Malu a mu nsombelu

Disadila bakuabu didi dikepesha dikenga

MALONDA KUDI JULIÁN ARIAS

Mu tshidimu tshia 1988, pamvua ne bidimu 40, mudimu wanyi uvua umueneka kauyi mua kunyanguka to. Mvua mulombodi wa kumpanyi kampanda uvua mu tshimenga kansanga. Kumpanyi eu uvua kabidi mu matunga a bungi. Ku mudimu wanyi mvua ne vuatire wa mushinga mukole, bavua bamfuta makuta a bungi, ne mvua ne biro bilenga munkatshi mua tshimenga tshia Madrid, mu ditunga dia Espagne. Bena kumpanyi au bakajinga too ne bua meme kulua mulombodi wende mu ditunga dijima. Kadi tshivua mumanye ne: nsombelu wanyi ukavua pa kushintuluka bikole to.

DIMUE dituku mu tshidimu atshi, munganga wanyi wakangambila ne: mvua nsama disama dia sclérose en plaques, disama ditu kadiyi ne buanga. Biakantonda bikole be. Pashishe, pamvua mbala tshidi disama dia sclérose en plaques mua kuenzela muntu, buôwa buakankuata. * Bivua bisua kumueneka ne: mvua ne bua kushala ne lutatu lukole mu matuku anyi onso a muoyo. Mmunyi mumvua mua kudisha mukajanyi Milagros ne Ismael muananyi uvua ne bidimu bisatu? Mmunyi mutuvua mua kupita ne nsombelu au bimpe? Pantshivua nkeba mandamuna a nkonko eyi, bualu bukuabu bubi buakangenzekela.

Bu ngondo mujima kunyima kua munganga wanyi mumane kungambila malu avua atangila disama dianyi, mfumuanyi wa mudimu wakambikila mu biro biende, kungambilaye ne: kumpanyi uvua dijinga ne bantu bavua ne “tshimuenekelu tshimpe.” Ne muntu uvua ne disama didi ditekesha mubidi (nansha diodi ditshidi ku ntuadijilu)  kavua ne tshimuenekelu atshi to. Nunku anu pine apu, mfumuanyi au wakangipata ku mudimu. Diakamue, mudimu wanyi wakajika.

Pamvua ne bena dîku dianyi, mvua ngenza bua kuikala ne dikima, kadi mvua musue kusomba pa nkayanyi ne kuelangana meji bua disama divua dinkuate adi ne bua matuku anyi atshivua alua. Ngakaluangana ne tunyinganyinga tukole tumvua natu. Bualu buakatamba kuntonda buvua bua se: ngakalua ku mêsu kua bena mu kumpanyi wetu bu muntu uvua kayi ne tshivuaye mua kuenza.

Ndi mpetela bukole mu butekete

Diakalenga, pamvua ne tunyinganyinga atu, ngakapetela bukole ku bintu bia bungi. Mvua mulue Ntemu wa Yehowa kukavua bidimu bitue ku 20. Nunku ngakasambila bikole, kuambila Yehowa malu avua mu mutshima wanyi bua mumvua tshiyi mumanye tshivua mua kungenzekela lelu anyi makelela. Mukajanyi (udi muikale pende Ntemu wa Yehowa) wakankuatshisha bikole, ne bamue balunda ba malu malenga ne luse bakangambuluisha kabiyi kuamba.​—Nsumuinu 17:17.

Didimona ne bujitu bua kukuatshisha bantu bakuabu diakangambuluisha kabidi. Mvua musue kukolesha muananyi bimpe, kumulongesha, kusambila pamue nende, ne kumulongesha mua kuyisha. Nunku tshivua mua kuteketa mu mikolo to. Kabidi, mvua mukulu mu tshisumbu kampanda tshia Bantemu ba Yehowa, ne bana betu bena Kristo ba balume ne ba bakaji bavua dijinga ne dikuatshisha dianyi. Bu meme mulekele dikenga dianyi dinyange ditabuja dianyi, ntshilejilu kayi tshimvua mua kushila bantu bakuabu?

