Bu mudi dituku dia Yehowa dienda disemena pabuipi, mmunyi mutudi ne bua kumona bantu?

“Mfumu kena ujingakana bua kukumbaja tshidiye mulaye . . . apo udi ne lutulu kunudi nuenu bonso, musue ne: muntu kajiminyi, kadi bonso bafike ku didilengeja.”​—2 PETELO 3:9, MMM.

1, 2. (a) Mmunyi mudi Yehowa umona bantu lelu? (b) Nkonko kayi itudi ne bua kudiela?

 BASADIDI ba Yehowa badi ne mudimu mubapesha wa ‘kuvuija ba bisamba bionso bayidi.’ (Matayo 28:19) Patudi tukumbaja mudimu eu ne tuindila “dituku dinene dia Yehowa,” tudi ne bua kumona bantu mudiye yeye ubamona. (Sefanya 1:14) Kadi mmushindu kayi udi Yehowa umona bantu? Mupostolo Petelo udi wamba ne: “Mfumu kena ujingakana bua kukumbaja tshidiye mulaye bu mudi bakuabo bamuamba ne: udi ne njingakanyi; apo udi ne lutulu kunudi nuenu bonso, musue ne: muntu kajiminyi, kadi bonso bafike ku didilengeja.” (2 Petelo 3:9, MMM) Nzambi udi utangila muntu yonso umumona ne: udi ne mushindu wa kufikaye ku didilengeja. ‘Mmusue bantu bonso basungidibue, bafike ku dimanya dia malu malelela.’ (1 Timote 2:4) Bushuwa, Yehowa udi usanka padi ‘muntu mubi umuka mu njila wende mubi bua kuikalaye ne muoyo’!​—Yehezekele 33:11.

² Muntu ne muntu wa kutudi udiku umona bantu mushindu udi Yehowa ubamona anyi? Tutuku tuangata bantu ba makoba onso ne bisamba bionso mutu Yehowa ubangata: bu bantu badi mua kulua ‘mikoko ya mu mpata wende’ anyi? (Musambu 100:3; Bienzedi 10:34, 35) Tumonayibi bilejilu bibidi bidi bileja mudi kumona bantu mudi Nzambi ubamona kuikale ne mushinga. Mu bilejilu bionso bibidi ebi, kabutu kavua pabuipi, ne bakavua bamanyishe basadidi ba Yehowa bualu abu kumpala kua dîba. Bilejilu ebi bidi ne mushinga  nangananga patudi bindile dituku dinene dia Yehowa apa.

Abalahama uvua umona bantu mudi Yehowa ubamona

3. Mmushindu kayi uvua Yehowa umona bantu bavua basombele mu Sodoma ne Amola?

³ Tshilejilu tshia kumpala ntshia Abalahama uvua nkambua muena lulamatu ne bimenga bia Sodoma ne Amola bivua biuwule ne malu mabi. Pakumvua Yehowa ‘muadi [wa bualu bua] Sodoma ne Amola,’ kakabutula bimenga ebi diakamue ne bantu bonso bavuamu to. Tshia kumpala wakakonkonona malu. (Genese 18:20, 21) Wakatuma banjelu babidi mu Sodoma muakasombelabu mu nzubu mua muntu muakane Lota. Butuku bua dituku diakafika banjelu aba, ‘bena musoko, ne bansongalume ne bantu banunu ba nseke yonso bakanyunguluka nzubu yonso,’ bajinga bua kuenda masandi ne banjelu abu. Bulelela, bikadilu bia bundu bia bantu ba mu tshimenga atshi biakaleja ne: tshivua tshikumbanyine kabutu. Nunku banjelu bakakonka Lota ne: ‘Bantu bakuabu badi nebe anyi? Baku ne bana bebe balume ne bana bebe bakaji ne bonso baudi nabu mu musoko eu, umuke nabu mu muaba eu.’ Yehowa wakapengela bamue bena mu tshimenga atshi njila bua kubapandisha, kadi ndekelu wa bionso, anu Lota ne bana bende ba bakaji babidi ke bakapanduka ku kabutu.​—Genese 19:4, 5, 12, 16, 23-26.

4, 5. Bua tshinyi Abalahama wakakuila bantu bavua basombele mu Sodoma, ne mushindu uvuaye umona bantu uvuaku upetangana ne uvua Yehowa ubamona anyi?

