Nuimane talalaa, numone lupandu lua Yehowa

‘Nudijadike, nuimane talalaa, numone lupandu lua Yehowa ludi nenu.’​—2 KULONDOLOLA 20:17.

1, 2. Bua tshinyi mvita idi pabuipi ya “Gogo wa buloba bua Magoga” idi minene kupita malu a tshikisu adi matangalake pa buloba bujima?

 TERORISME mmuaku udi bamue bantu bumvuija ne: mvita miela bantu ba buloba bujima, miela nshidimukilu mene. Bushuwa, eyi ki nnjiwu ya bilele to. Kadi kudi mvita mikuabu minene idi bantu bena panu bangata ne mushinga mukese peshi kabayi mene bangata ne mushinga to. Mmvita kayi ayi?

² Mmvita miela kudi “Gogo wa buloba bua Magoga,” udi Bible wakula bualu buende mu Yehezekele nshapita wa 38. Kuamba ne: mvita eyi mminene kupita ya malu a tshikisu adi matangalake pa buloba bujima nkuela kalele anyi? Tòo, bualu mvita ya Gogo mmipite diluisha mbulamatadi ya bantu. Badi bayela mbulamatadi wa mu diulu wa Nzambi! Kadi, bishilangane ne bantu badi batata bikole menemene bua kutshimuna mvita ya panu,  Mufuki mmumanye bimpe menemene mua kupita ne mvita mibiamibi ya Gogo.

Diluisha mbulamatadi wa Nzambi

3. Ntshinyi tshidibu balombe bakalenge ba pa buloba bua kuenza katshia mu 1914, ne ntshinyi tshidibu benze?

³ Mvita idi pankatshi pa Mukalenge udi ukokesha udi Nzambi muteke ne bulongolodi bubi bua Satana mmitungunuke katshia bajadika Bukalenge bua Nzambi mu diulu mu 1914. Tshidimu atshi, bakamanyisha bakalenge bua kukokela Mukokeshi udi Nzambi musungule. Kadi mbabenge kumukokela anu muvuabu bamanyishe ne: ‘Bakalenge ba pa buloba badi badijadika; ne bakokeshi badi bela tshifufu, bua kutombokela Yehowa ne wende muedibue manyi, bamba ne: Tutshibule nkanu yabu bitupa, tumushe mionji yabu pambidi petu.’ (Musambu 2:1-3) Dibenga kukokela Bukalenge ebu nedikole menemene pikala Gogo wa buloba bua Magoga ne bua kuela mvita.

4, 5. Mmunyi mudi bantu mua kuluisha bukalenge bua Nzambi bua mu diulu pabu kabuyi bumueneka?

⁴ Tudi mua kudikonka bua kumanya mushindu udi bantu mua kuluangana ne bukalenge bua mu diulu budi kabuyi bumueneka. Bible udi wamba ne: bukalenge ebu mbuenza ne “bantu binunu lukama makumi anayi ne binayi,” pamue ne “Muana wa Mukoko,” Yezu Kristo. (Buakabuluibua 14:1, 3, MMM; Yone 1:29) Bu mudi bukalenge bupiabupia ebu buikale mu diulu, badi babubikila ne: ‘diulu dipiadipia’ ne babukokedi badi pa buloba mbakumbanyine bua kubikidibua ne: ‘buloba bupiabupia.’ (Yeshaya 65:17; 2 Petelo 3:13) Ba bungi ba munkatshi mua aba badi bakokesha ne Kristo bakadi bajikije lubilu luabu lua pa buloba ne lulamatu luonso. Nunku, mbaleje ne: mbakumbanyine bua kuenzela Nzambi mudimu wabu mupiamupia mu diulu.

 ⁵ Kadi bashadile bakese ba ku bantu 144 000 batshidi ne muoyo pa buloba. Mu bantu 15 000 000 bavua babuele mu disekelela dia Didia dia Mukalenge mu tshidimu tshia 2002, anu bantu 8 760 patupu ke bavua baleje ditekemena dia mudibu babasungule bua kuenza mudimu wa mu diulu eu. Muntu yonso udi upeta dikamakama dia kuluisha bashadile aba bikala ne bua kukokesha mu Bukalenge udi uluisha Bukalenge bua Nzambi.​—Buakabuluibua 12:17.

