Muaba utudi mua kumanyina mushindu wajika bupele

NANSHA mudiku ngumu mibi pa buloba bujima pa bidi bitangila bupele, kudi bantu batshidi batekemena bua se: badi mua kuenza bualu kampanda busunguluke bua kushintulula malu. Tshilejilu, bilondeshile tshiena-bualu tshia mu tshikandakanda kampanda, Banke wa malu a Dilubuluka wa mu Asia wakamanyisha ne: “Matunga a mu Asia adi mua kujikija bupele mu bidimu 25.” Banke eu wakafila mubelu eu uleja ne: dilubuluka mu malu a mpetu ke mushindu udi mua kuambuluisha bua kumbusha bantu mu bupele bukole budibu nabu.​—Manila Bulletin.

Manga malongolodi ne mbulamatadi mbipatule mulongolongo wa mibelu ne mishindu ya kujikija tshilumbu etshi. Munkatshi muayi mudi programe ya dikuba bantu ne bintu biabu, dilongolola malu a tulasa, dilekelela matunga mapele mabanza adiwu mabuele kudi matunga mabanji, diumbusha difuta dia bitadi ku mikalu bua matunga adi ne bapele ba bungi amone mua kusumbisha bintu biawu kakuyi lutatu, ne dipesha bapele nzubu ya difutshila ya mbulamatadi ku mushinga mupuekele.

Mu tshidimu tshia 2000, Tshipangu Tshinene tshia Bulongolodi bua Matunga Masanga tshiakadifundila bipatshila bia kukumbaja pa kuamba tufike mu tshidimu tshia 2015. Munkatshi mua bipatshila abi muvua tshivua tshitangila dijikija bupele ne nzala ne dishilangana dinene dia mafutu didi pankatshi pa bantu ba mu matunga mabanji ne mapele. Kadi nansha mudi bipatshila ebi bikale bimpe, bantu ba bungi kabena bamona ne:  badi mua kubikumbaja pa buloba ebu budi bantu kabayi mu buobumue to.

Malu adi ambuluisha bua kumona mua kupita ne bupele

Pikalaku kakuyi ditekemena menemene dia se: malu a pa buloba bujima nealubuluke, nanku nkuepi kutudi mua kuya kukeba diambuluisha? Anu mutukadi baleje, kudi mpokolo wa meji adi mua kuambuluisha bantu mu nsombelu bituadijile ku mpindieu. Mmpokolo kayi au? M’Bible, Dîyi dia Nzambi.

Bible mmushilangane ne mikanda mikuabu yonso ku tshinyi? Bible mmufumine kudi mfumu mutambe bunene, Mufuki wetu. Mu Bible mudi malu a meji a mushinga mukole, mêyi mimpe adi bantu bonso mua kutumikila, miaba yonso ne bikondo bionso. Bapele buobu batumikile mêyi aa, bidi mua kubambuluisha bua kuikala ne nsombelu wa disanka nansha mpindieu. Tumonayi bimue bilejilu bikese.

Ikala ne mmuenenu muimpe wa mfranga. Bible udi wamba ne: ‘[Meji] adi ne dikuatshisha bu dia biuma; kadi [meji] adi atamba bualu adi avuija muoyo kudi muenawu.’ (Muambi 7:12) Mêyi aa adi umvuija tshinyi? Makuta kaatu apetesha muntu bintu bionso to. Bulelela, atu akuba mu mushindu kampanda peshi kansanga. Atu atuambuluisha bua kusumba bimue bintu bitudi nabi dijinga, kadi nansha nanku adi ne mikalu. Kudi bintu bia mushinga mukole bidi makuta kaayi mua kusumba to. Dimanya dia bualu ebu nedituambuluishe bua kuikala ne nkatshinkatshi ne kuepuka tunyinganyinga tudibu bapete kudi aba badi basombela anu dikeba bua kupeta makuta a bungi. Makuta kaena mua kusumba muoyo to, kadi kuenza malu ne meji kudi mua kukuba muoyo mpindieu ne kutunzuluila njila wa muoyo wa tshiendelele.

Ikala ne nsombelu bilondeshile buebe bumonyi. Bintu bitudi tujinga kabiena muomumue ne bitudi tukengela to. Pabi bintu bitudi tukengela ke bitudi ne bua kuteka pa muaba wa kumpala. Mbipepele bua tuetu kudiambila ne: tudi tukengela tshintu kampanda, pabi tuetu bikale anu natshi dijinga kadi katuyi tutshikengela to. Muntu wa meji neanji kutula diambedi makuta ende ku bintu bidiye ukengela menemene bu mudi biakudia, bia kuvuala, muaba wa kulala ne bikuabu. Pashishe, kumpala kua kusumba tshintu tshikuabu, neanji kukeba bua kumanya makuta adiye mushale nawu ni adi mua kukumbana bua kusumba bintu bikuabu. Mu umue wa ku mifuanu yende, Yezu wakamba bua muntu anji ‘kusomba panshi ne abale mushinga [bua kumona] bikalaye ne makuta makumbane.’​—Luka 14:28, Muanda Mulenga Lelu.

