Malu adi ajadika ne: Yezu Kristo uvuaku pa buloba apa

BANTU ba bungi kabatu bamone Albert Einstein muena malu a siyanse mumanyike bikole. Mu matunga makuabu, bantu ba bungi kabena nansha bamumanye to. Kadi ngumu milelela ya malu adiye muenze idi ijadika ne: uvuaku pa buloba apa. Malu avuaye muenze patshivuaye ne muoyo adi amuenekela mu bidi bena siyanse benza ku diambuluisha dia bivuaye mupete. Tshilejilu, bantu ba bungi badi benza mudimu ne nzembu idibu bapeta imue misangu ku diambuluisha dia malu avuaye mupete.

Ke mudibi kabidi bua Yezu Kristo, muntu udi ba bungi bitaba mudiye mushintulule nsombelu wa bantu bavule. Malu avuabu bafunde pa bidi bimutangila ne bijadiki bia malu avuaye muenze bidi bileja patoke ne: uvuaku. Nansha mudi dipeta mifundu idi ne dîna  dia Yakobo matuku mashale aa (ditudi bumvuije mu tshiena-bualu tshia kumpala) mua kuikala ne mushinga mukole, bulelela bua muyuki wa Yezu kabuena bushindamene pa kashete ka mifuba aka anyi pa tshintu tshikuabu tshia kale to. Bualu budi ne: tudi mua kupeta bijadiki bia dikalaku dia Yezu mu malu adi bafundi ba malu a kale bafunde pa bidi bimutangila yeye ne bayidi bende.

Bujadiki bua bafundi ba malu a kale

Tshilejilu, tangila bujadiki bua Flavius Josèphe mufundi wa malu a kale muena Yuda wa mu bidimu lukama bia kumpala uvua Mufalese. Wakakula bua Yezu Kristo mu mukanda wende mukuabu. Nansha mudi bamue belesha bulelela bua muaba wa kumpala uvua Josèphe mutele Yezu bu Masiya mpata, Mulongeshi Louis Feldman wa mu Iniversite wa Yeshiva udi wamba ne: bantu bakese ke bavua beleshe bujalame bua muaba muibidi uvuabu bamutela mpata. Mu mukanda amu Josèphe wakamba ne: “[Muakuidi munene Ananus] wakabikila balumbuluishi ba ku kabadi ka Sanedren ne kuluaye kumpala kuabu ne muntu mukuabu diende Yakobo, muanabu ne Yezu uvuabu babikila ne: Kristo.” (Jewish Antiquities, XX, 200) Bulelela, Mufalese wa mu kasumbu ka malu a nzambi kavua ne bantu ba bungi bamanyike muvuabu baluishi banene ba Yezu, wakitaba ne: “Yakobo muanabu ne Yezu” uvuaku bushuwa.

Malu avua Yezu muenze pavuaye pa buloba akamuenekela mu midimu ivua bayidi bende benze. Pakelabu mupostolo Paulo mu buloko ku Lomo mu tshidimu bu tshia 59 bikondo bietu ebi, banene ba bena Yuda bakamuambila ne: ‘Bualu bua tshisumbu etshi, tudi bamanye ne: badi batshibanda kuonso.’ (Bienzedi 28:17-22) Bavua babikila bayidi ba Yezu ne: “tshisumbu etshi.” Bikalabu bavua bababanda miaba yonso, bafundi ba malu a kale bavua mua kuakula bualu buabu, ki mmuomu anyi?

Tacite, mulela bu mu tshidimu tshia 55 bikondo bietu ebi ne uvuabu bangata bu umue wa ku bafundi banene ba malu a kale pa buloba bujima, wakakula bua bena Kristo mu mukanda wende wa Annals. Mu muyuki udi wakula bua mushindu uvua Néron ubabanda muvuabu buoshe Lomo mu tshidimu tshia 64 bikondo bietu ebi, Tacite wakafunda ne: “Néron wakela tshilumbu atshi pambidi pa kasumbu kavuabu bakine bua malu aku mabi, kavua bantu babikila ne: bena Kristo ne wakabakengesha bikole menemene. Dîna edi ndifumine kudi Kristus wakashipabu kudi umue wa ku bangovena betu Pontio Pilato, mu bukokeshi bua Tibelio.” Malu adi mu muyuki eu adi apetangana ne malu a Yezu wa mu Bible.

