Dinanga dia mushinga mutambe bunene

MIABA ya bungi mu Mifundu ya tshiena-Gelika anyi Dipungila Dipiadipia, muaku “dinanga” nkudimuinu wa muaku wa tshiena-Gelika agape.

Mukanda wa Étude perspicace des Écritures * udi umvuija muaku eu ne: “[Agape] ki ndinanga didi muntu uleja mukuende anu bualu mmumulamate, bu mutu bantu ba bungi bela meji to, kadi ndinanga dimpe dileja bantu bonso anu mudi muntu nkayende muanyishe ne muoyo wende bualu udi umona ne: ndîyi dia kulonda, mbujitu buende ne mbualu buanyishibue, ukeba ne muoyo umue bua kuenzela bakuabu bimpe bilondeshile malu adi makanyine kuenza. Dinanga dia agape kadiena ditangila lukuna ludi pankatshi pa bantu, kadiena dilulekela lufikisha bantu ku dishipa mêyi makane ne ku dikina bantu badi babakine pabu.”

Agape ndinanga dikole. Mupostolo Petelo wakamba ne: “Nuikalangane ne dinanga dikole munkatshi muenu.” (1 Petelo 4:8) Nunku tudi mua kuamba ne: dinanga dia agape didi kabidi bualu bua mutshima, ki mbua lungenyi nkayalu to. Bua tshinyi kubenga kubala imue mvese idi ileja bukole ne bunene bua dinanga dinene edi? Mvese idi ilonda eyi idi mua kukuambuluisha: Matayo 5:43-47; Yone 15:12, 13; Lomo 13:8-10; Efeso 5:2, 25, 28; 1 Yone 3:15-18; 4:16-21.

[Mêyi adi kuinshi]