Tuidikijayi Yehowa, Nzambi wetu udi kayi kansungasunga

‘Bualu bua [Nzambi] kêna ne kansungasunga.’​—LOMO 2:11, Muanda Mulenga Lelu.

1, 2. (a) Ndipangadika kayi divua Yehowa muangate bua bena Kanâna bonso? (b) Yehowa wakenza tshinyi, ne nkonko kayi idi bualu ebu bujula?

 PAVUABU batudile mu mpata ya Moaba mu tshidimu tshia 1473 kumpala kua bikondo bietu ebi, bena Isalele bakateleja Mose ne ntema yonso. Kuvua lutatu kampanda luvua lubindile dia muamua dia Musulu wa Yadene. Mose wakamanyisha dipangadika dia Yehowa dia se: bena Isalele batshimune bisamba muanda-mutekete bia bukole bia bena Kanâna bivua mu Buloba Bulaya. Mêyi a Mose a se: ‘Pabafila Yehowa Nzambi wenu, mu bianza bienu, nenubashipe’ akabakolesha ku muoyo be! Bena Isalele kabavua ne bua kudia nabu tshipungidi ne kabavua bakanyine kubenzela bualu buimpe nansha bumue to.​—Dutelonome 1:1; 7:1, 2.

² Nansha nanku, Yehowa wakapandisha dîku dimue mu tshimenga tshia kumpala tshivua bena Isalele baluishe. Wakakuba kabidi banga bantu ba mu bimenga bikuabu binayi. Bua tshinyi? Ntshinyi tshidi mianda ya dikema yakenzeka pakapanduka bena Kanâna aba itulongesha pa bidi bitangila Yehowa? Ne mmushindu kayi utudi mua kumuidikija?

Tshivuabu benze pakumvuabu lumu lua Yehowa

3, 4. Ngumu ya ditshimuna dia Isalele yakasaka bamue bantu ba mu Kanâna bua kuenza tshinyi?

³ Munkatshi mua bidimu 40 bivua bena Isalele benze mu tshipela kumpala kua kubuelabu mu Buloba Bulaya, Yehowa uvua ukuba ne uluila tshisamba tshiende mvita. Ku Sud kua Buloba Bulaya, Isalele wakaluangana ne Alada mukalenge wa bena Kanâna. Ne Yehowa wakambuluisha bena Isalele, buobu kumutshimuna yeye ne bantu bende ku Hôma. (Nomba 21:1-3) Pashishe, bena Isalele bakayila kumpenga-mpenga kua ditunga dia Edoma batangile ku Nord-Est kua Mbuu Mufue. Tshitupa etshi tshivua bena Moaba basombele kumpala, bena Amola ke bakavua basombelamu. Sihona Mukalenge wa bena Amole wakabenga kuanyishila bena Isalele bua kupitshilabu mu buloba buende. Bena Isalele ne Mukalenge Sihona bakaluangana ku Yahasa, kabiyi mpata ku Nord kua Tshibanda tshia mâyi a Ânona kuakashipabu Sihona. (Nomba 21:23, 24; Dutelonome 2:30-33) Dia ku Nord menemene, Oga uvua ukokesha bena Amole bakuabu mu Bashana. Nansha muvua Oga muikale muntu wa mpolondo, kavua mua kukokesha bua kuluangana ne Yehowa to. Bakashipa Oga ku Edelei. (Nomba 21:33-35; Dutelonome 3:1-3, 11) Ngumu ya ditshimuna eyi ne miyuki ya Tshimuangi tshia bena Isalele bafume mu Ejipitu biakalenga bamue bantu bavua mu Kanâna ku muoyo bikole. *

⁴ Pakabuela bena Isalele musangu wa kumpala mu Kanâna bamane kusabuka Yadene, bakasa tshitudilu tshiabu mu Gilegala. (Yoshua 4:9-19) Pabuipi apu kuvua tshimenga tshia Yeleko tshinyungulula ne lumbu. Lumu luvua Lahaba muena Kanâna mumvue bua malu avua Yehowa muenze luakamusaka bua kuikala ne ditabuja. Nunku, pavua Yehowa mubutule Yeleko, wakapandisha Lahaba ne bantu bavua mu nzubu muende.​—Yoshua 2:1-13; 6:17, 18; Yakobo 2:25.

