Dinanga ntshintu tshidi tshikengedibua

BANTU bonso, nansha bikale ba bukole kayi, nansha bakolele muaba kayi ta bikale ba dikoba anyi tshisa kayi, badi dijinga ne dinanga. Padi dijinga edi kadiyi dikumbaja, kabena ne disanka to. Mukebuludi mukuabu wa malu a diondopangana wakafunda ne: “Dinanga ne malanda mashême ke malu manene adi mua kutusamisha ne kutupa makanda a mubidi, kutubungamijija ne kutupa disanka, kutukengeshisha ne kutuondopa. Bu kuoku kuikale buanga buvua mua kuenzelangana bionso ebi, baminganga bonso ba mu ditunga bavua mua kuikala babufundila babedi babu. Bivua mua kuikala tshilema tshinene bu munganga mubenge kufundila mubedi buanga abu.”

Kadi lelu, nangananga tudiomba ne bantu badibu bangata bu bitembelu, batu batamba kuzangika bubanji, bukole, lumu ne malu adi atangila diangatangana dia bakaji ne balume pamutu pa dijinga didi nadi bantu dia kuikala ne malanda mimpe ne a musangelu. Balongeshi ba bungi batu batamba kuimanyina pa bipatshila ne midimu ya bianza, babala diakalenga dia muntu bilondeshile bipatshila bidiye mukumbaje ne muanzu udiye nawu. Bulelela, dilonga tulasa ne dikala ne mamanya bidi ne mushinga, kadi muntu udiku ne bua kuipatshila anu malu aa ne lungenyi luende luonso kayiku dijinga ne dîku ne balunda anyi? Mufundi kampanda wa kale uvua mubandidi wa bantu wa meji a bungi wakafuanyikija muntu wa mamanya a bungi kadi kayi dinanga ne “Tshipanza tshidi tshienza mutoyi, bu ludibu ludila.” (1 Kolinto 13:1, Mukanda wa Mvidi Mukulu [Katolike, MMM]) Bantu ba nanku badi mua kupeta bubanji bua bungi, badi mua kupeta lumu, kadi kabena mua kuikala ne disanka dilelela nansha.

Yezu Kristo, muntu uvua umvuila bantu bikole ne mutambe kubananga, wakatamba kuakula menemene mu dilongesha diende bua kunanga Nzambi ne muntu netu. Wakamba ne: ‘Unange Mfumu [Nzambi] webe ne muoyo webe mujima, ne lungenyi luebe luonso, ne meji ebe onso. Unange muntu nebe muudi mudinange.’ (Matayo 22:37-39, MMM) Anu aba bavua balonda mêyi aa ke bavua ne bua kuikala bayidi ba Yezu menemene. Pashishe wakamba ne: “Bonso nebanumanye munudi balongi banyi ku dinanga dinuikala banangangane.”​—Yone 13:35, MMM.

Mmushindu kayi udi muntu mua kukuama dinanga lelu’eu? Mmushindu kayi udi baledi mua kulongesha bana babu dinanga? Tshiena-bualu tshidi tshilonda tshidi tshiandamuna nkonko eyi.

[Bimfuanyi mu dibeji 3]

Mu bulongolodi ebu bua lukuka, mbualu bukole bua kukuama dinanga