Tshitudi katuyi mua kudisombela pa nkayetu

“Mbimpe kuikala babidi. . . . Padi umue udishinda, mukuabo udi umujula.”​—Mukalenge Solomo

SOLOMO MUKALENGE wa Isalele wa kale wakamba ne: “Mbimpe kuikala babidi, pa mutu pa kuikala nkayebe, bualu mudimu wa bantu babidi udi mua kubapetesha tshipeta tshimpe. Padi umue udishinda, mukuabo udi umujula; kadi muntu muikale nkayende, mudishinde, nganyi udi mua kumujula?” (Muambi 4:9, 10, Mukanda wa Mvidi Mukulu [Katolike, MMM]) Muena meji eu uvua ukonkonona bikadilu bia bantu udi uleja mushinga wa kusomba ne bakuabu ne mudibi kabiyi bimpe bua kuditapulula kudi bakuabu. Kadi bualu ebu kabuvua bufumine ku lungenyi lua bantu nansha. Mêyi a Solomo avua afumina ku meji a Nzambi ne avua menzeja ku nyuma muimpe.

Ki mbia meji bua tuetu kuditola pa nkayetu to. Bantu badi dijinga ne bakuabu. Tuetu bonso tudi dijinga ne bukole ne diambuluisha bitudi mua kupetela kudi bantu bakuabu. Lusumuinu kampanda lua mu Bible ludi luamba ne: ‘Udi udipandulula kudi banga bantu udi ukeba anu bualu budiye musue, ne udi upatula mêyi a tshiji tshikole bua kupidia meji makane.’ (Nsumuinu 18:1) Nunku tudi tumvua bua tshinyi bamanyi ba malu a nsombelu wa bantu badi bakankamija bantu bua kuikala mu tshisumbu kampanda ne bua kuikala kutangila malu a bakuabu.

Munkatshi mua malu adi akengela kuenza bua kupingaja bantu mu nsombelu wa mu tshinsanga, Mulongeshi Robert Putnam udi utela “dikolesha dia ditabuja mu malu a ntendelelu.” Bantemu ba Yehowa mbasunguluke mu bualu ebu bualu badi mu bukubi munda mua bisumbu bidi bienze bu dîku bidi pa buloba bujima. Mu diumvuangana ne mêyi a mupostolo Petelo, ‘mbanange bana babu ba mu Kristo’ badi ‘batshina Nzambi’ ne kanemu. (1 Petelo 2:17) Bantemu badi kabidi bepuka diditola pa nkayabu ne bipeta biadi bibi bualu midimu mimpe ya bungi idibu benza mu ntendelelu mulelela idi ibasaka bua kuikala bambuluisha bantu nabu bua kulongabu bulelela bua mu Bible, Dîyi dia Nzambi.​—2 Timote 2:15.

Dinanga ne bulunda biakashintulula nsombelu wabu

Bantemu ba Yehowa badi benza nsangilu wa bantu badi mu buobumue, ne munkatshi muabu muntu yonso udi ne mushinga wa bungi. Angata tshilejilu tshia Miguel, Froylán ne Alma Ruth, bantu basatu ba mu dîku dimue dia mu Amerike Latine. Bavua baledibue ne disama dia mifuba didi dishawishangana bikole. Bonso basatu badi bendela mu makalu a balema. Mmunyi mudi didisangisha ne Bantemu dishintulule nsombelu wabu?

Miguel udi wamba ne: “Mvua ne bikondo bimvua ntata bikole, kadi pangakabanga kudisangisha  ne basadidi ba Yehowa, nsombelu wanyi wakashintuluka. Muntu udi udisombela pa nkayende udi ne njiwu ya bungi. Kudisangisha ne bena Kristo nanyi mu bisangilu bia tshisumbu ne kupetangana nabu lumingu luonso biakangambuluisha bikole bua kupeta disanka.”

Alma Ruth udi wamba pende ne: “Mvua ne bikondo bimvua mpeta dibungama dikole; mvua ngumvua bibi bia dikema. Kadi pangakalonga malu adi atangila Yehowa, ngakamanya ne: mvua mua kudia nende malanda mashême. Abu buakalua bualu bua mushinga wa bungi be mu nsombelu wanyi. Dîku dianyi ndingambuluishe bikole, ne bualu ebu mbutuambuluishe bikole bua kuikala mu buobumue.”

