Bamanyishi ba Bukalenge badi balonda

Lutulu ne dinanukila bidi bipatula bipeta bimpe

YEZU KRISTO wakamanyisha ne: mu matuku a ku nshikidilu ‘dinanga dia ba bungi [divua ne bua] kukepa.’ Ke bualu kayi miaba ya bungi lelu’eu, bantu bavule kabatu basue bua kuteleja lumu luimpe lua Bukalenge to. Bamue batu bafika too ne ku dipepeja malu a Nzambi.​—Matayo 24:12, 14.

Nansha nanku, ditabuja ne lutulu mbiambuluishe bamanyishi ba Bukalenge bua kutshimuna lutatu elu anu mudi bualu budi bulonda ebu buvua buenzeke mu ditunga dia République Tchèque buleja.

Dimue dituku, bamamu bakuabu babidi Bantemu ba Yehowa bakayikila ne munga mamu muikadile munda mua nzubu ku tshibi kukanga. Kunyima kua katantshi kîpi, muntu mukaji au wakakangula tshibi kakese, kololaye tshianza, kuangataye bibejibeji bia Tshibumba tshia Nsentedi ne Réveillez-vous! bivua Bantemu abu benda bafila. Yeye kuamba ne: “Tuasakidilayi,” pashishe kuinjilaye tshibi. Bantemu abu bakadiebeja ni bavua mua kumupinganyina tshiakabidi. Umue wa kudibu, mpanda-njila (anyi muyishi wa ku dîba ne ku dîba) wakapinganyina mamu au, ne kuenzekabi anu bu kumpala. Malu akatungunuka amu nanku munkatshi mua tshidimu tshijima.

Mpanda-njila au wakashintulula nyishilu wende, yeye kusambila Yehowa kumulomba bua amuambuluishe. Pakapeshaye muntu mukaji au bibejibeji musangu wakalonda, wakamukonka ne dîyi dimpe ne: “Malu kayi? Mmalu kayi avua makusankishe mu bibejibeji abi?” Kumpala kavua wandamuna to, kadi pakayabu kumutangila misangu mikuabu kabidi, wakabanga kudileja mulunda. Dimue dituku wakunzulula tshibi tshionso, kadi bakayikila anu bua katantshi kîpi.

Bu muvua muntu mukaji au welakana bua kuyikila ku tshibi, mpanda-njila au wakamufundila mukanda, kumumvuija tshituyi uluila kuende ne kumulombaye bua kulonga nende Bible ku nzubu. Ndekelu wa bionso, kunyima kua tshidimu tshijima ne tshitupa tshia lutulu ne didienzeja ne muoyo mujima, mpanda-njila au wakatuadija kulonga Bible ne muntu mukaji au. Wakakema ne kumvua bimukankamija pakalua muntu mukaji au kumuambila ne: “Ngakabanga kuitabuja Nzambi kubangila dituku diwakatuadija kuntuadila bibejibeji.”

Bushuwa, lutulu ne dinanukila bidi mua kupatula bipeta bimpe mu mudimu eu wa diyisha Bukalenge ne divuija bantu bayidi.​—Matayo 28:19, 20.