Nkonko ya babadi

Mbibi bua kushipa nyama mumuna padiye usama bikole peshi mumane kukulakaja anyi?

Bantu batu bamona bibasankisha bikole bua kuikala ne nyama mishilangane ku nzubu. Imue nyama mimuna itu ilua bu balunda ba bantu. Tshilejilu, mbua mmimanyike mutuyi itumikila ne inanga benayi. Nunku tudi tumvua bua tshinyi bantu batu banange nyama idibu bamune, nangananga nyama udibu nende kukadi bidimu bia bungi.

Kadi matuku a muoyo a nyama ya bungi kaatu male nansha. Mbua idi mua kushala ne muoyo bidimu 10 too ne ku 15 anyi bipite apu, anu bu tumpusu bilondeshile mushindu watu. Padi nyama eyi ikulakaja idi mua kupeta masama anyi bulema kampanda budi mua kubungamija benabi padibu bavuluka tshikondo tshivua nyama ayi miana ne mikale ne makanda. Nebikale bibi bua kushipa nyama eyi bua kukosoloja makenga ayi anyi?

Muena Kristo udi ne bua kulama nyama mudi Nzambi musue. Diyikengesha kadiena diumvuangana ne disua dia Nzambi to, bualu Dîyi diende didi diamba ne: ‘Muntu muakane udi welela muoyo wa tshimuna tshiende meji, kadi mitshima ya bantu babi idi ne lukisu.’ (Nsumuinu 12:10) Kadi, bualu ebu kabuena bumvuija ne: Nzambi udi wangata nyama mushindu udiye wangata bantu to. Pakafuka Nzambi bantu, wakaleja ne: kuvua dishilangana dinene pankatshi pabu ne nyama. Tshilejilu, wakapesha bantu ditekemena dia muoyo wa kashidi, kadi katu muanji kudipesha nyama nansha. (Lomo 6:23; 2 Petelo 2:12) Bu mudiye Mufuki, udi ne bukenji bua kuleja mushindu muimpe udi bantu ne bua kusomba ne nyama.

Genese 1:28 udi uleja mudi bantu mua kusomba ne nyama. Nzambi wakambila bantu ba kumpala ne: ‘Nuikale ne bukokeshi ku mutu kua minyinyi ya mu mâyi, ne nyunyu ya mulu, ne tshintu tshionso tshidi ne muoyo tshidi tshiendakana pa buloba.’ Bia muomumue, Musambu wa 8:6-8 udi wamba ne: ‘[Wewe Nzambi] wakuteka bintu bionso muinshi mua makasa [a muntu]: mikoko yonso ne ngombe, ne nyama ya mu tshisuku; ne nyunyu ya mulu ne minyinyi ya mu mâyi manene.’

Nzambi wakaleja patoke ne: bantu bavua mua kuenza mudimu bimpe ne nyama ne kabidi bavua mua kuyishipa. Tshilejilu, bavua mua kuvuala biseba biayi bu bilamba. Pa kumusha bisekiseki bivuaye mubapeshe kumpala bu biakudia, Nzambi wakapesha kabidi bantu bukenji bua kudia munyinyi wa nyama kunyima kua Mvula wa kabutu wa mu matuku wa Noa.​—Genese 3:21; 4:4; 9:3.

Bualu ebu kabuena bupesha bantu njila wa kushipa nyama tshianana tshianana to. Mu Genese 10:9, Bible udi ubikila Nimeloda ne: ‘Tshilembi tshikole.’ Kadi mvese umue-umue au udi uleja ne: bualu ebu buakamuvuija “[muluishi] ku mesu kua Yehowa.”

Nenku, nansha mudi muntu ukokesha nyama, kêna ne bua kuenza malu mabi ne bukokeshi abu to, kadi udi ne bua kuenza nabu malu adi umvuangana ne mikenji ya mu Dîyi dia Nzambi. Ebi kabiena biumvuija ne: udi ne bua kulekela nyama ukenga tshianana bua bukulakaje, bulema bukole, anyi ne disama dia lufu to. Mu nsombelu wa nunku, muena Kristo ke udi ne bujitu bua kusungula tshidiye mua kuenza. Bikalaye mumone ne: ki bimpe bua kulekela nyama ukenga kakuyi ditekemena dia se: neumvue bimpe, dîba adi udi mua kuangata dipangadika dia kumushipesha.