Ntshilele patupu anyi nkosa-mishiku?

MU BIMUE bilongelu bibandile bia mu ditunga dia Pologne, balongi batu ne tshilele tshia kusangisha makuta bua kusumbila balongeshi babu bintu bua kubelelabu mpue ya bungi ku mateta. Kadi kabiena bikemesha bua muvua Katarzyna (nsongakaji muena Kristo) mupete lutatu kampanda to. Wakadikonka ne: “Mfila makuta anyi tshiafidi?” Balongi babu bakamuambila ne: “Etshi ntshilele tshidi tshitangalake bikole. Kuena ne tshiudi ujimija nansha tshimue to. Tshidibi, neupete bia bungi. Kadi udi welakana bua tshinyi?”

Katarzyna udi wamba ne: “Ndi ngitaba bua se: mu tshidimu tshianyi tshia kumpala tshia pangakabuela mu kalasa, ngakasangisha panyi makuta aa. Kadi ngakalua kujingulula ne: mvua mubuelakane mu malu a nkosa-mishiku adi Bible ukandika pamvua mufile panyi makuta au.” Wakavuluka mvese idi ileja ne: Yehowa udi ukina malu a nkosa-mishiku. (Dutelonome 10:17; 16:19; 2 Kulondolola 19:7) Katarzyna udi wamba ne: “Ngakamona mudibi bipepele bua mudi muntu mua kulonda tshidi binende benza. Ngakelangana kabidi meji bua bualu abu, ne katshia anu apu, tshitu mbuelakana kabidi mu tshilele etshi to.” Mu bidimu bisatu bia ndekelu bia kalasa kende, nansha muvua balongi babu bamuseka, wakambila bamue ne: bilondeshile malu a mu Bible adiye witabuja, katu witaba bua kufila makuta a kukosangana nawu mishiku to.

Bamue bakamba Katarzyna ne: mmuena buiminyi. Yeye muine udi wamba ne: “Tshitshitu kabidi ngumvuangana ne bamue ba ku balongi betu abu to. Kadi bakuabu ba bungi badi buobu banemeka mmuenenu wanyi, ne bualu ebu budi bunsankisha bikole.” Bakalua kumanya ne: Katarzyna udi Ntemu wa Yehowa udi ukonkonona mêyi a mu Bible mu nsombelu wende wa dituku dionso.