Basadidi ba Yehowa badi ne ditekemena dilelela

‘[Bashadile]Difuka ba Yakoba nebikale munkatshi mua bisamba bia bungi bu [lumuma] lufume kudi Yehowa, ludi kaluyi luindila dîyi dia muntu.’​—MIKA 5:7.

1. Mmushindu kayi udi Isalele wa mu nyuma muikale upetesha bukole bua mu nyuma?

 YEHOWA ke Mufuki munene wa mvula ne lumuma. Katuena ne bua kutekemena bantu bua kuenzejabu lumuma anyi bua kulokeshabu mvula to. Muprofete Mika wakafunda ne: ‘[Bashadile] ba Yakoba nebikale munkatshi mua bisamba bia bungi bu [lumuma] lufume kudi Yehowa, bu kumata kua mvula pa mashinde, bidi kabiyi bindila dîyi dia muntu, ne bidi kabiyi bindila mêyi a bana ba balume ba bantu.’ (Mika 5:7) Lelu mbanganyi badi bikale ‘bashadile ba Yakoba’? Mbena Isalele wa mu nyuma, bashadile ba ‘Isalele wa Nzambi.’ (Galatia 6:16) Kudi “bisamba bia bungi” bia pa buloba badi anu bu ‘lumuma [ludi lukolesha] lufume kudi Yehowa’ ne bu ‘kumata kua mvula pa mashinde.’ Bulelela, lelu bena Kristo bela manyi badi bikale dibenesha dia kudi Yehowa dipesha bantu. Bu mudibu bamanyishi ba Bukalenge, Yehowa udi ubatuma bua kumanyisha bantu mukenji wende wa ditekemena dilelela.

2. Bua tshinyi tudi ne ditekemena dilelela nansha mutudi mu bukua-panu busaluke?

² Kabiena ne bua kukemesha bua mudi bena panu kabayi ne ditekemena dilelela. Ditekankana dia malu a tshididi, dinyanguka dia bikadilu bia bantu, dibunda dia bilumbu, dikola dia mishinga ya bintu, dienzelangana malu a tshinyangu (anyi a ba-teroriste) ne mvita, ke malu atudi batekemene mu bukua-panu bulombola kudi Satana Diabolo. (1 Yone 5:19) Bantu ba bungi badi ne buôwa bua malu adi mua kulua kuenzeka mu matuku atshilualua. Kadi tuetu batendeledi balelela ba Yehowa katuena ne buôwa, bualu tudi ne ditekemena dishindame bua matuku atshilualua. Nditekemena dilelela bualu ndishindamene mu Dîyi dia Nzambi. Tudi tuitabuja Yehowa ne Dîyi diende bualu malu onso atuye wamba atu anu akumbana.

3. (a) Bua tshinyi Yehowa uvua ne bua kunyoka Isalele ne Yuda? (b) Bua tshinyi mêyi a Mika adi ne mushinga lelu?

³ Mulayi wa Mika mufundisha ku nyuma wa Nzambi udi utukankamija bua kuenda mu dîna dia Yehowa ne udi utupesha nshindamenu wa ditekemena dilelela. Mu bidimu bia 700 kumpala kua bikondo bietu ebi, pavua Mika umanyisha milayi ya kudi Nzambi, bantu bavua Nzambi mudie nabu tshipungidi bavua batapuluke mu bisamba bibidi: Isalele ne Yuda, ne bisamba bionso bibidi ebi bivua bipepeja tshipungidi tshia Nzambi. Ke bualu kayi bikadilu biabu bivua binyanguke, bantu bavua balekele ntendelelu mulelela ne bavua ne lukuka lukole lua biuma. Nunku Yehowa wakabadimuija ne: uvua ne bua kubanyoka. Bushuwa, Nzambi uvua mudimuije bantu ba mu tshikondo tshia Mika. Kadi nsombelu udiku lelu mmufuanangane bikole menemene ne wa mu tshikondo tshia Mika, ke bualu kayi mêyi ende adi kabidi ne mushinga lelu. Netumvue muanda eu bimpe tuetu bakonkonone amue malu manene adi mu nshapita muanda-mutekete ya Mukanda wa Mika.

