Ntshinyi tshiakabifikila?

NOFE ne Nô mmêna a mu Bible a bimenga bikulu bia mu Ejipitu bivua biende lumu kale: tshia Mempi ne tshia Thèbes. Tshimenga tshia Nofe (Mempi) tshivua mutantshi wa kilometre mitue ku 23 ku Sud kua tshimenga tshia Caire, ku muelelu wa ku Ouest wa Musulu wa Nile. Kadi ndekelu wa bionso tshimenga tshia Mempi tshiakajimija muaba watshi bu tshimenga tshikulu tshia Ejipitu. Ku ntuadijilu kua tshidimu tshia 1500 kumpala kua bikondo bietu, Ejipitu wakapeta tshimenga tshikulu tshikuabu: Nô (Thèbes), tshivua mutantshi wa kilometre mitue ku 500 ku Sud kua tshimenga tshia Mempi. Munkatshi mua bikulu bia tempelo ivua mu tshimenga tshia Thèbes mudi bia tempelo wa Karnak, udibu bamanye bu nzubu mutambe bunene uvua muibaka ne makunji. Tshimenga tshia Thèbes ne tempelo wa Karnak uvuamu bivua bibaka bua ntendelelu wa Amona, nzambi munene wa bena Ejipitu.

Ntshinyi tshivua milayi ya mu Bible midianjile kuamba bua tshimenga tshia Mempi ne tshia Thèbes? Yehowa wakapangadika bua kunyoka Palô wa mu Ejipitu ne nzambi yabu, nangananga nzambi wabu munene, “Amona, nzambi wa Nô.” (Yelemiya 46:25, 26) Uvua ne bua ‘kushipa’ bisumbu bia batendeledi bavua baya ku Nô. (Yehezekele 30:14, 15) Ke tshiakenzeka. Anu bikulu bia tempelo ke bidi bishale ku bintu biono bia ntendelelu wa Amona. Tshimenga tshia lelu tshia Louxor tshidi muaba uvua Thèbes kale, ne kudi misoko mikuabu mikese idi munkatshi mua bikulu bia tshimenga etshi.

Ki nkushale tshintu tshia nsongo mu tshimenga tshia Mempi pa kumusha nkita. Mukebuludi wa malu a mu Bible Louis Golding udi wamba ne: “Munkatshi mua nkama mivule ya bidimu, bena Arabe bavua batshimune bena mu Ejipitu bakapawula tshitupa tshinene tshia bintu bivua bibaka nabi tshimenga tshia Mempi bua kuibaka nabi tshimenga tshikulu tshiabu [tshia Caire] dia muamua dia musulu. Nunku bua mâyi a musulu wa Nile ne bua mudimu wa bibaki bena Arabe, kakuena dibue nansha dimue didi dimueka pa mutu pa buloba bufike mutantshi wa kilometre ya bungi mu tshijengu tshia tshimenga etshi tshia kale.” Bushuwa, anu muvua Bible mudianjile kuamba, tshimenga tshia Mempi tshiakalua ‘tshikulu, katshiyi ne bantu.’​—Yelemiya 46:19.

Ebi mbilejilu bibidi patupu bidi bileja bulelela bua milayi ya mu Bible. Dibutuka dia tshimenga tshia Thèbes ne tshia Mempi didi ditupesha tshijadiki tshikole bua kueyemena milayi ya mu Bible idi kayiyi mianji kukumbana.​—Musambu 37:10, 11, 29; Luka 23:43; Buakabuluibua 21:3-5.

[Mêyi a dianyisha bua tshimfuanyi mu dibeji 32]

Foto muangata ne dianyisha dia British Museum