Mushindu udi Nzambi wangata bantu bafue

BULELELA, lufu lua muntu utudi banange lutu lunyingalaja be. Lungenyi lua didimona bashale bitupu, katuyi ne munga muntu ne lua dijimija utuvua banange lutu lukole menemene. Difuisha muntu utudi banange didi mua kuenza ne: muntu adimone kayi diambuluisha, bualu nansha muntu muikale ne bubanji bua bungi, bukole anyi muanzu, kakuena muntu pa buloba apa udi mua kupingaja muntu mufue ku muoyo to.

Kadi Mufuki wetu udi umona malu mu mushindu mushilangane. Bu muvuaye mufuke muntu wa kumpala ku lupuishi, udi kabidi ne bukokeshi bua kufukulula muntu mufue. Bua bualu ebu, Nzambi udi mua kuangata bafue anu bu badi ne muoyo. Bua basadidi bena lulamatu ba kale bavua bafue, Yezu wakamba ne: ‘Bonso badi ne muoyo bua bualu bua [Nzambi]’ anyi mu mushindu mukuabu Nzambi udi ubamona bu badi ne muoyo.​—Luka 20:38.

Pavuaye pa buloba, Yezu uvua ne bukole bua kujula bafue. (Yone 5:21) Uvua ne mmuenenu wa muomumue ne wa Tatuende bua bantu bavua bafue ne lulamatu. Tshilejilu, pavua mulunda wende Lazalo mufue, Yezu wakambila bayidi bende ne: ‘Ndi nya kumubisha ku tulu.’ (Yone 11:11) Bua mmuenenu wa bantu, Lazalo uvua mufue, kadi bua Yehowa ne Yezu, Lazalo uvua mulale tulu.

Mu Bukalenge bua Yezu, nekuikale ‘dibika dia bafue ne dia bakane ne dia babi.’ (Bienzedi 24:15) Ndekelu wa bionso, nebalongeshe bantu bikala mua kubishibua ku lufu malu a Nzambi ne nebapete ditekemena dia kuikala ne muoyo wa kashidi pa buloba.​—Yone 5:28, 29.

Bushuwa, lufu lua muntu utudi banange ludi mua kutunyingalaja ne kutubungamija bikole be munkatshi mua bidimu bia bungi. Nansha nanku, kuangata bantu bafue mudi Yehowa ubangata kudi mua kutusamba bikole ne kutupesha ditekemena.​—2 Kolinto 1:3, 4.