“MBANUPESHE tshianana, nupeshangane penu tshianana.” (Matayo 10:8, MMM) Yezu wakambila bapostolo bende dîyi edi pakabatumaye bua kuyisha lumu luimpe. Bapostolo bavua batumikile dîyi edi anyi? Eyowa, bakatungunuka ne kuenza nunku nansha pakumuka Yezu pa buloba.

Tshilejilu, pakamona Simona mutempeshi wa mbuku wa kale bukole bua kuenza bishima buvua nabu bapostolo aba Petelo ne Yone, wakalomba bua kubafutaye makuta bua bamupeshe bukole abu. Kadi Petelo wakatandisha Simona wamba ne: ‘Argent yebe ifue nebe, bualu bua wewe wakuelangana meji ne: Nengangate dipa dia Nzambi ku bintu.’​—Bienzedi 8:18-20.

Mupostolo Paulo wakaleja pende lungenyi lua buena lua Petelo. Paulo uvua mua kulekela bua bana babu ba mu Kolinto kuambulabu bujitu buende. Kadi wakenza mudimu ne bianza biende bua kudiambuluisha. (Bienzedi 18:1-3) Nunku ne dieyemena dionso uvua mua kuamba ne: uvua muyishe lumu luimpe kudi bena Kolinto ‘kaluyi bua mushinga.’​—1 Kolinto 4:12; 9:18.

Bia dibungama, bantu ba bungi badi badiamba mudibu bayidi ba Kristo ki mbaleje lungenyi lua muomumue elu lua ‘kupeshangana [bintu] tshianana’ to. Bulelela, bamfumu ba bitendelelu ba bungi mu Bukua-buena-Kristo badi ‘bayisha anu bua difutu.’ (Mika 3:11) Bamfumu ba bitendelelu bakuabu mbanême ne mfranga idi bena mu bisumbu biabu basangisha. Mu tshidimu tshia 1989, bakafundila mpasata mukuabu wa mu États-Unis buloko bua bidimu 45. Bua tshinyi? Uvua “wiba bena mu tshitendelelu miliyo ya dolare bungiyi, e kusumba ne tshitupa tshia makuta au nzubu, mashinyi, kuenza ngendu bua kuya kuikisha ne wakasumba mene too ne tshiamu tshia kufila mashika anyi luya bua kazubu ka mbua wende.”​—People’s Daily Graphic, 7 Kasuamansense 1989.

Bilondeshile tshikandakanda tshia Ghanaian Times tshia mu dia 31 Luabanya 1990, mu ditunga dia Ghana nsaserdose mukuabu wa ekeleziya Katolike wakangata makuta avuabu basangishe mu misa ne kuimanshila bantu bavua mu misa amu. Tshikandakanda tshidi tshiamba ne: “Tshivuaye muenzele nanku tshivua bualu bu muvuabu bantu abu bakulumpe, uvua mutekemene bua kuelabu makuta bungi bubandile.” Kabiena bikemesha padi ekeleziya ya bungi iteta mua kujula lukuka kudi bena kuitabuja babu, ilongoluesha manaya a mfranga ne malu makuabu bua kumona mua kupeta makuta a bungi.

Bishilangane bikole menemene, Bantemu ba Yehowa buobu badi benza muabu muonso bua kuidikija Yezu ne bayidi bende ba kumpala. Kabena ne balombodi batubu bafuta makuta to. Ntemu ne Ntemu yonso mmuena mudimu udi ne bujitu bua kuyisha ‘lumu luimpe lua bukalenge’ kudi bakuabu. (Matayo 24:14) Nunku Bantemu bapite pa miliyo isambombo badi batuadila bantu ‘mâyi a muoyo’ tshianana. (Buakabuluibua 22:17) Nunku eu, nansha aba badi ‘kabayi ne biuma’ badi mua kuteleja mukenji wa mu Bible. (Yeshaya 55:1, MMM) Nansha mudi mudimu wabu wa pa buloba bujima muikale wenzeka ne mapa a budisuile, kabatu benda balomba bantu makuta to. Bu mudibu bena mudimu balelela ba Nzambi, kabena “benda mushinga ne [dîyi dia Nzambi],”  kadi badi bakula ‘bulelela anu mudibu bufume kudi [Nzambi].’​—2 Kolinto 2:17, MMM.

