Tshikondo tshikale malu adi Nzambi mulaye mua kukumbana

MALU adi menzeke pa buloba mmuwule ne malaya adi kaayi makumbane. Misangu ne misangu matunga atu mapangile kukumbaja tshipungidi tshia dilekela mvita, afikisha benamu mu mvita mikole. Napoléon wakamba dimue dituku ne: “Mbulamatadi itu ikumbaja malu adiyi ilaya anu padibu bayenzeja ku bukole, anyi padibi bua diakalenga diayi.”

Kadi netuambe tshinyi bua malu adi bantu pa nkayabu balaya? Mbibi be padi muntu kayi unemeka dîyi diende! Nangananga padiye muntu unudi bamanye ne beyemene. Bushuwa, bantu badi mua kupangila anyi kubenga mua kukumbaja malu adibu balaye.

Ndishilangana kayipu didi pankatshi pa malu adi Nzambi mulaye ne a bantu! Malu adi Nzambi mulaye mmalelela ne a kueyemene. Bualu buonso budi Yehowa Nzambi mulaye budi ne tshia kukumbana. Nebukumbane kakuyi mpata. Mu diakula bua dîyi dia Nzambi didi kadiyi mua kupanga kukumbana, Yeshaya 55:11 udi wamba ne: ‘Nunku dîyi didi dipatuka mukana muanyi nedikale muomumue; kadiena dipingana kundi patupu, kadiyi dianji kuenza muanda undi musue dienze, kadiyi dianji kujikija muanda unakaditumina.’

Pa nanku, mmunyi mutudi ne bua kumona malu adi Nzambi mulaye mu Bible? Kakuyi mpata, tudi ne bua kueyemena. Tshilejilu, Mupostolo Yone wakafunda ne: ‘Tangilayi! nzubu wa tshilulu wa Nzambi udi munkatshi mua bantu, ne yeye neikale nabo, ne buobu nebikale bantu bende; ne Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikaleku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 21:3, 4) Udi mua kupeta mabenesha aa biwikala wenza malu mu diumvuangana ne mêyi a Yezu aa: ‘Eu udi muoyo wa tshiendelele, bua buobu bakumanye wewe, Nzambi umuepele mulelela, ne yeye uwakatuma, Yezu Kristo mene.’​—Yone 17:3.