Malu a mu nsombelu

Yehowa utu utulama misangu yonso

MALONDA KUDI ENELESI MZANGA

Bivua mu tshidimu tshia 1972. Bansongalume dikumi ba mu Nsangilu wa Bansonga ba mu Malawi, bakabuela mu nzubu muetu, buobu kunkuata e kumpulumuna kuya nanyi too ne mu budimi bua mienga buvua pabuipi apu. Buobu kunkuma ne kunshiyabu tshilamba bela meji ne: mvua mufue.

Bantemu ba Yehowa bavule ba mu ditunga dia Malawi bavua bapete makenga makole bu edi. Bua tshinyi bavua babakengesha? Ntshinyi tshiakabambuluisha bua kutantamena makenga aa? Suayi bua ndulondele muyuki wa dîku dianyi.

MVUA muledibue mu dia matuku 31 ngondo wa Tshisua-munene 1921, mu dîku dia bantu bavua batendelela. Tatu uvua mpasata mu Ekeleziya Munene wa ba-Présbytérien mu Afrike. Ngakakolela mu Nkhoma, tshimenga tshikese tshidi pabuipi ne Lilongwe, tshimenga tshikulu tshia ditunga dia Malawi. Bakansela kudi Emmas Mzanga meme mutshikale ne bidimu 15.

Dimue dituku mpasata mukuabu mulunda wa tatu wakalua kuetu. Ukavua mumanye ne: Bantemu ba Yehowa bavua pabuipi netu ne yeye kutudimuija bua katubuelakanyi mu malu abu nansha. Wakatuambila ne: Bantemu bavua ne demon, ne patuvua katuyi tudimuka, tuetu petu tuvua mua kupeta demon. Didimuija adi diakatulubakaja bikole, ke bualu kayi tuakamuangala e kuya mu musoko mukuabu, muakapeta Emmas mudimu wa disumbisha mu magazen makuabu nunku. Kadi kunyima kua matuku makese tuakalua kumanya ne: nzubu wetu mupiamupia utuvua basombele au uvua kabidi pabuipi ne Bantemu ba Yehowa!

Kadi kunyima kua matuku makese, dinanga dikole divua nadi Emmas bua Bible diakamusaka bua kuakula ne Ntemu mukuabu nunku. Kunyima  kua yeye mumane kupeta mandamuna mimpe a nkonko mivule ivuaye nayi, Emmas wakitaba bua Bantemu kulongabu nende Bible. Kumpala bavua balongela Bible mu magazen muvuaye usumbisha, kadi kunyima bakabanga kulongela lumingu luonso mu nzubu muetu. Dîba dionso divua Bantemu ba Yehowa balua, mvua mpatuka mu nzubu bualu mvua mbatshina. Nansha nanku, Emmas wakatungunuka ne kulonga Bible. Ngondo bu isambombo kunyima kua yeye mumane kutuadija dilonga, wakatambula mu ngondo wa Tshisanga wa 1951. Kadi kakangambila ne: uvua mutambule to, bualu uvua utshina ne: meme mumvue lumu alu dibaka dietu divua mua kufua.

Mbingu isatu ya ntatu

Kadi dimue dituku, mulunda wanyi Ellen Kadzalero wakangambila ne: bayanyi uvua mutambule ne mulue Ntemu wa Yehowa. Ngakumvua tshiji tshia dikema! Kubangila anu dituku adi, tshivua mmuakuisha anyi mmulambila biakudia to. Ngakalekela kabidi kumusunyina ne kumubabajila mâyi a yeye kuowa; eu ke mudimu wa mukaji bilondeshile bibidilu bietu.

Kunyima kua yeye mumane kukolela lutatu elu munkatshi mua mbingu isatu mijima, Emmas wakangambila mu buimpe bua tuyikile nende, ne pashishe kungumvuijaye tshivuaye muangatshile dipangadika dia kulua Ntemu. Wakambadila ne kungumvuijaye mvese mivule bu mudi wa 1 Kolinto 9:16. Biakandenga ku muoyo bikole ne meme kumona ne: meme panyi mvua ne bua kuyisha lumu luimpe. Ke bualu kayi ngakapangadika bua kutuadija kulonga Bible ne Bantemu ba Yehowa. Dilolo dine adi, ngakalambila bayanyi biakudia bilenga bia dinono, biobi kumusankisha bikole bia dikema.

