Badi benza mudimu ne tshisumbu tshia muakulu wa pa buawu mu Corée

TSHISUMBU kampanda tshia bantu bikale ne musangelu kadi katshiyi mutoyi tshiakadisangisha mu mpungilu wa distrike wa Bantemu ba Yehowa mu muvu wa été mu tshidimu tshia 1997. Eu uvua mpungilu wa kumpala wa pa buende uvua muenzeke mu ditunga dia Corée bua tumama. Bantu 1 174 bakabuela mu mpungilu au. Programe wa mpungilu mujima (miyuki, diela bantu nkonko ne drama) wakenzeka mu muakulu wa tumama wa bena Corée ne bavua bamuleje ku TV munene uvua mu Nzubu wa mpuilu. Etshi tshivua tshikondo tshitambe bulenga tshia bipeta bia bidimu bia bungi bia mudimu mukole uvua bena budisuile benze.

Tshikondo netshilue tshikala ‘matshi a badi ne mapapa ne bua kujikuka’ pa buloba bukudimuna mparadizu. (Yeshaya 35:5) Bua kupeta muoyo mu Mparadizu au, bantu bonso, nansha tumama, badi ne bua kuanji kubuela mu mparadizu wa mu nyuma mumue ne: nsombelu mulenga wa mu nyuma wa bantu ba Nzambi. Badi ne bua kudilambula, kulua Bantemu ba Yehowa batambule badiye ulongesha yeye nkayende.​—Mika 4:1-4.

Badi batuadija ne bantu bakese

Nansha muakabangishabu kuyisha tumama mu bidimu bia 1960, bakese ba kudibu bakatuadija kubuela mu bisangilu bia Bantemu ba Yehowa anu mu bidimu bia 1970 mu Séoul tshimenga tshikulu tshia ditunga dia Corée. Muanetu kampanda wa balume uvua ufunda lukasa lukasa uvua ubafundila malu manene a muyuki, pamue ne mvese ya mu Bible ivuabu babadisha.

Mu tshidimu tshia 1971 mu tshimenga tshia Taejon, Ntemu kampanda uvua ne muanende wa balume kamama wakatuadija kumulongesha mukenji wa Bukalenge pamue ne balunda bende bakuabu bavua pabu tumama. Mu kasumbu aka ke muakapatukila bena lukunukunu badi bakuate buambi ne manza abidi mu budimi bua muakulu wa tumama.​—Zekâya 4:10.

Bansonga badi badifila ne disanka

Bua tumama kufikatu ku dimanya Yehowa ne Yezu ne nenku kubuela mu njila wa muoyo, bena budisuile badi ne bua kuenza mudimu wa bungi. (Yone 17:3) Bua kukumbaja tshipatshila etshi, Bantemu  ba Yehowa bavule mbalonge muakulu wa tumama ne mbapete bipeta bilenga.

Park In-sun nnsonga wa bidimu 15 wakadifundila tshipatshila tshia kulonga muakulu wa tumama. Bua kulonga muakulu eu, wakaya kulonga mudimu mu tshiapu tshikuabu muvua tumama 20 tuenza mudimu. Wakenza nabu mudimu pamue ngondo muanda-mukulu bua kumona mua kulonga muakulu ne ngelelu wa meji wa tumama. Tshidimu tshiakalonda wakalua mpanda-njila wa pa tshibidilu (mumanyishi wa Bukalenge wa ku dîba ne ku dîba) ne wakenza mudimu ne tshisumbu tshia tumama tuvua tusankidila bulelela bua mu Bible. Tshisumbu tshikese atshi tshiakadiunda lukasa, ne matuku makese panyima bantu bapite pa 35 bakatuadija kubuela mu bisangilu bia mu Dia lumingu.​—Musambu 110:3.

Pashishe, bua musangu wa kumpala mu tshimenga tshia Séoul, bakabanga kuenza bisangilu bia mu tshisumbu anu mu muakulu wa tumama. Muanetu Park In-sun wakalua mpanda-njila wa pa buende mu tshisumbu tshikese etshi tshivua tshienda tshidiunda. Mu tshikondo atshi ukavua mushikuluje muakulu wa tumama bimpe menemene. Ngondo mikuabu uvua ulonga Bible ne tumama 28. Ba bungi ba kudibu bakadiunda ne kuluabu Bantemu ba Yehowa.

Bu tshipeta tshia mudimu mukole eu wa bena budisuile, bakenza tshisumbu tshia kumpala tshia muakulu wa tumama mu Séoul mu ngondo wa dikumi wa tshidimu tshia 1976, tshikale ne bamanyishi 40 ne ba-mpanda-njila ba pa tshibidilu 2. Bualu ebu buakatuma mudimu kumpala mu bimenga bikuabu bia mu Corée. Tumama tua bungi tuvua ne nzala mikole ya lumu luimpe ne tuvua tuindile bua balue kutuyisha.