Mu Philippines, Eufrosina (mamu udi udikoleshila bana bende basatu) uvua ne lutatu lua kupeta mfranga ne uvua utula ulaminyina makuta ende bualu bayende uvua mumulekele kukavua bidimu ndambu. Nunku wakalongesha nansha ne bana bende bua kumanya bintu bia mushinga bidi bikengela kusumba kumpala menemene kua kuela meji bua kusumba bikuabu. Tshilejilu, bana badi mua kumona tshintu kampanda tshidibu basue. Pamutu pa kubenga tshianana, mamu eu utu ubeleshisha meji wamba ne: “Nudi mua kupeta tshintu etshi nuenu basue, kadi bidi bikengela nuenu kusungula tshinudi basue. Makuta atudi nawu mmakumbane anu bua kusumba tshintu tshimu’epele. Tudi mua kusumba tshintu etshi tshinudi basue, anyi tudi mua kusumba ndambu wa munyinyi peshi bisekiseki bia tuetu kudia ne losa lumingu elu. Mpindieu, ntshinyi tshinudi basue? Sungulayi.” Pa tshibidilu, bana batu bumvua ne lukasa ne bitaba bua kupeta biakudia pamutu pa tshinga tshintu.

Manya mua kusanka anu ne biudi nabi. Dîyi dikuabu dia mu Bible didi diamba ne: “Tuetu ne biakudia ne bia kuvuala, tusanke.” (1 Timote 6:8, Mukanda wa Mvidi Mukulu [Katolike, MMM]) Makuta nkayau kaatu afila disanka to. Bantu babanji ba bungi kabatu ne disanka to, kadi bapele  bavule batu ne disanka dia bungi. Bapele batu balonge mua kusanka anu ne bintu bikese bidibu nabi bualu. Yezu wakamba bua kuikala ne ‘dîsu dimpe’ didi dituishila anu pa bintu bidi bikengedibua menemene. (Matayo 6:22, MMM) Bualu ebu budi buambuluisha muntu bua kumanya mua kusanka ne bidiye nabi. Bapele bavule batu ne disanka dia bungi bualu batu mu malanda mimpe ne Nzambi ne kabidi batu ne nsombelu wa disanka mu dîku, bintu bidi makuta kaayi mua kusumba to.

Ebi mbilejilu bikese patupu bia mibelu milenga ya mu Bible idi mua kuambuluisha bantu badi bapele bua kumanya mua kupita ne nsombelu wabu. Kudi mibelu mikuabu ya bungi. Tshilejilu, epuka bibidilu bibi bu mudi kunua kua mfuanka ne kunaya manaya a makuta bualu bidi bitudisha makuta patupu; keba bua kumanya bintu bidi bikengedibua menemene mu nsombelu wa muntu, nangananga malu a mu nyuma; miaba idibi bikole bua kupeta mudimu, keba bua kuenza mudimu kampanda udi bantu nawu dijinga. (Nsumuinu 22:29; 23:21; Filipoi 1:9-11) Bible udi ulomba bua kulonda ‘meji adi akuatshisha, ne bukole bua kupangadija malu’ bualu “nebikale muoyo ku mutshima webe.”​—Nsumuinu 3:21, 22.

Nansha mudi mibelu ya mu Bible mua kupesha badi baluangana ne bupele ndambu wa disulakana, nkonko idi itangila matuku atshilualua itshidi mimane kamungulu. Bapele mbafundila bua kushala anu mu bupele kashidi ne tshiendelele anyi? Dishilangana didi pankatshi pa babanji ba menemene ne bapele ba menemene nedijike dimue dituku anyi? Tumonayi diandamuna didi bantu ba bungi kabayi bamanye to.

Bible udi utupesha ditekemena

Bantu ba bungi batu bamba ne: Bible mmukanda muimpe wa dikema. Kadi misangu mivule kabatu bamanye ne: Bible udi ne malu masunguluke adi atangila mashintuluka manene enzeka kumpala eku to.

Nzambi mmulongolole bua kujikija ntatu ya bukua-bantu, kusangisha ne bupele kabidi. Bu mudi mbulamatadi ya bantu kayiyi ne dijinga peshi mikokeshe bua kujikija bupele, Nzambi mmulongolole bua kuyumbusha. Mmushindu kayi? Bible udi wamba mu Danyele 2:44 ne: ‘Mu matuku a bakalenge aba Nzambi wa mu diulu neajadike bukalenge bukuabu budi kabuyi bubutudibua tshiendelele. Bukokeshi buabu kabuena bupianyibua kudi bantu bakuabu, kadi nebutshibule makalenge aa onso bitupa bitupa, nebuabutule, ne buobu nebujalame tshiendelele.’

