Tshitudi mua kulongela kudi nyunyi

“TANGILAYI nyunyi idi ibuka mulu. Kayena ikuna biakudia, kayena inowa, kayena nansha iteka biakudia mu mayeba. Kadi Tatu wenu udi mu diulu udi uyidisha! Nuenu bantu, kanuena bapite nyunyi anyi?” (Matayo 6:26, Mukanda wa Mvidi Mukulu [Mishonyi, MMV) Yezu Kristo wakamba mêyi aa mu muyuki muende lumu wakenzaye ku luseke lua mukuna kampanda uvua pabuipi ne dijiba dia Galela. Pa kumbusha bayidi bende, bantu bakuabu kabidi bavua bateleje muyuki au. Muaba au uvua tshisumbu tshinene tshia bantu ba mu bitupa bionso bia ditunga adi bavua pamuapa mua kulua bayidi bende mu matuku avua alua kumpala. Ba bungi ba kudibu bavua bapele bavua balue ne babedi bua Yezu kubuondapaye.​—Matayo 4:23–5:2; Luka 6:17-20.

Yezu mumane kuondopa babedi bonso abu, wakatuma ntema yende ku malu a mu nyuma a mushinga mukole. Ku malu akalongeshaye kuvua ebu butudi batele mu tshikoso tshia kumpala etshi.

Nyunyi ya mu diulu ivuaku katshia kuonso aku. Imue ya kudiyi itu idia tuishi, mikuabu idia bimuma anyi ntete. Bikala Nzambi mulongoluele nyunyi biakudia bungi nunku, bushuwa udi mua kuambuluisha kabidi basadidi bende bua kupetabu tshiakudia tshia buatshia buila. Udi mua kuenza nunku pa kubambuluisha bua kupetabu mudimu udi mua kubapetesha makuta a kusumba biakudia. Udi nansha mua kubakoleshila bia pa madimi abu bimpe. Padi ntatu imueneka, Nzambi udi mua kusonsola mitshima ya bena mutumba ne balunda ba muoyo muimpe bua kupesha badi bakenga biakudia.

Kudi malu makuabu a bungi atudi mua kulonga pa kutangila bimpebimpe mutu nyunyi. Nzambi mmufuke nyunyi muyipeshe tshingenyingenyi tshia dikema tshidi tshiyambuluisha bua kuenza masua a yoyi kukoleshila tuana tuayi. Tangila masua abidi adibu baleje mu bimfuanyi mu dibeji edi. Ku dia bakaji kudi disua dia nyunyi wa mushamusha. Utu wenzela disua diende mu tshibadi tshia dibue anyi mu tshimanu tshia nzubu. Tshidi tshibuikidije masua aa ku mutu ndibue anyi tshisasa tshia nzubu, anu mutudi tumona mu tshimfuanyi etshi. Panshi pa disua edi padi bitotshi bikuatakane, biondoke. Nyunyi yonso ibidi mulume ne mukaji itu yenza mudimu mukole wa kukungija tubulu tua buloba etu ne idi mua kuenza ngondo ne matuku bua kujikija disua diayi. Pashishe, itu ibuikila disua edi munda ne bisonsa ne bukuyikuyi. Yonso ibidi itu idisha tuana tuayi. Kuinshi kudi disua dia nyunyi wa nsokonso. Nyunyi muenji wa mudimu bikole eu utu wenza disua diende ne bisonsa ne mabeji a mitshi. Udi mua kuenza disua dimue mu dituku dimue ne kuenza masua mapite pa 30 mu muvu umue.

Ebi bidi bitulongesha tshinyi? Bidi bitulongesha ne: bikala Nzambi upesha tunyunyi meji a nunku ne bintu bivule mushindu eu bua kuenza masua atu, udi mua kuambuluisha basadidi bende bua kupeta muaba wa kusombela. Kadi Yezu wakaleja ne: kudi bualu bukuabu bua mushinga budi bukengela kuenza bituikala basue bua se: Yehowa Nzambi atuambuluishe bua kupeta bintu bitudi nabi dijinga. Yezu wakalaya ne: ‘Diambedi kebayi bukalenge buende ne buakane buende, nunku nebanupe bintu ebi bionso.’ (Matayo 6:33) Pamuapa udi mua kudikonka ne: ‘Kukeba diambedi Bukalenge bua Nzambi kudi kumvuija tshinyi?’ Bantemu ba Yehowa (bena tshibejibeji etshi) nebikale ne disanka dia kukupesha diandamuna dia lukonko elu.