Nsombelu wanyi wakashintuluka ku mubidi ne mu malu a mfranga kakuyi mushindu wa kuepuka, kuluaye mubiamubi mu umue mushindu ne mulenga mu mukuabu mushindu kabidi. Dimue dituku ngakumvua munganga wamba ne: “Disama kaditu dibutula muntu to; kadi ditu dimushintulula.” Ne ndi mufike ku dimona ne: nshintulukilu yonso wa malu katu mubi to.

Tshia kumpala, “dieba mu mubidi” dianyi diakangambuluisha bua kumanya bimpe kusama kua bakuabu ne kubaleja luse. (2 Kolinto 12:7) Ngakumvua bimpe menemene mêyi adi mu Nsumuinu 3:5 aa: “Eyemena Yehowa ne mutshima webe wonso, kueyemenyi dijingulula diebe dia mianda.” Disama dianyi diakandongesha nangananga malu adi ne mushinga wa bungi menemene mu nsombelu ne tshidi tshipetesha bantu disanka dilelela ne dibafikisha ku didimona bikale ne mushinga. Kutshivua malu a bungi amvua ne bua kuenza mu bulongolodi bua Yehowa. Ngakajingulula diumvuija dilelela dia mêyi a Yezu aa: “Disanka dia kupa ndipite dia kupeta.”​—Bienzedi 20:35.

Nsombelu mupiamupia

Kunyima kua disama dianyi dimane kumanyika, bakambikila mu tshisangilu kampanda tshivua tshienzekela mu tshimenga tshia Madrid muvuabu balongesha bena budisuile bena Kristo bua kukeba diumvuangana pankatshi pa baminganga Bantemu ba Yehowa badi basama. Pashishe, bena budisuile abu bakalua kuenza komite ya diumvuangana ne mpitadi. Buanyi meme, tshisangilu atshi tshiakenzeka mu tshikondo tshiakanyine menemene. Ngakalonga mudimu mutambe buimpe, uvua ne bua kulua kumpetesha disanka ditambe bunene kupita mudimu wa makuta.

Mu tshisangilu atshi tuakalonga ne: komite ya diumvuangana ne mpitadi ivuabu bafuma ku dienza ayi ivua ne tshipatshila tshia kukumbula mpitadi, kuela baminganga nkonko ne kuyukila ne bena mudimu ba mu mpitadi, buonso buabu, ne tshipatshila tshia kuenzejangana mudimu ne kuepuka dikokangana. Komite eyi idi yambuluisha bana betu Bantemu bua kupeta baminganga badi basue kuondapa kabayi belangana mashi. Bushuwa, bu mumvua tshiyi mulonge malu a manga, mvua ne malu a bungi a kulonga pa bidi bitangila miaku ya malu a manga, bikadilu bimpe mu malu diondapangana ne ndongoluelu wa lupitadi. Nansha nanku, tshisangilu atshi tshiakashintulula ngelelu wanyi wa meji, tshiotshi kumpaya bua kumona mua kupita ne lutatu lukuabu luakantonda.

 Dikumbula mpitadi didi dimpetesha disanka

Nansha muvua disama dianyi dienda dintekesha ku kakese ku kakese, majitu anyi mu komite wa diumvuangana ne mpitadi akavula. Bu muvuabu bampesha makuta a pansio, mvua ne dîba dia meme kukumbula mpitadi. Nansha muvuabu kabayi bangakidila bimpe imue misangu mikese, makumbula aa akamueneka mikale mapepele ne afila disanka kupita mumvua mutekemene. Nansha mundi mpindieu mukalamine mu dikalu dia balema, bualu ebu ki mbumpingaje tshianyima to. Misangu ya bungi tutu tuya ne muanetu mukuabu utudi nende mu komite wa diumvuangana ne mpitadi. Kabidi, badoktere batu ne tshibidilu tshia kuyikila ne bantu batu mu makalu a balema, ne minga misangu batu bu batu banteleja ne kanemu ka bungi menemene padibu bamona bukole bundi ngenza bua kubakumbula.