Ndi mmanyisha bena dîku ne balunda banyi bulelela

Pakumvua baledi betu ne: tuvua tudisangisha ne Bantemu ba Yehowa, bakabenga bualu ebu ne muoyo umue. Bena mu dîku dianyi bakatufundila mukanda batuambila bua katuyi kubatangila kabidi to. Bualu ebu buakatubungamija bikole, kadi tuakeyemena mulayi wa Yezu wa se: tuvua mua kupeta bana betu ba mu nyuma balume ne bakaji ne batatu ne bamamu ba bungi.​—Matayo 19:29.

Ngakadiunda ne lukasa mu dilonga dianyi dia Bible ne meme kutambula mu ngondo wa muanda-mukulu 1951, ngondo isatu patupu ne tshitupa kunyima kua ditambula dia bayanyi. Ngakadiumvua muenzejibue bua kumanyisha mulunda wanyi Ellen bulelela. Diakalenga, wakitaba bua meme kulonga nende Bible. Mu ngondo wa Lumungulu 1952, Ellen wakatambula ne kuluaye muanetu wa bakaji wa mu nyuma, ne bualu ebu buakakolesha bulunda buetu menemene. Lelu, tutshidi anu balunda ba katapula kateka.

Mu 1954, bakateka Emmas mutangidi wa tshijengu bua kuikalaye ukumbula bisumbu. Tshikondo atshi, tukavua ne bana basambombo. Mu matuku au, mutangidi muendakanyi uvua ne dîku uvua ukumbula tshisumbu lumingu lumue ne lumingu lukuabu luvua lulonda uvua usomba kuende ne mukajende ne bana bende. Kadi, pavua Emmas wenza luendu, misangu yonso uvua ulongolola bua ngikale ndombola dilonga dia mu dîku. Tuvua tudienzeja bua dilonga ne bana betu balela dikale disankisha. Tuvua kabidi tuakula ne dishindika dionso pa bidi bitangila dinanga dietu kudi Yehowa ne bulelela bua mu Dîyi diende, ne tuvua tuyisha tuetu bonso mu dîku. Dilongesha bana malu a mu nyuma nunku diakakolesha ditabuja diabu ne diakabalongolola bua makenga atukavua pa kupeta.

Badi batuadija kukengesha batendeledi

Mu tshidimu tshia 1964, ditunga dia Malawi diakapeta dipanda. Pakumvua banene ba mu tshisumbu tshia tshididi tshivua tshilombola ditunga bua se: katuvua tubuelakana mu malu a tshididi, bakakeba bua kutuenzeja ku bukole bua tuetu kusumba tuarte tua bena mu tshisumbu tshia tshididi atshi. * Bu mutuakabenga meme ne Emmas bua kusumba tuarte atu, bena mu Nsangilu wa Bansonga bakanyangakaja budimi buetu bua matala, avua mikale  bietu biakudia bituvua ne bua kuikala nabi tshidimu tshivua tshilonda. Pavua bena mu Nsangilu wa Bansonga eu benda batshiubuila matala panshi apu, bavua benda bimba misambu bamba ne: “Bonso badi babenga bua kusumba karte ka Kamuzu [Mfumu Banda], musuasua neudie matala abu atshidi mabishi ne bantu abu nebele tshibobo wa muadi bua bualu ebu.” Kadi nansha mutuakajimija biakudia bietu ebi, katuakateketa mu maboko to. Bushuwa, tuakamona mudi Yehowa utukuba. Wakatukolesha ne dinanga dionso.​—Filipoi 4:12, 13.

