Kupa kudi kusankisha Nzambi

YEZU ne bayidi bende bavua badia biakudia bilenga mu Betania pamue ne bamue balunda babu, munkatshi muabu muvua Mariya, ne Mâta ne Lazalo uvuabu bafumine ku dibisha ku lufu. Pakangata Mariya mafuta a mushinga mukole mikale kilo isatu ne kuafita Yezu ku makasa, Yudasa Isakaliote wakumvua tshiji ne kuambaye tshivua bualu ebu bumutondele. Kuambaye ne: ‘Munyi kabakapana manananshi aa ku ndenalio nkama isatu, bua kupa bantu bapele?’ Bakuabu bakadiabakena pabu mushindu wa muomumue.​—Yone 12:1-6; Mâko 14:3-5.

Kadi, Yezu wakandamuna ne: ‘Numulekele. Nudi ne bapele matuku onso munkatshi muenu; nudi bamanye mua kubenzela bimpe dituku dionso dinuasua; kadi kanuena nanyi meme matuku onso.’ (Mâko 14:6-9) Balombodi ba bitendelelu bena Yuda bavua balongesha ne: kufila tshia-pa-luse kakuvua anu bualu buakane patupu kadi kuvua kabidi mua kuambuluisha bua kujimija nansha mibi. Ku luseke lukuabu, Yezu wakaleja patoke ne: kupa kudi kusankisha Nzambi kakuena anu dipesha bapele ka-pa-luse.

Dikonkonona mu tshikoso mushindu uvuabu bafila mapa mu tshisumbu tshia bena Kristo ba kumpala nedituleje imue mishindu mimpe itudi mua kuleja luse ne nenku kusankisha Nzambi ne mapa atudi tufila. Nedituleje kabidi mushindu wa kufila wa pa buawu udi utamba kuambuluisha bantu.

Nufile ‘bintu bia luse’

Misangu ya bungi Yezu uvua ukankamija bayidi bende bua kufila ‘bintu bia luse.’ (Luka 12:33) Kadi Yezu wakabadimuija bua kuepuka difila bintu ne lutambishi ne tshipatshila tshia kutumbisha muntu uvua ufila pamutu pa kutumbisha Nzambi. Wakamba ne: ‘Pawapa bantu bintu bia luse, kuedi mpungi kumpala kuebe bu mutu bena lubombo benza mu nsunagoga ne mu misesu, bua bantu babatumbishe.’ (Matayo 6:1-4) Bua kulonda mubelu eu, bena Kristo ba kumpala bavua bepuka malu avua balombodi ba bitendelelu ba mu tshikondo tshiabu benza bua kuditambisha ne bakapangadija bua kudiambuluishila bakengi ne kubapesha bintu buobu nkayabu.

Tshilejilu, badi batuambila mu Luka 8:1-3 ne: Mariya muena Magadala, Yoana, Susana ne bakuabu ba bungi bavua bakuatshisha Yezu ne bapostolo bende ne ‘bintu biabu.’ Nansha muvua bantu aba kabayi bapele, bavua balekele midimu yabu bua kuenza anu mudimu wa buambi. (Matayo 4:18-22; Luka 5:27, 28) Pavua bakaji aba bambuluisha Yezu ne bapostolo bende bua kukumbaja mudimu uvua Nzambi mubapeshe, bavua bulelela batumbisha Nzambi. Pashishe Nzambi kulua kuleja  dianyisha diende padiye mufundishe mu Bible muyuki wa bintu bia luse bivuabu bapeshangana bua bantu bonso bavua ne bua kulua panyima baubale.​—Nsumuinu 19:17; Ebelu 6:10.

Dôka uvua mukaji mukuabu muimpe uvua “wenza malu mempe a bungi, upesha bapele bintu bia luse.” Uvua utelela bakaji bakamba bilamba mu tshimenga tshia Yopa tshivuaye musombele tshivua ku mpenga kua mâyi. Katuena bamanye ni uvua udisumbila nkayende bintu bia kutela nabi ni uvua anu ubatelela tshianana kakuyi mfranga. Nansha nanku, mudimu wende mulenga wakamuvuija mamu wa mushinga mukole ku mêsu kua aba bavuaye wambuluisha, ne kabidi ku mêsu kua Nzambi wakamufuta bua muoyo wende muimpe.​—Bienzedi 9:36-41, Mukanda wa Mvidi Mukulu, (Katolike, MMM).

Meji mimpe adi ne mushinga

Ntshinyi tshivua tshisake bantu aba bua kufila? Katshivua anu muoyo wa luse musaka kudi lungenyi lua diambuluishangana patupu to. Bavua bamona ne:bavua ne dibanza dia kuenza tshivuabu bakokeshe bua kuenza dituku dionso bua kuambuluisha aba bavua mu dikenga, bikale ne masama anyi ne ntatu mikuabu. (Nsumuinu 3:27, 28; Yakobo 2:15, 16) Eu ke mushidu wa kufila udi usankisha Nzambi. Tshintu tshia kumpala tshidi tshisaka ku difila dia bintu mushindu’eu ndinanga dikole dia Nzambi ne dijinga dia kuidikija bumuntu buende bua luse ne kalolo.​—Matayo 5:44, 45; Yakobo 1:17.

