“Wakakumbaja dijinga dia mu mutshima wanyi”

“NNDI nuela tuasakidila ne muoyo mujima bua dipa dilenga dia mukanda wa Approchez-vous de Jéhovah. Wakakumbaja dijinga dia mu mutshima wanyi: dijinga dia kudiumvua munangibue ne muanyishibue kudi Yehowa. Mpindieu ndi ndiumvua pabuipi bikole ne Yehowa kabidi ne Muanende munanga. Ndi musue kuambila bantu bonso bua mukanda eu ne kuupesha bantu bandi munange.” Ke muvua Ntemu wa Yehowa mukuabu mudiumvue pakapatulabu mukanda mupiamupia wa mabeji 320 mu Mpungilu wa Distrike wa “Bamanyishi ba Bukalenge ba tshisumi” wa tshidimu tshia 2002-2003. Tukonkononayi amue malu manene adi mu mukanda mupiamupia eu ne bua tshinyi bakaupatula.

Amue malu manene adi mu mukanda mupiamupia

Mmalu kayi adi mu mukanda mupiamupia eu? Mmalu onso adi mamba mu biena-bualu bibidi bia dilonga bidi mu tshibejibeji etshi ne makuabu a bungi! Mukanda udi ne nshapita 31 ne yonso wa kudiyi udi ne bule bua tshiena-bualu tshia dilonga tshia mu Tshibumba tshia Nsentedi. Kunyima kua mêyi a ntuadijilu ne nshapita isatu ya kumpala, mukanda mmukosolola mu bitupa binayi ne tshitupa tshionso tshidi tshiakuila pa ngikadilu umue munene wa Yehowa. Tshitupa tshionso tshidi tshituadija ne mêyi makese adi umvuija ngikadilu au. Nshapita idi ilonda idi yakula bua mushindu udi Yehowa uleja ngikadilu eu. Tshitupa tshionso tshidi ne nshapita umue udi wakula bua Yezu. Bua tshinyi? Bushuwa, Yezu wakamba ne: ‘Wakutangila meme wakutangila Tatu.’ (Yone 14:9) Bu muvua Yezu muikale tshimfuanyikiji tshipuangane tshia Yehowa, Yezu udi utupesha bilejilu bimpe bia dienza mudimu ne ngikadilu ya Nzambi. Tshitupa tshionso tshidi tshijika ne nshapita udi utulongesha mutudi mua kuidikija Yehowa mu ngikadilu udibu bafuma ku diumvuija. Mu diakula bua ngikadilu ya Yehowa, mukanda mupiamupia eu udi utela mvese idi mu mikanda yonso ya mu Bible.

Mukanda wa Approchez-vous de Jéhovah udi ne malu makuabu a pa buawu. Kubangila mu nshapita 2, nshapita yonso idi ne kazubu kadi ne tshiena-bualu ne: “Nkonko ya dielela meji.” Mvese ne nkonko idibu bafila ki mienza bu diambulula dia nshapita to. Kadi mmifila bua kukuambuluisha bua kuela meji bikole pa tshiena-bualu ku diambuluisha dia Bible. Badi bakulomba bua kubala mvese yonso bimpe menemene. Pashishe elela meji pa lukonko elu ne keba mushindu wa kutumikila mu nsombelu webe. Diela meji dia nunku didi mua kukolesha mutshima webe, dikuambuluisha bua kusemena pabuipi ne Yehowa.​—Musambu 19:14.

Bimfuanyi bidi mu mukanda wa Approchez-vous de Jéhovah mbikeba ne mbilongolola bimpe bua kulongesha ne bua kusaka ku tshienzedi. Nshapita 17 idi ne bimfuanyi bilenga biuwula dibeji bidi bileja mianda ya mu Bible.

Bua tshinyi bakaupatula?

Bua tshinyi bakapatula mukanda wa Approchez-vous de Jéhovah? Tshipatshila tshia kumpala tshia mukanda mupiamupia eu ntshia kutuambuluisha bua kumanya Yehowa bimpe bua tufike ku didia malanda makole ne Nzambi wetu.

Udiku mumanye muntu kampanda udi mukanda wa Approchez-vous de Jéhovah mua kuambuluisha, pamu’apa mulongi wa Bible peshi muanetu muena Kristo ukadi mulekele kuyisha anyi? Wewe muine, ukadiku mutuadije kubala mukanda mupiamupia eu anyi? Biwikala kuyi muanji kubanga, bua tshinyi kubengaku kudienzela programe wa kutuadija anu ku mpindieu? Ukeba dîba dia kuelela meji pa biudi ubala. Mukanda mupiamupia eu ukuambuluisheku bua kusemena pabuipi ne Yehowa Nzambi, nunku neumanyishe lumu luimpe lua Bukalenge buende ne disanka dia bungi ne tshisumi!