Dimue edi butuku bua menemene mu ngondo wa Tshimungu 1964, mvua nkayanyi kumbelu ne bana. Tuvua balale, kadi meme kutabuluka ku tulu bua mitoyi ya misambu imvua mumvue bimba mutantshi mule. Bavua benda bimba abu bavua bena mu Gulewamkulu, tshisumbu tshivua tshienza malu mu musokoko tshia baji ba maja ba mu tshisamba kampanda batu baluisha bantu bamba mudibu mikishi ya bankambua bafue. Bena mu Nsangilu wa Bansonga bavua batume bena mu Gulewamkulu bua kuluabu kutuluisha. Meme kubisha bana lubilu, ne kumpala kua baluishi aba kufikabu ku nzubu kuetu, tuakanyema tuetu kuya kusokoma muitu.

Patuvua basokome apu, tuetu kumona mudilu mukenke. Bena mu Gulewamkulu bavua batue nzubu wetu wa nsona mudilu. Nzubu wakoshika kubutuka butubutu ne bintu bietu bionso nkong. Pakavua bantu abu bumbuka mu bibundu bia nzubu wetu bitshivua bifuima muîshi wa kapia, tuakabumvua bamba ne: “Tudi batemeshile Ntemu au mudilu muimpe wa yeye kuota.” Tuvua ne dianyisha dia bungi kudi Yehowa bua mutuvua bapanduke! Bulelela, bakanyanga lupangu luetu luonso, kadi dipangadika dietu dia kueyemena Yehowa pamutu pa bantu kabakadibutula to.​—Musambu 118:8.

Tuakumvua ne: bena Gulewamkulu bavua benzele mêku makuabu atanu a Bantemu ba Yehowa bualu bubi bua muomumue abu mu tshitupa tshietu atshi. Tuvua ne disanka ne dianyisha dia bungi pakalua bana betu ba balume ba mu bisumbu bivua pabuipi netu bua kutuambuluisha! Bakibakulula nzubu yetu ne kutuambuluishabu ne biakudia bia mbingu ya bungi.

Ditukengesha didi divula

Mu ngondo wa Kabitende 1967, bakabanga kuluisha Bantemu ba Yehowa bonso bua kubakomba kubamana mu ditunga dijima. Bua kutukuata, bansongalume ba tshikisu tshikole ne luonji (ba mu Nsangilu wa Bansonga ne ba mu tshisumbu tshia Bansonga Bampanda-njila ba mu Malawi, bambule miele) bavua benda bakeba Bantemu ku nzubu ne ku nzubu. Pavuabu babapeta, diakamue bavua babambila bua basumbe tuarte tua tshisumbu tshia tshididi.

Pakafikabu ku nzubu kuetu, bakatuebeja bua kumanya bituikala tuvua ne karte ka tshisumbu tshia tshididi. Ngakandamuna ne: “Tòo, tshiena muanji kukasumba to. Ne tshiakukasumba mpindieu to, mene tshiakukasumba nansha mu matuku atshilualua nansha.” Nunku bakatukuata meme ne bayanyi ne kuyabu netu ku biro bia bampulushi, kabayi batuanyishile bua kuambula tshintu nansha tshimue. Pakafuma bana mu kalasa, kabakatusangana kumbelu to, ke buobu kubanga kupampakana bikole. Diakalenga, muananyi wa kumpala Daniel, wakafika ku mbelu panyima ne kumuambilabu kudi muena mutumba kampanda tshivua tshienzeke. Diakamue yeye kuangata bakunyi bende kuluabu batangile ku biro bia bampulushi. Bakafika dîba dikavua bampulushi batuela mu mashinyi bua kuya netu ku Lilongwe. Bana bakaya netu.

Mu Lilongwe, bakenza tshilumbuluidi tshivua katshiyi tshinemeka mukenji nansha umue to. Balumbuluishi bakatuebeja ne: “Nenutungunuke ne kuikala Bantemu ba Yehowa anyi?” Tuakandamuna ne: “Eyowa!” nansha muvua diandamuna edi diumvuija diakamue tshibawu tshia bidimu muanda-mutekete bia buloko. Bua aba bavuabu bangata bu balombodi ba bulongolodi, tshibawu tshivua tshia bidimu 14 bia buloko.

