Tukebayi malu mimpe adi munda mua bantu bonso

‘Nzambi wanyi, umvuluke bua [malu mimpe].’​—NEHEMIYA 13:31.

1. Mmunyi mudi Yehowa wenzela bantu bonso malu mimpe?

 KULU kuoku kushale kufue matuku a bungi, bantu batu basanka padi munya utema. Bantu badi basanguluka ne bumvua bimpe. Bia muomumue, kunyima kua bikondo bile bia munya mukole ne munanga, mvula nansha mukese patupu utu ufila tshitalela tshidi tshifila bukole ne disulakana. Mufuki wetu wa dinanga Yehowa mmutupeshe dipa dilenga dia mvula ne munya. Yezu wakakula bua kalolo kadi naku Nzambi pakalongeshaye ne: ‘Suayi badi nenu lukuna, lombelayi badi banukengesha Nzambi; nunku nenuikale bana ba Tatu wenu udi mu diulu; bualu bua yeye utu wabandishila bantu babi ne bantu bimpe dîba, yeye kabidi utu watumina bantu bakane ne bantu babi mvula.’ (Matayo 5:43-45) Bushuwa, Yehowa udi wenzela bantu bonso malu mimpe. Basadidi bende badi ne bua kuenza muabu muonso bua kumuidikija padibu bakeba malu mimpe adi munda mua bantu bakuabu.

2. (a) Bua tshinyi Yehowa udi wenzela bantu bimpe? (b) Ntshinyi tshidi Yehowa umona padiye utangila mutudi tuangata malu mimpe adiye utuenzela?

² Bua tshinyi Yehowa udi wenzela bantu bimpe? Katshia Adama wenza mpekatu, Yehowa katu muanji kulekela bua kukeba malu mimpe adi munda mua bantu to. (Musambu 130:3, 4) Mmulongolole bua kupesha tshiakabidi bantu bena butumike muoyo mu Mparadizu. (Efeso 1:9, 10) Bua bulenga buende bukena butuakanyine mmutupesha ditekemena dia kupikudibua ku mpekatu ne dipanga bupuangane ku butuangaji bua Dimiinu dilaya. (Genese 3:15; Lomo 5:12, 15) Patudi tuitaba mulambu udi upikula, tudi tubuela mu njila udi ufikisha ku bupuangane.  Yehowa udi mpindieu utangila yonso wa kutudi bua kumona mushindu udiye wangata kalolo kadiye mutuleje. (1 Yone 3:16) Udi umona bionso bitudi tuenza bua kuleja dianyisha dietu bua malu mimpe adiye utuenzela. Mupostolo Paulo wakamba ne: ‘Nzambi kêna upanga buakane bua kupuaye muoyo mudimu wenu ne dinanga dinuakaleja bua dîna diende.’​—Ebelu 6:10.

3. Ndukonko kayi lutudi ne bua kuandamuna?

³ Nunku, mmunyi mutudi mua kuidikija Yehowa pa bidi bitangila dikeba malu mimpe adi munda mua bakuabu? Tumonayi mandamuna a lukonko elu mu nseka inayi ya mu nsombelu: (1) mu mudimu wa buambi, (2) mu dîku, (3) mu tshisumbu ne (4) mu malanda etu ne bantu bakuabu.