Kadi bua tshinyi Bantemu ba Yehowa mbasue kuambuluisha bakuabu, benza nunku nansha ne mfranga yabu nkayabu? Ntshinyi tshidi tshibasaka? Kupeshangana tshianana kudiku kumvuija ne: badi benza nunku kakuyi difutu bua mudimu mukole udibu bakuata anyi?

Bena Kristo balelela badi bangabanga ne tshipatshila tshia kusankisha Yehowa, kadi ki ntshia kulua babanji nansha. Nunku badi bapeta mushindu wa kuandamuna ku mayobo avua Satana Diabolo muyobole Nzambi kukadi bidimu nkama ne nkama. Pa bidi bitangila muntu muakane Yobo, Satana wakayobola Yehowa e kuamba ne: ‘Yobo udi utshina Nzambi patupu anyi?’ Satana wakamba muvua Yobo wenzela Nzambi mudimu anu bualu Nzambi uvua mumunyungulule ne lupangu bua kumukuba. Satana wakamba ne: bu Yobo mua kujimija bintu biende uvua mua kuela Nzambi mulawu!​—Yobo 1:7-11.

Bua kuleja ne: kabivua nanku, Nzambi wakapesha Satana njila bua kutetaye Yobo, e kuambaye ne: ‘Bintu bionso bidiye nabi bidi mu bianza biebe.’ (Yobo 1:12) Ntshinyi tshiakenzeka? Yobo wakaleja ne: Satana uvua muena dishima. Nansha muvua Yobo mupete makenga a bungi, wakashala anu ne lulamatu. Wakamba ne: ‘Too ne pangafua tshiena ngitabuja bua [muoyo] wanyi mutoke umuke nkundi!’​—Yobo 27:5, 6.

Lelu’eu batendeledi balelela badi baleja ngikadilu wa buena wa Yobo. Kabena benzela Nzambi mudimu bua kupeta bintu to.

Bualu bukuabu budi busaka bena Kristo balelela bua kuikala ‘kupeshangana tshianana” mbualu Nzambi ‘mubapeshe tshianana.’ Bantu badi ku bupika bua mpekatu ne lufu bualu bua mpekatu wa nkambua wetu Adama. (Lomo 5:12) Bua dinanga didiye munanga bantu, Yehowa wakatuma Muanende bua afue lufu lua mulambu, ne bualu ebu buvua bulombe Nzambi bia bungi. Bantu ki mbakumbanyine mulambu eu nansha. Etshi bushuwa ndipa dia kudi Nzambi.​—Lomo 4:4; 5:8; 6:23.

Ke bua tshinyi mu Lomo 3:23, 24, Paulo udi wambila bena Kristo bela manyi ne: ‘Bualu bua bonso bakenza malu mabi, ne badi bapanga kupeta butumbi kudi Nzambi. Badi babingishibua anu patupu ku [bulenga bukena butuakanyine buende] bualu bua dipikula didi mu Kristo Yezu.’ Aba badi ne ditekemena dia kupeta muoyo wa kashidi pa buloba buobu pabu ‘mbabapeshe tshianana.’ Dipa edi didi dikonga too ne diakalenga dia kubadibua bu bakane, bu balunda ba Yehowa.​—Yakobo 2:23; Buakabuluibua 7:14.

Mulambu wa kupikula nawu bantu uvua Kristo mufile ke udi wambuluisha bena Kristo bonso bua bikale basadila Nzambi bu bena mudimu bende. Bua bualu busokoka bua tshijila ebu, mupostolo Paulo wakafunda ne: ‘Bakamvuija muena mudimu bua dipa dia [bulenga bukena butuakanyine] bua Nzambi.’ (Efeso 3:4-7) Bu muvuabu babikile bena Kristo bua kuenza mudimu eu ku diambuluisha dia dipa divua kadiyi dibakanyine anyi divuabu kabayi mua kupeta, kabavua mua kutekemena bua kubafutabu bualu badi bamanyisha lumu lua dipa edi kudi bakuabu to.

Nunku, bualu ebu budiku bumvuija ne: Nzambi mmutekemene bua bena Kristo bamuenzele mudimu kabayi ne ditekemena nansha dimue dia difutu anyi? Too, bualu mupostolo Paulo wakambila bana babu bena Kristo ne: ‘Bualu bua Nzambi kêna upanga buakane bua kupuaye muoyo mudimu wenu ne dinanga dinuakaleja bua dina diende.’ (Ebelu 6:10; Dutelonome 32:4) Yehowa ‘udi mufutshi wa badi bamukeba.’ (Ebelu 11:6) Kadi dilaya dia muoyo wa tshiendelele mu Mparadizu kadienaku mua kusaka bantu ku buiminyi anyi?​—Luka 23:43, NW.