Kunyima kua tuetu bamane kushala butuku bujima katuyi badie peshi bikishe, bampulushi bakaya netu mu buloko bua mu Maula. Mu buloko abu tuzubu tuvuabu bela bantu tuvua tûle tente ne bena buloko, katuvua mene mua kupeta muaba wa kulala panshi nansha! Nkumba uvua mbeketshi uvuabu bateke mu kazubu konso ka buloko kavua bantu bûle ne pa mishiku. Biakudia bivuabu batupesha bivua bikese ne bilamba bibi bia menemene. Kunyima kua mbingu ibidi, batangidi ba buloko bakamona ne: tuvua bantu bena ditalala ne buobu kutuanyishila bua kusombela mu lubanza lua nzubu wa buloko. Bu muvua ba bungi ba kutudi bikale pamue, dituku dionso tuvua ne mushindu wa kukankamijangana ne kuyisha bena buloko bakuabu. Bualu buakatukemesha buvua se: kunyima kua tuetu bamane kuenza ngondo bu isatu ne tshitupa ya tshibawu tshia buloko, bakatulekela bualu matunga  makuabu avua menzeje mbulamatadi wa ditunga dia Malawi bua kushintululaye malu ende.

Bamfumu ba bampulushi bakatuambila bua kupingana ku nzubu yetu, kadi bakatuambila kabidi ne: bavua bakandike Bantemu ba Yehowa mu ditunga dia Malawi. Dibakandika edi diakatuadija mu dia matuku 20 Kasuamansense 1967 too ne mu dia matuku 12 a ngondo wa Tshimungu 1993, tuamba ne: bidimu bitue ku 26 bijima. Ebi bivua bidimu bia ntatu, kadi nansha nanku Yehowa wakatuambuluisha bua tuetu kushala katuyi tubuelakana mu malu a tshididi.

Bavua batuipata bu nyama

Mu ngondo wa Kasuamansense 1972, mbulamatadi wakela mukenji wakakebesha tshikondo tshikuabu tshia ditukengesha ne tshikisu. Mukenji au uvua wamba ne: Bantemu ba Yehowa bonso bavua ne bua kuipatshibua miaba ivuabu benza midimu ne se: Bantemu bonso ba mu misoko bavua ne bua kubipata ku nzubu yabu. Bulelela, bavua bipata Bantemu bu nyama.

Mu tshikondo atshi, muanetu wa balume mukuabu muena Kristo wakalua kuanyi ne mukenji wa lukasa lukasa bua kuambila Emmas ne: ‘Nsangilu wa Bansonga udi wela tshifufu bua kukukosa mutu, kuasa mutu webe ku mutshi, ne kuya nawu kudi bamfumu ba musoko.’ Emmas wakumbuka lukasa kumbelu, kadi wakumbuka nanku kunyima kua yeye mumane kulongolola bua tuetu kumulonda ne lukasa luonso. Ngakatuma bana mu lubilu. Pashishe, anu pankavua nkeba kupatuka, bantu dikumi ba mu tshisumbu tshia Nsangilu wa Bansonga bakapatuka, benda bakeba Emmas. Bakabuela mu nzubu muanyi kadi buobu kusangana ne: Emmas ukavua muye. Ne tshiji tshionso, balume aba dikumi bakampulumuna too ne mu budimi bua mienga buvua pabuipi apu, kunkumabu muomu ne mienga bikole. Pashishe bakanshiya mufue tshipuka. Kunyima kua meme mumane kupeta lungenyi, ngakakalaba too ne kumbelu.

Butuku abu mu mîdima, Emmas wakamba kujimija muoyo wende pavuaye upingana kumbelu bua kutukeba. Pakansanganaye bankume bikole, Emmas ne mulunda wende mukuabu uvua ne mashinyi bakangambula bimpe bimpe mu mashinyi. Pashishe tuakaya ku nzubu kua muanetu mukuabu mu Lilongwe, meme kushalamu ne kutuadija kumvua bimpe ku kakese ku kakese, ne Emmas wakatuadija kulongolola bua kumbuka mu ditunga.