Mu mudimu wa kuyisha ne wa kuvuija bantu bayidi

4. Mmunyi mudi kuenza mudimu wa buambi kuleja ne: tudi tukeba malu mimpe adi munda mua bantu?

⁴ Pavua Yezu wandamuna nkonko ya bayidi bende pa bidi bitangila diumvuija dia lusumuinu lua maminu mimpe ne lupela, wakamba ne: ‘Budimi budi bantu ba pa buloba.’ Tuetu bayidi ba lelu ba Kristo, tudi bajadike bulelela ebu patudi tuenza mudimu wa buambi. (Matayo 13:36-38; 28:19, 20) Mudimu wetu wa buambi udi ulomba bua kumanyisha ditabuja dietu patoke. Mushindu udi Bantemu ba Yehowa bamanyike bimpe bua mudimu wabu wa kuyisha ku nzubu ne ku nzubu ne mu misesu udi uleja patoke ne: badi bakeba ne tshisumi bantu bonso badi bakanyine mukenji wa Bukalenge. Bulelela, Yezu wakamba ne: ‘Panuabuela mu tshimenga anyi mu musoko mukese, nukebe bantu bimpe badimu.’​—Matayo 10:11; Bienzedi 17:17; 20:20.

5, 6. Bua tshinyi tudi tutungunuka ne kuya kutangila bantu kumbelu njila ne njila?

⁵ Patudi tuya ku nzubu ya bantu bua musangu wa kumpala, tudi tutangila mushindu udibu bangata mukenji utudi tubatuadila. Misangu mikuabu tudi tupeta muntu udi witaba bua kututeleja ku nzubu kampanda, padi eku anu ku nzubu umue umue au, mukuabu wela dîyi ne: “Kabiena bitusankisha to,” muyuki ukosekela amu muaba au. Padi dibenga kuteleja dia muntu umue difikisha mukuabu bua kubenga kututeleja pende tutu tumvua bibi be! Kadi ntshinyi tshitudi mua kuenza bua kutungunuka ne kukeba malu mimpe adi munda mua bantu bonso?

⁶ Patudi tupingana kabidi kumbelu aku mu  diyisha tshitupa atshi, tudi mua kupeta mushindu wa kuyikila buludiludi ne muntu uvua mukose muyuki wetu wa musangu mushale. Tuetu bavuluke bualu buvua buenzeke musangu mushale nebituambuluishe bua kudilongolola. Muntu uvua mubenge kuteleja eu uvua mua kuikala mubenge ne meji mimpe, muikale wela meji ne: uvua ne bukenji bua kukandika mukuabu au bua kuteleja mukenji wa Bukalenge. Lungenyi luende luvua pamu’apa lunyanga kudi malu a mafi adiye mumvue bamba bua bitudi tuenza. Kadi bualu abu kabuena butupumbisha bua kutungunuka anu ne kuyisha lumu luimpe lua Bukalenge ku nzubu aku, mu dikeba bua kumumvuija malu bimpe mushindu udiwu ne budimu to. Tudi basue kuambuluisha bantu bonso bua bafike ku dimanya dilelela dia Nzambi. Nanku imue misangu Yehowa udi mua kukoka muntu au kudiye.​—Yone 6:44; 1 Timote 2:4.

7. Ntshinyi tshidi mua kutuambuluisha bua kutekemena bipeta bimpe patudi tuyukila ne bantu?

⁷ Mu mibelu ivua Yezu mupeshe bayidi bende, wakadimuija kabidi ne: bena mu mêku abu bavua ne bua kubaluisha. Kavuaku muambe ne: “Bualu ndi muvue kupandulula muana wa balume ne tatuende, wa bakaji ne mamuende, mukaji wa muana ne mamuende muenu” anyi? Yezu wakamba kabidi ne: “Baluishi ba muntu nebikale bena mu diku diende bine.” (Matayo 10:35, 36, MMM) Kadi nsombelu ne ngikadilu bitu bishintuluka. Malu bu mudi disama dia tshimpitshimpi, lufu lua mulela kampanda, bipupu, tunyinganyinga ne malu makuabu bungi kabuyi kubala atu ashintulula mushindu udi bantu bangata mudimu wetu. Tuetu bikale ne lungenyi lubi lua ne: bantu batudi tuyisha kabakuitaba, tudiku bushuwa tukeba malu mimpe adi munda muabu anyi? Bua tshinyi kubenga kuya kubatangila kabidi kumbelu musangu mukuabu? Tudi mua kubasangana bashintuluke. Misangu mikuabu ki ng’anu malu atudi tuamba adi mua kushintuluisha muntu, kadi mushindu muine utudi tuamba. Tuetu basambile Yehowa ne muoyo mujima kumpala kua kutuadija kuyisha, kakuyi mpata nebituambuluishe bua kutekemena bipeta bimpe ne kuyisha mukenji wa Bukalenge mu mushindu udi mua kusankisha bantu bonso.​—Kolosai 4:6; 1 Tesalonike 5:17.