Badi benza mudimu muaba udi tumama

Udi mua kudiebeja muvuabu bapeta tumama. Ba bungi ba kudibu bavua babapeta ku diambuluisha dia bantu bavua babamanye. Bavua kabidi bebeja bantu bavua ne magazen a losa, ne bavua bafila mêna ne muaba uvua tumama tusombele. Bimue biro bia mbulamatadi bivua biambuluisha pabi bua kubapeta. Mudimu mukole mu teritware wa tumama wakapatula bipeta bimpe menemene, ne mu matuku makese tshianana, bakenza bisumbu binayi bia muakulu wa tumama. Bakakankamija bansonga bena Kristo ba bungi bua kulonga muakulu wa tumama.

Biro bia filiale bia Bantemu ba Yehowa biakatuma bampanda-njila ba pa buabu bavua balonge muakulu wa tumama bua kuenza mudimu ne bisumbu bia muakulu wa tumama. Matuku adi panshi aa, mbatume bana betu badi bajikije mu Kalasa ka Dilonga Mudimu mu bisumbu ebi, ne mbabikoleshe mu nyuma.

Mudimu eu udi ne ntatu. Kuenza mudimu mu teritware eu kudi kulomba kuenza bukole bua bungi bua kumanya bibidilu bia tumama. Kabatu babubika ngenyi yabu ne malu abu to. Bualu ebu butu misangu ya bungi bukemesha bantu ne budi mua kukebesha dipangakana ku mêyi. Pashishe, padi Bantemu balonga Bible ne tumama, mbimpe batuambuluishe bua kushikuluja muakulu watu eu ne batukankamije bua kuikala badibadila ne badilongela bikole.

Mu nsombelu wabu wa matuku onso, tumama tutu tupeta ntatu idi bantu bakuabu ba bungi kabayi bamanye to. Diyikila ne bena mbulamatadi ne ba-minganga nansha kabidi disumba ne dipanyisha bintu bitu misangu mivule bibatatshisha bikole. Bu mudi Bantemu ba mu bisumbu bidi pabuipi babambuluisha ne dinanga, tumama tudi mu tshisumbu tshia bena Kristo ntumone dinanga dia buwetu.​—Yone 13:34, 35.

 Buambi bua mu mpukapuka budi bupatula bipeta bimpe

Mu tshimenga tshia Pusan, dibungu dinene dia ku Sud kua Corée, Ntemu mukuabu wakapetangana ne tumama tubidi tuakamufundila pa dibeji ne: “Tudi basue Mparadizu. Tudi tukeba kumanya mvese idi yakula bua muoyo wa tshiendelele.” Muanetu au wakafunda muaba uvuabu basombele ne wakalongolola bua kuya kubatangila. Pakayaye kubatangila, wakasanga tumama tuule ntente mu nzubu tuindile bua kumvua mukenji wa Bukalenge. Bualu ebu buakamusaka bua kutuadija kulonga muakulu wa tumama. Matuku makese panyima bakenza tshisumbu tshia muakulu wa tumama mu tshimenga tshia Pusan.

Muanetu wa mu tshisumbu atshi wakamona tumama tuakula mu muakulu wa tumama, ke yeye kasemena kudibu. Pakamanyaye ne: bavua bafumina mu masangisha a tshitendelelu kampanda, wakababikila ku Nzubu wa Bukalenge pa dîba ibidi mu mapingaja anu dituku dine adi. Bakalua mu bisangilu ne bakatuadija kulonga nabu Bible. Matuku makese pashishe, bantu babidi abu bakabuela mu mpungilu wa distrike pamue ne balunda babu 20 bavua pabu tumama. Mu tshisumbu atshi, ba bungi mbalambule Yehowa mioyo yabu. Babidi bakadi balue bakulu ba mu tshisumbu ne umue musadidi wa mudimu mu bisumbu bia muakulu wa tumama.

Tshisumi tshidi tshipatula bipeta bilenga

Bu mudi tumue tumama tusombele kule ne tshisumbu tshia  muakulu wa tumama, bua kubatuadila biakudia bua mu nyuma bia mu Bible pa tshibidilu bitu misangu ya bungi bilomba bua kudienzeja ne kuikala ne tshisumi. Tshilejilu, muntu mulume mukuabu wa bidimu 31 uvua mulobi ku muelelu kua tshidila bua kumona mua kudiambuluisha. Wakumvuila mukenji wa mu Bible kudi muakunyende wa balume ukavua yeye mupetangane ne Bantemu ba Yehowa kumpala. Bua kujikija nzala ya mu nyuma ivuaye nayi, mulobi eu uvua kamama wakenza luende lua kilometre 16 mu buatu mutangile mu tshimenga tshia Tongyoung, ku muelelu wa ku Sud kua Corée. Wakenza luendu elu bua kupetangana ne mpanda-njila wa pa buende uvua mu tshisumbu tshia muakulu wa tumama tshia mu tshimenga tshia Masan. Mu Dimue dionso, mpanda-njila eu uvua wenza luendu lua kilometre 65 anu bua kulonga Bible ne mulobi eu uvua kamama.