Mukalenge udi utshimuna kabidi

6. Mmunyi mudi Yehowa ne Kristo bamona buluishi budibu bela bantu ba Nzambi?

⁶ Bakavua bamanyishe tshivua Yehowa ne bua kuenza pavuabu baluisha Bukalenge buende buvuaye mujadike ne: ‘Yeye udi ushikama mu diulu udi useka, [Yehowa] udi ubapetula. Pashishe, yeye neakule nabu mu tshiji tshiende, neabatshingishe mu tshiji tshiende tshikole, wamba ne: Meme panyi ngakujadika Mukalenge wanyi pamutu pa Siona, mukuna wanyi wa tshijila.’ (Musambu 2:4-6) Tshikondo tshikadi tshifike mpindieu bua Kristo “kutshimuna kabidi” ku diambuluisha dia Yehowa. (Buakabuluibua 6:2, MMM) Mmunyi mudi Yehowa umona buluishi budibu bela bantu bende mu tshikondo tshia ditshimuna dia ndekelu? Yehowa udi umona bu badi bamuluisha yeye ne Mukalenge wende udi ukokesha. Udi wamba ne: ‘Udi ubisha tshianza tshiende kunudi udi utua mu kamonyi ka dîsu dia Yehowa.’ (Zekâya 2:8) Ne Yezu wakaleja bimpe ne: udi ubala bidi bantu benzela anyi kabayi benzela bana babu bela manyi bu bimuenzela anyi kabiyi bimuenzela yeye.​—Matayo 25:40, 45.

7. Mbua malu kayi budi bantu ba mu “musumba munene” badibu bambe mu Buakabuluibua 7:9 bamona tshiji tshia Gogo?

⁷ Bulelela, aba badi batua bashadile bela manyi nyama ku mikolo ne muoyo mujima nebamone kabidi tshiji tshia Gogo. Bantu aba bikala ne bua kuenza ‘buloba bupiabupia’ badi “musumba munene” wa “bisamba bionso, bisa bionso, matunga ne miakulu yonso.” (Buakabuluibua 7:9, MMM) Badi bamba ne: “bavua bimane kumpala kua nkuasa wa bukalenge ne kua Muana wa Mukoko, bavuale nkanzu mitoke.” Nunku badi ne ngikadilu muimpe kumpala kua Nzambi ne Kristo Yezu. Badi ne “malala mu bianza,” batumbisha Yehowa bu Mukalenge muakane mutambe bunene, udi uleja bukokeshi buende ku butuangaji bua bukokeshi budiye mupeshe Yezu Kristo, ‘Muana wa Mukoko.’​—Yone 1:29, 36.

8. Mvita ya Gogo neyisake Kristo bua kuenza tshinyi, ne nebifikishe ku tshinyi?

⁸ Mvita ya Gogo neyisake Mukalenge udi Nzambi muteke bua kuditua mu mvita ya Armagedone. (Buakabuluibua 16:14, 16) Aba badi babenge kuitaba ne: Yehowa udi mfumu mutambe bunene nebabutudibue. Kadi aba badibu bakengeshe bua dilamata diabu dia Bukalenge bua Nzambi nebapete disulakana dia kashidi. Paulo wakafunda bua bualu ebu ne: ‘Malu aa adi tshimanyinu tshia dilumbulula diakane dia Nzambi; bua nuenu nubadibue bakanangane ne bukalenge bua Nzambi bunudi nukengela  bualu kabidi; bikalabu buakane bua Nzambi kupingaja makenga kudi badi banukengesha; ne bua kunupaye nuenu badi bakengeshibua dikisha popamue netu, ku dibuluibua dia Mukalenge Yezu paluaye mu diulu ne banjelu ba bukole buende mu kapia kadi kakenka. Neadisombuele kudi bantu badi kabayi bamanye Nzambi ne kudi badi kabayi batumikila lumu luimpe lua Mukalenge wetu Yezu.’​—2 Tesalonike 1:5-8.