5. Ntshinyi tshiakasaka bena Gibeona bua kuenza malu ne budimu?

⁵ Pashishe, bena Isalele bakabanda bumukila mu bibandabanda bia pabuipi ne musulu wa Yadene batangile ku mikuna ivua munkatshi mua tshitupa atshi. Yoshua wakalonda mêyi a Yehowa, kuenzaye mayele bua kuteya musoko wa Ai. (Yoshua nshapita wa 8) Lumu lua ditshimuna edi luakasaka bakalenge bena Kanâna bua kudisangisha bua kuluangana mvita. (Yoshua 9:1, 2) Bena mu  tshimenga tshia Gibeona tshia bena Hiwi tshivua pabuipi apu bakenza bualu bushilangane. Yoshua 9:4 udi wamba ne: ‘Buobu bakenza budimu.’ Anu bu Lahaba, bakavua bumvue muvua Yehowa mupandishe tshisamba tshiende mu Tshimuangi ne muvuaye mutshimune Sihona ne Oga. (Yoshua 9:6-10) Bena Gibeona bakamona ne: kuluisha bena Isalele kakuvua ne mushinga to. Nunku buobu ne misoko mikuabu isatu (Kefila, Bêlota ne Kiyata-yalima) bakatumina Yoshua bantu ku Gilegala, badifuanyikije bu bantu bavua bafumine mu ditunga dia kule. Mayele abu akakumbana. Yoshua wakenza nabu tshipungidi tshivua tshibajadikila ne: bavua ne bua kubashiya ne muoyo. Matuku asatu pashishe Yoshua ne bena Isalele bakumvua ne: bavua babadinge. Nansha nanku, bakavua baditshipe mu dîna dia Yehowa bua kunemeka tshipungidi etshi, ne ke tshiakenzabu. (Yoshua 9:16-19) Yehowa wakanyisha bualu abu anyi?

6. Ntshinyi tshiakenza Yehowa bua tshipungidi tshivua Yoshua mupunge ne bena Gibeona?

⁶ Bakanyishila bena Gibeona bua kuluabu bapandi ba nkunyi ne basunyi ba mâyi ba bena Isalele ne “ba tshioshelu tshia Yehowa” ku ntenta wa kusambakena. (Yoshua 9:21-27) Pashishe, pakalua bakalenge batanu ba bena Amole ne biluilu biabu kuluisha bena Gibeona, Yehowa wakenza tshishima. Mvula wa mabue wakashipa baluishi bungi bupite buvua bantu ba Yoshua bashipe. Yehowa wakateleja dilomba dia Yoshua bua dîba ne ngondo bimane kabiyi binyunga bua buobu kumona mua kutshimuna baluishi bimpe. Yoshua wakamba ne: ‘Kakuakadi dituku dikuabu bu dituku edi kumpala kuadi anyi kunyima kuadi, pakumvua Yehowa dîyi dia muntu nunku; bualu bua Yehowa wakaluila bena Isalele mvita.’​—Yoshua 10:1-14.

7. Mbulelela kayi buvua Petelo muitabe buvua buleja patoke mu muanda uvua utangila bamue bena Kanâna?

⁷ Lahaba muena Kanâna ne dîku diende pamue ne bena Gibeona bakatshina Yehowa ne bakenza malu avua aleja ditshina edi. Bualu buvua bubafikile budi buleja patoke bulelela buvua mupostolo muena Kristo Petelo muakule pashishe ne: ‘Bulelela, ndi njingulula ne: Nzambi kêna ne kansungasunga, kadi yeye udi witabuja wa mu tshisamba tshionso udi umutshina, udi wenza malu makane.’​—Bienzedi 10:34, 35.

Malu avua Yehowa muenzele Abalahama ne Isalele

8, 9. Mmunyi mudi malu avua Yehowa muenzele Abalahama ne tshisamba tshia Isalele aleja ne: kêna ne kansungasunga?