Mu bidimu dikumi bishale ebi, ndi mukumbule badoktere ba bungi. Bamue bavua basue kutuambuluisha anu musangu wa kumpala utuvua tumonangana nabu. Doktere Juan Duarte, mupandi wa mitshima wa mu tshimenga tshia Madrid utu ne disanka dia kunemeka kuondo ka muoyo ka mubedi, wakangambuluisha diakamue. Kubangila apu, mmupande Bantemu 200 ba mu bitupa bia bungi bia Espagne, kayi ubela mashi to. Mu kupita kua bidimu, badoktere bavule bakatuadija kupanda bantu kabayi babela mashi to. Makumbula etu avua bumue bua ku malu akasaka badoktere ba bungi bua kuenzabu nanku, bukuabu bualu buvua diya kumpala dia malu a diondapangana ne bipeta bimpe bivua dipanda bantu kakuyi dibela mashi dipatule. Tudi batuishibue ne: Yehowa mmubeneshe didienzeja dietu.

Malu akenza badoktere bapandi ba mitshima bapiluke mu diondapa dia bana bua didienzeja dietu adi ke akatamba kunkankamija. Munkatshi mua bidimu bibidi tuakakumbula kasumbu ka bapandianganyi babidi ne batuanganyi ba manga. Tuakabapesha mikanda ya manga ivua yumvuija tshidi badoktere bakuabu benza mu muanda eu. Didienzeja dietu diakaya kumpala mu 1999, pavuaku kuenzeke Tshipangu tshia malu a diondapangana adi atangila dipanda mitshima ya bana. Baminganga bapandianganyi babidi abu, balombola kudi munganga kampanda mupandianganyi uvua muanyishe mmuenenu wetu, bakapanda ne lutatu luonso muana wa katoto wa Ntemu kampanda mujilu munene wa mashi uvuabu bajinga kuakaja. * Ngakasanka pamue ne baledi ba muana au pavua umue wa ku bapandianganyi mupatuke mu nzubu wa kupandila bantu bua kulua kumanyisha ne: dipanda adi divua dipite bimpe ne bavua banemeke kuondo ka muoyo ka bena dîku. Mpindieu, badoktere babidi aba batu bitaba bua kuondapa Bantemu badi basama ba mu ditunga dijima dia Espagne.

Bualu buakansankisha bikole pa bidi bitangila malu a buena aa mbua se: ngakajingulula ne: ndi mua kuambuluisha bana betu bena Kristo. Pa tshibidilu, patu bana betu aba baya kudi bena mu kasumbu kampanda ka diumvuangana ne mpitadi, batu ne lutatu lutambe bukole. Badi mua kuikala bakeba kubapanda, kadi badoktere badi mu lupitadi lua muaba udibu basombele ki mbasue bua kubondapa kabayi babela mashi, ne ki mbamanye mene kuenza nanku to. Kadi padi bana betu bumvua ne: kudi baminganga bapandianganyi badi bitaba mmuenenu wetu mu bitupa bionso bia ngondapilu munemu mu Madrid, badi bapeta disulakana dikole. Nkadi mumone muanetu mukuabu mushintuluke bualu tuvua ku luseke luende mu lupitadi.

 Banzuji ne bikadilu bilenga bia mu malu a diondapangana

Mu bidimu bishale ebi, bena mu komite ya diumvuangana ne mpitadi mbakumbule kabidi banzuji. Mu makumbula aa, tutu tubapesha mukanda udi ne tshiena-bualu tshia se: Soins de la famille: Traitement médicaux et Témoins de Jéhovah (Mushindu wa kukuba dîku ne wa kuondapa Bantemu ba Yehowa), udibu bapatule nangananga bua kumanyisha banene aba mmuenenu wetu pa bidi bitangila mashi ne dikalaku dia manga makuabu adi kaayi menza ne mashi. Makumbula aa avua akengedibua bikole, bualu kumpala mu Espagne muvua tshibidilu tshia banzuji banyishila baminganga bua kuela mubedi mashi ku bukole.

Biro bia banzuji bitu bilenga bitambe, mu dikumbula dianyi dia kumpala, ngakadimonamu bu kankenene pamvua ngendela mu bipitshilu biabi, musombele mu dikalu dianyi dia balema. Biakantonda bikole pakatuenzekela mpukapuka mikese, pangakakuluka ne dikalu, mutue binu bianyi panshi. Banzuji bakese bavua bamone lutatu lumvua nalu bakalua kungambuluisha ne bulenga buonso, kadi ngakumvua bundu kumpala kua bantu bavua mu biro bia banzuji abi.