Mupostolo Yone wakaleja mudi mushindu wa difila eu muikale ne mushinga pakebejaye ne: ‘Bikala muntu ne bintu bia pa buloba, ne yeye udi utangila muanabu ubikengela, ne yeye udi ukanda luse luende kudiye, mmunyi mudi mua kuikala dinanga dia Nzambi munda muende?’ (1 Yone 3:17) Diandamuna nditoke. Dinanga dia Nzambi didi disaka bantu bua kuikalabu bambuluishangana. Nzambi udi wanyisha ne ufuta aba badi ne muoyo wa kalolo bu yeye. (Nsumuinu 22:9; 2 Kolinto 9:6-11) Tutuku tumona kalolo ka mushindu’eu lelu anyi? Tangila bualu buvua buenzeke matuku mashale aa mu tshisumbu kampanda tshia Bantemu ba Yehowa.

Nzubu wa mamu mukuabu mukulakaje muena Kristo uvua munyanguke bikole. Uvua usomba nkayende ne kavua ne dîku divua mua kumuambuluisha nansha. Munkatshi mua bidimu bia bungi, bisangilu bia bena Kristo bivua bienzekela mu nzubu muende, ne misangu ya bungi uvua udia biakudia ne muntu yonso uvua witaba bua kudiabu nende. (Bienzedi 16:14, 15, 40) Pakamona bena mu tshisumbu lutatu luvuaye nalu, bakasuika dîyi bua kumuambuluisha. Bamue bakafila mfranga, bakuabu bakenza mudimu wa dilongolola nzubu eu. Panyima pa matuku makese a ku ndekelu kua mbingu, bena budisuile bakenza musaka mukuabu, kuenzabu tshiowedi tshikuabu tshia mu nzubu, kushinguilabu nzubu yonso ya muinshi, kuyifitabu mukubu ne kumuenzelabu tubadi tukuabu tua malongo mu tshikuku. Malu aa kaavua anu makumbaje patupu dijinga dia mamu eu nkayende, kadi akambuluisha kabidi bena mu tshisumbu bua kushemeja malanda ne akakemesha bena mutumba bualu avua tshilejilu tshia difila dia bena Kristo balelela.

 Kudi mishindu ya bungi be itudi mua kuambuluisha bakuabu. Tudiku mua kulongolola dîba dia kusomba ne muana wa nshiya anyi? Tudiku mua kuya kusumbila mukaji mukamba utudi bamanye bintu mu tshisalu peshi kumutelelaku tshilamba anyi? Tudiku mua kulambila mukengi biakudia anyi kumupesha makuta a kusumba tshintu kampanda anyi? Tudi mua kuambuluishangana nansha tuetu katuyi babanji. Mupostolo Paulo wakafunda ne: “Paudi ne dijinga dikole dia kupa, [Nzambi] udi wanyisha tshiudi natshio; kena ukeba tshiudi kuyi natshio nansha.” (2 Kolinto 8:12, MMM) Kadi didifidila bintu buludiludi nunku ke mushindu umuepele wa difila udi Nzambi ubenesha anyi? Tòo.

Netuambe bishi bua disangisha bintu bivule bia kuambuluishangana nabi?

Imue misangu didifidila nkayebe bintu bua kuambuluisha muntu kaditu dikumbane to. Bulelela, Yezu ne bapostolo bende bavua ne tshibutshilu bua bapele, ne bavua bitaba mfranga ivuabu babapesha kudi bena muoyo wa luse bavuabu bapeta mu mudimu wabu. (Yone 12:6; 13:29) Bia muomumue, bisumbu bivule bia mu bidimu lukama bia kumpala bivua bisangisha bintu bua kuambuluisha bana babu pavua makenga abakuata.​—Bienzedi 2:44, 45; 6:1-3; 1 Timote 5:9, 10.

Umue musangu bakasangisha bintu bia kuambuluishangana nabi nunku mu tshidimu tshia 55 mu bikondo bietu ebi. Tshisumbu tshia mu Yuda tshiakapona mu bupele, pamu’apa bua tshiyole tshikole tshia nzala tshivua tshifuma ku dienzeka. (Bienzedi 11:27-30) Mupostolo Paulo uvua misangu yonso uditatshisha bua bapele, ne wakalomba diambuluisha dia bisumbu too ne tshia mutantshi mule mu Makedonia. Wakalongolola nkayende disangisha dia bintu ne wakabipesha bantu bavua bakumbane bua kuyabu kubifila. (1 Kolinto 16:1-4; Galatia 2:10) Nansha yeye, nansha bakuabu bavua benza mudimu au kabakapeta difutu bua mudimu wabu to.​—2 Kolinto 8:20, 21.

