Kumpala ne panyima: Mushindu udi Bible mumushintulule
‘Semenayi pabuipi ne Nzambi ne yeye neasemene pabuipi nenu’
Kumpala ne panyima: Mushindu udi Bible mumushintulule
MIJIKI ke tshivua nsombelu mujima wa Rolf-Michael. Dinua dia bintu bia lulengu divua dimukuata ku bupika. Nsonga muena Allemagne eu uvua unua maluvu mapite bungi ne uvua unua kakuyi wa kumuenza bualu bintu bia lulengu bia mishindu yonso: LSD, cocaine, diamba ne bintu bikuabu bidi binyungulula lungenyi.
Pakajingaye bua kuya mu musokoku ne diamba dia mu ditunga kampanda dia mu Afrike, bakamukuata ne kuenzaye ngondo 13 mu buloko. Matuku avuaye muenze mu buloko akamupesha tshikondo tshimpe tshia kuelela meji pa kipatshila ka muoyo.
Rolf-Michael ne mukajende, Ursula, bavua bakeba kipatshila ka muoyo ne bulelela kadi kakuyi tshipeta tshia nsongo. Nansha muvuabu bateketa mu mikolo bua malu a mu bitendelelu bidi bidiamba mudibi bia bena Kristo, dijinga diabu dikole divua dia kumanya Nzambi. Kadi bavua ne nkonko ne kabavua bapeta mandamuna avua abasankisha mu bitendelelu bia bungi to. Bitendelelu ebi kabivua bibapesha mene bukole bua kushintulula nsombelu wabu to.
Rolf-Michael ne Ursula bakalua kupetangana matuku kunyima ne Bantemu ba Yehowa. Buobu bamane kutuadija dilonga dia Bible, dibikila dia ne: ‘Semenayi pa buipi ne Nzambi ne yeye neasemene pa buipi’ diakalenga Rolf-Michael ku muoyo bikole. (Yakobo 4:8) Uvua mupangadije bua ‘kumusha muntu wa kale, bu muakadi tshikadilu tshiende tshia diambedi ne kudivuadika muntu mupia-mupia wakafukibua mu tshimfuanyi tshia Nzambi ne buakane ne tshijila bidi bifuma ku malu malelela.’—Efeso 4:22-24.
Kadi mmunyi muvua Rolf-Michael mua kuvuala bumuntu mupia-mupia? Bakamuleja mu Bible ne: pa kuikala ne “dimanya dilelela” muntu udi mua ‘kuvuijibua mupia-mupia bu mudi tshifuanyikiji tshia Mumufuki,’ udi muikale Yehowa Nzambi.—Kolosai 3:9-11.
Bu muvua Rolf-Michael wenda anu upeta dimanya dilelela, uvua ukeba bua nsombelu wende kuikalaye mu diumvuanga ne Dîyi dia Nzambi. (Yone 17:3) Bivua bikole bua kulekela dinua dia bintu bia lulengu, kadi Rolf-Michael wakamona mushinga wa disemena pabuipi ne Yehowa mu disambila ne kupeta diambuluisha diende. (1 Yone 5:14, 15) Diambuluisha dikuabu diakafuma ku didisangisha ne aba bakavua Bantemu ba Yehowa, bavua pabu badienzeja bikole bua kuenza disua dia Nzambi.
Dimanya dia se: ndongoluelu wa malu eu udi upite kadi aba badi benza disua dia Nzambi nebashaleku kashidi, diakambuluisha kabidi Rolf-Michael. Diakamuambuluisha bua kubenga kusungula disanka dia tshitupa tshîpi ne ndongololuelu eu, kadi kusungula masanka a tshiendelele pa kuikala ne malanda mashême ne Yehowa Nzambi wa dinanga. (1 Yone 2:15-17) Mêyi adi mu Nsumuinu 27:11 akalenga Rolf-Michael bikole: “Muananyi ikala ne meji, nanku nensanke bikole. Pikala muntu unjana nemmone mua kumuandamuna.” (MMV) Udi wamba ne dianyisha dionso ne: “Bu mudi mvese uleja diakalenga didi nadi bantu dia kusankisha mutshima wa Yehowa, mvese eu udi uleja buondoke bua dinanga diende.”
Anu bu Rolf-Michael, mukajende ne bana bende basatu, bantu bakuabu nkama ya bungi mbapete masanka pa kulonda mêyi manene a mu Bible. Bantu ba mushindu eu badi mu bisumbu bia Bantemu ba Yehowa bia pa buloba bujima. Kadi bidi bitubungamija bualu mu amue matunga batu badingila Bantemu mudibu kasumbusumbu ka malu a Nzambi kadi katapulula bena dîku dimue. Tshilejilu tshia Rolf-Michael tshidi tshifila tshijadiki tshidi tshibenga bidibu bamba ebi.—Ebelu 4:12.
Rolf-Michael udi wamba ne: Mvese wa Matayo 6:33 (udi utulomba bua kuteka bintu bia mu nyuma pa muaba wa kumpala mu nsombelu) udi mu dîku diende bu “kaleji Nord” kadi kafunkuna luseke luimpe lua kuyila mu nsombelu wabu. Yeye ne dîku diende mbena dianyisha dikole kudi Yehowa bua nsombelu mulenga udibu nende mu dîku diabu bu mudibu bena Kristo. Badi bamona mêyi a mufundi wa Musambu aa bu abu: ‘Nempingajile Yehowa tshinyi bua malu ende mimpe onso akungenzeleye?’—Musambu 116:12.
[Lungenyi lunene lua mu dibeji 9]
Nzambi udi upesha bantu diakalenga dia kusankisha mutshima wende
[Kazubu mu dibeji 9]
Mêyi a mu Bible adi enza mudimu
Munkatshi mua mêyi a mu Bible adi mambuluishe bantu ba bungi bua kulekela dinua dia bintu bia lulengu mudi aa nunku:
“Nuenu badi bananga Yehowa, nuikale ne malu mabi lukuna.” (Musambu 97:10) Panyima pa muntu yeye mumane kutuishibua bua ngenzelu mibi idi mua kufikisha ku lufu ne mufike ku dikina bikole ngenzelu eyi, udi mua kufika bipepele ku dienza tshidi tshisankisha Nzambi.
‘Udi wenda ne bena meji udi ulua muena meji, kadi udi ubuelakana ne bapote neakenge bua bualu ebu.’ (Nsumuinu 13:20) Bua kubenga kunua bintu bia lulengu ne bintu bikuabu bidi bikuata, muntu udi ne bua kusungula bimpe balunda bende. Kudia bulunda ne bena Kristo bikala mua kutukuatshisha mu dipangadika dietu kudi bushuwa ne diambuluisha dia bungi.
‘Lekelayi kuditatshisha ku bualu bumue; kadi mu malu onso ku ditendelela ne ku disengelela numanyishe Nzambi bua milombu yenu ne disakidila. Ne ditalala dia Nzambi didi ditamba dijingulula dionso dia bantu, nedilame mitshima yenu ne meji enu mu Kristo Yezu.’ (Filipoi 4:6, 7) Ditalala dia mu muoyo ne dia mu lungenyi dia nunku kakuena mushindu wa kudipeta ku tshintu tshikuabu to. Disambila ne dieyemena Nzambi bidi biambuluisha muntu bua kuluangana ne ntatu pamutu pa kunyemena ku dinua dia diamba.