⁸ Muyidi Yakobo wakakula bua bulenga bukena butuakanyine mu malu avuaye muenzele Abalahama ne ndelanganyi yende. Ditabuja dia Abalahama ke diakamuvuija “mulunda wa Nzambi,” kadi ki ntshisamba tshiabu nansha. (Yakobo 2:23) Ditabuja dia Abalahama ne dinanga diende kudi Yehowa biakapetesha ndelanganyi yende mabenesha. (2 Kulondolola 20:7) Yehowa wakalaya Abalahama ne: “Nenkubeneshe, nemvudije ndelanganyi yebe bu mitoto ya kulu ne lusenga lua ku muelelu wa mbu.” Kadi tangila dilaya didi mu mvese udi ulonda: “Bisamba bionso bia pa buloba [nebidibeneshe ku diambuluisha] dia ndelanganyi yebe.”​—Genese 22:17, 18, Mukanda wa Mvidi Mukulu [Katolike, MMM]; Lomo 4:1-8.

⁹ Pamutu pa kuleja kansungasunga, Yehowa wakaleja mu malu akenzelaye Isalele tshidiye mua kuenza bua aba badi bamutumikila. Malu aa adi tshilejilu tshia mushindu udi Yehowa uleja dinanga dikole kudi basadidi bende ba lulamatu.  Nansha muvua Isalele muikale ‘bantu ba bumpianyi [ba Yehowa],’ bualu ebu kabuvua bumvuija ne: Nzambi kavua mua kuenzela bantu bakuabu malu mimpe to. (Ekesode 19:5; Dutelonome 7:6-8) Bulelela, Yehowa wakapikula Isalele ku bupika mu Ejipitu ne bua bualu abu wakamba ne: ‘Nuenu nkayenu mbangakumanya munkatshi mua bisamba bionso bia panshi pa buloba.’ Kadi ku butuangaji bua muprofete Amosa ne bua baprofete bakuabu, Yehowa wakalaya kabidi malu malenga bua “bisamba bionso.”​—Amosa 3:2; 9:11, 12; Yeshaya 2:2-4.

Yezu m’Mulongeshi udi kayi kansungasunga

10. Mmushindu kayi uvua Yezu muidikije Tatuende bua kubenga kuikala ne kansungasunga?

¹⁰ Munkatshi mua mudimu wende pa buloba, Yezu, eu udi tshimfuanyi mene tshia Tatuende, wakidikija ngikadilu wa Yehowa wa dibenga kuikala ne kansungasunga. (Ebelu 1:3) Tshipatshila tshiende tshinene tshivua tshia kupeta ‘mikoko mijimine ya mu nzubu wa Isalele.’ Nansha nanku, kakabenga bua kuyisha mukaji muena Samalea ku tshina tshia mâyi to. (Matayo 15:24; Yone 4:7-30) Wakenza kabidi tshishima pakamulomba mfumu wa basalayi uvua pamu’apa kayi muena Yuda. (Luka 7:1-10) Wakenza kabidi malu avua aleja dinanga divuaye nadi bua bantu ba Nzambi. Bayidi ba Yezu bakayisha bikole miaba ya bungi. Biakamueneka patoke ne: dipeta mabenesha a Yehowa divua dilonda ngikadilu ya muntu, kadi ki ntshisamba tshiende to. Bantu bena bupuekele ne bena mutshima mululame bavua ne nzala ya bulelela bakitaba mukenji wa lumu luimpe lua Bukalenge. Kadi bantu bena lutambishi ne badisui bakapetula Yezu ne mukenji wende. Yezu wakamba ne: ‘Tatu wanyi, Mukalenge wa diulu ne wa buloba, ndi nkusakidila bua wewe wakusokoka bena meji ne bena budimu malu aa, wakuasokolola kudi bana bakese; bulelela, Tatu, bua bualu ebu buakadi buimpe ku mêsu kuebe.’ (Luka 10:21) Patudi tuenzela bakuabu malu ne dinanga ne ditabuja, katuena tubasunguluja to, bualu tudi bamanye ne: eu ke mushindu udi Nzambi wanyisha.