Bena tshimuangi badi kabayi ne muaba wa kuya

Muananyi wa bakaji Dinesi ne bayende bavua ne mashinyi avua ambula bujitu bua tone itanu. Bakangata muendeshi uvua kumpala mu tshisumbu tshia Bansonga Bampanda-njila ba mu Malawi, kadi uvua utumvuila luse bua lutatu lutuvua nalu. Wakitaba bua kutuambuluisha tuetu ne Bantemu bakuabu. Muendeshi au wakenza mbingu ya bungi wambula Bantemu miaba ivuabu basokome ikavuabu badianjile kulongolola. Pashishe uvua uvuala nsukutu wa Bansonga Bampanda-njila ba mu Malawi ne bavua bamupitshisha miaba ya bungi ivua bampulushi bakange njila. Wakamba kujiwuka bikole bua kuambuluisha nkama ne nkama ya Bantemu bua kupita ku mikalu ne kubuela mu ditunga dia Zambie.

 Kunyima kua ngondo mikese, bamfumu ba mu ditunga dia Zambie bakatupingaja ku bukole mu Malawi; kadi katuvua mua kupingana mu musoko wetu to. Bintu bietu bionso bituvua bashiye bavua babibe. Nansha malata avua menze nawu nzubu bavua baatule. Bu mutuvua katuyi ne muaba mukuabu wa kuya, tuakanyemena mu ditunga dia Mozambique ne tuetu kusombela mu tshitudilu tshia bena tshimuangi tshia mu Mlangeni bua bidimu bibidi ne tshitupa. Kadi mu ngondo wa Kabalashipu 1975, mbulamatadi mupiamupia wa mu Mozambique wakakanga tshitudilu tshia bena tshimuangi ne wakatuenzeja bua kupingana mu Malawi muvua malu kaayi mashintuluke bua basadidi ba Yehowa nansha. Katuvua ne tshikuabu tshia kuenza to, ke bualu kayi tuakanyemena kabidi mu Zambie. Tuetu kufika mu tshitudilu tshia bena tshimuangi tshia mu Chigumukire.

Kunyima kua ngondo ibidi, mulongolongo wa bise ne mashinyi a basalayi akimana kumpenga kua njila munene, ne basalayi nkama mivule bikale ne bingoma bipite bungi ba mu Zambie bakabuela mu tshitudilu etshi. Bakatuambila ne: mbatuibakile nzubu milenga ne bavua balue bua kutuambula bua kuya kutushiyaku. Tuvua bamanye ne: bualu abu kabuvua bulelela nansha. Basalayi bakatuadija kusakila bantu mu mashinyi ne mu bise ku bukole, kayumbayumba kutuadija. Basalayi kubangabu kututa bingoma biabu binene muulu, ne bana betu nkama mivule kutangalakabu mu tshipapu.

Mu diyumbakana edi, Emmas wakadishinda panshi ne bantu kumudiatakajabu, kadi muanetu mukuabu wakamuambuluisha bua kujuka kuulu. Tuvua tuela meji ne: eu uvua ntuadijilu wa dikenga dinene. Bena tshimuangi bonso bakanyema kupingana mu Malawi. Patutshivua mu Zambie, tuakafika ku musulu mukuabu nunku, ne bana betu kuenzabu mulongo mule bakuatangane ku bianza bua kusabuka bimpe mâyi aa. Kadi dia muamua dia musulu eu, bakatukuata kudi basalayi ba mu Zambie ne kutupingajabu ku bukole mu Malawi.

Patuakapingana tshiakabidi mu Malawi, katuvua bamanye kua tuetu kuya to. Tuakumvua ne: mu bisangilu bivua bena tshididi benze ne mu bikandakanda, bavua badimuije bantu bua kukeja “mpala mienyi” idi ifika mu misoko yabu, pinapu bavua bakula bua Bantemu ba Yehowa. Ke bualu kayi tuakapangadika bua kuya mu tshimenga tshikulu tshia ditunga, mutuvua katuyi mua kusunguluka bikole bu mu musoko. Tuakafika ku difutshila nzubu mukese, ne Emmas wakabangulula mudimu wende wa mutangidi wa tshijengu, ukumbula bisumbu mu musokoko.