Nansha muvua banzuji kabayi bitaba kendela ketu kudibu, ba bungi ba kudibu bakatuakidila bimpe. Nzuji wa kumpala ungakaya kutangila ukavua welangana meji bua mmuenenu wetu, kuambaye ne: uvua musue kuyukila netu mutantshi. Mu dikumbula dietu diakalonda, yeye nkayende wakampusa too ne mu biro biende ne kuntelejaye ne ntema. Bipeta bimpe biakapatula dikumbula dia kumpala edi biakatukankamija meme ne benzejanganyi nanyi ba mudimu bua kulekela buôwa butuvua nabu, ne diakamue, tuakapatula bipeta bikuabu bimpe.

Munkatshi mua tshidimu tshimue tshimue atshi, tuakashila nzuji mukuabu wakatuakidila bimpe mukanda wa Soins de la famille, yeye kutuambila ne: uvua ne bua kuubala. Ngakamupesha nimero yanyi ya telefone bua kutubikilaye padiye netu dijinga lukasa. Kunyima kua mbingu ibidi wakangela nshinga ne kungambila ne: doktere mukuabu uvua mumulombe dianyisha bua kuelaye Ntemu kampanda uvuabu bajinga kupanda mashi. Nzuji au wakatuambila ne: uvua musue bua tumuambuluishe bua apete diandamuna divua mua kunemeka dijinga dia Ntemu au dia kuepuka mashi. Katuvua ne lutatu lunene lua kupeta lupitadi lukuabu, muvua baminganga bapanda bantu kabayi babela mashi to. Nzuji au uvua ne disanka pakumvuaye bipeta biakamueneka, ne wakatujadikila ne: uvua ne bua kulonda ngodapilu au mu matutu avua kumpala.

Mu matuku amvua nkumbula mpitadi au, tshilumbu tshia bikadilu bilenga bia mu malu a diondapangana  tshivua tshitamba kujuka, bualu tuvua basue bua badoktere kunemeka kuondo ka muoyo ka mubedi. Bena lupitadi kampanda lua mu Madrid bavua bapetangana netu bakambikila bua kubuela mu kalasa kavuabu balongesha malu a bikadilu bilenga bia mu malu a luondapu. Kalasa aka kakampetesha mushindu wa kuleja mmuenenu wetu wa mu Bible kudi baminganga ba bungi. Kakangambuluisha kabidi bua kumanya mapangadika makole a bungi adi badoktere ne bua kuangata.

Diego Gracia, mulongeshi wa mu iniversite uvua umue wa ku balongeshi ba mu kalasa aku utu pa tshibidilu ulongolola kalasa kalongesha kudi bamanyi ba tshitupa kampanda tshia malu a bikadilu bia mu malu a diondapangana ba mu Espagne ne udi mulue mubingishi munene wa bukenji butudi nabu bua kusungula luondapu lutudi basue. * Dimonangana dietu nende pa tshibidilu diakamufikisha ku dibikila bamue bena ku biro bia filiale bia Bantemu ba Yehowa bia mu Espagne bua kumvuija balongi ba Mulongeshi Gracia bakadi bapete mapoloma mmuenenu wetu, ne batu bangata bamue ba ku balongi aba bu badoktere bimpe menemene ba mu ditunga.

Nsombelu mu mushindu udiye

Bushuwa, mudimu muimpe eu utudi tuenzela bana betu bena Kristo ki mmujikije ntatu yanyi yonso to. Disama dianyi didi dienda anu dikola. Diakalenga, meji anyi mmatabale. Ku diambuluisha dia mukajanyi ne muananyi (badi kabayi badiabila), ndi mutungunuke ne kukumbaja majitu anyi. Bu kabayi bangambuluishe ne bankuatshishe, tshivua mua kuakumbaja to. Tshiena nansha mua kukanga mbote ya mupanu wanyi anyi kuvuala tshizaku to. Ntu ne disanka nangananga dia kuyisha ne muananyi wa balume Ismael, wenda upusa dikalu dianyi pandi meme eku ngenda nyikila ne bantu bashilashilangane ku nzubu yabu. Ne ndi ntungunuka ne kukumbaja majitu anyi a mukulu mu tshisumbu.