⁴ Mpindieu tupinganayi mu tshikondo tshivua Yehowa musokolole dijinga diende dia kukonkonona malu avua enzeka mu bimenga bia Sodoma ne Amola. Tshikondo atshi ke tshivua Abalahama mumuebeje ne: ‘Bikala bantu bakane makumi atanu mu musoko, wewe neuushipe, kuena usungila musoko bualu bua bantu bakane makumi atanu badimu anyi? Bualu ebu kabuikadi kuudi bua wewe kuenza nunku bua kushipa bantu bakane ne bantu babi popamue; biwenza nunku bantu bakane nebikale muomumue ne bantu babi; bualu ebu kabuikadi kuudi; Mulumbuluishi wa buloba buonso katu wenza bimpe anyi?’ Abalahama wakatela mêyi a se: ‘bualu ebu kabuikadi kuudi,’ misangu ibidi. Bu mukavua Abalahama muikale mumanye kuonso eku, uvua mujadike ne: Yehowa kavua mua kubutula bantu bakane popamue ne bantu babi nansha. Pakamba Yehowa ne: kavua mua kubutula Sodoma kuoku kuikale “bantu bakane makumi atanu mu musoko,” Abalahama wakaya wenda upuekesha bungi abu too pakafikabu ku bantu dikumi.​—Genese 18:22-33.

⁵ Yehowa uvua mua kuikala muteleje malu avua Abalahama umulomba au bu owu kaayi apetangana ne muvuaye yeye muine uamona anyi? Kabivua mua kuikala nanku to. Bu muvua Abalahama “mulunda wa Yehowa,” bidi bimueneka ne: uvua mumanye mmuenenu wa malu uvua nende Yehowa ne uvua witaba pende mmuenenu au. (Yakobo 2:23) Pakatangila Yehowa tshilumbu tshia Sodoma  ne Amola, wakanyisha bua kukumbaja malu avua Abalahama umulomba. Bua tshinyi? Bualu Tatu wetu wa mu diulu yeye ‘mmusue ne: muntu kamijiminyi, kadi bonso bafike ku didilengeja.’

Yona yeye uvua umona bantu mushindu mukuabu

6. Ntshinyi tshiakenza bena mu Ninewe pakumvuabu mêyi a Yona?

⁶ Mpindieu tangila tshilejilu tshibidi, tshilejilu tshia Yona. Mu tshikondo atshi tshimenga tshivuabu bafundile kabutu tshivua tshia Ninewe. Bavua bambile muprofete Yona bua kumanyishaye ne: malu mabi a bena mu tshimenga atshi avua ‘mabande ku mêsu kua Yehowa.’ (Yona 1:2) Ninewe uvua tshimenga tshinene kusakidila ne misoko ya pa mpenga, tshimenga tshivua ne bualabale bua ‘luendu lua matuku asatu bua kutshinyunguluka.’ Pakalua Yona ndekelu wa bionso kutumikila ne kuya mu Ninewe, wakatungunuka ne kumanyisha ne: ‘Papita matuku makumi anayi, nebabutule Ninewe.’ Pakumvuabu nanku, ‘bena mu Ninewe bakitabuja mêyi a Nzambi; bakajila biakudia, bakaluata bivualu bikayabale.’ Too ne mukalenge wa bena Ninewe muine pende wakanyingalala bia muomumue.​—Yona 3:1-6.

7. Mmunyi muvua Yehowa mumone mutshima wa didilengeja uvua nawu bena mu Ninewe?

⁷ Abi bivua bishilangane menemene ne tshivua bena mu Sodoma benze buobu! Mmushindu kayi uvua Yehowa muangate bena mu Ninewe bavua badilengeje? Yona 3:10 udi wamba ne: ‘Nzambi [wakanyingalala] bua muanda mukole wakambaye diambedi ne: Nembenzele; yeye kakawenza nansha.’ Yehowa ‘wakanyingalala’ mu ngumvuilu wa se: wakashintulula malu avuaye musue kuenzela bena Ninewe, bualu bavua bashintulule njila yabu. Mikenji ya Nzambi kayivua mishintuluke to, kadi Yehowa wakashintulula dipangadika diende pakamonaye ne: bena mu Ninewe bavua badilengeje.​—Malaki 3:6.