Nansha kakese. Tshia tuetu kumanya ntshia se: dijinga dia kusomba ne muoyo kashidi mu Mparadizu pa buloba didi difumina kudi Nzambi nkayende. Yeye ke wakapesha bantu babidi ba kumpala ditekemena edi. (Genese 1:28; 2:15-17) Wakalongolola kabidi bua kupingajilula ditekemena edi pavua Adama ne Eva badijimijile ndelanganyi yabu. Nanku mu Dîyi diende Nzambi mmulaye ne: ‘Bifukibua mene nebipikudibue kabidi ku bupika bua dibola diabi, nebibuejibue mu budishikaminyi bua butumbi bua bana ba Nzambi.’ (Lomo 8:21) Nunku, anu bu Mose kale, mbikumbane menemene bua bena Kristo lelu kutangilabu ku ‘difutu.’ (Ebelu 11:26) Nzambi kêna ufila difutu edi bu nkosa mishiku bua bantu bamutendelele to. Udi udifila bua dinanga dilelela didiye nadi bua aba badi bamuenzela mudimu. (2 Tesalonike 2:16, 17) Nanku ku luetu luseke: ‘Tudi ne dinanga, bualu bua yeye wakadianjila kutunanga.’​—1 Yone 4:19.

Nansha nanku, bena Kristo lelu badi ne bua kukonkonona misangu yonso malu adi abasaka bua kuenzela Nzambi mudimu. Mu Yone 6:10-13 tudi tubala ne: Yezu wakadisha mu tshishima musumba wa bantu bapite pa binunu bitanu. Bua bualu abu, bakuabu bakatuadija kumulonda bua masanka abu nkayabu. Yezu wakabambila ne: ‘Nudi nunkebela bualu nuakudia [mampa], nuakuukuta.’ (Yone 6:26) Bidimu bu makumi asatu bimane kupita, bamue bena Kristo badilambule bakenzela muomumue Nzambi mudimu kadi ‘kabayi ne mitshima mitoke.’ (Filipoi 1:17) Bakuabu bavua ‘kabayi bitabuja mêyi malenga a Yezu Kristo’ bavua bakeba bua kupetela bintu ku malanda abu ne bena Kristo.​—1 Timote 6:3-5.

Lelu’eu, muena Kristo udi usadila Nzambi anu bualu mmusue kupeta muoyo wa kashidi mu Mparadizu udi mua kuikala pende wenza mudimu anu bua disanka diende nkayende. Ndekelu wa bionso, udi mua kulua kukuluka mu nyuma. Bu mudi ndongoluelu wa malu wa Satana umueneka munenge bikole, muena Kristo wa nunku udi mua ‘kuteketa,’ kumona ne: mbasemeje nshikidilu kule. (Galatia 6:9, MMM) Udi nansha mua kumvua tshiji bua bintu bidiye mudibudishe. Yezu wakatuvuluija ne: ‘Sua Mukalenge Nzambi webe ne mutshima webe wonso ne muoyo webe wonso ne lungenyi luebe luonso.’ (Matayo 22:37) Bulelela, muntu udi usadila Nzambi ne dinanga kêna wela meji bua kumuenzela mudimu mua bidimu bungi kampanda bisunguluke to. Mmupangadike bua kuenzela Yehowa mudimu bua kashidi! (Mika 4:5) Kêna unyingalala bua bintu bidiye mupangile kupeta bualu udi wenzela Nzambi mudimu to. (Ebelu 13:15, 16) Dinanga dia Nzambi didi dimusaka bua kuteka malu a Nzambi muaba wa kumpala mu nsombelu wende.​—Matayo 6:33.

Lelu, batendeledi balelela bapite pa miliyo isambombo ‘badi badifila ne disanka’ ku budisuile mu mudimu wa Yehowa. (Musambu 110:3) Udiku munkatshi muabu anyi? Biwikala kuyimu, nunku ela meji pa malu adi Nzambi ufila: dimanya dikezuke dia bulelela; (Yone 17:3) budikadidi ku malongesha a dishima a malu a Nzambi; (Yone 8:32) ditekemena dia kuikala ne muoyo kashidi. (Buakabuluibua 21:3, 4) Bantemu ba Yehowa badi mua kukuambuluisha bua kulonga mushindu uudi mua kupeta malu onso aa a kudi Nzambi kuyi ufuta mfranga.