9, 10. (a) Mmunyi muvua Yehowa muambuluishe Yuda bua kutshimuna muluishi munene? (b) Ntshinyi tshidi bena Kristo ne bua kutungunuka ne bua kuenza lelu?

⁹ Munkatshi mua dikenga dinene didi dienda disemena dikala mua kujika ne Armagedone, Kristo nealuishe malu mabi onso. Kadi bualu ebu kabuakulomba bayidi bende bua kuluanganabu to, anu muvua bena bisa bibidi bia bukalenge bua Yuda kabayi baluangane kukadi bidimu bivule mpindieu. Mvita ayi ivua ya Yehowa, ne wakabambuluisha bua kuitshimuna. Bible udi wamba ne: ‘Yehowa wakateka baalaminyi kudi bena Amona ne kudi bena Moaba ne ba ku mikuna ya Seî, bakaluila kuluisha bena Yuda; bakadi bashipibue. Bualu bua bena Amona ne bena Moaba bakimana kumpala kua ba ku mikuna ya Seî, bua kubabutula ne kubashipa; pakajikijabu kushipa ba ku mikuna ya Seî, bakashipangana nkayabu. Pakapita bena Yuda ku tshibumba tshia mu tshipela, bakatangila kuakadi tshisumbu tshia bantu, monayi, anu bitalu bilale panshi pa buloba nansha muntu wakapanduka.’​—2 Kulondolola 20:22-24.

¹⁰ Biakenzeka anu muvua Yehowa mumanyishe ne: ‘Kanuena ne bua kuluangana mvita eyi.’ (2 Kulondolola 20:17) Etshi ke tshikala bena Kristo ne bua kuenza ‘paya Yezu bua kutshimuna kabidi.’ Bua mpindieu badi batungunuka ne kuluisha malu mabi ne bia mvita bia mu nyuma, ki mbia ku mubidi to. Nunku, badi ‘bapita malu mabi ku malu mimpe.’​—Lomo 6:13; 12:17-21; 13:12; 2 Kolinto 10:3-5.

Nnganyi walombola mvita ya Gogo?

11. (a) Mbantu kayi bikala Gogo ne bua kukuata nabu mudimu bua kuela mvita yende? (b) Kushala batabale mu nyuma kudi kumvuija tshinyi?

¹¹ Gogo wa Magoga udi Satana Diabolo mupuekesha milongo katshia mu tshidimu tshia 1914. Bu mudiye tshifukibua tshia mu nyuma, kêna mua kuela mvita yeye nkayende to, neenze mudimu ne bamue bantu bua kukumbaja malu ende. Bantu aba nebikale banganyi? Bible kêna ufila mumvuija a bungi bua bantu aba to, kadi udi utupesha bimue bimanyinu bidi mua kutuambuluisha bua kumanya bantu aba. Bu mudi mianda idi yenzeka pa buloba ikumbaja milayi ya mu Bible, netupete ngumvuilu wayi muimpe menemene ku kakese ku kakese. Bantu ba Yehowa badi bepuka diamba malu adi kaayi majadika bimpe, kadi badi bashala  batabale mu nyuma, bamanye bimpe malu a tshididi ne a bitendelelu adi akumbaja milayi ya mu Bible.

12, 13. Mmunyi muvua muprofete Danyele mumanyishe mvita ya ndekelu ivua ne bua kukuata bantu ba Nzambi?

¹² Muprofete Danyele udi ufila butoke pa bidi bitangila mvita ya ndekelu ya Nzambi, wamba ne: ‘[Mukalenge wa ku Nord] neapatuke muulangane ne tshiji tshikole bua kubutulaye bantu ba bungi. Pashishe, neashimike ntenta yende ya bukalenge pankatshi pa mâyi manene ne mukuna wa tshijila ne wa butumbi.’​—Danyele 11:44, 45.