Kunyima kua yeye mumane kumbusha ‘makalenge’ aa anyi mbulamatadi eyi, Mukokeshi udi Nzambi mutekete neenze bualu kampanda. Mukalenge eu ki mmuntu wa mashi ne mâyi to, kadi mmuntu wa bukole wa mu diulu udi mufuanangane ne Nzambi, muikale ne bukokeshi bua kushintulula malu manene adi akengedibua bua kujikija dishilangana didiku mpindieu mu bantu. Nzambi mmusungule Muanende bua kuenza bualu ebu. (Bienzedi 17:31) Musambu 72:12-14 udi uleja tshikala Mukalenge eu ne bua kuenza, wamba ne: ‘Neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’ Edi nditekemena dilenga be! Ndekelu wa bionso bantu nebapete disulakana. Mukalenge udi Nzambi musungule neakuatshishe bapele ne bapuekele.

 Ntatu ya bungi mikebesha kudi bupele neijike dîba adi. Mvese wa 16 wa Musambu wa 72 udi wamba ne: ‘Blé ikale mivule pa buloba, too ne pa mitu pa mikuna.’ Kakuakuikala kabidi biyole bia nzala bidi bifumina ku dipangika dia biakudia anyi dia makuta peshi bua bulombodi bubi nansha.

Ntatu mikuabu neijike kabidi. Tshilejilu, lelu bantu ba bungi badi pa buloba kabatu ne nzubu wabu buobu nkayabu to. Kadi Nzambi udi ulaya ne: ‘Nebase nzubu, nebashikamemu; nebatentule mionji ya tumuma tua mvinyo, nebadie tumuma tuayi. Kabena basa nzubu bua mukuabu abuelemu; kabena bakuna bintu bua mukuabu abidie; bualu bua bu mudi matuku a muoyo wa mutshi mbu mudi matuku a bantu banyi, ne bantu bangakusungula nebasanke musangu mule mu mudimu wa bianza biabu.’ (Yeshaya 65:21, 22) Muntu yonso neikale ne wende nzubu ne mudimu muimpe wanangaye. Nunku Nzambi udi ulaya dijika dia bupele bua kashidi. Kakuakuikala kabidi dishilangana dinene pankatshi pa babanji ne bapele to, bantu kabakuikala bakenga kabidi nansha.

Musangu wa kumpala udi muntu umvua milayi ya mu Bible eyi, udi mua kumona bu idi kayiyi milelela to. Kadi dikonkonona Bible bimpe bimpe didi dileja ne: malu onso avua Nzambi mulaye kale mu Bible akadi makumbane. (Yeshaya 55:11) Nunku tshilumbu tshidi muaba eu ki ntshia kukeba bua kumanya bikale bionso ebi mua kuenzeka anyi kubenga kuenzeka to. Kadi mbimpe wewe kudiebeja ne: Ntshinyi tshiudi mua kuenza bua kupeta diakalenga pikala bualu ebu mua kuenzeka?

Newikalemu anyi?

Bu mudi bukalenge ebu buikale bua Nzambi, nanku tudi ne bua kuikala bantu bikala Nzambi mua kuanyishila bua kusomba mu bukokeshi buende ebu. Ki mmutusokoke tshia kuenza bua kukumbaja malu adiye ulomba to. Mmutuleje malu a tuetu kuenza mu Bible.

Muana wa Nzambi udiye muteke Mukalenge udi muakane. (Yeshaya 11:3-5) Nunku, bonso badibu bitabila bua kuikala ne muoyo mu bukalenge ebu badi babalomba pabu bua bikale bakane. Nsumuinu 2:21, 22 udi wamba ne: ‘Badi ne mitshima miakane nebashikame mu buloba, badi ne mutshima umue mutoke nebajalame. Kadi nebajimije bantu babi pa buloba, nebumushepu bena tshitungu.’

Kudiku mushindu wa kulonga bua kumanya mua kukumbaja malu malomba aa anyi? Eyowa menemene. Udi mua kupeta diakalenga edi mu matuku atshilualua wewe mulonge Bible ne mutumikile mibelu idimu. (Yone 17:3) Bantemu ba Yehowa nebikale ne disanka dia kukuambuluisha ne dilonga edi. Tudi tukulomba bua kuenza muebe muonso bua umone pebe mua kuikala munkatshi mua bantu bikala kabayi mua kukenga kabidi bua bupele anyi kansungansunga.

[Tshimfuanyi mu dibeji 5]

Eufrosina: “Dilaminyina makuta ndiambuluishe bena dîku dianyi bua kuikala ne bintu bidibu nabi bualu”

[Bimfuanyi mu dibeji 6]

Malanda mimpe ne Nzambi ne nsombelu wa disanka mu dîku kabatu mua kubisumba ne makuta to