 Malu atudi tumanya mu dikonkonona mukanda wa Mika mu tshikoso

4. Mmalu kayi adi Mika nshapita 1 too ne 3 itumanyisha?

⁴ Tumonayi mu tshikoso malu adi mu mukanda wa Mika. Mu nshapita wa 1, Yehowa udi wela patoke ditomboka dia Isalele ne Yuda. Bua malu mabi abu, Isalele neabutudibue ne dinyoka dia Yuda nedifike too ne ku tshiibi tshia Yelushalema. Nshapita 2 udi uleja ne: babanji ne bantu ba bukole badi bakengesha bapele ne bantu badi kabayi ne wa kubakuila. Nansha nanku, kudi bualu bukuabu budi Nzambi mulaye. Nzambi neasangishe bantu bende mu buobumue. Nshapita 3 udi uleja mêyi a Yehowa adiye upisha nawu balombodi ba tshisamba etshi ne baprofete ba malu mabi. Balombodi badi bakonyangaja buakane, ne baprofete badi bamba malu a dishima. Nansha nanku, nyuma wa Nzambi udi upesha Mika bukole bua kumanyisha dinyoka dia Yehowa didi dilua kumpala.

5. Mmalu kayi adi mu Mika nshapita 4 ne 5?

⁵ Nshapita 4 udi umanyisha ne: mu matuku a ndekelu, bisamba bionso nebilue ku mukuna mutumbuke wa nzubu wa Yehowa bua yeye kubilongesha. Kadi kumpala kua bualu ebu, Yuda neanji kuya mu bupika mu Babulona, kadi Yehowa neamupikulemu. Nshapita 5 udi utumanyisha ne: Masiya nealedibue mu Beteleheme wa Yuda. Nealame bantu bende ne neabapikule ku matunga adi abakengesha.

6, 7. Mmalu kayi adibu baleje mu nshapita 6 ne wa 7 ya mulayi wa Mika?

⁶ Mika nshapita 6 udi uleja malu adi Yehowa ufunda nawu bantu bende bienze bu ku tshilumbuluidi. Mbualu kayi budi Yehowa muenze budi bubafikishe ku dimutombokela? Ki mmuenze bualu nansha bumue. Kadi bua kuamba bulelela, malu adiye ubalomba mmakanyine menemene. Mmusue bua bantu badi bamutendelela baleje buakane, bikale bena malu malenga ne bende nende ne bupuekele buonso. Kadi pamutu pa kuenza malu aa, Isalele ne Yuda mbalonde njila wa buntomboji ne nebapete manyoka bua malu aa.

⁷ Mu nshapita wa ndekelu wa mulayi wende, Mika udi wela bubi bua bantu ba mu tshikondo tshiende patoke. Kadi kêna uteketa mu mikolo bualu mmupangadike bua ‘kuindila’ Yehowa. (Mika 7:7) Mukanda eu udi ujika ne mêyi adi aleja dishindika dia se: Yehowa neafuile bantu bende luse. Malu akadi menzeke adi ajadika ne: ditekemena edi diakakumbana. Mu tshidimu tshia 537 kumpala kua bikondo bietu ebi, pakajikija Yehowa kunyoka bantu bende, bua wakapingaja bashadile mu ditunga diabu.

8. Mmunyi muudi mua kuamba mu tshikoso malu adi mu mukanda wa Mika?

 ⁸ Mmalu kayipu malenga adi Yehowa utumanyisha ku butuangaji bua Mika! Mukanda eu mufundisha ku nyuma wa Nzambi udi utupesha bilejilu bidi bitudimuija bia mushindu udi Yehowa wangata bantu badi bamba mudibu bamusadila kadi kabayi ne lulamatu to. Udi umanyisha malu adi mikale enzeka lelu’eu. Ne udi utupesha mibelu ya kudi Nzambi ya ngikadilu utudi ne bua kuikala nende mu tshikondo etshi tshikole bua tuetu kumona mua kukolesha ditekemena dietu.