8. Bua tshinyi Yona wakashala mubungame?

⁸ Pakajingulula Yona ne: Yehowa kavua mua kubutula kabidi Ninewe, wakamonaku malu mushindu uvua Yehowa uamona anyi? Tòo, bualu badi batumanyisha ne: “Muanda eu wakafikisha Yona munda bikole, ne yeye wakakuatshika tshiji.” Ntshinyi tshikuabu tshiakenza Yona? Bible udi wamba ne: ‘[Wakalomba] Yehowa, wakamba ne: Yehowa, ndi nkukonka ne: Tshiakamba dîyi edi pantshivua mu buloba buanyi anyi? Bua muanda eu ngakadianjila kunyemena ku Tâshishi; bualu bua ngakamanya ne: wewe udi Nzambi wa luse, muwule tente ne dinanga, kuyi ukuatshika tshiji lubilu, udi uleja bantu luse lujalame lukumbane, udi ukudimuna mutshima webe bua dikenga kadikuatshi bantu.’ (Yona 4:1, 2) Yona uvua mumanye bimpe ngikadilu ya Yehowa. Kadi dîba adi muprofete wakashala mubungame, kayi umona bena mu Ninewe bavua badilengeje bu muvua Yehowa ubamona nansha.

9, 10. (a) Ndilongesha kayi divua Yehowa mupeshe Yone? (b) Bua tshinyi tudi mua kuamba ne: Yona wakalua ndekelu wa bionso kumona bantu ba mu Ninewe mushindu uvua Yehowa ubamona?

⁹ Yona wakapatuka mu Ninewe, kuasaye ka-tshitanda, e kusomba muinshi mua dileji diaku ‘bua kumonaye ne: mmalu kayi akuata musoko’ eu. Yehowa wakamenesha mutshi wa mudiantondo bua kupatuilawu Yona dileji. Kadi dituku diakalonda, mutshi au kuma. Pakafika Yona munda bua diuma dia mutshi, Yehowa wakamuambila ne: ‘Wewe udi unyingalala bua mudiantondo. Ne meme tshiakadi ne bua kunyingalala bua Ninewe, musoko au munene, mudi bantu binunu lukama ne makumi abidi badi kabayi mua kujingulula tshianza ni ntshia  balume ni ntshia bakaji, ne mudi bimuna bia bungi kabidi anyi?’ (Yona 4:5-11) Ndilongeshapu kayi bulenga nunku diakapeta Yona dia mushindu udi Yehowa umona bantu!

¹⁰ Ki mbafunde tshiakenza Yona pakumvuaye mêyi a Yehowa a diumvuila bena Ninewe luse to. Nansha nanku, bidi bimueneka patoke ne: muprofete eu wakashintulula mushindu uvuaye umona bena Ninewe bakadilengeja ku bubi buabu. Tudi tuamba nanku bualu Yehowa wakamuangata bua kufundaye muyuki eu muenzeja ku nyuma muimpe.

Mmuenenu kayi uudi nende?

11. Mmushindu kayi uvua Abalahama mua kumona bantu badi ne muoyo mpindieu?

¹¹ Lelu, tudi bindila kabutu kakuabu: ka ndongoluelu mubi wa malu eu mu dituku dinene dia Yehowa. (Luka 17:26-30; Galatia 1:4; 2 Petelo 3:10) Mmushindu kayi uvua Abalahama mua kumona bantu badi mu bukua-panu ebu budi ne bua kubutudibua mu katupa kîpi emu? Mu mishindu yonso uvua ne bua kuditatshisha bua aba badi kabayi banji kumvua ‘lumu luimpe lua Bukalenge.’ (Matayo 24:14) Abalahama wakasengelela Nzambi njila ne njila bua bantu bakane bavua pamu’apa mua kuikala mu Sodoma. Tudiku tuditatshisha bua bantu badi mua kulua kubenga njila ya bukua-panu ebu bulombola kudi Satana buobu babapeshe mushindu wa kunyingalala bua mibi, kuyilekela ne kusadila Nzambi anyi?​—1 Yone 5:19; Buakabuluibua 18:2-4.

12. Bua tshinyi mbipepele bua kubanga kumona bantu batudi tupeta mu mudimu wetu buambi mushindu wa muomumue ne uvua Yona umona bantu, ne ntshinyi tshitudi mua kuenza bua bualu ebu?