Tudi tubuela mu bisangilu bia tshisumbu

Ntshinyi tshiakatuambuluisha bua kushala ne lulamatu? Bisangilu bia tshisumbu! Mu bitudilu bia bena tshimuangi bia mu Mozambique ne mu Zambie, katuvua ne lutatu lua kubuela mu bisangilu bivua bienzekela mu Nzubu ya Bukalenge ya nsona to. Kudisangisha bua kuenza bisangilu mu Malawi kuvua bualu bukole bua njiwu ya bungi, kadi bivua bikengela anu kubuelamu. Bua kuepuka bua kabatukuatshi, tuvua tuenza bisangilu misangu mivule butuku bua menemene miaba ivuabu kabayi mua kutumona to. Bua kumona mua kubenga kukoka ntema ya bantu ku bisangilu bietu, katuvua tukuma bikashi bua kuleja dianyisha kudi ngamba-malu, kadi tuvua tufitakaja bianza patupu.

Bantu bavua batambula butuku. Muananyi Abiyudi wakatambula pende butuku nunku. Kunyima kua muyuki wa batismo, bakaya nende ne bantu bakuabu bavua ne bua kutambula mu mîdima too ne muaba mukuabu uvua bitotshi uvuabu bumbule tshina. Mu tshina atshi ke muakabatambuishabu.

Nzubu wetu mukese uvua muaba muimpe kauyi njiwu

Mu bidimu bia ndekelu bivua mbulamatadi mutukandike, nzubu utuvua basombele mu Lilongwe uvua muaba muimpe uvua kauyi ne njiwu to. Mikanda ivua ifumina ku biro bia filiale wa Zambie bavua balua nayi mu musokoko mu nzubu muetu. Bana betu bavua bambula mikanda eyi ku makalu bavua balua ku nzubu kuetu bua kuambula mikanda ivua mifumine mu Zambie ne baya nayi mu bitupa bionso bia ditunga dia Malawi. Bibejibeji bia Tshibumba tshia Nsentedi bituvua tuabanya bivua bia tupeyipeyi bualu bivua bipatuila pa mabeji mapepele menemene atubu bafundila Bible. Ebi bivua biambuluisha bambudi ba mikanda bua kuambula bibejibeji bia bungi kupita muvuabu mua kuambula bu bibejibeji bienzela pa mabeji a pa tshibidilu. Bambudi ba mikanda bavua kabidi babanya bibejibeji bikese bia Tshibumba tshia Nsentedi, bivua anu ne biena-bualu bia dilonga. Bibejibeji bikese bivua bipepele bua kubisokoka mu mpaya wa mutelu bualu bivua anu dibeji dimue.

Bambudi ba mikanda aba bakamba kujimija budikadidi buabu ne mioyo yabu pavuabu bendakana mu tshisuku, imue misangu butuku mu mîdima, ne turton tua mikanda ivuabu bakandika  tuambakaja pa makalu abu. Nansha muvuaku miaba ivua bampulushi bajike njila ne miaba mikuabu ya njiwu, bavua benza kilometre mivule mu mvula ne munya bua kutuadila bana babu biakudia bia mu nyuma. Bushuwa, bana betu abu bavua bambula mikanda bavua ne dikima dikole!

Yehowa udi ulama bakaji bakamba

Mu ngondo wa Tshisua-munene wa tshidimu tshia 1992, pavuaye wenza muyuki mu dikumbula kampanda, Emmas wakateketa luseke. Kunyima kavua kabidi mua kuakula to. Panyima pa matuku ndambu wakateketa kabidi, kushalaye ne luseke lumue lutekete. Nansha muvua disama diende dikale bualu buvua bunyingalaja bikole, dikuatshisha dia dinanga dia kudi bana betu ba mu tshisumbu diakakepesha kanyinganyinga kanyi. Ngakatshiunga bayanyi kumbelu too ne pakafuaye mu ngondo wa Kasuabanga 1994, muikale ne bidimu 76. Tuvua benze nende bidimu 57 mu dibaka, ne kumpala kua Emmas kufuaye, wakamona muakajika dikandika dia mudimu wetu. Kadi ntshitshidi anu ndila bua lufu lua mulunda wanyi wa lulamatu.