Mufundi mukuabu uvua muakule bua bayidi ba Yezu uvua Pline Muana, ngovena wa mu Bitunia. Mu tshidimu bu tshia 111 bikondo bietu ebi, Pline wakafundila Amperere Trajan umuebeja tshivuaye mua kuenza ne bena Kristo. Pline wakafunda ne: bantu bavuabu bashiminyina muvuabu bena Kristo bavua basambila nzambi [ya tshianana] ne batendelela lupingu lua Trajan, anu bua kuleja se: kabavua bena Kristo to. Pline wakatungunuka wamba ne: “Batu bamba ne: kakuena mushindu wa kuenzeja bena Kristo balelela malu aa ku bukole nansha.” Bualu ebu budi bujadika dikalaku dia Kristo muena bayidi bavua badilongolole bua kufua bua ditabuja diabu.

Kunyima kua mumane kumvuija mu tshikoso miaba idibu bakule bua Yezu Kristo ne bua bayidi bende kudi bafundi ba malu a kale ba mu bidimu nkama ibidi bia kumpala, mukanda kampanda udi wamba ne: “Miyuki eyi milonda ne  budikadidi idi ijadika ne: mu tshikondo tshia kale nansha baluishi ba Buena-Kristo kabavua banjiku kuelesha bulelela bua muyuki wa Yezu mpata, muyuki uvua bantu bakokanganepu musangu wa kumpala ne bijadiki bivua kabiyi nansha bikumbane ku ndekelu kua bidimu bia 1700, mu bidimu bia 1800 ne ku mbangilu kua bidimu bia 1900.”​—The Encyclopædia Britannica mufunda mu 2002.

Bujadiki bua bayidi ba Yezu

Tshibungu tshikuabu tshidi tshiamba ne: “Dipungila Dipiadipia didi difila bijadiki pabuipi ne bionso bidi biambuluisha bua kupetulula malu a kale adi akula bua muoyo ne lufu lua Yezu ne bua kupetulula kabidi mumvuija a kale menemene a bena Kristo a tshivuaye muambe.” (The Encyclopedia Americana) Bena mpata badi mua kubenga kuitaba Bible bu tshijadiki tshia dikalaku dia Yezu. Bulelela, bijadiki bibidi biangatshila mu malu adi Bible ulonda bidi nangananga bituambuluisha bua kujadika ne: Yezu uvuaku pa buloba apa tshia bushuwa.

Anu mutukadi bamone, malongesha manene a Einstein adi ajadika ne: uvuaku. Muomumue, malongesha a Yezu adi ajadika bulelela bua dikalaku diende. Angata tshilejilu tshia Muyuki wa pa Mukuna uvua Yezu muenze udi bantu ba bungi bamanye bimpe. (Matayo nshapita 5-7) Mupostolo Matayo wakafunda bua mushindu uvua muyuki eu mulenge bantu, wamba ne: ‘Diyisha diende diakakemesha bantu; bualu bua yeye wakabayisha bu muena mêyi.’ (Matayo 7:28, 29) Bua mushindu udi muyuki eu mulenge bantu munkatshi mua bidimu bia bungi, Mulongeshi Hans Dieter Betz wakamba ne: “Bukole budi nabu Muyuki wa pa Mukuna butu misangu mivule busambuka mikalu ya Buena-Yuda ne ya Buena-Kristo kule ne kule, anyi nansha bibidilu bia bena mu matunga a ku Mputu.” Wakamba kabidi ne: muyuki eu udi “ukoka bantu ba pa buloba bujima mu mushindu wa pa buawu.”