¹² Bidiku biakane bua kujinga bua nshikidilu wa bantu babi alue anyi? (Habakuka 1:2, 3) Bushuwa, bitu bipepele be bua kuikala ne mmuenenu wa malu mufuane wa Yona, wa dibenga kuditatshisha bua diakalenga dia bantu badi mua kudilengeja kulekela kuenza malu mabi. Bidi nanku nangananga patudi tutungunuka ne kupetangana ne bantu badi kabayi basue kututeleja, badi ne luonji, peshi mene badi batuluisha patudi tuya ku nzubu yabu ne mukenji wa Bukalenge. Tudi mua kufika ku dibenga kumona aba bikala Yehowa mua kupatula mu ndongoluelu eu mubi wa malu. (Lomo 2:4) Tuetu badikonkonone bimpe bimpe ne bamone ne: tudi ne lungenyi nansha lukese menemene lufuanangane ne lua Yona pa bidi bitangila bena mu Ninewe, dîba bidi bikengela kulomba diambuluisha bua tuetu kuikala ne mmuenenu wa malu mufuanangane ne wa Yehowa.

13. Bua tshinyi tudi mua kuamba ne: Yehowa udi uditatshisha bua bantu lelu?

¹³ Yehowa udi uditatshisha bua bantu badi kabayi banji kubanga kumuenzela mudimu to, ne udi uteleja milombo ya basadidi bende badi badilambule kudiye. (Matayo 10:11) Tshilejilu, ‘neabasombuele’ bua kuandamuna masambila abu. (Luka 18:7, 8) Kabidi, Yehowa neakumbaje milayi yende ne malu adiye mupangadike bua kuenza mu tshikondo  tshidiye musungule. (Habakuka 2:3) Munkatshi muawu nemuikale diumbusha dia malu mabi onso pa buloba, anu muakabutulaye Ninewe pakalua bantu bavua basombelamu kuditua kabidi mu malu mabi.​—Nahuma 3:5-7.

14. Ntshinyi tshitudi ne bua kutungunuka ne kuenza patudi bindile dituku dinene dia Yehowa?

¹⁴ Too ne tshikondo tshikala ndongoluelu eu mubi wa malu mua kubutudibua mu dituku dinene dia Yehowa, netuindileku ne lutulu, bikale ne mudimu wa bungi mu dienza dia disua diende anyi? Katuena bamanye malu adi atangila muaba wikala mudimu wa diyisha ne bua kufikila kumpala kua difika dia dituku dia Yehowa, kadi tshitudi bamanya ntshia se: lumu luimpe lua Bukalenge luolu neluyishibue mu buloba buonso mushindu udi Nzambi musue kumpala kua nshikidilu kuluaye. Bushuwa, tudi ne bua kuditatshisha bua “bintu bilengele” bitshidibu ne bua kubueja padi Yehowa utungunuka ne kuuja nzubu wende ne butumbi apa.​—Hagai 2:7.

Mmuenenu wetu udi umuenekela ku bitudi tuenza

15. Ntshinyi tshidi mua kukolesha dinanga dietu dia mudimu wa diyisha?

¹⁵ Pamu’apa tudi mua kuikala basombele muaba udi bantu kabayi batamba kuanyisha mudimu wetu wa diyisha ne katuyi ne mushindu wa kuya muaba udibu dijinga dikole ne bamanyishi ba Bukalenge bavule. Tufuanyikijabi ne: bantu dikumi ki batudi mua kupeta muaba utudi tuyisha kumpala kua nshikidilu kuluaye. Katuenaku tumona se: bantu dikumi abu mbakumbanyine kubakeba anyi? Yezu uvua umvuila bisumbu bia bantu “luse, bualu bua bobo bakadi batata, bakadi bamuangalake bu mikoko idi kayi ne mulami.” (Matayo 9:36) Tuetu bikale tulonga Bible ne tubala biena-bualu bitu bipatuka mu Tshibumba tshia Nsentedi ne Réveillez-vous! ne lubatshi luonso, tudi mua kufika ku dijingulula bimpe menemene tshidi nsombelu mubi ukadi pa kukuata bena panu apa. Nunku bualu ebu budi mua kukolesha kabidi dinanga dietu dia mudibi bikengela kuyisha lumu luimpe. Kabidi, kuenza mudimu ne dianyisha dionso ne bia-mudimu bia kulonga nabi Bible bitupetesha ku diambuluisha dia “mupika wa lulamatu ne wa budimu” kudi mua kukolesha dimanya dietu dia mua kufikisha bantu ku ditabuja bitudi tubayisha miaba itukadi bayishayishe.​—Matayo 24:45-47, NW; 2 Timote 3:14-17.