Ndi mupete imue ntatu munkatshi mua bidimu 12 bishale ebi. Misangu mikuabu, pa kumona mushindu udi disama dianyi ditatshisha bena mu dîku dianyi, ngakapeta kanyinganyinga kakole kupita disama diena dîna. Ndi mumanye bimpe ne: badi batata, nansha mudibu kabayi basue kubileja. Kakuena kuanji kupita matuku a bungi to, mu tshidimu tshimue, mamu muenu ne tatu mundedi bakafua. Munkatshi mua tshiotshi tshidimu atshi, tshivua kabidi ne mushindu wa kunyunga pamvua tshiyi ne dikalu to. Tatu (uvua musombele ku nzubu kuetu) wakafua disama dikuabu didi ditekesha mubidi. Milagros uvua umulama wakela meji ne: uvua wenda umona malu avua ne bua kulua kungenzekela mu matuku atshivua alua.

Kadi bumue bualu buimpe mbua se: buobumue budi bubuela mu dîku dietu patudi tukandamena ntatu popamue. Ndi mumbuke ku mudimu munene, mubange kuendela mu dikalu dia balema, nansha nanku nsombelu wanyi udi muimpe menemene bualu ndi mudifile muanyi muonso bua kusadila bakuabu. Diambuluisha bantu didi dikepesha dikenga, ne Yehowa neakumbaje dilaya diende bua kutukolesha patudi ne lutatu. Anu bu Paulo, ndi mua kuamba ne: ‘Ndi mumanye mua kuenza malu onso mu Mukalenge udi unkolesha.’​—Filipoi 4:13.

[Mêyi adi kuinshi]

[Kazubu mu dibeji 24]

Mmuenenu wa mukaji

Bua mukaji yonso wa muntu eu, kusomba ne mulume udi usama disama dia sclérose ndutatu lukole mu lungenyi, mu meji ne ku mubidi. Ndi ne bua kuikala ne nkatshinkatshi mu malu andi ndongolola bua kuenza ne ndi musue kulengulula tunyinganyinga tua tshianana tua matuku adi kumpala. (Matayo 6:34) Dikenga didi nadi muntu didi mua kuleja ngikadilu mimpe idiye nayi patoke. Dibaka dietu ndilue kukola kupita muvuadi kumpala, ne malanda anyi ne Yehowa mmalue kushema bikole. Miyuki ya mu nsombelu ya bana betu badi ne ntatu mikole ya muomumue mminkuatshishe be. Ndi ne disanka dia buena didi nadi Julían bua bipeta bia mudimu wende mulenga udiye wenzela bana betu, ne ndi mufike ku dimona ne: Yehowa kêna mua kutulekela to, nansha tuetu mua kupeta dikenga kampanda dituku dionso.

[Kazubu mu dibeji 24]

Mmuenenu wa muana

Dinanukila dia tatu ne mmuenenu wende muimpe mbimpeshe tshilejilu tshilenga tshia meme kulonda, ne ndi ndimona muikale ne mushinga pandi mmupusa mu dikalu diende. Ndi mumanye bimpe ne: tshiena mua kuenza tshionso tshindi musue misangu yonso to. Mpindieu ndi nsonga, kadi pangalua muntu mukole, nenjinge kuenza mudimu mu komite wa diumvuangana ne mpitadi. Ndi mumanye ku diambuluisha dia malaya adi mu Bible ne: makenga adiku bua tshitupa tshiipi ne bana betu ba bungi ba balume ne ba bakaji badi bakenga bikole kutupita tuetu.

[Tshimfuanyi mu dibeji 22]

Mukajanyi utu unkolesha

[Tshimfuanyi mu dibeji 23]

Ndi nyikila ne doktere Juan Duarte, mupandi wa mitshima

[Tshimfuanyi mu dibeji 25]

Meme ne muananyi tuyisha