11. Mmushindu kayi uvua bena mu tshisumbu tshia bena Kristo ba kumpala baleja ne: kabavua ne kansungasunga?

¹¹ Mu tshisumbu tshia bena Kristo tshia ku ntuadijilu, bena Yuda ne bavua kabayi bena Yuda bavua diatshimue. Paulo wakumvuija ne: ‘Butumbi ne bunême ne ditalala nebikale kudi muntu yonso udi wenza malu mimpe, kudi muena Yuda diambedi ne kudi muena Gelika kabidi. Bualu bua [Nzambi kêna ne] kansungasunga.’ * (Lomo 2:10, 11) Tshiakenza bua se: bapete bulenga bukena butuakanyine bua Yehowa ki ntshisamba tshiabu to, kadi mmalu avuabu benze pakalongabu malu adi atangila Yehowa ne mabenesha afila mulambu wa bupikudi wa Muanende Yezu. (Yone 3:16, 36) Paulo wakafunda ne: ‘Bua muntu kêna muena Yuda anu bua mubidi wende; ditengula dia mubidi nkayawu kadiena dilelela. Kadi yeye udi muena Yuda bua malu adi munda muende; ne ditengula didi dia mu mutshima [kudi] nyuma, kadiena [bua] mikenji mifunda.’ Pashishe, wakula bua muaku “muena Yuda” (udi umvuija “wa Yuda,” mbuena kuamba ne: mutumbishibue), Paulo wakamba kabidi ne: ‘Butumbi buende kabuena bufuma kudi bantu, kadi budi bufuma kudi Nzambi.’ (Lomo 2:28, 29) Yehowa udi utumbisha bantu kayi ne kansungasunga to. Ke mututu tuenza petu anyi?

12. Buakabuluibua 7:9 udi ufila ditekemena kayi, ne nkudi banganyi?

¹² Kunyima, mu tshikena kumona kampanda mupostolo Yone wakamona balejamu bena Kristo ba lulamatu bela manyi bu tshisamba tshia mu nyuma tshia bantu 144 000, ‘[bavuabu batue tshimanyinu] ba mu bisamba bionso bia bena Isalele.’ Pashishe, Yone wakamona ‘musumba munene wa bantu ba bisamba bionso, ba bisa bionso, matunga ne miakulu yonso. Bavua bimane kumpala kua nkuasa wa bukalenge ne kua Muana wa Mukoko, bavuale nkanzu mitoke, ne malala mu bianza.’ (Buakabuluibua 7:4, 9, MMM) Nenku, ki mbabenge tshisamba anyi muakulu nansha umue mu tshisumbu tshia bena Kristo lelu to. Bantu ba bisamba bionso badi ne ditekemena dia kupanduka ku “dikenga dinene” ditshilualua ne dia kunua mâyi a ku “mpokolo ya mayi a muoyo” mu buloba bupiabupia.​—Buakabuluibua 7:14-17, MMM.

 Bipeta bimpe

13-15. (a) Mmunyi mutudi mua kutshimuna dishilangana dia dikoba ne bibidilu? (b) Tela bilejilu bia malu malenga adi mua kumueneka patudi tulejangana bulunda.

¹³ Yehowa mmutumanye bimpe anu mutu tatu mulenga mumanye bana bende. Bia muomumue, patudi tufika ku dimanya bakuabu mu diangata bibidilu ne bilele biabu ne mushinga, dishilangana didi dienda dikepela. Dishilangana dia bisa didi dijimina, ne bulunda, dinanga ne buobumue bidi bikola. (1 Kolinto 9:19-23) Bualu ebu budi bumuenekela bimpe menemene mu mudimu wa ba-misionere badi mu matunga a ku-ba-bende. Badi bangata bantu ba muaba udibu basombele ne mushinga, ne ke bua tshinyi ba-misionere kabatu banenga ne kulamatangana ne bena mu bisumbu bia muaba udibu babatume.​—Filipoi 2:4.