Tangila mêyi aa a mu tshikoso a mushinga ne a meji atudi tusangana mu Muyuki wa pa Mukuna: ‘Biakukuma muntu dipi ku ditama dia ku tshianza tshia balume, umuandamuine dia ku bakaji kabidi.’ ‘Nudimuke, kanuenji buakane buenu ku mêsu kua bantu.’ ‘Kanutambi kuelangana meji a makelela, bualu bua makelela neadielangane meji.’ ‘Kanuedi mabue enu a mushinga mukole panshi padi ngulube yendela.’ ‘[Nutungunuke ne] kulomba, nebanupe.’ “Nuenzele bantu malu onso anudi basue banuenzele.” “Nubuele ku mushiku wa mbelu mubumbakane.” ‘Nenubajingulule ku mamuma abu.’ “Mitshi yonso idi mimpe itu ikuama mamuma mimpe.”​—Matayo 5:39; 6:1, 34; 7:6, 7, 12, 13, 16, 17.

Kakuyi mpata, ukatu mumvueku bimue biambilu ebi anyi malu manene adimu. Pamu’apa mbilue nsumuinu ya mu muakulu wenu. Biambilu bionso ebi mbiangatshila mu Muyuki wa pa Mukuna. Mushindu udi muyuki eu mushintulule bantu ba bungi ne bibidilu biabu udi ujadika patoke ne: “mulongeshi munene” uvuaku.

Tshinkabi ne: muntu kampanda uvua mufuikakaje muntu diende Yezu Kristo. Tshinkabi kabidi ne: bua meji a bungi avua nawu muntu eu, wakenza malongesha adi Bible wamba ne: nga Yezu. Muntu au kavuaku mua kuenza bua se: bantu ba bungi bitabe Yezu au ne malongesha ende anyi? Kadi mupostolo Paulo wakamba ne: ‘Bualu bua bena Yuda badi balomba bimanyinu, ne bena Gelika badi bakeba meji; kadi tuetu tudi tuamba Kristo wakashipabu ku mutshi, tshilenduishi kudi bena Yuda ne mbupote kudi bisamba bia bende.’ (1 Kolinto 1:22, 23) Mukenji wa Yezu uvuabu bapopele ku mutshi kauvua ukoka ni mbena Yuda ni mbantu ba bisamba bia bende to. Nansha nanku, au ke Kristo uvua bena Kristo ba mu bidimu lukama bia kumpala bamanyisha. Bua tshinyi diumvuija dia Kristo mupopela ku mutshi? Diumvuija dimuepele dimpe nedikale dia se: bafundi ba Mifundu ya tshiena-Gelika ya bena Kristo bavua bafunde malu malelela adi atangila muoyo ne lufu bia Yezu.

Tudi tupeta tshijadiki tshikuabu tshidi tshileja bulelela bua muyuki wa Yezu mu mudimu wa diyisha malongesha ende ne tshisumi wakenza bayidi bende. Bidimu bitue ku 30 patupu panyima pa Yezu mumane kutuadija mudimu wende, Paulo wakamba ne: lumu luimpe ‘luakambibua munkatshi mua bifukibua bionso muinshi mua diulu.’ (Kolosai 1:23) Bushuwa, malongesha a Yezu akatangalaka mu matunga avuaku mu tshikondo atshi nansha muvuaku buluishi. Paulo, uvuabu bakengeshe pende bualu uvua muena Kristo wakamba ne: ‘Bikala Kristo kayi muanji kubishibua  ku bafue, nunku kuamba kuetu kua dîyi dia Nzambi kudi patupu, ne ditabuja [dietu] didi patupu kabidi.’ (1 Kolinto 15:12-17) Bikala kuyisha Kristo uvuabu kabayi babishe ku bafue dikale patupu, kuyisha bua Kristo uvua kayi muanji kuikalaku kuvua mua kuikala bualu bua patupu menemene. Anu mutudi tubala mu luapolo lua Pline Muana, bena Kristo ba mu bidimu lukama bia kumpala bavua badilongolole bua kufua bua ditabuja diabu dia Kristo Yezu. Bakateka mioyo yabu mu njiwu bua Kristo bualu uvua muntu wa bushuwa; uvua ne muoyo pa buloba apa anu mudi miyuki ya mu Evanjeliyo ileja.

