Bapele badi benda anu balua bapele

“Kakuena bantu badi mua kuikala ne diakalenga ne disanka dilelela padi ba bungi ba kudibu bikale bapele ne bakenga to.”

MUENA malu a mpetu Adam Smith ke wakamba mêyi aa mu bidimu bia 1700. Bantu ba bungi mbatuishibue ne: bulelela bua mêyi akambaye aa mbumueneke bikole lelu. Dishilangana pankatshi pa babanji ne bapele ndilue kumueneka bikole menemene. Mu Philippines, tshia-bisatu tshimue tshia bantu tshitu tshitula dolare muinshi mua umue ku dituku bua biakudia, bungi bua makuta atu bantu bapeta pa tshibidilu mu minite mikese mu matunga mabanji. Luapolo kampanda lua Nsangilu wa Matunga Masanga (ONU) ludi luamba ne: “Bantu batanu pa lukama ba ku babanji pa buloba bujima badi ne mafutu mapite a bantu batanu pa lukama ba ku bapele misangu 114.”​—Rapport mondial sur le développement humain 2002.

Padi eku bamue basombele miaba idi imueneka mimpe, bakuabu bavule mbasombele mu bisasasa bia nzubu miaba yonso idibu basue kuasa. Banga kabena ne pa kutudila bu bakuabu aba to; badi basombele mu njila, baladila pa turton anyi pa tubudimbua. Ba bungi ba kudibu badi basumpakana bua kupeta muaba wa kulala, baya kangula bintu miaba itubu bimansha bintu bia bukoya, bambula majitu manene anyi benda basangisha bintu bia ku diala mu matempu.

Dishilangana pankatshi pa babanji ne bapele kaditu anu mu matunga mapele nkayamu to, kadi anu mudi bena ku Banke wa Buloba bujima bamba, “mu matunga onso mutu miaba ya bapele.” Kubangila mu ditunga dia Bangladesh too ne mu États-Unis, nansha bamue bikale ne biuma bia bungi, kudi bantu badi baluangana bikole bua kupetaku biakudia anyi nzubu wa kusombela. Tshikandakanda tshia The New York Times tshiakakula bua luapolo lua Biro bidi bitangila malu a bungi bua bena ditunga luvua luleja ne: dishilangana pankatshi pa babanji ne bapele mu États-Unis didi dienda didiunda. Tshivua tshiamba ne: “Tshia-bitanu tshia bantu tshivua tshipete tshia-bibidi tshimue tshia tshitupa tshia makuta onso masanga a kudia nawu tshidimu tshishale avua akengela . . . Tshia-bitanu tshia bapele menemene tshivua tshipete bia pa lukama bisatu ne tshitupa bia makuta a kudia nawu.” Nsombelu udi wa muomumue anyi mutambe bubi mu matunga a bungi. Luapolo kampanda lua Banke wa Buloba bujima luakaleja ne: bantu 57 pa lukama pa buloba bujima badi badia dolare mishadile ku ibidi ku dituku.

Nsombelu wakatamba kukola mu tshidimu tshia 2002, ne biakatonda ba bungi pakumvuabu ne: balombodi ba kumpanyi bavua balue babanji mu njila ivua imueneka kayiyi mimpe  to. Nansha muvua balombodi ba kumpanyi aba kabayi benze bualu kampanda bubi patoke, bantu ba bungi mbamone ne: balombodi aba “bavua benda balua babanji mu mishindu mibi.” Bilondeshile malu adi enzeka pa buloba bujima, bamue badi badikonka bua mudi makuta bungi nunku (miliyo ne miliyo ya dolare) mikale ku bianza bia bamue bantu eku bakuabu bungi tshianana bikale bapele.

Bupele nebushale kashidi anyi?

Ebi kabiena bisua kuleja ne: kakuena muntu nansha umue udi uditatshisha bua kuenzela bapele bualu kampanda to. Bamfumu ba mbulamatadi ba muoyo muimpe ne malongolodi a diambuluisha bantu mbafile ngenyi ya kujikija tshilumbu etshi. Nansha nanku, malu adi enzeka adi anu atekesha mu mikolo. Nansha mudi bantu baditatshisha ne muabu muonso bua kulengeja nsombelu, luapolo kampanda ludi luamba ne: “Matunga a bungi mmalue mapele kupita too ne muvuabi kukadi bidimu 10 anyi 20 anyi mene muvuabi kukadi bidimu 30.”​—Rapport mondial sur le développement humain 2002.

Nunku malu aa adi asua kuleja ne: kakuena bua nsongo budi bapele mua kutekemena anyi? Tudi tukulomba bua kubala tshiena-bualu tshidi tshilonda bua kumona imue mibelu ya meji idi mua kukuambuluisha bituadijila mpindieu, ne kabidi kumona mushindu wa kujikija malu auvua kuyi nansha mua kuikala welela meji to.