Udi muvuluke anyi?

Udiku muanyishe malu auvua mubale mu nimero ya ndekelu ya Tshibumba tshia Nsentedi anyi? Nanku anji tetabi ni udi mua kuandamuna nkonko idi ilonda eyi:

• Mmu imue mishindu kayi ivua Luta muikale tshilejilu tshilenga?

Uvua tshilejilu tshimpe mu mushindu uvuaye munange Yehowa, mulamate Naomi ne dinanga dionso ne muleje ngikadilu ya muenji wa mudimu ne mudipuekeshi. Bantu bavua bamuangata bu ‘mukaji wa kanemu’ bua malu a bungi. (Luta 3:11)​—15/4, dibeji dia 23-6.

• Mmunyi mutudi bamanye ne: Yehowa utu uditatshisha bua bantu ba patupu?

Wakambila bena Isalele bavuabu basubisha mu Ejipitu bua kabakengeshi bapele. (Ekesode 22:21-24) Yezu uvua widikija Tatuende, wakatabalela bantu ba patupu ne wakasungula bantu bavua kabayi ‘bamanye mikanda ne ba patupu’ bua kuluabu bapostolo bende. (Bienzedi 4:13; Matayo 9:36) Tudi mua kuidikija Nzambi pa kutabalela bakuabu, bu mudi bansonga.​—15/4, dibeji dia 28-31.

• Mmalu kayi adi atusaka bua kuitaba ne: Yehowa utu umona malu atutu tuenza?

Miyuki ya mu Bible idi ileja ne: Yehowa udi umona malu adi bantu benza. Wakamona mulambu uvua Abele mufile ne utu umona ‘milambu ya kumutumbisha nayi idi mamuma a mishiku.’ (Ebelu 13:15) Yehowa uvua mumanye ne: Hanoka wakadienzeja bikole bua kumusankisha mu dikala ne nsombelu mukezuke ne mulenga. Nzambi wakamona kabidi muvua mukaji wa mu lufuila uvua kayi muena Isalele wa mu tshimenga tshia Salefata muabanyangane tukese tuvuaye natu ne muprofete Elisha. Yehowa udi umona kabidi bienzedi bietu bia ditabuja.​—1/5, dibeji dia 28-31.

• Bua tshinyi tudi mua kuamba ne: kunyima kua Pentekoste wa mu tshidimu tshia 33 bikondo bietu ebi, bena Yuda bavua balue bena Kristo bavua ne bua kudilambula nkayabu kudi Nzambi?

Mu tshidimu tshia 1513 Kumpala kua Bikondo Bietu ebi, bena Isalele ba kale bakadilambula kudi Yehowa. (Ekesode 19:3-8) Kubangila mu tshikondo atshi, bena Yuda bavua baledibue mu tshisamba tshimane kudilambula muinshi mua mikenji ya Mose. Kadi Yehowa wakashipa tshipungidi tshia mikenji ya Mose ku diambuluisha dia lufu lua Kristo mu tshidimu tshia 33 Bikondo Bietu. (Kolosai 2:14) Pashishe, bena Yuda bavua basue kuenzela Nzambi mudimu bimpe bavua ne bua kudilambula kudiye ne kutambula mu dîna dia Yezu Kristo.​—15/5, dibeji dia 30-1.

• Diosha musenga wa manananshi didiku ne mushinga mu ntendelelu mulelela lelu anyi?

Kuosha musenga wa manananshi kuvua kuikale tshitupa tshia ntendelelu mulelela mu Isalele wa kale. (Ekesode 30:37, 38; Lewitiki 16:12, 13) Kadi mikenji ya Mose, ne diosha dia musenga wa manananshi, biakajika ne lufu lua Kristo. Bena Kristo badi mua kusungula nkayabu bua kuosha musenga wa manananshi bua bipatshila bidi kabiyi bia ntendelelu, kadi ki ntshitupa tshia ntendelelu mulelela lelu to. Tudi kabidi mua kukonkonona mudi bakuabu badiumvua bua kubenga kubalenduisha.​—1/6, dibeji dia 28-30.

• Mmalu kayi mapiamapia adi masake bantu ba bungi ku diela meji ne: Yezu uvuaku musombe pa buloba apa bulelela?

Mbendeshe lumu bikole bua kashete ka kulamina mifuba kavuabu bapete mu ditunga dia Israël. Kadi kamueneka ne: kadi mua kuikala ka mu bidimu lukama bia kumpala ne mbafundepu miaku eyi: “Yakobo, muana wa Yosefe, muanabu ne Yezu.” Bakuabu badi bakamona bu “tshijadiki tshia kale menemene tshidi katshiyi tshia mu Bible” tshia dikalaku dia Yezu.​—15/6, dibeji 3-4.

• Mmunyi mudi muntu mua kulonga mua kunanga?

Bantu batu balonga diambedi mua kunanga ku diambuluisha dia tshilejilu ne dilongesha dia baledi babu. Padi mulume ne mukaji balejangana dinanga ne kanemu, bana badi mua kulonga dinanga. (Efeso 5:28; Tito 2:4) Nansha muntu mufumine mu dîku muvua kamuyi dinanga, udi mua kulonga mua kunanga padiye witaba buludiki bua Yehowa bua butatu, upeta diambuluisha dia nyuma muimpe ne upeta dikuatshisha dia musangelu dia bu-wetu bua bena Kristo.​—1/7, dibeji dia 4-7.

• Eusèbe uvua nganyi ne ntshinyi tshitudi mua kulongela ku malu a mu nsombelu wende?

Eusèbe uvua mufundi wa malu a kale ne mu tshidimu tshia 324 Bikondo Bietu, wakajikija volime dikumi ya mukanda uvua ne tshiena-bualu ne: History of the Christian Church. Nansha muvuaye witaba ne: Tatu uvuaku kumpala kua Muana, Eusèbe wakitaba mmuenenu mushilangane mu tshipangu tshia Nicée. Bidi bimueneka ne: uvua mulengulule mukenji wa Yezu wa ne: bayidi Bende kabavua ne bua kuikala ‘ba pa buloba.’ (Yone 17:16)​—15/7, dibeji dia 29-31.

• Yehowa mmushintulule mmuenenu wende pa disela bakaji ba bungi anyi?

Too, Yehowa ki mushintulule mmuenenu wende pa disela bakaji ba bungi nansha. (Malaki 3:6) Dilongolola dia Nzambi bua mulume wa kumpala divua dia ne: ‘alamate mukaji wende’ ne alue mubidi umue nende. (Genese 2:24) Yezu wakamba ne: kushipa dibaka kabiyi bua masandi ne kuselulula anyi kusedibua kabidi kudi kuvuija muntu muena masandi. (Matayo 19:4-6, 9) Dilekelela dia Yehowa bua bantu kusela bakaji ba bungi diakajika pakenzabu tshisumbu tshia bena Kristo.​—1/8, dibeji dia 28.