8. Ntshinyi tshidi mua kuenzeka padi bena Kristo bakeba malu mimpe adi munda mua bena dîku diabu badi kabayi bena Kristo?

⁸ Mu bimue bisumbu bantu ba bungi ba mu dîku dimue badi benzela Yehowa mudimu. Misangu mivule tshivua tshitambe kusaka bana ba mu dîku edi bua kuikala ne dianyisha ne kanemu ne kushintulula mutshima wabu tshivua disuminyina dia muntu mukulumpe kampanda wa mu dîku edi udi ne nsombelu muimpe wa mu dîku ne wa mu dibaka. Dilonda mubelu wa mupostolo Petelo ndiambuluishe bakaji bena Kristo ba bungi bua kupeta babayabu “kakuyi diyi.”​—1 Petelo 3:1, 2, MMM.

Mu dîku

9, 10. Mmushindu kayi uvua Yakoba ne Yosefe bakebe malu mimpe avua munda mua bena dîku diabu?

⁹ Malanda makole adi asuikakaja bena dîku pamue adi atupesha munga mushindu utudi mua kukeba malu mimpe adi munda mua bakuabu. Tangila dilongesha ditudi tupeta mu malanda a Yakoba ne bana bende ba balume. Mu Genese nshapita wa 37, mvese 3 ne 4, Bible udi uleja muvua Yakoba mutambe kunanga Yosefe. Bana babu ne Yosefe bakamumvuila mukawu, kufikabu too ne ku dimuelela tshifufu bua kumushipa. Kadi tangila malu akenza Yakoba ne Yosefe bidimu panyima. Bonso babidi bakakeba malu mimpe avua munda mua bena mu dîku diabu.

 ¹⁰ Yosefe wakakidila bana babu bimpe pavuaye mutangidi wa malu a biakudia mu Ejipitu mu tshikondo tshia nzala mikole. Nansha muvuaye kayi mudimanyishe kudibu diakamue, wakenza bua ne: babalame bimpe ne bikale ne biakudia bia kupinganabu nabi kudi tatuabu ukavua mukulakaje. Bulelela, nansha muvuabu bamukine, Yosefe wakabenzela malu mimpe. (Genese 41:53–42:8; 45:23) Bia muomumue, pakavua Yakoba pa kufua, wakalaya bana bende bonso ba balume mabenesha a tshiprofete. Nansha muvua malu mabi avuabu benze makepeshishe amue mabenesha avuabu ne bua kupeta, muntu nansha umue kavua mupangile bua kupeta bumpianyi mu buloba. (Genese 49:3-28) Mmushindupu kayi mulenga nunku uvua Yakoba muleje dinanga dikole!

11, 12. (a) Ntshilejilu kayi tshia buprofete tshidi tshileja mushinga wa kutangila malu mimpe adi munda mua bena mu dîku? (b) Mbualu kayi butudi tulongela ku tshilejilu tshia tatu wa mu lusumuinu lua Yezu lua muana mujimine?

