Nkonko ya babadi

Bua tshinyi Ebelu 2:14 (NW) udi wamba ne: Satana “udi ne mushindu wa kukebesha lufu”?

Mu tshikoso, Paulo uvua musue kuamba ne: Satana yeye nkayende anyi ku diambuluisha dia bena mudimu bende, udi mua kukebesha lufu lua bantu. Mu diumvuangana ne bualu ebu, Yezu wakamba bua Satana ne: “Ku tshibangidilu wakadi mushipianganyi.”​—Yone 8:44.

Bantu badi mua kupanga kumvua bimpe mêyi adi mu Ebelu 2:14 (NW) bilondeshile mushindu udiwu mu bible ya bungi. Idi yamba ne: Satana udi ne “bukole bua lufu” anyi “bumfumu bua lufu.” (Mukanda wa Nzambi; Mukanda wa Mvidi Mukulu [MMM]) Mushindu udibu bakudimune miaku eyi udi usua kuleja ne: Satana udi ne bukole kabuyi mikalu bua kushipa yonso udiye musue. Kadi mbidimuenekele bimpe ne: kabiena nanku to. Bu biobi bikale nanku, pamuapa uvua mua kuikala mushipe batendeledi bonso ba Yehowa badi pa buloba katshia kuonso aku.​—Genese 3:15.

Muaku wa mu tshiena-Gelika udibu bakudimune ne: “bukole bua lufu” mu Mukanda wa Nzambi ne “mushindu wa kukebesha lufu” mu Traduction du monde nouveau udi “kratos tou thanatou.” Tou thanatou ntshiambilu tshidi mua kumvuija “lufu.” Kratos udi umvuija nangananga ne: “bukole anyi dikanda.” Bilondeshile nkonga-miaku kampanda, udi uleja “dikalaku ne diumvuija dia bukole anyi dikanda kadi ki ndienza nabi mudimu to.” Nunku, mu Ebelu 2:14 Paulo kêna usua kuamba ne: Satana ke udi ne bukole bua lufu to. Kadi udi uleja ne: Satana udi ne mushindu kampanda wa kukebesha lufu.

Mmushindu kayi udi Satana ‘ukebesha lufu’? Mu mukanda wa Yobo, tudi tubala bualu kampanda budi mua kumueneka buikale bua pa buabu. Bible udi uleja ne: Satana wakakuata mudimu ne tshipepele tshikole bua ‘kushipa’ bana ba Yobo. Kadi tuikale bamanye ne: Satana uvua mua kuenza bualu ebu anu ne dianyisha dia Nzambi, divuaye mumupeshe bualu kuvua tshilumbu tshitambe bunene tshivua tshijuke. (Yobo 1:12, 18, 19) Bulelela, Satana yeye nkayende kavua mua kushipa Yobo to. Kabavua bamupeshe dianyisha dia kuenza nanku to. (Yobo 2:6) Ebi bidi bileja ne: nansha muvua misangu mikuabu Satana muikale ne bukole bua kukebesha lufu lua bantu ba lulamatu, katuena ne bua kutshina bua se: udi mua kutushipa padiye musue nansha.

Satana utu kabidi mushipeshe bantu ku diambuluisha dia bantu bakuabu. Ke bualu kayi bena Kristo ba bungi mbafue bua ditabuja diabu, bamue mbabashipe kudi bisumbu bia bantu bikale ne tshiji anyi mbabashipe kabayi ne bualu bubi budibu benze ku dîyi dia bamfumu ba mbulamatadi anyi banzuji badibu bakose mishiku.​—Buakabuluibua 2:13.

Satana mmushipeshe kabidi bantu pa kubuelela mu butekete bua bantu. Kale mu tshikondo tshia Isalele, muprofete Belâma wakambila bena Moaba bua kusaka bena Isalele bua “kuenzabo malu mabi kudi Yehowa.” (Nomba 31:16) Bualu ebu buakakebesha lufu lua bena Isalele bapite pa 23 000. (Nomba 25:9; 1 Kolinto 10:8) Lelu’eu kabidi bamue badi mua kupona mu “mateyi” a Satana ne kuditua mu dienda dia masandi anyi malu makuabu mabi. (Efeso 6:11) Bushuwa, bantu aba kabatu diatshimue bajimija mioyo yabu to. Kadi badi bapangila mushindu wa kupeta muoyo wa tshiendelele, ne mu mushindu eu ke udi Satana ukebesha lufu luabu.

Nansha mutudi bamanye ne: Satana udi ne bukole bua kukengesha bantu, katuena ne bua kutshina tshianana tshianana to. Pakamba Paulo ne: Satana udi ne mushindu wa kukebesha lufu, wakamba kabidi ne: Kristo wakafua bua ‘kuvuija [Satana] tshianana, ne bua yeye apikule bonso aba bakadi bakuatshibue mu bupika matuku onso a muoyo.’ (Ebelu 2:14, 15) Eyowa, Yezu wakafuta tshia-bupikudi ne kupikulaye bantu bavua bamuitabuja ku mpekatu ne ku lufu.​—2 Timote 1:10.

Bulelela, kabiena bibi bua kuela meji ne: Satana udi ne mushindu wa kukebesha lufu to, tudi batuishibue ne: Yehowa udi mua kujimija lutatu luonso lukebesha kudi Satana ne bantu bende. Yehowa udi utujadikila ne: Yezu mubishibue ku lufu ‘neabutule midimu ya Diabolo.’ (1 Yone 3:8) Ku bukole bua Yehowa, Yezu neabishe bafue ne neajimije lufu. (Yone 5:28, 29) Ndekelu wa bionso, Yezu neikale ne bua kuimanyika bukole bua Satana pamuelaye mu tshina ne paluaye kumubutula kashidi ne tshiendelele.​—Buakabuluibua 20:1-10.