Bande wa video udi ulenga mitshima ya bansonga

BAVUA bakankamije bansonga ba bungi bua kukonkononabu ngikadilu wabu bimpe bimpe pakatangilabu bande wa video wa Les jeunes s’interrogent​—Comment me faire de vrais amis? * Mu bande eu mudi mibelu milenga ya mu Bible, malu adi bansonga bena Kristo nkayabu balonde ne dinaya dimpe dia lelu dishindamene pa muyuki wa mu Bible wa Dina. (Genese nshapita wa 34) Mêyi adi atangila bande eu adi alonda aa mmafumine mu ditunga dia Mexique.

Martha udi wamba ne: “Malu adi mu bande eu akalenga mutshima wanyi bikole be. Bidi bisua kumueneka bu se: bande eu uvua mungenzela anu meme. Mvua ngela meji ne: bivua bikengela patupu bua balongeshi betu ne balongi betu kumanyabu ne: ndi Ntemu wa Yehowa. Ngakapangila mua kujadika bualu ebu pa kubayisha. Ndi ne dianyisha bua malu onso adi Yehowa utuambila, nangananga padiwu alenga mitshima yetu bikole anu bu mudi malu adi mu bande eu.”

Juan Carlos udi wamba ne: “Bande eu udi weleshangana meji bikole. Mundi nsonga, mvua muenze bimue bilema bia buena bivua bamue bantu ba mu dinaya adi benze. Kukadi bidimu ndambu, mvua ne nsombelu wa mpala ibidi, kadi ngakajingulula ne: nsombelu wa buena eu udi mua kupatula bipeta bibi. Kunyima kua meme mumane kutangila bande eu, ndi mudisuike bua kushala ne lulamatu kudi Yehowa.”

Sulem udi uleja ne: “Pangakatangila bande eu, muoyo wa munda wakansama. Kumpala, ngakalekela kubala Bible, ne tshivua kabidi ntamba kusambila Yehowa to. Pangateleja malu akamba bansonga mu bande au, mutshima wanyi wakansaka bua kutuadija kulonga Bible tshiakabidi ne kusambila Yehowa.”

Lelu bansonga batu bapeta ntatu ya bungi, ne balunda badibu basungula badi mua kubasaka bikole ku dienza amue malu. (Musambu 26:4; Nsumuinu 13:20) Bande wa video wa Les jeunes s’interrogent​—Comment me faire de vrais amis? udi wambuluisha bansonga ba bungi bua kuangata mapangadika mimpe mu tshilumbu etshi.

[Mêyi adi kuinshi]