¹⁴ Bipeta bimpe bia dibenga kuikala ne kansungasunga bidi bimueneka mu matunga mavule. Aklilu (udi mufumine mu ditunga dia Éthiopie) uvua udiumvua nkaya mu Londres, tshimenga tshikulu tshia ditunga dia Grande-Bretagne. Tshiakalela lutatu luende lua didiumvua nkaya tshivua bualu buvuaye umona kudi bantu bu dibenga kusankidila bantu badi bafume mu matunga makuabu, bualu butu buenzeka lelu mu bimenga binene bia bungi bia ku Mputu. Aklilu wakamona dishilangana dinene pakabuelaye mu bisangilu ku Nzubu wa Bukalenge wa Bantemu ba Yehowa! Bavuamu bakamuakidila ne disanka, ne mu matuku makese patupu wakibidilangana nabu. Wakavudija dimanya ne dianyisha diende bua Mufuki ne lukasa. Mutantshi eu yeye kubanga kukeba mushindu wa kumuangalaja lumu luimpe lua Bukalenge kudi bantu bakuabu bavua mu tshitupa atshi. Bushuwa, dimue dituku pavua muanetu uvua mu buambi ne Aklilu mumuebeje bua bipatshila bivuaye mudifundile mpindieu, Aklilu wakandamuna ne lukasa luonso ne: uvua ujinga bua kuikala dimue dituku mu tshisumbu muvuabu bakula muakulu wende wa Amharique. Pakumvua bakulu ba mu tshisumbu tshia muakulu wa Anglais bualu ebu, bakenza ne lukasa muyuki wa patoke wa malu a mu Bible mu muakulu wa ba Aklilu. Benyi ba bungi ne Bantemu ba muaba au bakalua bua kutua tshisangilu tshia patoke tshia kumpala mu muakulu wa Amharique nyama ku mikolo. Lelu eu, bena Éthiopie ne bantu bakuabu mu tshitupa atshi badi badisangisha mu buobumue mu tshisumbu tshidi tshienda tshidiunda tshia muakulu wa Amharique. Bantu ba bungi mu tshitupa atshi kabena bamona tshintu tshidi mua kubapumbisha bua kutambula bua kuleja ne: badi ku luseke lua Yehowa to.​—Bienzedi 8:26-36.

¹⁵ Ngikadilu ne bibidilu bia bantu kabitu muomumue to. Ki mbiobi bidi babandisha anyi bipuekesha bantu to; tshidibi ndishilangana patupu. Pavuabu batangila mushindu uvua basadidi bapiabapia ba Yehowa batambula mu tshidila tshia Malte, Bantemu ba mu tshidila etshi bavua batumpika ne disanka pavua eku benyi bavua bafume mu Grande-Bretagne bapuekesha bisonji bia disanka. Bantemu ba mu Malte ne ba mu Grande-Bretagne bonso bakaleja disanka diabu mu mishindu mishilangane, ne dinanga diabu dikole bua Yehowa diakakolesha malanda a buwetu buabu bua bena Kristo.​—Musambu 133:1; Kolosai 3:14.

Tutshimunayi kansungasunga

16-18. Londa bualu kampanda budi buleja mushindu udi bena Kristo mua kutshimuna kansungasunga mu tshisumbu.

¹⁶ Padi dinanga ditudi nadi bua Yehowa ne bua bana betu bena Kristo dikola, tudi mua  kutamba kuidikija Yehowa mu mushindu utudi tuangata bantu bakuabu. Tudi mua kutshimuna kansungasunga kuonso katuvua mua kuikala naku kumpala bua bisamba kampanda, dikoba anyi bibidilu bikuabu. Tangila tshilejilu tshia Albert, uvua musalayi mu tshiluilu tshia Grande-Bretagne mu Mvita Mibidi ya Buloba bujima uvuabu bakuate kudi bena Japon pavuabu bakuate ditunga dia Singapour mu tshidimu tshia 1942. Pashishe wakenza bidimu bitue ku bisatu mu mudimu wa kuela njanja ivua mishipeshe bantu bapite bungi, pabuipi ne tshiakalua kumanyika bu tshilamba tshia pa musulu wa Kwai. Pakamulekelabu ku ndekelu kua mvita, uvua ne kilo 32, mutshibuke mufuba wa tshibanga ne wa diulu, wela munda mashi ne muikale ne tubaba ne malaria. Bantu ba bungi bavuaye nabu mu buloko bavua mu lutatu lupite bukole ne ba bungi bakafua. Bua malu a tshikisu avua Albert mumone ne mupete, wakalua muntu wa tshiji pakapinganaye kuabu, kayi musue malu a Nzambi anyi a bitendelelu to.