Tatuende wa Miguel wakamulongesha mua kubala ne kufunda. Pashishe Miguel wakambuluisha pende Froylán ne Alma Ruth bua kumanyabu pabu mua kubala. Bualu ebu buvua ne mushinga wa bungi bua makanda abu a mu nyuma. Alma Ruth udi wamba ne: “Kulonga mua kubala kuakatuambuluisha bikole bualu tuvua mpindieu mua kudia biakudia bia mu nyuma mu dibala Bible ne mikanda ya kumulonga nayi.”

Miguel udi mpindieu mukulu mu tshisumbu tshia bena Kristo. Froylán ukadi mubale Bible mujima misangu tshitema. Alma Ruth mmuvudije mudimu udiye wenzela Yehowa mu dikala mpanda-njila anyi mumanyishi wa Bukalenge wa ku dîba ne ku dîba, katshia mu tshidimu tshia 1996. Alma Ruth udi wamba ne: “Yehowa mmungambuluishe bua kukumbaja tshipatshila etshi, bualu bana betu ba bakaji bena Kristo bananga badi bangambuluisha ki ng’anu bua kuyisha, kadi ne bua kulongesha mu dilombola malonga a Bible 11 andi mupete mushindu wa kutuadija.”

Tshilejilu tshikuabu tshimpe ntshidibu bashiye kudi Emelia, uvua mupete njiwu idi mimushiye wendela mu dikalu dia balema bualu uvua mutshibuke mikolo ne muongo. Bantemu ba Yehowa ba mu tshimenga tshia Mexico bakalonga nende Bible, ne yeye kutambula mu 1996. Emelia udi wamba ne: “Kumpala kua kumanya bulelela, mvua nkeba kudishipa; tshivua musue kabidi kushala ne muoyo to. Mvua ndimona tshiyi ne mushinga nansha mukese, mvua ndila muadi butuku ne munya. Kadi pangakabanga kudisangisha ne basadidi ba Yehowa, ngakamona dinanga dia buwetu. Malu adibu bangenzele mmankoleshe ku muoyo bikole. Umue wa ku bakulu udi kundi anu bu muanetu ne tatuanyi. Yeye ne bamue basadidi ba mudimu batu baya nanyi mu bisangilu ne mu mudimu wa buambi meme mu dikalu dianyi dia balema.”

José (wakatambula ne kuluaye Ntemu wa Yehowa mu 1992) mmudisombele pa nkayende. Udi ne bidimu 70, ne mmuangate pansio mu 1990. José uvua ne tshibidilu tshia kubungama bikole, kadi kunyima kua Ntemu kampanda mumane kumuyisha, wakatuadija diakamue  kubuela mu bisangilu bia tshisumbu. Uvua musue malu avuaye umvuamu ne umonamu. Tshilejilu, wakamona bulunda buvua pankatshi pa bana betu ne mushindu uvuabu baditatshisha bua bualu buende. Mpindieu bakulu ne basadidi ba mudimu ba mu tshisumbu tshiabu ke badi bamulame. (Filipoi 1:1; 1 Petelo 5:2) Bena Kristo nende aba badi “basambi” kudiye. (Kolosai 4:11) Batu baya nende kua munganga, batu baya kumutangila kumbelu, ne batu bamukoleshe ku muoyo misangu yonso inayi ikadibu bamupande. José udi wamba ne: “Badi baditatshisha bua bualu buanyi. Buobu ke dîku dianyi. Ndi musue kuikala pamue nabu.”

Kupa kudi kupetesha disanka dia bushuwa

Pakamba Mukalenge Solomo ne: “mbimpe kuikala babidi,” uvua ufuma ku dileja mudibi kabiyi bia meji bua kudifila ne bukole buetu buonso mu dikeba dia bubanji. (Muambi 4:7-9, MMM) Atshi ke tshidi bantu ba bungi bakeba lelu, nansha mudibi biumvuija kudipangisha malanda mimpe ne bena mu dîku ne bantu bakuabu kabidi.

