Tudiku menemene dijinga ne bantu bakuabu anyi?

ALBERT Einstein, muena meji mumanyike bimpe, wakamba ne: “Patudi tutangila bimpe nsombelu wetu ne midimu itudi tuenza, tudi tujingulula diakamue ne: malu etu ne majinga etu pabuipi ne onso mbisuikakaja ku nsombelu wa bantu bakuabu.” Wakamba kabidi ne: “Tudi tudia biakudia bidi bantu bakuabu bakune, tuvuala bilamba bidi bakuabu benze, tusombela mu nzubu idi bakuabu bibake. . . . Muntu udi tshidiye ne udi ne mushinga udiye nawu ki nnangananga bua dikala mudikadile pa nkayende to, kadi mbualu udi munkatshi mua tshinsanga tshinene tshia bantu, badi bamulombola mu malu ende a ku mubidi ne a mu nyuma kubangila ku diledibua diende too ne ku lufu.”

Mu bukua-nyama, tutu tuyimona idia payi bulunda mu tshingenyingenyi tshiayi. Tupumbu tutu tuenda pamue mu tshisumbu, tulame bana batu bimpe. Ntambue mikaji itu ipata pamue nyama ya kudia ne itu idia biakudia biayi pamue ne ntambue milume. Mishipa minene ya dauphin itu inaya pamue ne itu mene ikuba nyama mikuabu ya mu mâyi anyi bowedi padibu mu njiwu.

Kadi bamanyi ba malu a nsombelu wa bantu mbamone ne: kudi tshilele tshidi tshibungamija bikole munkatshi mua bantu. Bilondeshile tshikandakanda tshipatula mu ditunga dia Mexique, bamue bena meji badi bamba ne: “bidimu bivule bia didisombela pa nkaya ne dienda dibutula nsombelu wa mu tshinsanga mbinyange bantu bikole mu ditunga dia États-Unis.” Tshikandakanda atshi tshiakamba kabidi ne: “nsombelu muimpe wa ditunga mmusuikila ku dishintuluka dinene dia ngikadilu wa bantu, mbuena kuamba ne: dipingana ku nsombelu wa mu tshinsanga.”

Bualu ebu mbutangalake bikole nangananga munkatshi mua bantu badi basombele mu matunga mashidimuke. Tshilele tshia kudisombela pa nkaya tshidi tshienda tshitangalaka ne lukasa munkatshi mua bantu ba bungi. Bantu mbasue ‘kuikala badikadile’ ne badi babenga ne muoyo mujima bua bantu bakuabu ‘kababuelakanyi mu malu abu.’ Batu baleje ne: tshibidilu etshi ntshifikishe bantu ku dipeta tunyinganyinga, dibungama ne ku didishipa.

Bua muanda eu, munganga Daniel Goleman wakamba ne: “Dibenga kusomba ne bantu (mbuena kuamba ne: kubenga kuikala ne munga muntu wa kuambila malu ebe anyi wa kusomba nende) didi divudija njiwu ya kupeta masama anyi lufu.” Luapolo kampanda lupatula mu tshikandakanda tshia Science luakamba ne: dibenga kusomba ne bantu ‘didi dikebesha mfu ya bungi anu bu mudi tshilele tshia kunua makanya, didi dikebesha disama dia luendu lua mashi, dia kolesterole wa bungi mu mubidi, dia divula dia mafuta mu mubidi ne dibenga kuibidija mubidi.’

Nunku kudi malu a bungi adi atusaka bua kuikala dijinga menemene ne bantu bakuabu. Katuena mua kudikadila pa nkayetu katuyi dijinga ne bantu bakuabu nansha. Kadi mmunyi mudi tshilumbu tshia didisombela pa nkaya mua kujika? Ntshinyi tshidi tshiambuluishe bantu ba bungi bua kuikala ne muoyo udi ne tshipatshila tshilelela? Tshiena-bualu tshidi tshilonda netshiandamune nkonko eyi.

[Lungenyi lunene lua mu dibeji 3]

“Malu etu ne majinga etu pabuipi ne onso mbisuikakaja ku nsombelu wa bantu bakuabu.”​—Albert Einstein