¹⁷ Irene mukaji wa Albert wakalua Ntemu wa Yehowa. Bua kumusankisha, Albert wakabuela mu bisangilu bikese bia Bantemu ba Yehowa mu tshisumbu tshia muaba uvuabu basombele. Nsonga mukuabu muena Kristo diende Paul muikale wenza mudimu wa ku dîba ne ku dîba wakalua kumona Albert bua kulonga nende Bible. Albert e kulua kujingulula ne: Yehowa utu utangila bantu bilondeshile mitshima yabu. Wakalambula muoyo wende kudi Yehowa ne wakatambula.

¹⁸ Pashishe Paul wakaya kusombela mu tshimenga tshia Londres, kulongaye tshiena-Japon ne kubuelaye mu tshisumbu tshia muakulu wa bena Japon. Pakalombaye bua kuya ne bamue bana betu bavua bafumine ku Japon mu tshisumbu tshivuaye kumpala, bana betu bakavuluka muvua Albert wangata bantu bonso bavua bafume mu Japon. Katshia wapingana mu Grande-Bretagne, Albert uvua wepuka bua kumonangana mpala ne mpala ne muntu yonso wa mu Japon. Nunku bana betu bavua badikonka mushindu uvuaye mua kupita ne bualu ebu. Kabavua ne bua kupampakana to, Albert wakakidila benyi aba ne dinanga dia buwetu.​—1 Petelo 3:8, 9.

“Tudialabajayi”

19. Mmubelu kayi wa mupostolo Paulo udi mua kutuambuluisha bituikala ne tshilele tshia kusunguluja bantu?

¹⁹ Solomo Mukalenge wa meji wakafunda ne: ‘Kuleja kansungasunga kakuena kuimpe.’ (Nsumuinu 28:21) Bitu bipepele bua kulamata bantu batudi bamanye bimpe. Kadi misangu mikuabu  tutu ne tshilele tshia kubenga kuangata bantu batudi katuyi bamanye bimpe ne mushinga. Kusunguluja bantu nunku kakuena kuakanyine musadidi wa Yehowa to. Bushuwa, tudi ne bua kulonda mubelu mutoke wa Paulo wa ‘kudialabaja,’ mmumue ne: kualabaja dinanga dietu kudi bena Kristo netu ba bisamba bikuabu.​—2 Kolinto 6:13, NW.

20. Mmu malu kayi a mu nsombelu wetu mutudi ne bua kuidikija Yehowa Nzambi wetu udi kayi kansungasunga?

²⁰ Nansha tuetu ne diakalenga dia kuya mu diulu anyi ditekemena dia kushala ne muoyo kashidi pa buloba, dibenga kuikala ne kansungasunga didi dituambuluisha bua kuikala mu buobumue mu tshisumbu tshimue tshia mikoko, bikale ne Mulami umue. (Efeso 4:4, 5, 16) Tuetu tuditatshisha muetu muonso bua kuidikija Yehowa Nzambi wetu udi kayi kansungasunga, nebituambuluishe mu mudimu wetu wa bena Kristo, mu dîku dietu ne mu tshisumbu, bulelela, nebituambuluishe mu nsombelu wetu mujime. Mmushindu kayi? Tshiena-bualu tshidi tshilonda netshileje bualu ebu.

[Mêyi adi kuinshi]

Newandamune munyi?

• Mmunyi muvua Yehowa muleje ne: kavua ne kansungasunga kudi Lahaba ne bena Gibeona?

• Mmunyi muvua Yezu muleje ne: kavua ne kansungasunga pavuaye ulongesha?

• Ntshinyi tshidi mua kutuambuluisha bua kutshimuna disunguluja dionso dia dikoba ne dia bibidilu?

[Nkonko ya dilonga]

[Tshimfuanyi mu dibeji 13]

Bena Isalele badi babanga kukuata maloba a Kanâna

[Tshimfuanyi mu dibeji 15]

Yezu kakadikanda bua kuyisha mukaji muena Samalea

[Tshimfuanyi mu dibeji 16]

Tshisangilu tshia patoke mu muakulu wa Amharique mu Grande-Bretagne

[Tshimfuanyi mu dibeji 16]

Dinanga dia Albert bua Yehowa diakamuambuluisha bua kutshimuna kansungasunga