¹³ Mu tshikondo tshivuabu bafunda Bible, ‘mâyi manene’ avua Mbuu Munene (Grande Mer) anyi Mbuu wa Méditerranée, ne “mukuna wa tshijila” uvua Siona, uvua Yehowa muambe bua bualu buawu ne: ‘Meme panyi ngakujadika Mukalenge wanyi pamutu pa Siona, mukuna wanyi wa tshijila.’ (Musambu 2:6; Yoshua 1:4) Nunku, mu ngumvuilu wa mu nyuma, buloba budi ‘pankatshi pa mâyi manene ne mukuna wa tshijila’ budi buleja nsombelu wa bubanji bua mu nyuma wa bena Kristo bela manyi. Kabena kabidi mâyi adi umvuija bantu badi kule ne Nzambi to, mbatekemene kabidi bua kukokesha ne Kristo Yezu mu Bukalenge bua mu diulu. Kabiyi mpata, basadidi bela manyi ba Nzambi, pamue ne balunda babu ba lulamatu ba mu musumba munene nebikale ne bua kukengeshibua kudi mukalenge wa ku Nord pikalaye ne bua kuela mvita yende mikole idi ikumbaja mulayi wa Danyele.​—Yeshaya 57:20; Ebelu 12:22; Buakabuluibua 14:1.

Ntshinyi tshikala basadidi ba Nzambi ne bua kuenza?

14. Mmalu asatu kayi ikala bantu ba Nzambi ne bua kuenza pabaluishabu?

¹⁴ Ntshinyi tshikala basadidi ba Nzambi ne bua kuenza diakamue pikalabu ne bua kubaluisha? Tshiakenza tshisamba tshia Nzambi mu matuku a Yehoshafata tshidi kabidi tshitupesha tshilejilu tshia kulonda. Tangila ne: bavua batumine benamu dîyi bua kuenza malu asatu: (1) kudijadika, (2) kuimana talala, ne (3) kumona lupandu lua Yehowa. Ntshinyi tshikala bantu ba Nzambi ne bua kuenza lelu’eu mu diumvuangana ne mêyi aa?​—2 Kulondolola 20:17.

15. Kudijadikila kua bantu ba Yehowa kudi kumvuija tshinyi?

¹⁵ Kudijadika: Kabayi batua eku batua kuaka, bantu ba Nzambi nebatungunuke ne kutua Bukalenge bua Nzambi nyama ku mikolo ne muoyo mujima. Nebatungunuke ne kuikala bena Kristo badi kabayi babuelakana mu malu a tshididi. Nebikale ‘bakole, batantamane’ mu mudimu wabu wa lulamatu udibu benzela Yehowa ne batungunuka ne kumutumbisha mu bantu bua luse luende lujalame. (1 Kolinto 15:58; Musambu 118:28, 29) Kakuena lutatu nansha lumue lua mpindieu anyi lutshilualua ludi mua kubajimijila dianyishibua diabu kudi Nzambi to.

16. Mmu mushindu kayi wikala basadidi ba Yehowa ne bua kuimana talalaa?

¹⁶ Nuimane talalaa: Basadidi ba Yehowa kabakukeba bobu nkayabu bua kudipandisha to, kadi nebeyemene amu Yehowa. Tshidibi udi ne bukole bua kusungila basadidi bende ku ntatu idi pa buloba apa, ne ke tshidiye mulaye bua kuenza. (Yeshaya 43:10, 11; 54:15; Muadi wa Yelemiya 3:26) Kueyemena Yehowa nekulombe bua kueyemena kabidi njila udiye mukuate nende mudimu bidimu bia bungi bua kukumbaja majinga ende. Mpindieu, bena Kristo nebikale ne bua kueyemena bena Kristo nabu badi Yehowa ne Mukalenge udi ukokesha mu bukalenge buende bateke  bua kulombola. Bena Kristo ba lulamatu aba nebalombole bantu ba Nzambi. Kubenga bulombodi buabu kudi mua kufikisha ku kabutu.​—Matayo 24:45-47; Ebelu 13:7, 17.

