Nkonko ya babadi

Bua tshinyi Tshibumba tshia Nsentedi tshia 1 Tshisanga 2002, tshivua tshiamba mu dibeji dia 11, tshikoso tshia 7 ne: batismo wa bena Yuda bakalua bena Kristo dia Pentekoste wa 33 bikondo bietu ebi uvua uleja se: “bavua badilambule kudi Nzambi ku butuangaji bua Kristo,” pabi kumpala tuvua tuamba ne: batismo wa bena Yuda kumbukila mu tshidimu tshia 33 bikondo bietu ebi too ne mu tshia 36 kavua utangila didilambula kudi Nzambi mushindu au?

Mu tshidimu tshia 1513 kumpala kua bikondo bietu ebi, Yehowa Nzambi wakapesha bena Isalele mushindu wa kuluabu tshisamba tshinsantu kudiye bu buobu mua ‘kutumikila dîyi diende ne kunemeka tshipungidi tshiende.’ Bakandamuna ne: ‘Netuenze mêyi onso akutuambila Yehowa.’​—Ekesode 19:3-8; 24:1-8.

Pa kuanyisha bua kunemeka tshipungidi tshia Mikenji ya Mose, bena Isalele bakadilambula kudi Nzambi. Bipungu bia bena Yuda biakalonda biakaledibua mu tshisamba tshivua tshidilambule kudi Nzambi etshi. Kadi batismo wa bena Yuda bakalua bayidi ba Yezu Kristo dia Pentekoste wa tshidimu tshia 33 kavua utangila anu didifila kudi Nzambi bu bena tshisamba tshivua tshidilambule kudiye to. Uvua tshimfuanyi tshia didilambula diabu kudi Yehowa Nzambi bua kuikala nende mu malanda mapiamapia ku butuangaji bua Yezu Kristo. Mmu mushindu kayi?

Kunyima kua nyuma muimpe mumane kutulukila bayidi batue ku 120 bavua badisangishe mu nzubu kampanda wa kuulu mu Yelushalema dia Pentekoste wa tshidimu tshia 33, mupostolo Petelo wakimana kuulu ne kutuadija kuyisha tshisumbu tshia bena Yuda ne bantu ba bisamba bia bende bavua balonda buena-Yuda, bavua badisangishe bua kumona malu avua menzeke. Kunyima kua Petelo mumane kuyisha kuyishilamu, wakambila bena Yuda (bakumvua tuondo tuabu tua muoyo tusama) ne: ‘Kudimunayi mitshima yenu, nubatijibue buonso buenu mu dîna dia Yezu Kristo bualu bua kunujimijilabu mibi yenu.’ Pakatungunuka Petelo ne mêyi ende, ‘bakitabuja dîyi diende bakabatijibua. Dituku adi bantu bu binunu bisatu bakadikungija nabu.’​—Bienzedi 2:1-41.

Bena Yuda abu bakatambula kunyima kua Petelo mumane kubapesha mubelu au kabavua badianjile kuikala bena mu tshisamba tshidilambule kudi Nzambi anyi? Kabavua bamane kudilambula kudi Nzambi anyi? Tòo. Mupostolo Paulo wakafunda ne: ‘[Nzambi] wakumbusha [Mikenji] pa kuyipopela pa mutshi wa tshibawu.’ (Kolosai 2:14, MMM) Ku diambuluisha dia lufu lua Kristo lua mu tshidimu tshia 33, Yehowa Nzambi wakashipa tshipungidi tshia Mikenji. Ke tshiakenzaye bua kufikisha bena Isalele ku didilambula Kudiye. Mpindieu Yehowa pende wakabenga tshisamba tshivua  tshibenge Muanende. ‘Nunku bavua bena Isalele mu buntu buabu’ kabavua kabidi mua kudiamba muvuabu tshisamba tshidilambule kudi Nzambi to.​—1 Kolinto 10:18; Matayo 21:43.

Tshipungidi tshia Mikenji tshiakafua mu tshidimu tshia 33, kadi tshikondo tshivua Nzambi muteke bua kuleja bena Yuda luse lua pa bualu ne kubatabalela katshiakashikila mu tshidimu atshi to. * Tshikondo atshi tshivua ne bua kutungunuka too ne mu tshidimu tshia 36, pavua Petelo muyishe Kônelio, muntu uvua utshina Nzambi (wa mu ditunga dia Italie) ne bena mu nzubu muende ne banga bantu ba bisamba bia bende. (Bienzedi 10:1-48) Kadi bua tshinyi Nzambi wakaleja too ne bantu ba bisamba bia bende luse?

Danyele 9:27 udi wamba ne: ‘[Masiya] neajadike tshipungidi tshikole ne bantu ba bungi bua kushalatshi lumingu lumue.’ Tshipungidi tshiakajadikabu bidimu muanda mutekete anyi “lumingu lumue,” kumbukila ku ditambula dia Yezu ne ntuadijilu wa mudimu wa patoke wa Masiya mu tshidimu tshia 29 tshivua tshipungidi tshia Abalahama. Bua muntu kuikala mu tshipungidi atshi, uvua anu ne bua kuikala wa mu ndelanganyi ya Abalahama. Tshipungidi atshi tshivua tshitangila amu bantu ba luseke lumue katshivua tshipesha muntu mushindu wa kudilambula kudi Yehowa to. Ke bualu kayi nansha muvuabu batabelele bena Kristo bavua batambule kunyima kua muyuki wa Petelo mu mushindu wa pa buawu bualu bavua bena Yuda, bena Kristo aba kabavua mua kuamba ne: bavua badilambule kudi Nzambi to, bualu tshipungidi tshia Mikenji tshikavua tshimane kufua. Bavua ne bua kudilambula buobu nkayabu kudi Nzambi.

Didilambula dia bena Yuda anyi bantu ba bisamba bia bende bavua balonda buena-Yuda bua kutambula mu dia Pentekoste wa tshidimu tshia 33 divua ne mushinga bua bualu bukuabu kabidi. Mupostolo Petelo wakabela bantu bavua bamuteleje bua kukudimunabu mitshima yabu ne kutambula mu dîna dia Yezu. Kuenza nanku kuakalomba bua se: balekele ngikadilu wa bena panu ne banyishe Yezu bu Mukalenge ne Masiya, bu Muakuidi Mutambe Bunene, ne eu udi musombe ku dia balume dia Nzambi mu diulu. Bavua ne bua kubila dîna dia Yehowa Nzambi bua kupeta lupandu ku butuangaji bua Kristo Yezu. Bua kupeta lupandu elu, bavua ne bua kuitabuja Kristo ne kumuanyisha bu Muludiki wabu. Mpindieu malu onso akashintuluka bua kuikala mu malanda ne Nzambi ne kufuidibua luse bua mpekatu. Muena Kristo muena Yuda yonso uvua ne bua kuitaba ndongoluelu mupiamupia au. Mmushindu kayi? Mpa kudilambula kudi Nzambi ne kumanyisha patoke ne: bavua badilambule kudiye pa kubatijibua mu dîna dia Yezu Kristo. Batismo uvua tshimfuanyi tshia didilambula diabu kudi Nzambi, ubafikisha ku dikala mu malanda mapiamapia nende ku butuangaji bua Yezu Kristo.​—Bienzedi 2:21, 33-36; 3:19-23.

[Mêyi adi kuinshi]