Yehowa Mukalenge Mutambe Bunene udi wakula

9. Bilondeshile Mika 1:2, ntshinyi tshivua Yehowa ne bua kuenza?

⁹ Mpindieu tukonkononayi mukanda wa Mika ku kanungu ne kanungu. Tudi tubala mu Mika 1:2 ne: ‘Umvuayi, nuenu bantu, buonso buenu; telejayiku, wewe buloba ne bintu biebe bionso. Mukalenge Yehowa, Mukalenge mu ntempelo wende wa tshijila, anupishe.’ Bu wewe muikale ne muoyo mu tshikondo tshia Mika, mêyi aa avua ne bua kuikala makoke ntema yebe. Bulelela, adi akoka ntema yebe lelu bualu Yehowa udi wakuila mu ntempelo wende wa tshijila, ne malu adiye wamba kêna anu uambila Isalele ne Yuda, kadi udi uambila bantu ba miaba yonso. Mu tshikondo tshia Mika, bantu bavua balengulule Yehowa Mukalenge Mutambe Bunene mukantshi mua bidimu bia bungi be. Kadi bualu ebu buvua ne bua kushintuluka mu katupa kîpi. Yehowa uvua mupangadike bua kubanyoka.

10. Bua tshinyi mêyi a mu Mika 1:2 adi ne mushinga kutudi?

¹⁰ Ke mudibi kabidi lelu’eu. Buakabuluibua 14:18-20 udi uleja ne: Yehowa udi wakuila kabidi mu ntempelo wende wa tshijila. Mu katupa kîpi emu, Yehowa neafile dinyoka, ne mianda ya tshikuma neyinyukule kabidi bukua-bantu. Bua musangu eu, nebele ‘mvinyo [mubi] wa pa buloba’ mu tshikaminu tshinene tshia tshiji tshia Yehowa, bualu buafikisha ndongoluelu wa malu wa Satana ku dibutuka butubutu.

11. Ntshinyi tshidi mêyi a Mika 1:3, 4 umvuija?

¹¹ Teleja bualu bualua Yehowa kuenza. Mika 1:3, 4 udi wamba ne: ‘Monayi, Yehowa udi upatuka mu muaba wende, neapueke panshi ne neadiate pa mitu pa mikuna ya pa buloba. Mikuna neyivingutuke muinshi mua makasa ende, bibanda nebipandike mitanta, bu dipula mu kapia, bu mâyi apueka pa tshibungubungu.’ Yehowa neumbuke muaba udiye musombele mu diulu bua kuendela pa mitu pa mikuna ne mu bibanda bia mu Buloba Bulaya anyi? Tòo. Kêna ne bua kuenza nanku to. Neatume patupu ntema yende pa buloba bua disua diende dienzeke. Kabidi, bantu ke bikala mua kupeta makenga adibu bambe muaba eu, ki mbuloba buetu buena dîna ebu nansha. Pikala Yehowa mua kufila manyoka aa, nebikale bia muadi bua bantu badi kabayi ne lulamatu, nebienze anu bu se: mikuna mmivingutuke bu dipula ne bibandabanda mbipandike mitanta bua tshikumina.

12, 13. Mu diumvuangana ne 2 Petelo 3:10-12, ntshinyi tshiashindamija ditekemena dietu?