¹¹ Lutulu luvua Yehowa muleje tshisamba tshia Isalele tshipange lulamatu ludi luleja kabidi mushindu udiye ukeba malu mimpe adi munda mua basadidi bende. Yehowa wakaleja dinanga diende dikole ku diambuluisha dia tshilejilu tshia nsombelu uvua mu dîku dia muprofete Hoshea. Gomê mukaji wa Hoshea wakenda masandi misangu mivule. Nansha nanku, Yehowa wakambila Hoshea ne: ‘Ya kabidi, nanga mukaji udi munangibue kudi mulunda wende ne udi muena masandi, bu mudi Yehowa unanga bena Isalele, nansha buobu bafila mitshima yabu kudi nzambi mikuabu ne bananga mikata ya tumuma tua mvinyo.’ (Hoshea 3:1) Bua tshinyi Yehowa wakamuambila nunku? Yehowa uvua mumanye ne: munkatshi mua bantu aba bavua bapambuke mu njila yende, bamue bavua mua kuanyisha lutulu luende. Hoshea wakamba ne: ‘Pashishe, bena Isalele nebapingane ne nebakebe Yehowa Nzambi wabu ne Davidi mukalenge wabu; nebalue kudi Yehowa ne ditshina, ne ku buimpe buende mu matuku adi alua.’ (Hoshea 3:5) Kakuyi mpata, etshi ntshilejilu tshimpe tshitudi mua kuelela meji patudi ne ntatu mu mêku etu. Tuetu batungunuke ne kukeba malu mimpe adi munda mua bakuabu bena mu dîku dietu, netufile tshilejilu tshimpe tshia lutulu.

¹² Lusumuinu lua Yezu lua muana mujimine ludi lutumvuija kabidi mushindu utudi mua kukeba malu mimpe adi munda mua bena mu dîku dietu. Muana muakunyi wakapingana kumbelu panyima pa mumane kulekela nsombelu wende wa buenzavi. Tatu wakamumvuila luse lua bungi. Ntshinyi tshiakenza tatu pakabanga muanende  wa kumpala uvua kayi muanji kumbuka kumbelu kudilakana? Tatu wakambila muanende muanabute ne: ‘Muananyi, wewe udi nanyi [matuku onso], bintu bianyi bionso mbiebe.’ Muaba eu tatu kavua umutandisha to, kadi uvua umujadikila dinanga diende kudiye. Wakamba kabidi ne: ‘Biakadi bimpe bua tuetu kusanka, bualu bua muanenu eu wakadi mufue, udi ne muoyo kabidi; wakadi mujime, wakumueneka.’ Tudi mua kutungunuka ne kukeba malu mimpe adi munda mua bakuabu mu mushindu wa muomumue.​—Luka 15:11-32.

Mu tshisumbu tshia bena Kristo

13, 14. Ng’umue mushindu kayi utudi mua kulonda mukenji wa butumbi wa dinanga mu tshisumbu tshia bena Kristo?

¹³ Tuetu bena Kristo tudi basue kutumikila mukenji wa butumbi wa dinanga. (Yakobo 2:1-9) Bulelela, tudi mua kuitaba bena mu tshisumbu tshietu badi kabayi ne biuma bu bietu. Kadi tudiku ne ‘matapulukangana’ bua makoba, bibidilu nansha ntendelelu utuvua kale anyi? Biobi bikale nanku, mmunyi mutudi mua kulonda mubelu wa Yakobo?

¹⁴ Diakidila ne disanka bonso badi babuela mu bisangilu bia tshisumbu didi dijadika ne: tudi ne muoyo wa kalolo. Patudi tuyikila ne bapiabapia badi balua ku Nzubu wa Bukalenge, tudi tubambuluisha bua kumbusha bundu buonso. Bushuwa, bamue badi babuele mu bisangilu bua musangu wa kumpala batu bamba ne: “Bantu bonso bavua bena malu malenga. Bivua bienze anu bu ne: bantu bonso bakavua bammanye. Mvua mudiumvue bimpe.”