Lelu Bantemu ba Yehowa batu bambuluishangana ne lukasa padi makenga akuata bantu. Tshilejilu, mu muvu wa été wa mu tshidimu tshia 2001, mvula mikole yakasapalaja mâyi a bungi mu tshimenga tshia Houston mu provense wa Texas (États-Unis). Nzubu 723 ya Bantemu ba Yehowa yakanyanguka, ya bungi yakanyanguka bikole. Bakenza komite wa diambuluishangana muikale ne bakulu bena Kristo bapiluke bua kukonkonona majinga a muntu ne muntu ne bua kupesha Bantemu ba mu tshimenga atshi mfranga ya kudiambuluisha nayi ne bua kulongolola nzubu yabu. Bena budisuile ba mu bisumbu bia pabuipi apu ke bakenza mudimu wonso. Ntemu mukuabu wakanyisha bikole diambuluisha edi dia kudi bana babu, nunku pakamupabu mfranga ya kulongoluesha nayi nzubu wende kudi kumpanyi wa malu a tshieya (assurance), wakafila mfranga eyi diakamue kudi komite wa diambuluishangana bua kukuatshisha nayi bakuabu.

Kadi pa bidi bitangila bisumbu bia bambuluishanganyi, tudi ne bua kuikala ne budimu patudi tuteleja mbila idibu bela. Bimue bisumbu bia bambuluishanganyi bidi bitula mfranga ya bungi  bua kufuta bantu badi benzamu mudimu anyi bua kuenzeja nayi mudimu wa disonsola bantu bua kufilabu makuta, bashiya anu tshitupa tshikese tshia mfranga ivuabu basangishe bua tshipatshila tshivuabu baisangishile. Nsumuinu 14:15 udi wamba ne: ‘Mutshimbakanyi udi witabuja dîyi dionso, kadi muena budimu udi utangila kudiye uya.’ Nenku nebikale bia meji bua kukonkonona malu ne ntema yonso.

Difila didi ditamba kuambuluisha bantu

Kudi mushindu mukuabu wa difila udi ne mushinga mupite difila bintu bia kuambuluishangana nabi. Meji a Yezu avua matume ku difila edi pavua mfumu mubanji utshivua nsonga mumuebeje tshivuaye ne bua kuenza bua kupeta muoyo wa tshiendelele. Yezu wakamuambila ne: ‘Ya biebe, upane biudi nabi, ubipe bantu bapele, newikale ne bintu mu tshibutshilu tshia mu diulu, ulue kundonda.’ (Matayo 19:16-22) Tangila ne: Yezu kavua anu muambe se: ‘Pesha bapele ne neupete muoyo.’ Kadi wakamba ne: “Ulue kundonda.” Mu mêyi makuabu, nansha mudi dipeshangana bintu bia luse dikale bualu buimpe budi buambuluisha, dikala bayidi bena Kristo didi dilomba malu a bungi.

Bualu bunene bua kumpala buvua Yezu uditatshishila buvua bua kuambuluisha bakuabu mu nyuma. Katupa kakese kumpala kua lufu luende, Yezu wakambila Pilato ne: “Meme, tshidibo bandelele, kabidi tshindi muvuile panu apa, mbua kujadikila bantu bulelela.” (Yone 18:37, MMM) Nansha muvua Yezu muikale wa kumpala ku diambuluisha bapele, diondopa babedi ne didisha bavua ne nzala, wakanji kulongesha bayidi bende bua kuyisha. (Matayo 10:7, 8) Bushuwa, munkatshi mua mêyi a ndekelu avuaye mubambile muvua dîyi edi: ‘Yayi bienu, nuvuije ba bisamba bionso bayidi.’​—Matayo 28:19, 20.

Bulelela, kuyisha kakuena mua kujikija ntatu yonso idi pa buloba nansha. Tshidibi, kuyisha bantu ba mishindu yonso lumu luimpe lua Bukalenge bua Nzambi kudi kutumbisha Nzambi bualu kuyisha kudi kukumbaja disua dia Nzambi ne kudi kunzuluila aba bonso badi bitaba mukenji wa Nzambi njila wa kupeta mabenesha a kashidi. (Yone 17:3; 1 Timote 2:3, 4) Bua tshinyi kubenga kuteleja Bantemu ba Yehowa padibu balua kukuyisha? Badi bakutuadila dipa dia mu nyuma. Ne mbamanye ne: eu ke mushindu muimpe udibu mua kukupesha.

[Bimfuanyi mu dibeji 6]

Kudi mishindu ya bungi ya kuleja ne: tudi tuambuluisha bantu

[Tshimfuanyi mu dibeji 7]

Mudimu wetu wa kuyisha bantu lumu luimpe udi usankisha Nzambi ne ubunzuluila njila wa mabenesha a kashidi