Kudiku anu ‘tshitendelelu tshilelela’ tshimuepele anyi?

“ANU bu mudiku Kristo umue, nanku kudi kabidi mubidi umue wa Kristo, Mukaji umue wa Kristo: ‘Ekeleziya Katolike ne wa bapostolo umue.’”​—Dominus Iesus.

Ke muvua Joseph Ratzinger kardinale muena Katolike muakule bua malongesha a tshitendelelu tshiende wamba ne: kudi anu ne bua kuikala tshitendelelu tshimuepele tshilelela. Wakamba ne: tshitendelelu atshi, “Ng’Ekeleziya Katolike, udi muikale tshitendelelu tshimuepele tshia Kristo.”

“Kabiyi Bitendelelu mu ngumvuilu mulelela to”

Nansha muvua Papa Jean Paul II muambe ne: mukanda wa Dominus Iesus kauvua ne “lungenyi lua lutambishi, anyi dipanga kanemu bua bitendelelu bikuabu,” balombodi ba Ekeleziya wa bena Mishonyi bakandamuna bibi ku mukanda eu. Tshilejilu, ku Disangisha Dinene dia bena Mishonyi mu tshimenga tshia Belfast, ku Nord kua ditunga dia Irlande, mu ngondo muisambombo wa tshidimu tshia 2001, mpasata kampanda wakamba ne: mukanda au uvua mudimu muenza kudi “kasumbu ka bukole ka mu Ekeleziya Katolike . . . katshingisha kudi ngikadilu wa lungenyi lunzuluke lubueja kudi Vatican II.”

Robin Eames muepiskopo munene wa mu Irlande wakamba ne: bivua ne bua “kumutonda bikole be” bu mukanda au muikale dipingana dia lungenyi lua Ekeleziya Katolike kumpala kua Vatican II.” Mu diakula pa mushindu uvua Vatican wamba bua bitendelelu bivua bibenga amue malongesha a bena Katolike, wakamba ne: “ki mbitendelelu mu ngumvuilu mulelela to,” Eames wakamba ne: “Buanyi meme atshi ntshipendu.”

Ntshinyi tshivua tshibasaka bua kufunda Dominus Iesus? Mbimueneke ne: Tshilombuelu tshia bena Katolike tshivua tshinyanga kudi dilongesha dia ne: malongesha a tshitendelelu adi atangila bantu ne bisumbu badi baitaba. Bilondeshile tshikandakanda tshikuabu, “dipatuka dia dilongesha dia bitendelelu bia bungi, mbuena kuamba ne: tshitendelelu tshimue ntshimpe anu mudi tshikuabu tshimpe . . . diakatamba kutonda Kardinale Ratzinger bikole.” (The Irish Times) Mbimueneke ne: mmuenenu eu wakateta bua kunyanga malu avuaye muambe bua tshitendelelu tshimuepele tshilelela.

Tshitendelelu tshiebe tshidi ne mushinga anyi?

Bushuwa, bua bamue bantu, dikalaku dia bitendelelu bia bungi ndikumbane ne didi disankisha kupita lungenyi luonso lua ne: kudi mua kuikala anu tshitendelelu tshimue tshilelela. Buabu buobu, bualu bua tshitendelelu mbualu bua muntu kusungula nkayende. Badi bamba ne: ‘Ndekelu wa bionso, tshitendelelu tshiudi katshiena ne bualu to.’

 Mmuenenu eu udi mua kumueneka witaba malu a bungi, nansha mudiye mutapulule tshitendelelu mu tusumbusumbu tuvule. Bantu ba bungi badi bamba ne: ‘Dishilangana edi dia bitendelelu didi dileja bikole budikadidi budi nabu bantu.’ Kadi bua mufundi Steve Bruce, “dilekelela [dia nunku] dia bitendelelu” didi bushuwa “dilengulula dia bitendelelu.”​—A House Divided: Protestantism, Schism, and Secularization.

Kadi mmuenenu muimpe ke wepi? Kudiku anu tshitendelelu tshimuepele tshilelela anyi? Tshidi anu tshia bena Katolike anyi? Nzambi udi witaba bitendelelu bikuabu ebi mushindu wa muomumue anyi? Bu mudi nkonko eyi mishindamene pa malanda atudi nawu ne Mufuki wetu, mbia mushinga bua kumanya mmuenenu wende pa bualu ebu. Mmunyi mutudi mua kumumanya? Mpa kutangila mu Bible, Dîyi dia Nzambi difundisha ku nyuma wende. (Bienzedi 17:11; 2 Timote 3:16, 17) Tukonkononayi tshidiye wamba pa bualu bua tshitendelelu tshimuepele tshilelela.

 [Mêyi a dianyisha bua tshimfuanyi mu dibeji 2]

TSHIZUBU: Mark Gibson/​Index Stock Photography