¹² Mêyi a mulayi wa Mika 1:3, 4 adi mua kukuvuluija mulayi mukuabu mufundisha ku nyuma wa Nzambi udi umanyisha makenga enzeka pa buloba. Mupostolo Petelo wakafunda mu 2 Petelo 3:10 ne: ‘Dituku dia Mukalenge dilualua bu mudi muibi; mu dituku adi diulu nedijimine ne diyoyo dinene, ne bintu bia mu diulu nebivingutuke ne kapia kakole, ne buloba ne bintu bidimu nebipie.’ Anu mudibi bua mulayi wa Mika, mêyi a Petelo kaena atangila diulu ne buloba biena dîna to. Adi atangila dikenga dinene diakuata ndongoluelu mubi wa malu eu.

¹³ Nansha muikala dikenga adi mua kulua, bena Kristo badi ne dishindika bua matuku atshilualua anu muvua nadi Mika. Mmushindu kayi? Mu ditumikila mibelu idi mu mvese idi ilonda idi mu mukanda wa Petelo. Mupostolo wakamba ne: ‘Bunudi nabu mbua kuikala bantu ba mushindu kayi mu bienzedi bia tshijila ne bia [dilamata] Nzambi, panudi nutekemena ne panudi nuendesha lukasa dilua dia dituku dia Nzambi?’ (2 Petelo 3:11, 12) Ditekemena dietu bua matuku atshilualua nedikale dilelela bituadienzeja bua kuikala ne mutshima wa butumike ne bituenza bua se: ngikadilu wetu ikale munsantu ne nsombelu wetu ikale mûle ne bienzedi bidi bileja dilamata Nzambi. Bua ditekemena dietu kuikaladi dishindame, tudi ne bua kuvuluka ne: dituku dia Yehowa nedilue bulelela.

14. Bua tshinyi Isalele ne Yuda mbakanyine dinyoka?

¹⁴ Yehowa udi umvuija bua tshinyi bantu bende mbakumbanyine dinyoka. Mika 1:5 udi wamba ne: ‘Bua kutomboka kua bena Yakoba malu aa onso adi alua, ne bua mibi ya tshisamba tshia bena Isalele. Kutomboka kua bena Yakoba ntshinyi? Ki n’Samalea anyi? Bubi bua bena Yuda budi tshinyi? Ki n’Yelushalema anyi?’ Bena Isalele ne bena Yuda badi ne muoyo anu bua Yehowa. Kadi mbamutombokele, ne buntomboji buabu mbufike too ne mu bimenga biabu bikulu: Samalea ne Yelushalema.

Malu mabi adi avulangana

15, 16. Bantu ba mu tshikondo tshia Mika bavua bapie tshibawu bua malu mabi kayi?

¹⁵ Tshilejilu tshia malu mabi a bantu ba mu tshikondo tshia Mika ntshimvuija bimpe mu Mika 2:1, 2 ne: ‘Mulawu wikale kudi badi belangana meji a kuenza bibi, ne badi bapangidija malu mabi munda muabu pa malalu abu! Patshiabu badi benza malu aa, bualu bua bukole bua kuenza budi mu bianza biabu. Badi bakuma mitshima yabu ku madimi a bakuabu, badi baanyenga; ne ku nzubu ya bende, badi bayinyenga. Badi bakengesha muntu ne ba mu nzubu wende, muntu mene ne bupianyi buende.’

¹⁶ Bena lukuka badi balala tshitabela butuku bela meji a mushindu wa kunyenga madimi ne nzubu ya binabu. Mu dinda, badi basumpakana bua kukumbaja meji abu aa. Kabavua mua kuenza malu mabi a nunku bu buobu bavuluke tshipungidi tshivuabu badie ne Yehowa. Mu Mikenji ya Mose mudi mikandu miela bua kukuba bapele. Mu tshikondo tshia mikenji eyi, dîku nansha dimue kadiena ne bua kujimija kashidi bumpianyi buadi to. Kadi bena lukuka aba kabena batshiuka bualu ebu to. Badi bapepeja mêyi a mu Lewitiki 19:18 adi amba ne: “Sua mukuenu bu mûdi mudisue.”