15. Mmunyi mudi baledi mua kuambuluisha bana bua kuikala bayukila ne bantu bakulumpe?

¹⁵ Mu bimue bisumbu, padi bisangilu bijika tutu tumona bansonga badiunguija munda anyi pambelu pa Nzubu wa Bukalenge, bepuka bua kuikala munkatshi mua bantu bakulumpe. Ntshinyi tshitudi mua kuenza bua kujikija tshilele etshi? Tshia kumpala, baledi badi ne bua kulongesha bana babu kumbelu, kubalongolola bua bisangilu. (Nsumuinu 22:6) Badi mua kubapesha mudimu wa kukeba mikanda mishilangane ikala muntu yonso bua kuya nayi mu bisangilu. Baledi ke badi kabidi ne bukenji bua kukankamija bana babu bua kuyikilaku ndambu ne bantu bakulumpe ne balema ku Nzubu wa Bukalenge. Padi bana bikale ne bualu kampanda bua mushinga bua kuambila bantu ba mushindu’eu bidi bibapesha disanka.

16, 17. Mmunyi mudi bakulumpe mua kukeba malu mimpe adi munda mua bansonga badi mu tshisumbu?

¹⁶ Bana betu bakadi bantu bakole badi ne bua kuikala bayikila ne bana mu tshisumbu. (Filipoi 2:4) Badi mua kuya kudibu bua kubambila mêyi adi abakankamija. Misangu ya bungi kutu amue malu manene atubu baleja mu bisangilu. Bakulumpe badi mua kuebeja bana bikala bisangilu bivua bibasankishe ne bikalaku amue malu avua mabalenge bikole ne adibu mua kutumikila. Bu mudi bana bikale pabu ne muaba mu tshisumbu, bana betu bakuabu badi ne bua kubela kalumbandi bua ntema idibu nayi mu bisangilu ne bua mandamuna adibu bafile anyi bua mudimu kayi wonso udibu benzamu. Malanda adi nawu bana ne bantu bakulumpe mu tshisumbu ne mushindu udibu benza midimu mikese ya kumbelu bidi bileja ne: nebikale mua kuenza midimu minene mu matuku abu a muoyo.​—Luka 16:10.

¹⁷ Padi bamue bansonga bitaba bua kuambula majitu kampanda, badi badiunda bafika too ne  ku dipeta ngikadilu ya mu nyuma idi ibambuluisha bua kupeta majitu makuabu manene. Buobu bikale ne tshintu tshia kuenza, bidi bibambuluisha bua kuepuka ngenzelu idi kayiyi ya meji. (2 Timote 2:22) Midimu eyi idi mua ‘kuteta’ bana betu ba balume badi bipatshila bua kulua basadidi ba midimu. (1 Timote 3:10, MMM) Midimu idibu benza mu bisangilu ne lukunukunu ludibu nalu mu buambi, pamue ne mushindu udibu bambuluisha bantu bonso badi mu tshisumbu bidi bipesha bakulu mushindu wa kumona bidibu bamanye mua kuenza padibu bajinga kubapesha midimu mikuabu.

Tukebayi malu mimpe adi munda mua bantu bonso

18. Mbuteyi kayi budi bakulu ne bua kuepuka padibu balumbuluisha ne bua tshinyi?

¹⁸ Nsumuinu 24:23 udi wamba ne: ‘Ki mbimpe kuleja kansungansunga mu kulumbulula kua bilumbu.’ Meji a mu diulu adi alomba bakulu bua kuepuka kansungansunga padibu balumbuluisha bilumbu mu tshisumbu. Yakobo wakamba ne: “Kadi meji a mu diulu wowo, bangabanga adi makane tshishiki, pashishe adi a bupole, a luse ne muoyo mulenga, muule tente ne luse ne bimuma bimpe, kaayi kansungansunga, kaayi a mpala ibidi.” (Yakobo 3:17, MMM) Bushuwa, padi bakulu bakeba malu mimpe adi munda mua bakuabu, badi ne bua kuikala bajadike ne: dilumbuluisha diabu ki ndinyanga kudi malanda adibu ne muntu au anyi kudi bualu kampanda to. Asafa mufundi wa Misambu wakamba ne: ‘Nzambi udi udimanyika mu muaba wende wa disangisha dia Nzambi, udi ulumbulula bilumbu munkatshi mua nzambi mikuabu [anyi “bantu badi bu nzambi,” mbuena kuamba ne: balumbuluishi]. Nenulumbulule bilumbu ne kulumbulula kubi, nenunemeke mpala ya bantu babi musangu bule munyi?’ (Musambu 82:1, 2) Nanku, bakulu bena Kristo badi ne bua kuepuka disungulujangana mu bualu buonso budi butangila mulunda anyi mulela kampanda. Mushindu’eu ke udibu balama buobumue bua tshisumbu ne benza bua nyuma wa Yehowa kuenzaye mudimu bimpe.​—1 Tesalonike 5:23.

