Nkonko ya babadi

Yehowa wakalekela bua basadidi bende ba kale bena Isalele kuselabu bakaji ba bungi, kadi mpindieu kêna witaba bualu ebu to. Nanku mikenji yende idi itangila dibaka itu ishintuluka anyi?

Yehowa kêna mushintulule mmuenenu wende pa bidi bitangila tshilumbu tshia disela bakaji ba bungi nansha. (Musambu 19:7; Malaki 3:6) Ku tshibangidilu, Nzambi kavua mulongolole bua bantu kuikalabu basela bakaji ba bungi nansha, ne ke mudibi kabidi lelu. Pakafukaye Eva bua kuikalaye mukaji wa Adama, Yehowa wakela mukenji wa ne: mukaji umue bua mulume umue. ‘Bua bualu ebu mulume neashiye tatuende ne mamuende, nealamate mukaji wende; bubidi buabu nebikale mubidi umue.’​—Genese 2:24.

Pavua Yezu Kristo pa buloba, wakambulula mukenji eu pakandamunaye bantu bavua bebeja bua dishipa dia dibaka ne diselulula. Wakamba ne: ‘Nuenu kanuakubala ne: Ku tshibangidilu mufuki wakabafuka mulume ne mukaji, mufuki wakamba biende ne: Bua bualu ebu mulume neashiye tatu wende ne baba wende; bubidi buabu nebalue mubidi umue? Nunku kabena bantu babidi kabidi, badi mubidi umue.’ Yezu wakamba kabidi ne: ‘Wumusha mukaji wende kabuyi bua masandi, pabakaye mukaji mukuabu, yeye udi wenda masandi.’ (Matayo 19:4-6, 9) Bilondeshile mvese eu, kusela bakaji babidi anyi ba bungi nkuenda masandi.

Kadi bua tshinyi ku kale bavua balekela bantu basela bakaji ba bungi? Umanye ne: ki n’Yehowa uvua muambile bantu bua kuikalabu basela bakaji ba bungi to. Muntu wa kumpala udibu batele mu Bible uvua ne bakaji ba bungi uvua Lemeke, umue wa ku ndelanganyi ya Kayina. (Genese 4:19-24) Pavua Yehowa mulokeshe Mvula wa kabutu mu matuku a Noa, Noa ne bana bende ba balume basatu bavua muntu ne muntu ne mukaji umuepele patupu. Kadi bantu buonso bavua ne bakaji ba bungi bakafua ku Mvula au.

Kunyima kua bidimu bivule pakalua Yehowa kusungula bena Isalele bua kuikala tshisamba tshiende, bamue bakavua ne tshilele tshia kusela bakaji ba bungi, nansha mudibi bimueneka ne: bakuabu bavua ne mukaji anu umuepele. Nzambi kavua ulomba bua mêku kutapulukawu muaba uvua muntu ne bakaji babidi anyi ba bungi nansha. Pamutu pa nanku wakabelela mikenji bua kukontolola bimpe tshilele atshi.​—Ekesode 21:10, 11; Dutelonome 21:15-17.

Mêyi avua Yezu muambe pa bidi bitangila mikenji ya ku tshibangidilu bua dibaka ne avua nyuma wa Nzambi musake Paulo bua kufunda adi aleja ne: Nzambi uvua mulekele bantu basela bakaji ba bungi anu bua tshikondo kampanda. Paulo wakamba ne: ‘Mulume ne mulume ikale ne mukaji wende ne mukaji ne mukaji ikale ne mulume wende.’ (1 Kolinto 7:2) Nyuma wa Nzambi wakasaka kabidi Paulo bua kufunda ne: muntu yonso udibu bateka mutangidi anyi musadidi wa mudimu mu tshisumbu tshia bena Kristo udi ne bua ‘kuikala [ne] mukaji umue.’​—1 Timote 3:2, 12; Tito 1:6.

Nunku, kunyima kua dienjibua dia tshisumbu tshia bena Kristo kukadi mpindieu bidimu bu 2 000, Yehowa wakela tshisala ku tshilele etshi ne kakitaba kabidi bua bantu kuikalabu basela bakaji ba bungi. Katshia anu ku tshikondo atshi, mukenji wa dibaka wakapingana muvuawu ku ntuadijilu pavua Nzambi mufuke mulume ne mukaji, mbuena kuamba ne: mulume umue ne mukaji umue. Ke mukenji udiku lelu’eu munkatshi mua tshisamba tshia Nzambi pa buloba bujima.​—Mâko 10:11, 12; 1 Kolinto 6:9, 10.