Lungenyi elu lua lukuka ne lua dikeba bua kudisankisha ndufikishe bantu ba bungi ku diditapulula kudi bakuabu. Muanda eu ki mmubapeteshe disanka mu nsombelu wabu to, bualu bantu badi ne lungenyi lua mushindu’eu batu baya kushikila ne bapangila bionso. Kadi miyuki itudi balonde eyi idi ileja masanka adi afumina ku didisangisha ne aba badi basadila Yehowa ne badi bamunange ne banange muntu nabu. Dibuela mu bisangilu bia tshisumbu pa tshibidilu, diambuluisha ne diditatshisha dia bena Kristo nabu, ne dienza mudimu wa buambi ne lukunukunu ke bivua biambuluishe bantu aba bikole bua kumbusha meji mabi avua mabasake bua kuditapulula kudi bakuabu.​—Nsumuinu 17:17; Ebelu 10:24, 25.

Bu mudi muntu yonso muikale dijinga ne mukuabu, kuenzela bakuabu malu kudi kupetesha disanka. Albert Einstein, eu utu muenze malu adi mambuluishe bantu bakuabu, wakamba ne: “Mushinga wa muntu . . . udi ne bua kumuenekela mu bidiye ufila, kadi ki mmu bidiye mua kupeta nansha.” Bualu ebu budi bupetangana ne mêyi a Mukalenge wetu Yezu Kristo a se: “Disanka dia kupa ndipite dia kupeta.” (Bienzedi 20:35, MMM) Nunku, nansha mudibi bimpe bua bakuabu kutulejabu dinanga, bidi bitamba kutuambuluisha bua kuikala ne makanda a mubidi patudi petu tuleja bakuabu dinanga.

Mutangidi muena ngendu mukuabu utu mukumbule bisumbu munkatshi mua bidimu bia bungi bua kubikuatshisha mu nyuma ne utu muambuluishe bua kuibaka miaba ya kuenzela bisangilu bia bena Kristo bavua ne mushindu mukese, udi umvuija meji ende mushindu’eu: “Disanka dia kuambuluisha bana betu ne dia kubamona bikale ne mpala ileja dianyisha didi dinsaka bua kutungunuka ne kukeba mishindu ya kubambuluisha. Malu ankadi mumone adi aleja se: kuenzela bakuabu malu adi abambuluisha ke nsapi wa disanka. Ne ndi mumanye ne: tuetu bakulu tudi ne bua kuikala ‘bu tshisokomenu ku tshipepele, bu misulu ya mâyi mu muaba mûme, bu dileji dia dibue dinene mu buloba budi butondesha bantu.’​—Yeshaya 32:2.

Mbia disanka bua bantu kusomba pamue mu buobumue!

Bushuwa, kuambuluisha bakuabu ne kudia bulunda ne aba badi basadila Yehowa kudi kupetesha difutu dinene ne disanka dia bushuwa. Mufundi wa Misambu wakamba ne: “Monayi mudibio bilenga, mudibio disanka, bua kusomba  bonso pamue, bu bana ba muntu”! (Musambu 133:1, MMM) Buobumue bua dîku ke tshintu tshinene tshidi tshifikisha benamu bua kuambuluishangana, anu mudibi bileja mu tshilejilu tshia Miguel, tshia Froylán ne Alman Ruth. Ndibenesha dia dikema bua kuikala mu buobumue mu ntendelelu mulelela! Kunyima kua yeye mumane kupesha balume ne bakaji bena Kristo mibelu, mupostolo Petelo wakafunda ne: ‘Dîyi dia ku ndekelu ne: Nuikale buonso buenu ne mutshima umue, nusambangane, nunangangane [ne dinanga dia buena-muntu], nuikale ne mitshima ya luse ne mitshima mipuekele.’​—1 Petelo 3:8.

Bulunda bulelela budi butuambuluisha bikole mu lungenyi ne mu nyuma. Mupostolo Paulo uvua wambila balunda bende mu ditabuja pavuaye ubasengelela ne: ‘Nukoleshe badi ne mitshima yamba kupanga, nukuatshishe badi batekete, nuikale ne lutulu kudi bantu bonso. Misangu yonso [nukebe] malu adi mimpe [kudi] muntu ne muntu, ne kudi bonso.’ (1 Tesalonike 5:14, 15)