17. Ntshinyi tshidi mua kufikila bantu badi bamba mudibu basadila Nzambi padibu bateke biuma pa muaba wa kumpala mu nsombelu?

¹⁷ Bualu ebu budi buleja tshidi mua kufikila bantu badi bamba mudibu basadila Nzambi padibu balekele malu a mu nyuma bua kukeba diambedi biuma. Paulo wakadimuija bena Kristo ba mu tshikondo tshiende ne: ‘Bobu badi basue kuikala babanji badi bapona mu kutetshibua kua munda ne mu buteyi ne mu nkuka ya bungi idi mipote ne idi ibanyanga, bu yoyi mene idi înyisha bantu mu dibashipesha ne mu dibutuka.’ (1 Timote 6:9) Padi muntu uvuija dipeta dia mfranga tshipatshila tshiende tshinene, dîba adi udi utendelela nzambi wa dishima: Mamona anyi Bubanji. Nzambi wa dishima eu kêna ufila ditekemena dishindame bua matuku atshilualua to.​—Matayo 6:24.

18. Ntshinyi tshivua ne bua kufikila bantu bavua banange biuma mu matuku a Mika?

¹⁸ Kunyima kua bamane kupeta ntatu bantu ba bungi ba mu tshikondo tshia Mika bakapeta dilongesha dia se: kueyemena biuma nkuipata kua lupepele patupu. Bilondeshile Mika 2:4, Yehowa udi wamba ne: ‘Mu dituku adi nebanusendeke, nebanubingile bikole, bamba ne: Tuakubutudibua kabutu; yeye wakupa bakuabu bumpianyi buetu; ke bu mudiye mubumushe kutudi! Udi wabanyina bantombueji madimi etu.’ Bushuwa, bivi abu ba nzubu ya bende ne madimu a bende nebajimije bumpianyi bua mêku abu. Nebaye nabu mu ditunga dikuabu, ne bintu biabu bionso nebilue tshintu tshipawula kudi ‘bantombueji’ anyi bantu ba bisamba bia bende. Bintu bionso bivuabu batekemene bua kupeta mu matuku atshilualua nebibutuke.

19, 20. Ntshinyi tshiakafikila bena Yuda bavua beyemene Yehowa?

¹⁹ Kadi malu adi bantu badi beyemene Yehowa batekemene neakumbane. Yehowa udi ukumbaja tshipungidi tshiende tshidiye mudie ne Abalahama ne Davidi, ne udi ufuila bantu luse badi, anu bu Mika, bamunange ne banyingalala bua mudi bena mu ditunga diabu bikale kule ne Nzambi. Bua diakalenga dia bakane aba, Nzambi neabapingaje mu ditunga diabu mu tshikondo tshidiye mulongolole.

²⁰ Bualu ebu budi buenzeka mu tshidimu tshia 537 kumpala kua bikondo bietu ebi, kunyima kua dikuluka dia Babulona ne padi bashadile bena Yuda bapingana mu buloba buabu. Mu tshikondo atshi, mêyi a Mika 2:12 akakumbana bua musangu wa kumpala. Yehowa udi wamba ne: ‘Bulelela, nensangishe bana benu bonso, Yakoba; bulelela, nensangishe [bashadile] ba bena Isalele popamue; nembasangishe popamue bu mikoko mivule mu lupangu, bu tshisumbu tshia mikoko  mu mpata wayi wa mashinde, nebikale ne mutoyi bualu bua bungi buabu.’ Bushuwa Yehowa udi Nzambi wa dinanga! Kunyima kua mumane kupesha bantu bende dinyoka, udi wanyishila bashadile bua kupinganabu ne kumusadila mu ditunga divuaye mupeshe bankambua babu.

