Uvua munange bulenga

MILTON GEORGE HENSCHEL, muntu uvua muenze bidimu bia bungi mu Kasumbu Kaludiki ka Bantemu ba Yehowa, wakajikija luendu luende lua pa buloba bu muena Kristo muela manyi mu Disambombo dia matuku 22 a ngondo muisatu wa tshidimu tshia 2003. Uvua ne bidimu 82.

Patshivuaye nsongalume, Milton Henschel wakaya ku tshilombuelu tshia midimu ya Bantemu ba Yehowa ne wakenza mudimu ne lulamatu munkatshi mua bidimu bipite pa 60. Wakamanyika lukasa bua meji ende mimpe ne bua muvuaye utabalelela ne muoyo umue mudimu wa kuyisha Bukalenge. Mu tshidimu tshia 1939 wakalua sekretere wa muanetu Nathan Knorr, uvua tshikondo atshi mulombodi wa tshiapu tshia mikanda tshia Bantemu ba Yehowa ku Brooklyn. Pakalua Muanetu Knorr mulombodi wa midimu ya Bantemu ba Yehowa pa buloba bujima, wakalama Muanetu Henschel bu tshindondi tshiende. Muanetu Henschel wakasela Lucille Bennett mu tshidimu tshia 1956, ne bubidi buabu bakamona pamue masanka ne ntatu ya mu nsombelu.

Muanetu Henschel wakenza mudimu bimpe ne Muanetu Knorr too ne ku lufu lua Knorr mu tshidimu tshia 1977. Misangu ya bungi Muanetu Henschel wakenza ngendu ne Muanetu Knorr mu matunga mapite pa 150, mu dikumbula ne dikankamija Bantemu ba Yehowa pa buloba bujima, nangananga ba-misionere ne bena mu biro bia filiale. Ngendu ya nunku ivua ne ntatu misangu mikuabu, nansha ne njiwu. Mu tshidimu tshia 1963, pavuaye muye kubuela mu mpungilu kampanda mu ditunga dia Liberia, Muanetu Henschel wakatuilangana ne buluishi bubi bualu uvua mubenge kubuelakana mu musekelelu kampanda wa mu ditunga. * Kayi buôwa, Muanetu Henschel wakapingana mu Liberia ngondo mikese kunyima bua kumonanganaye ne mfumu wa ditunga ne kukebela Bantemu ba Yehowa ba mu ditunga adi budikadidi buvule bua ntendelelu.

Muanetu Henschel uvua mumanyike bu muntu muimpe, wa meji ne kayi ne malu makole. Bana betu bavuaye wenza nabu mudimu bavua bamuanyisha nangananga bua bulongame buende, budipuekeshi ne muvuaye musue kueleshangana bilele. Bu muvuaye ne tshipedi tshia kukuata malu ne lukasa, uvua usankisha ba-misionere ba bungi pa buloba bujima pavuaye uvuluka mêna abu diakamue, wakula tshiambilu tshimue anyi bibidi mu muakulu wa muaba au ne wamba kabualu ka tuseku ne dibunya dia dîsu.

Mika 6:8 udi utuvuluija ne: Yehowa Nzambi mmusue bua ‘tunange [bulenga].’ Nebavuluke Milton Henschel bua mudiye mushiye tshilejilu tshimpe mu muanda eu. Nansha muvuaye ne midimu ya bungi ne majitu, uvua ulekela bantu bamukuatshila malu ne kabidi uvua ne bukalanga ne bulenga. Uvua musue kuamba ne: “Paudi welakana, vuluka ne: tshintu tshimpe ke tshintu tshiakane.” Patudi tudila dijimina dia muanetu munanga eu, tudi tusanka bua ne: uvua mutantamane ne lulamatu too ne ku ndekelu, mutuishibue bua kupeta difutu diende, “tshifulu tshia butumbi tshia muoyo.”​—Buakabuluibua 2:10.

[Mêyi adi kuinshi]

[Tshimfuanyi mu dibeji 31]

M. G. Henschel ne N. H. Knorr

[Tshimfuanyi mu dibeji 31]

Ne mukajende Lucille