19. Mmu mishindu kayi mutudi mua kukeba malu mimpe adi munda mua bakuabu?

¹⁹ Patudi tukeba malu mimpe adi munda mua bana betu, tudi tuleja lungenyi luvua nalu Paulo pakafundilaye tshisumbu tshia bena mu Tesalonike. Wakamba ne: ‘Tudi ne ditekemena mu Mukalenge bua bualu buenu ne: nudi nuenza, ne nenuenze malu atudi tunuelela mikenji.’ (2 Tesalonike 3:4) Nebikale bitupepelele bua kulengulula bilema bia bakuabu patudi tukeba malu mimpe adi munda muabu. Netuikale tukeba miaba itudi mua kuelela bana betu kalumbandi, ne netuepuke lungenyi lua dibabipisha. Mupostolo Paulo wakamba ne: ‘Badi bakeba munkatshi mua balami bua kusangana mulami yonso muikale muntu udibu mua kueyemena.’ (1 Kolinto 4:2) Lulamatu lua balami ba tshisumbu ne lua bana betu bonso bena Kristo ludi lubavuija banangibue bikole kutudi. Lulamatu elu ludi lutusemeja pabuipi nabu ne ludi lukolesha malanda etu a bena Kristo. Ludi lutusaka bua kuangata bana betu anu muvua Paulo ubangata. Badi bikale ‘benzejanganyi [netu] ba mudimu bua bukalenge bua Nzambi’ ne ‘basambi’ kutudi. (Kolosai 4:11) Nunku tudi tuleja lungenyi lua Yehowa.

20. Mmabenesha kayi apeta bantu badi bakeba malu mimpe adi munda mua bantu bonso?

²⁰ Tudi tuambulula ne dishindika disambila dia Nehemiya dia ne: ‘Nzambi wanyi umvuluke [bua malu mimpe].’ (Nehemiya 13:31) Ndisankapu bungi kayi ditudi nadi bua mudi Yehowa ukeba malu mimpe adi munda muetu! (1 Bakelenge 14:13) Tuenzayi muomumue mu malanda etu ne bakuabu. Tuetu benze nunku netuikale ne ditekemena dia kupikudibua ne dia muoyo wa tshiendelele mu buloba bupiabupia bukadi pabuipi menemene.​—Musambu 130:3-8.

Newandamune munyi?

• Bua tshinyi Yehowa udi wenzela bantu malu mimpe?

• Mmunyi mutudi mua kukeba malu mimpe adi munda mua bakuabu

• mu mudimu wetu wa buambi?

• mu dîku dietu?

• mu tshisumbu tshietu?

• mu malanda etu ne bantu bonso?

[Nkonko ya dilonga]

[Tshimfuanyi mu dibeji 18]

Nansha muvua bana babu bamukine kumpala, Yosefe wakakeba malu mimpe avua munda muabu

[Tshimfuanyi mu dibeji 19]

Dibenga kuteleja dia bantu kadiena ditupangisha bua kukeba bua kuambuluisha bantu bonso to

[Tshimfuanyi mu dibeji 20]

Nansha muvuabu benze malu mabi ku kale, Yakoba kakapala nansha umue wa ku bana bende mabenesha

[Tshimfuanyi mu dibeji 21]

Tuakidile bantu bonso ne disanka mu bisangilu bia bena Kristo