Malu adi mafuanangane bikole ne a mu tshikondo tshietu etshi

21. Mmunyi mudi malu adiku lelu mafuanangane ne a mu tshikondo tshia Mika?

²¹ Kunyima kua tuetu bamane kukonkonona nshapita ibidi ya kumpala ya Mika, mbikukemeshaku bua mudi malu a muomumue mikalaku lelu anyi? Anu bu mu tshikondo tshia Mika, lelu bantu ba bungi badi bamba mudibu basadila Nzambi. Kadi anu bu Yuda ne Isalele, mbatapulukangane ne batu mene baluishangana mvita munkatshi muabu. Babanji ba bungi ba mu Bukua-Buena-Kristo mbakengeshe bapele. Balombodi ba bitendelelu badi benda anu bakankamija bilele bidi Bible mukandike. Ke bualu kayi mu katupa kîpi emu Bukua-Buena-Kristo nebubutudibue pamue ne bishadile bia “Babulona Munene,” nsangilu wa bitendelelu bia dishima bia buloba bujima! (Buakabuluibua 18:1-5) Nansha nanku, anu muvuabi bienzeke mu tshikondo tshia Mika, Yehowa neenze bua basadidi ba lulamatu bashale pa buloba.

22. Mbisumbu kayi bibidi bidi bitekemene Bukalenge bua Nzambi?

²² Mu tshidimu tshia 1919, bena Kristo bela manyi ba lulamatu bakaditapulula bua kashidi ne Bukua-buena-Kristo ne kutuadijabu kumanyisha bisamba bionso lumu luimpe lua Bukalenge. (Matayo 24:14) Diambedi, bakakeba bashadile ba Isalele wa mu nyuma. Pashishe, bakabanga kusangisha “mikoko mikuabo”, ne bisumbu bibidi ebi biakalua “tshisumbu tshimue, ne mulami umue.” (Yone 10:16) Nansha mudibu basadila Nzambi mpindieu mu matunga 235, batendeledi bonso ba Yehowa ba lulamatu aba badi bushuwa basangisha ‘popamue.’. Mpindieu, tshikumbi tshia mikoko tshidi ‘ne mutoyi bualu bua bungi buabu,’ mbuena kuamba ne: balume ne bakaji ne bana. Ditekemena diabu kadiena mu bukua-panu ebu to, kadi didi mu Bukalenge bua Nzambi buikala mua kuasulula Mparadizu pa buloba apa mu katupa kîpi emu.

23. Bua tshinyi udi mujadike ne: ditekemena diebe nedikumbane?

²³ Mvese wa ndekelu wa Mika nshapita 2 udi wamba bua batendeledi ba Yehowa ba lulamatu ne: ‘Mukalenge wabu neadianjile kumpala kuabu, ne Yehowa neikale ku mutu kuabu.’ Udiku udimona munkatshi mua tshisumbu tshia bantu aba badi batshimune, nuenda nulonda Mukalenge wenu Yezu Kristo, ne Yehowa nkayende muikale ku mutu anyi? Biwikala udimona nanku, ikala mujadike ne: neutshimune tshia bushuwa ne ditekemena diebe nedikumbane. Netutambe kumvua bualu ebu bimpe patuakonkonona malu makuabu a mu mulayi wa Mika.

Mmunyi muwandamuna?

• Mu tshikondo tshia Mika, bua tshinyi Yehowa wakangata dipangadika dia kunyoka Yuda ne Isalele?

• Tshinyi tshidi mua kufikila bantu badi bamba mudibu basadila Nzambi padibu bateke biuma pa muaba wa kumpala mu nsombelu wabu?

• Kunyima kua wewe mumane kukonkonona Mika nshapita 1 ne 2, bua tshinyi udi mujadike ne: ditekemena diebe nedikumbane?

[Nkonko ya dilonga]

[Tshimfuanyi mu dibeji 9]

Mulayi wa Mika udi mua kutukolesha mu nyuma

[Bimfuanyi mu dibeji 10]

Anu bu bashadile bena Yuda mu tshidimu tshia 537 kumpala kua bikondo bietu ebi, bena Isalele wa mu nyuma ne balunda babu badi batuma ntendelelu mulelela kumpala