Ntendelelu mulelela udi ufila buobumue mu dîku kampanda

MARIA uvua ne bidimu 13 pavua mulela wabu kampanda mubambile yeye ne muakunyende wa bakaji Lucy malu a Yehowa. Wakabumvuija kabidi bua ditekemena dia Mparadizu pa buloba. Bakemeshibue, bakaya nende ku Nzubu wa Bukalenge wa Bantemu ba Yehowa. Malu mumvuike bimpe akalongeshabu mu Nzubu wa Bukalenge au akasankisha Maria bikole. Avua mashilangane bikole ne avuabu babalongeshe mu ekeleziya wabu, muvuabu batamba anu kuimba misambu! Mu matuku makese, bana abu bakabanga kulonga Bible ne Ntemu wa Yehowa mukuabu.

Tutuabu Hugo uvua munange malu a nkindi ne a bidimenena. Uvua udiamba muvuaye kayi witaba ne: Nzambi udiku. Kadi pavuaye mu mudimu wende wa busalayi, wakabala mukanda wa La vie: comment est-elle apparue? Évolution ou création? * Wakapeta mandamuna a nkonko idi tshitendelelu kayi tshikuabu katshiyi mua kufila to. Pakajikijaye mudimu wende wa busalayi, wakabangisha kukolesha ditabuja diende dipiadipia dia Nzambi pa kulonga Bible ne kubuela mu bisangilu ne bakunyi bende ba bakaji. Maria ne Lucy bakatambula mu tshidimu tshia 1992, bidimu bibidi kunyima kua bamane kumvua bulelela, ne kunyima kua bidimu bibidi, tutuabu wakatambula pende.

Mu tshikondo atshi baledi babu bavua banange malu a mikiya a bena Katolike bikole, kabavua banyisha bulelela to. Bavua bangata Bantemu ba Yehowa bu bantu bavua bajimijilangana dîba, nansha muvuabu banyishe bikadilu bimpe ne mvuadilu mulenga wa bansonga Bantemu bavua bana babu babikile ku nzubu. Kabidi, pa mêba a kudia, pavua bana bayukila malu avuabu balonge mu bisangilu, bivua bijula ntema ya baledi babu.

Kadi baledi bonso babidi bavua basue bumpaka-manga. Tatu uvua mukuatshiki wa maluvu, ne uvua ututa mamu. Dîku dikavua pa kuabuluka. Kunyima, tatu wakenza mbingu ibidi mijima mu buloko bualu uvua muendeshe mashinyi bibi bua maluvu avuaye mukuatshike. Wakabanga kubala Bible pavuaye mu buloko apu. Mu dibala, wakafika muaba udi Yezu mumanyishe bimanyinu bia matuku a ku nshikidilu. Bualu ebu buakeleshisha tatu ne mamu meji bikole, buobu kuya ku Nzubu wa Bukalenge ne kuitababu bua kulonga Bible. Pakalongabu bulelela, bakosha mikanda yabu yonso ya bumpaka-manga ne kuepukabu buluishi bua bademon pa kubila dîna dia Yehowa. Bakatuadija kushintulula ngikadilu yabu bikole menemene.

Udiku mua kufuanyikija disanka divua nadi Maria ne Lucy pavuabu bamone Hugo utambuisha baledi babu mu mpungilu kampanda wa distrike mu ditunga dia Bolivie mu tshidimu tshia 1999 anyi? Bidimu bu tshitema bikadi bipite katshia Maria ne Lucy bumvua bakula bua Yehowa ne milayi yende musangu wa kumpala. Bonso ne Hugo badi mpindieu mu mudimu wa ku dîba ne ku dîba. Badi ne disanka dia bungi bua mudi ntendelelu mulelela mufile buobumue mu dîku diabu!

[Mêyi adi kuinshi]