17. Bua tshinyi basadidi ba lulamatu ba Nzambi nebamone lupandu lua Yehowa?

¹⁷ Numone lupandu lua Yehowa: Bena Kristo badi bashala ne muoyo mutoke ne badi beyemena Yehowa bua dipikudibua diabu nebapete lupandu. Tòo ne mu dîba dia ndekelu, ne mu mushindu wabu wonso, nebamanyishe difika dia dituku dia dilumbuluisha dia Yehowa. Bifukibua bionso bidi ne bua kumanya ne: Yehowa udi Nzambi mulelela ne udi ne basadidi ba lulamatu pa buloba. Dikokangana dia mulunguluku pa bidi bitangila buakane bua bumfumu butambe bunene bua Yehowa kadiakuikalaku kabidi to.​—Yehezekele 33:33; 36:23.

18, 19. (a) Mmunyi mudi musambu wa butshimunyi udi mu Ekesode nshapita wa 15 uleja lungenyi ludibu nalu kudi aba bikala mua kupanda ku mvita ya Gogo? (b) Bidi biakanyine bua bantu ba Nzambi kuenzabu tshinyi lelu’eu?

¹⁸ Ne bukole bupiabupia, bantu ba Nzambi nebabuele mu bulongolodi bupiabupia, bikale ne dijinga dikole dia kuimba musambu wa ditshimuna, anu muakimba bena Isalele ba kale kunyima kua dipikudibua diabu ku Mbuu Mukunze. Bikale ne dianyisha kashidi kudi Yehowa bua bukubi buende, muntu ne muntu anyi mu tshibungi, nebambulule mêyi a kalekale aa: ‘Nengimbile Yehowa musambu, bualu bua yeye wakatamba bukole ne butumbi buende. Yehowa udi muena mvita. Yehowa ndîna diende. Yehowa, tshianza tshiebe tshia balume tshidi tshisunsula bantu badi netu lukuna. Mu bunene bua buakane buebe, wewe utu wapita bantu bukole badi badileja ku mêsu kuebe; wewe udi ubatumina tshiji tshiebe, tshidi tshibosha bu bilu. Mu luse luebe wewe wakalombola bantu bawakupikula; wewe wakabenzeja mu bukole buebe too ne ku muaba webe wa tshijila. Wewe neulue nabu, neubateke mu mukuna wa bupianyi buebe, muaba uwakusungula, Yehowa, ne: Nenshikamemu, muaba wa tshijila, uwakajadika ne bianza biebe. Yehowa neakokeshe bantu tshiendelele.’​—Ekesode 15:1-19.

¹⁹ Lelu udi ditekemena dia muoyo wa tshiendelele dienda dikola, ke tshikondo tshiakanyine bua basadidi ba Nzambi kulejabu ne: mbadilambule kudi Yehowa ne kukolesha didisuika diabu dia kumuenzela mudimu bu Mukalenge wabu wa Tshiendelele!​—1 Kulondolola 29:11-13.

Udi mua kumvuija anyi?

• Bua tshinyi Gogo neikale ne bua kuela bela manyi ne mikoko mikuabo mvita?

• Mmunyi muikala bantu ba Nzambi ne bua kudijadika?

• Kuimana talalaa kudi kumvuija tshinyi?

• Mmunyi muikala bantu ba Nzambi ne bua kumona lupandu lua Yehowa?

[Nkonko ya dilonga]

[Tshimfuanyi mu dibeji 18]

Yehowa wakatshimuina Yehoshafata ne bantu bende mvita, kabayi baluangane to

[Tshimfuanyi mu dibeji 20]

Bela manyi ne mikoko mikuabu badi batua pamue bumfumu butambe bunene bua Yehowa nyama ku mikolo

[Tshimfuanyi mu dibeji 22]

Anu bu bena Isalele ba kale, mu katupa kîpi emu bantu ba Nzambi nebimbe musambu wa ditshimuna