Bua bualu ebu, keba mishindu mimpe ya kuenzela bakuabu malu mimpe. ‘Enzela bantu bonso bimpe, kadi [nangananga] bena mu dîku dia bena kuitabuja,’ bualu muanda eu neupeshe muoyo webe tshipatshila tshilelela ne neukupeteshe disanka. (Galatia 6:9, 10) Yakobo muyidi wa Yezu wakafunda ne: “Pikala muanetu wa balume nansha wa bakaji kayi tshilamba, kayi ne tshiakudia tshia matuku onso, umue wa kunudi umuamba ne: Ndaku bimpe, uye kuota kapia, uukute, kayi umupa tshidi mubidi wende ukengela, nebimuambuluishe ku tshinyi?” (Yakobo 2:15, 16, MMM) Diandamuna dia lukonko elu nditoke. Tudi ne bua ‘kutangila [ki ng’anu] malu etu nkayawu, kadi tutangile kabidi malu a bakuabu.’​—Filipoi 2:4.

Pa kumbusha diambuluisha bakuabu ne bintu padibu mu dikenga dikole anyi padi tshipupu kampanda tshienzeke, Bantemu ba Yehowa batu ne mudimu wa bungi wa kuambuluisha bantu nabu mu mushindu mukuabu wa mushinga mukole: ndiyisha dia lumu luimpe lua Bukalenge bua Nzambi. (Matayo 24:14) Bantemu bapite pa 6 000 000 badi benza mudimu wa dimanyisha mukenji eu wa ditekemena ne wa busambi badi bafila tshijadiki tshia se: badi batangila malu a bakuabu ne dinanga. Kadi kufila diambuluisha dia mu Mifundu Minsantu kudi kabidi kuambuluisha bua kukumbaja dijinga dikuabu didi nadi bantu. Ndijinga kayi adi?

Tukumbajayi dijinga dinene

Bua kupeta disanka dilelela, tudi ne bua kuikala mu malanda mimpe ne Nzambi. Batu bambe ne: “Bu mudi muntu, miaba yonso ne dîba dionso, katshia ku tshibangidilu too ne lelu, muikale umvua muoyo wa kutendelela tshintu kampanda tshidiye wela meji ne: tshidi ku mutu kuende ne tshidi ne bukole kumupita yeye, bidi bileja ne: tshitendelelu mbualu bua ku tshifukilu ne bena meji badi ne bua kujingulula bualu ebu. . . . Patudi tumona mushindu udi bantu ba miaba yonso bakeba ne bitabuja muntu mutambe bunene, bidi ne bua kutusaka bua kuikala ne dikatshila ne kanemu.”​—Man Does Not Stand Alone, mufunda kudi Cressy Morrison.

Yezu Kristo wakamba ne: ‘Badi bapele mu mitshima yabu badi ne disanka.’ (Matayo 5:3) Bantu badi bashala mutantshi mule baditapulule kudi bakuabu kabatu bapeta diakalenga nansha. Kadi bidi ne njiwu ya bungi menemene bua tuetu kuditapulula kudi Mufuki wetu. (Buakabuluibua 4:11) Kupeta ne kutumikila “dimanya dia malu a Nzambi” kudi ne bua kuikala bualu bua mushinga mu nsombelu wetu. (Nsumuinu 2:1-5) Bushuwa, tudi ne bua kuikala pabangadike bua kukumbaja majinga etu a mu nyuma, bualu katuena mua kudisombela pa nkayetu ne kushala baditapulule kudi Nzambi nansha. Nsombelu muimpe wa disanka udi ufumina ku malanda mimpe ne Yehowa, ‘Mutambe Bunene wa pa mutu pa buloba bujima.’​—Musambu 83:18.

[Tshimfuanyi mu dibeji 5]

Miguel: “Mvua ne bikondo bimvua ntata bikole, kadi pangakabanga kudisangisha ne basadidi ba Yehowa, nsombelu wanyi wakashintuluka”

[Tshimfuanyi mu dibeji 5]

Alma Ruth: “Pangakalonga malu adi atangila Yehowa, ngakamanya ne: mvua mua kudia nende malanda mashême”

[Tshimfuanyi mu dibeji 6]

Emelia: “Kumpala kua meme kumanya bulelela, . . . mvua ndimona tshiyi ne mushinga nansha mukese”

[Tshimfuanyi mu dibeji 7]

Kudisangisha ne batendeledi balelela kudi kuambuluisha bua kukumbaja majinga etu a mu nyuma