16. Mmunyi mutudi mua kufika ku dipatula bipeta bilenga mu mudimu wetu?

¹⁶ Diditatshisha dietu bua bantu badi pamu’apa mua kuanyisha mukenji wa muoyo wa mu Bible didi ditusaka bua kushintulula mêba etu a buambi ne kuakajilula misangu ne misangu mishindu yetu ya diakula ne batudi tupetangana nabu mu mudimu wa diyisha. Patudi mu buambi, tutu tutamba kusangana bantu ba bungi kabayiku anyi? Biobi nanku, tudi mua kufika ku dipatula bipeta bilenga mu mudimu wetu pa kuikala kushintulula mêba etu a mudimu wa diyisha ne miaba itudi tuwenzela. Balobi batu baya mu diloba mêba adibu mua kukuata mishipa. Katuenaku petu mua kuenza bia muomumue mu mudimu wetu wa diloba dia mu nyuma anyi? (Mâko 1:16-18) Bua tshinyi kubengaku kuteta mua kuikala kuyisha dilolo anyi kuyishila bantu ku telefone bikalabu kabayi bakandike bualu ebu muaba unudi? Bamue mbafike ku dimona se: miaba idi bantu bimanyikila mashinyi abu, mu bitudilu bia mashinyi, miaba ya bipanyinu bia tusolonyi, ne mu makazen ke ‘malobo a dilobela’ mimpe adi ne mudilu. Tuetu bikale kabidi tumona bantu muvua Abalahama ubamona bidi bidimuenekela patudi katuyi tupanga kuyisha dîba dionso didi mpunga umueneka.

17. Mmu malu kayi mutudi mua kukankamija ba-misionere ne bakuabu badi basadila mu matunga a ku ba bende?

¹⁷ Ba bungi ki mbanji kumvua mukenji wa Bukalenge to. Pa kumusha diyisha dietu, katuenaku mua kuleja mutudi tuditatshisha bua bantu aba nansha katuyi bapatuke lubanza luetu anyi? Tudiku bamanye ba-misionere kampanda peshi basadidi kansanga ba ku dîba ne ku dîba badi basadila mu matunga a ku ba bende anyi? Bituikala babamanye, tuetu babafundilaku mikanda bua kubaleja mutudi tuanyisha mudimu wabu nebikale bimpe be! Mmunyi mudi bualu ebu mua kuleja ne: tudi tuditatshisha bua bantu bakuabu bonso? Mikanda yetu ya dikankamija nayi ba-misionere ne dibela kalumbandi idi mua kubakolesha bua kutungunukabu mu mudimu wabu, benda bambuluisha bantu bakuabu ba bungi bua kufikabu ku dimanya bulelela. (Balumbuluishi 11:40) Tudi kabidi mua kusambila bua ba-misionere ne bua bantu badi ne nzala ya bulelela mu matunga makuabu. (Efeso 6:18-20) Mushindu mukuabu wa kuleja kuditatshisha kuetu ngua kufilaku mapa a makuta bua kukuatshisha mudimu wa Bantemu ba Yehowa wa buloba bujima.​—2 Kolinto 8:13, 14; 9:6, 7.

 Neukokeshe bua kumuangala anyi?

18. Ntshinyi tshidi bamue bena Kristo benze bua kuyisha malu a Bukalenge kumpala mu matunga adibu basombele?

¹⁸ Bantu badi baye miaba idibu dijinga dikole ne bamanyishi ba Bukalenge ba bungi mbapete mabenesha bua didienzeja diabu ne muoyo wabu wa didifila. Kadi Bantemu ba Yehowa bakuabu pabu badi bashale mu matunga abu mbalonge miakulu mikuabu bua kumona mua kufila diambuluisha dia mu nyuma kudi benyi badi bafumina ku ba bende. Mudimu wabu mukole wa mushindu’eu mmubapeteshe bipeta bimpe menemene. Tshilejilu, mu tshimenga kampanda tshia mu Texas (mu États-Unis), Bantemu bakuabu muanda-mutekete batu bayisha bantu badi bafumina mu ditunga dia Chine bakakidila bantu 114 mu tshibilu tshia musekelelu wa Didia dia Mukalenge tshia mu tshidimu tshia 2001. Bana betu batu bambuluisha tusumbu tua bantu tua mushindu’eu batu bamona ne: tshikondo tshia buobu kunowa tshikadi tshikumbane.​—Matayo 9:37, 38.

19. Ntshinyi tshidibu bakubela bua kuenza biwikala wela meji bua kuya mu ditunga dikuabu bua kutantshishamu mudimu wa diyisha dia Bukalenge?