Kunyima kua meme mumane kulua mukaji mukamba, bayende wa muananyi wa bakaji wakambula bujitu bua kundisha, kusangisha ne bujitu bukavuaye nabu bua mukajende ne bana bende batanu. Kadi mona diakabi, kunyima kua disama dia matuku makese, wakafua mu ngondo wa Tshimungu 2000. Mpindieu mmunyi muvua muananyi wa bakaji mua kupeta biakudia ne muaba kulala buetu tuetu? Ngakamona kabidi ne: Yehowa udi utulama ne udi bushuwa ‘tatu wa bana ba nshiya ne mulumbuluishi wa bakaji ba mu lufuila.’ (Musambu 68:5) Ku diambuluisha dia basadidi bende badi pa buloba, Yehowa wakatupesha nzubu muimpe. Mmushindu kayi wakenzeka bualu ebu? Pakamona bana betu ba balume ne ba bakaji ba mu tshisumbu tshietu dikenga dituvua nadi, bakatuibakila nzubu mu mbingu itanu! Bana betu ba mu bisumbu bikuabu bavua bikale bibaki ba nzubu bakalua bua kuambuluisha. Dinanga ne bulenga biakatulejabu kudi Bantemu bonso aba biakatupita bualu nzubu uvuabu batuibakile mmuimpe mupite nzubu yonso itukadi basombele. Mushindu’eu udi bena mu tshisumbu baleje dinanga udi uyisha bantu badi pabuipi ne muaba utudi basombele. Pantu nya bua kulala butuku, ntu ngumvua anu bu se: ndi mu Mparadizu! Bushuwa, nzubu mupiamupia mmuenza ne madioto a siman, kadi anu mudi bantu ba bungi baleje, nnzubu uvuabu bibake ne dinanga menemene.​—Galatia 6:10.

Yehowa udi utungunuka ne kutulama

Nansha mutubi bimfikila imue misangu bua kubungama bikole, Yehowa mmungenzele malu malenge ne mmukuatshishe bikole. Bana banyi muanda-mutekete batshidi ne muoyo, ne dîku dianyi didi mpindieu ne bantu 123. Ndi ne dianyisha dia bungi bua mudi ba bungi ba kudibu bikale basadila Yehowa ne lulamatu!

Lelu undi ne bidimu 84 bulubulu, ndi mûle tente ne disanka pandi mmona malu adi nyuma wa Nzambi muenze mu Malawi. Mu bidimu bishale binayi, ndi mumone bungi bua Nzubu ya Bukalenge buenda bubanda kubangila ku umue too ne ku nzubu mipite pa 600. Tudi kabidi mpindieu ne biro bipiabipia bia filiale mu Lilongwe, ne tudi ne mushiki wa biakudia bia mu nyuma bimpe bidibu kabayi bakandike to. Ndi ngumvua bushuwa ne: ndi mumone dikumbana dia mulayi wa Nzambi udi mu Yeshaya 54:17, mudibu batujadikila ne: ‘Kakuena tshielelu tshia mvita tshidibu batula bua kukuluisha natshi tshidi mua kuikala ne diakalengele.’ Kunyima kua dienzela Yehowa mudimu munkatshi mua mvula mipite pa 50, ndi mutuishibue ne: mu mateta onso adi mua kutukuata, Yehowa udi utulama misangu yonso.

[Mêyi adi kuinshi]

[Tshimfuanyi mu dibeji 24]

Bayanyi Emmas wakatambula mu ngondo wa Tshisanga 1951

[Tshimfuanyi mu dibeji 26]

Kasumbu ka bambudi ba mikanda ba dikima

[Tshimfuanyi mu dibeji 28]

Nzubu muibaka ne dinanga