Nkonko ya babadi

Mu matunga a bungi, bantu batu ne tshilele tshia kupeshangana tudo tua dibaka. Mmêyi kayi a mu Bible atudi ne bua kulonda patudi tufila anyi padibu batupesha tudo tua mushindu’eu?

Bible kêna upisha bantu padibu bapeshangana tudo ne meji mimpe ne mu tshikondo tshiakane to. Pa bidi bitangila muanda wa difila, Bible udi ulomba bena Kristo balelela bua kuidikija Yehowa, muena kalolo utu upeshangana bintu. (Yakobo 1:17) Mupostolo Paulo wakambila bena Kristo nende ne: ‘Kanupu muoyo bua kuenzelangana bimpe ne bua kukuatshishangana [ne bintu ne bakuabu]; bua Nzambi udi usanka ne milambu ya nunku.’ Nunku badi balomba bena Kristo bua kuikala bena kalolo.​—Ebelu 13:16; Luka 6:38.

Kadi netuambe tshinyi bua difunda mêna a tudo tutudi basue bua batutuadile mu mukanda wa mu magazen, tshilele tshidi tshitangalake mu ditunga dia États-Unis? Mu ditunga dia Angleterre, batu babikila mukanda eu ne: liste wa dibaka. Pa tshibidilu, mulume ne mukaji badi basue kuenza difesto dia dibaka batu banji kutangila bintu bidi mu magazen kampanda ne bafunda mulongolongo wa tudo tudibu basue bua bantu babapeshe. Balela ne balunda babu badi bapeta mukanda udi ubambila bua kuya mu magazen kampanda bua kusumba tshintu tshidi aba badi baselangana bamane kufunda mu mukanda wa tudo tudibu bakeba bua balue kubapesha. Patudi tutangila bimpe, mukanda udi ne liste wa tudo udi wambuluisha muntu udi musue kupeshangana kado bua kubenga kujimija mêba a bungi mu dikeba dia kado ka disumba, ne aba badibu bapesha kado badi bepuka lutatu lua kuya kupingaja tudo tuonso tudibu kabayi basue mu magazen.

Bikala aba badi basue kuselangana bafunde mu mukanda wa tudo bintu bidibu basue bua bantu babapeshe, atshi ntshilumbu tshidi tshibatangile anu buobu nkayabu. Kadi muena Kristo udi ne bua kuikala ne budimu ne kuepuka bilele bionso bidi mua kumufikisha ku dishipa mêyi a mu Bible. Tshilejilu, netuambe tshinyi bikala bintu bidi babangilangana basungule bikale anu bia mushinga mukole bobobo? Biobi bikale nanku, aba badi kabayi ne mfranga ya bungi badi mua kupangila bua kufila kabu kado, anyi badi mua kumona ne: mbimpe kubenga kuya mu difesto dia dibaka adi bua kubenga kuya kafuamu bundu bua patupu bua diya ne kado ka mushinga mukese. Mukaji mukuabu muena Kristo wakafunda ne: “Kutuadilangana tudo tua dibaka kudi kuenda kulua bualu bua bujitu bua dikema. Ndi muenze muanyi muonso bua kuikala muena kalolo, kadi matuku mashale aa disanka dionso dimvua nadi ndijimine.” Bidi bibungamija be padi mpindieu difesto dia dibaka dilua bualu budi butekeshangana mu maboko!

Bushuwa, aba badi bafila tudo kabena ne bua kuela meji ne: bua kuitababu kabu kado, kadi ne bua kuikala kasumba anu mu magazen kampanda peshi kadi ne bua kuikala ka mushinga kansanga nansha. Bushuwa, Yezu Kristo wakamba ne: tshidi ne mushinga wa bungi menemene ku mêsu kua Nzambi mmeji adi mu mutshima wa eu udi ufila, kadi ki mmushinga wa tshintu tshidiye ufila to. (Luka 21:1-4) Bia muomumue, mupostolo Paulo wakafunda bua mapa a luse avua bantu ne bua kupesha bakengi ne: ‘Muntu ne muntu afile bintu bu muakadisunguilaye mu mutshima wende; kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’​—2 Kolinto 9:7.

Bilondeshile Bible, ki mbibi to bua muntu kudimanyisha ne: yeye ke udi mufile tshintu kampanda, pamu’apa udi mua kufila kado aku kutentekapu ne ka-mukanda kadiye mufunde. Kadi imue miaba bantu batu ne tshilele tshia kuambila bantu bonso badipu dîna dia eu udi mufile kado kampanda peshi kansanga. Tshilele etshi tshidi mua kukebesha bilumbu. Pamu’apa aba badi bafila kado badi mua kujinga bua kushala kabayi bamanyike bua bantu kabalu kubatua mushinga udi kauyi nansha muakanyine. Bantu aba badi balonda dîyi didi mu Matayo 6:3, mudi Yezu wamba ne: ‘Kadi wewe pawapa bantu bintu bia luse, tshianza tshiebe tshia bakaji katshimanyi tshidi tshianza tshiebe tshia balume tshienza.’ Bakuabu badi mua kuela meji ne: dipeshangana kado mbualu budi butangila muntu nkayende budi ne bua kushala anu pankatshi pa udi ufila kado ne eu udi ukangata. Kabidi, kumanyisha mêna a aba badi bafile tudo kudi mua kufikisha bantu ku difuanyikija tudo, ne bualu ebu budi mua ‘[kujudija] mukawu.’ (Galatia 5:26) Bena Kristo badi ne bua kuepuka difuisha bakuabu bundu mu dimanyisha patoke mêna a bantu badi bafile tudo.​—1 Petelo 3:8.

Bushuwa, tuetu balonde mêyi aa a mu Dîyi dia Nzambi, dipeshangana tudo nedishale bualu budi bufila disanka.​—Bienzedi 20:35.