¹⁹ Pamu’apa wewe ne ba mu dîku dienu nudi numvua ne: nudi mua kukokesha bua kuya kusombela muaba udibu dijinga dikole ne bayishi ba Bukalenge. Mbimpe, kadi mbia meji bua kuanji ‘kusomba, kubadika binudi mua kutula.’ (Luka 14:28, MMM) Bitu nanku nangananga padi muntu ujinga kupatuka bua kuya mu ditunga dia ku ba bende. Yonso udi musue kuenza bualu bua nunku mbimpe yeye kudiela nkonko bu mudi eyi: ‘Nenkokeshe bua kukumbaja majinga a ba mu dîku dianyi anyi? Nempete viza peshi mukanda wa kubuela nawu mu ditunga dindi nya anyi? Nkadi mumanye mua kuakula muakulu wa mu ditunga adi anyi peshi ndiku ne dijinga dia kuulonga anyi? Nkadi mukonkonone malu bu mudi a mivu idimu ne bilele bia bantu ba muomu anyi? Nengikale bushuwa ‘busambi’ kudi bena Kristo nanyi ba mu ditunga edi tshiyi bu bujitu kudibu anyi?’ (Kolosai 4:10, 11) Bua kumanya bunene bua diambuluisha didibu nadi dijinga mu ditunga diudi ujinga kuya, pa tshibidilu mbimpe kufundila biro bia Bantemu ba Yehowa bidi bitangila mudimu wa diyisha udi wenzekamu. *

20. Mmushindu kayi uvua nsonga kampanda muena Kristo mudifile bua diakalenga dia bena Kristo nende ne dia bantu bakuabu ba mu ditunga dia ku ba bende?

²⁰ Muanetu mukuabu muena Kristo uvua wambuluisha mu mudimu wa dibaka dia Nzubu ya Bukalenge mu ditunga dia Japon wakumvua ne: bavua dijinga ne bena mudimu bapiluke bavua mua kuibaka nzubu wa tshitendelelu mu ditunga dia Paraguay. Bu muvuaye mujike ne mutshikale ne dikanda dionso dia bunsonga, wakaya mu ditunga adi e kukuataye mudimu wa ngondo muanda-mukulu muikale muntu umu’epele patupu uvua uwenza ku dîba ne ku dîba dionso muaba au. Matuku akenzaye mu ditunga adi wakalonga tshiena-Espagne e kutuadijaye kulonga Bible ne bantu. Wakamona dijinga divua mu ditunga adi dia kupeta bamanyishi ba Bukalenge ba bungi. Nansha muvuaye mupingane ku Japon, matuku makese pashishe wakapingana kabidi mu ditunga dia Paraguay e kukuata mudimu wa disangisha bantu mu Nzubu wa Bukalenge muine uvuabu bibake au.

21. Bu mutudi bindile dituku dinene dia Yehowa, ntshinyi tshitudi ne bua kutamba kuditatshishila, ne mbimpe tuikale ne mmuenenu wa mushindu kayi?

²¹ Nzambi neenze bua mudimu wa diyisha wenjibue too ne mu ndekelu muawu, biumvuangane ne disua diende. Lelu’eu, udi wenda wenzeja mudimu wa dinowa dia mu nyuma wa ndekelu ne lukasa luonso. (Yeshaya 60:22) Nunku, bu mutudi bindile dituku dia Yehowa, tudituayi ne tshisumi tshionso mu mudimu wa dinowa eu ne tuikale tumona bantu bu mudi Nzambi wetu wa dinanga ubamona.

[Mêyi adi kuinshi]

Utshidi muvuluke anyi?

• Bu mutudi bindile dituku dia Yehowa, mmushindu kayi utudi mua kumona bantu?

• Abalahama uvua ne mmuenenu kayi bua bivua bitangila bantu bakane bavua mua kuikala mu Sodoma?

• Mmunyi muvua Yona mumone bantu ba mu Niniwe bakanyingalala bua mibi yabu e kuyilekela?

• Mmushindu kayi utudi mua kuleja ne: tudi ne mmuenenu wa Yehowa bua bantu badi kabayi banji kumvua lumu luimpe?

[Nkonko ya dilonga]

[Tshimfuanyi mu dibeji 16]

Abalahama uvua umona bantu mudi Yehowa ubamona

[Tshimfuanyi mu dibeji 17]

Yona wakafika ku dikala ne mmuenenu wa Yehowa pa bivua bitangila bena Niniwe bakanyingalala bua mibi yabu

[Bimfuanyi mu dibeji 18]

Diditatshisha bua bantu didi ditusaka bua kushintulula mêba etu a buambi ne kuakajilula nyishilu wetu njila ne njila