Udi mupete bijadiki

Bivua bikengela bua bena Kristo kuitabujabu dibika dia bafue bua kumonabu mua kuyisha. Wewe pebe udi mua kumona Yezu mubishibue ku lufu ne mêsu ebe a mu nyuma paudi umona mushindu udiye wenzeja malu lelu.

Kumpala kua kumushipabu, Yezu wakafila mulayi munene pa bidi bitangila dikalaku diende mu bumfumu mu matuku atshivua alua. Wakamba kabidi ne: Nzambi uvua ne bua kumubisha ku lufu ne uvua ne bua kusomba ku tshianza tshia balume tshiende bua kuindila tshikondo tshivuaye mua kuluisha baluishi bende. (Musambu 110:1; Yone 6:62; Bienzedi 2:34, 35; Lomo 8:34) Pashishe, uvua ne bua kujuka bua kuipata Satana ne ba-demon bende mu diulu.​—Buakabuluibua 12:7-9.

Ndîba kayi divua bionso abi ne bua kuenzeka? Yezu wakapesha bayidi bende ‘tshimanyinu tshia [dikalaku diende] ne tshia nshikidilu wa tshikondo etshi.’ Tshimanyinu tshivua mua kuambuluisha bua kujingulula dikalaku diende divua kadiyi dimueneka tshivua tshikonga malu bu mudi mvita minene, biyole bia nzala, bikumina, dimueneka dia baprofete ba dishima, divulangana dia dishipa dia mikenji ne bipupu bia masama makole. Makenga aa avua ne bua kulua bualu dipata dia Satana mu diulu divua ne bua kumvuija ‘mulawu pa buloba.’ Diabolo mmupueke ku mpenga kua buloba ‘muikale ne tshiji tshikole, mumanye ne: udi ne musangu muipi.’ Tshimanyinu tshidi kabidi tshiangata diyisha dia lumu luimpe lua Bukalenge ‘pa buloba [bujima], luikale tshimanyishilu ku bisamba bionso.’​—Matayo 24:3-14; Buakabuluibua 12:12; Luka 21:7-19.

Anu bu mutu tupesa tua dinaya dia dilamakaja tutupa tua tshimfuanyi tudi tukumbanangana pa muaba watu, malu avua Yezu mumanyishe mmakumbane. Katshia Mvita ya Kumpala ya Buloba bujima yabudika mu tshidimu tshia 1914, tudi tumona bijadiki bionso bisangisha bia dikalaku didi kadiyi dimueneka dia Yezu Kristo. Udi ukokesha mu Bukalenge bua Nzambi ne udi ne bukokeshi bua bungi. Tshibejibeji tshiudi natshi mu bianza ntshijadiki tshia se: mudimu wa kuyisha Bukalenge udi wenda wenzeka lelu eu.

Bua kumvua malu makuabu avua Yezu muenze pavuaye ne muoyo, mbimpe ulonge Bible. Bua tshinyi kubenga kuebeja Bantemu ba Yehowa malu adi atangila dikalaku dia Yezu?

[Bimfuanyi mu dibeji 5]

Josèphe, Tacite ne Pline Muana bakakula bua Yezu Kristo ne bayidi bende

[Mêyi a dianyisha]

Bimfuanyi bionso bisatu: © Bettmann/​CORBIS

[Tshimfuanyi mu dibeji 7]

Bena Kristo ba kumpala bavua bajadike ne: Yezu uvua muntu wa bushuwa