Bua kubuelaye mu bisangilu bia mu Dia lumingu mu tshimenga tshia Masan, mulongi wa Bible eu uvua kamama uvua wenza luendu lua kilometre 16 mu buatu ne pashishe wangata bise bua kuenza kilometre mikuabu 65. Tshisumi tshiende tshiakapatula bipeta bimpe. Mu ngondo mikese tshianana wakashikuluja muakulu wa tumama, kulonga maleta makuabu a mu tshiena-Corée, ne kulongaye kabidi mushindu umuepele wa kuikala ne malanda mimpe ne Yehowa. Pakamonaye mushinga wa kubuela mu bisangilu ne kuyisha pa tshibidilu, wakaya kusombela mu teritware wa tshisumbu tshia muakulu wa tumama. Bualu ebu buvuaku bupepele anyi? Tòo. Uvua ne bua kulekela mudimu wende wa kuloba uvua umupetesha dolare 3 800 ku ngondo yonso, kadi tshisumi tshiende tshiakamupetesha masanka. Kunyima kua yeye mumane kudiunda mu bulelela, wakatambula ne mpindieu udi wenzela Yehowa mudimu ne disanka pamue ne dîku diende.

Dikudimuna mikanda bua tumama

Batu batamba kumanyisha lumu luimpe lua Bukalenge ku diambuluisha dia mêyi a mukana. Kadi bua kutamba kumanyisha mukenji wa mu Dîyi dia Nzambi bimpe menemene, bidi bikengela kulongesha malu a mu Bible ne bintu bidi bitamba kunenga bikole. Ke bualu kayi mu bidimu lukama bia kumpala bakulu bavua bafunda mikanda. (Bienzedi 15:22-31; Efeso 3:4; Kolosai 1:2; 4:16) Mu tshikondo tshietu etshi, mbafile biakudia bia mu nyuma bivule ku diambuluisha dia mikanda ne bintu bikuabu bidi Bantemu ba Yehowa bapatula. Mbakudimune mikanda eyi mu miakulu mivule, ne mu miakulu mishilangane ya tumama. Bua kukudimuna mikanda mu muakulu wa tumama wa mu Corée, Biro bia filiale bidi ne tshibambalu tshia dikudimuna muakulu wa tumama. Tshibambalu tshia video tshidi tshipatula bande ya video mu muakulu wa tumama. Bionso ebi bidi bipesha tumama tudi tuamba lumu luimpe ne bantu bakuabu badi basankidila bulelela biakudia bia mu nyuma mu bisumbu bia mu Corée mujima.

Nansha mudi bantu ba bungi bashikuluje muakulu wa tumama ne bambuluishe bua kupatula bande ya video, bakudimunyi batambe buimpe mbana ba tumama. Mbalonge muakulu wa tumama katshia anu ku buana buabu. Bana aba batu bakula muakulu eu bimpe menemene, bumvuija bidibu bamba ne muoyo mujima padibu babileja ku bianza ne mudibu benza mu mpala, mushindu eu badi balenga lungenyi ne mitshima ya bantu.

Anu mutudi baleje, mpungilu ne mpuilu ya mu muakulu wa tumama idi yenzeka mpindieu pa tshibidilu mu Corée. Bidi bilomba mudimu muvule, mfranga ya bungi ne bukole bua kulongolola mpungilu ne mpuilu eyi. Kadi bantu badi babuelamu badi banyisha dilongolola edi. Patu bisangilu ebi bijika, bantu ba bungi batu bashala, bajinga bua kutungunuka ne kuyikila ne bawetu ne bua kuakula bua biakudia bilenga bia mu nyuma bidibu bafumina ku dipeta. Bushuwa, kuenza mudimu mu tshisumbu tshia pa buatshi etshi kudi ne ntatu, kadi masanka a mu nyuma adi afuminaku adi ne mushinga wa bungi.

[Tshimfuanyi mu dibeji 10]

Bande ya video ya muakulu wa tumama mipatula mu Corée: “Tshinyi tshidi Nzambi utulomba?,” “Tuanyishayi bumpianyi buetu bua mu nyuma,” “Bilejilu bidi bitudimuija matuku etu aa” ne “Tunemekayi bukokeshi bua Yehowa”

[Bimfuanyi mu dibeji 10]

Kubangila kuinshi mutu milonda ya dîba inyunguluka: Badi bakuata bande wa video mu muakulu wa tumama ku Betele wa mu Corée; dilongolola miaku ya muakulu wa tumama ya bulongolodi; kasumbu ka bakudimunyi ba muakulu eu; dileja mushindu wa kuenza minu padibu bakuata bande wa video