Utuku wangata bena Kristo nebe bakadi bakulakaje ne mushinga anyi?

PAVUA bena Isalele wa kale badie tshipungidi ne Nzambi, uvua mubambile ne: ‘Uleje kanemu kudi muntu udi ne nsuki mitoke too, unemeke muntu mununu, utshine Nzambi webe.’ (Lewitiki 19:32) Bushuwa, kunemeka bantu bakulakaje kuvua bualu bua tshijila buvua Nzambi ulomba bantu, ne bualu ebu buvua muomumue ne kumukokela. Nansha mudi bena Kristo kabatshiyi ku Mikenji ya Mose, muanda eu udi utuvuluija ne: Yehowa udi wangata basadidi bende bakadi bakulakaje ne mushinga wa bungi menemene. (Nsumuinu 16:31; Ebelu 7:18) Tutuku tubangata petu mudi Yehowa ubangata anyi? Tutuku tuangata bana betu bena Kristo bakulakaje ne mushinga anyi?

Elisha uvua wangata mulunda wende mukulakaje ne mushinga

Muyuki umue wa mu Bible udi uleja bua tshinyi bidi bikengela kunemeka bantu bakole udi mu mukanda wa Bakelenge Muibidi. Mu muyuki eu badi bumvuija mushindu uvua Elisha muprofete utshivua nsonga mupingane pa muaba wa muprofete Eliya. Tangila tshiakenzeka dituku dia ndekelu dia buprofete bua Eliya mu bukalenge bua Isalele bua bisa dikumi.

Dituku adi, Yehowa wakambila muprofete eu mukulakaje bua kumbuka ku Gilegala kuya ku Betele, bua kumbuka ku Betele kuya ku Yeleko, ne bua kumbuka ku Yeleko kuya ku musulu wa Yadene. (2 Bakelenge 2:1, 2, 4, 6) Munkatshi mua luendu alu lua kilometre mitue ku 50, misangu isatu mijima Eliya wakambila Elisha bua kamulondi to. Kadi, anu muvua nsongakaji Luta mubenge ne muoyo mujima bua kulekela dilonda Naomi kukadi bidimu nkama mivule, Elisha pende wakabenga bua kulekela muprofete au ukavua mukulakaje. (Luta 1:16, 17) Elisha wakamba misangu isatu mijima ne: “Bu mudi Yehowa ne muoyo ne bu mudi mutshima webe ne muoyo, tshiena nkulekela.” (2 Bakelenge 2:2, 4, 6) Pinapu, Elisha ukavua muambuluishe Eliya munkatshi mua bidimu bitue ku bisambombo bijima. Nansha nanku, uvua musue kutungunuka ne kuenza mudimu pamue ne Eliya bidimu bia bungi menemene. Bushuwa, Bible udi utulondela kabidi ne: ‘Pakatshidibu benda bayikila, monayi, Eliya wakabandishibua.’ (Mvese wa 11) Eliya ne Elisha bavua benda bayikila too ne dituku dia ndekelu dia mudimu wa Eliya mu Isalele. Muprofete eu utshivua nsonga uvua umueneka muikale ne dijinga dia kuteleja mêyi ne malongesha mavule ne dikankamija bia kudi muprofete mumonemone malu eu ukavua mukulakaje. Bushuwa, uvua wangata mulunda wende mukulakaje eu ne mushinga.

‘Bu batatu ne bamamu’

Ki mbikole bua kumvua tshivua Elisha munangile mulunda wende muprofete ukavua mukulakaje  au, uvua mene bu tatuende wa mu nyuma. (2 Bakelenge 2:12) Katupa kakese kumpala kua mudimu wa Eliya kujikawu mu Isalele, wakambila Eliya ne: ‘Ulombe tshindi mua kukuenzela diambedi tshiyi muanji kubandishibua kuudi.’ (Mvese wa 9) Nunku ku ndekelu, Eliya wakaleja ne: uvua ujinga bua eu uvua ne bua kumupingana ikale bimpe mu nyuma ne bua mudimu wa Nzambi utungunuke.

Lelu, bidi bisankisha bikole bua kumona lungenyi lua muomumue lua butatu ne bumamu munkatshi mua bena Kristo bakulumpe balume ne bakaji padibu baleja bansonga malu bua kubapetesha dimanya ne meji. Tshilejilu, bena budisuile bakadi benze bidimu bia bungi ku biro bia filiale ya Bantemu ba Yehowa batu bambuluisha bapiabapia badi balua mu dîku dia Betele bua kupetabu dimanya didibu bakengela bua kuenza mudimu udibu babapesha. Bia muomumue, batangidi bena ngendu ne bakaji babu bakadi benze bidimu bia bungi mu dikumbula bisumbu batu baleja aba badibu balongesha bua kuikala batangidi bena ngendu malu a bungi menemene bua kupetabu dimanya dia mua kuenza mudimu eu. Kabidi, mu bisumbu bia Bantemu ba Yehowa bidi pa buloba bujima mutu bana betu ba balume ne ba bakaji bakulakaje bakadi basadile Yehowa ne lulamatu bidimu bia bungi ne badi baleja bapiabapia badi balua mu tshisumbu malu bua kupetabu pabu meji adi akuatshisha ne dimanya didibu nadi.​—Nsumuinu 2:7; Filipoi 3:17; Tito 2:3-5.

Diditatshisha ne muoyo mujima didi bena Kristo bakulakaje aba baleje didi divuija dibaleja kanemu bualu budi busankisha bikole. Ke bualu kayi tudi basue kuidikija tshilejilu tshia Elisha mu diangata bena Kristo netu bakadi bakulakaje ne mushinga wa bungi. Anu mudi mupostolo Paulo utuvuluija, tutungunukayi ne kuangata ‘muntu mununu bu tatu’ ne ‘bakaji banunu bu bamamu.’ (1 Timote 5:1, 2) Patudi tuenza nunku, tudi tuambuluisha bikole bua tshisumbu tshia bena Kristo tshia buloba bujima tshiende bimpe ne tshilubuluke.

[Tshimfuanyi mu dibeji 30]

Elisha uvua musue kutungunuka ne kuenza mudimu pamue ne Eliya bidimu bia bungi menemene

[Bimfuanyi mu dibeji 31]

Bansonga badi bapetela malu mimpe a bungi be kudi bena Kristo bakadi bakulakaje