Badi bakengeshibua bua buakane

‘Bakakengeshibua bua buakane buabu badi ne disanka, bua bukalenge bua mu diulu budi buabu.’​—MATAYO 5:10.

1. Bua tshinyi Yezu uvua kumpala kua Pontio Pilato, ne ntshinyi tshiakambaye?

 “TSHIDIBO bandelele, kabidi tshindi muvuile panu apa, mbua kujadikila bantu bulelela.” (Yone 18:37, MMM) Pavua Yezu muambe mêyi aa, uvua kumpala kua Pontio Pilato, Ngovena wa bena Lomo wa mu Yudaya. Yezu kavua muaba au ku disua diende to, nansha Pilato kavua mumubikile to. Kadi uvuapu bualu bavua bamushiminyine kudi balombodi ba tshitendelelu tshia bena Yuda ne: uvua muenji wa malu mabi uvua muakanyine lufu.​—Yone 18:29-31.

2. Ntshinyi tshiakenza Yezu, ne mbipeta kayi biakapatuka?

² Yezu uvua mumanye bimpe ne: Pilato uvua ne bukokeshi bua kumulekela anyi kumushipa. (Yone 19:10) Kadi abi kabiakamupangisha bua kumanyisha Pilato malu a Bukalenge ne dikima to. Nansha muvua Yezu muikale mu njiwu, wakapeta mushindu wa kuyisha munene wa mbulamatadi wa tshitupa atshi. Nansha muakayishaye nanku, bakamufundila tshibawu tshia lufu ne kumushipabu, kufuaye lufu lua dikenga lua bu-martire anyi bua ditabuja pa mutshi wa tshinyongopelu.​—Matayo 27:24-26; Mâko 15:15; Luka 23:24, 25; Yone 19:13-16.

Uvua mujadiki wa malu anyi uvua martire?

3. Muaku “martire” uvua umvuija tshinyi mu tshikondo tshivuabu bafunda Bible, kadi udi umvuija tshinyi lelu eu?

³ Bua bantu ba bungi lelu, martire mmuntu udi ne lukunukunu lunekesha. Batu babanda bantu batu basue kufua bua malu adibu bitabuja, nangananga malu a tshitendelelu tshiabu ne: mbena tshinyangu (ba-teroriste) anyi bakebeshi ba njiwu mu bantu. Kadi muaku martire udi ufuma ku muaku wa mu tshiena-Greke martys uvua umvuija mu bikondo bivuabu bafunda Bible ne: “ntemu” anyi muntu udi ujadika malu (pamuapa ku kabadi), udi ujadika bulelela bua malu adiye witabuja. Muaku eu wakalua kumvuija pashishe “muntu udi ufila muoyo wende bua kujadika malu,” anyi mene udi ujadika malu pa kufila muoyo wende.

4. Mmu ngumvuilu kayi wa kumpala muvua Yezu muikale martire?

⁴ Yezu uvua martire mu ngumvuilu wa kumpala wa muaku eu. Anu muakambilaye Pilato, wakalua bua ‘kujadikila bantu bulelela.’ Dijadika diende dia malu diakapatula bipeta bishilashilangane mu bantu. Bamue ba munkatshi mua bantu bakasanka bua bivuabu bumvue ne  bamone, buobu kuitabuja Yezu. (Yone 2:23; 8:30) Bantu ba bungi, nangananga balombodi ba bitendelelu kabakasankidila malu akambaye to. Yezu wakambila balela bende bavua kabayi bamuitabuje ne: “Bena panu kabena mua kunukina, kadi meme mbankine, bualu ndi njadika ne: malu adibo benza adi mabi.” (Yone 7:7, MMM) Bu muvua Yezu ujadika bulelela, bakamukuatshila tshiji kudi balombodi ba bitendelelu ba mu tshisamba tshiabu, kumufikishabi ku lufu. Bushuwa, uvua “mujadiki wa bulamate ne mulelela (martys).”​—Buakabuluibua 3:14, MMM.

‘Nebikale nenu lukuna’

5. Ku ntuadijilu kua mudimu wende, ntshinyi tshiakamba Yezu pa bidi bitangila dikengesha bena Kristo?

⁵ Yezu nkayende ki nguakakengeshabu bikole to, wakadianjila kumanyisha kabidi bayidi bende ne: malu a muomumue avua ne bua kubenzekela pabu. Ku ntuadijilu kua mudimu wende, Yezu wakambila bavua bamuteleja mu muyuki wa pa Mukuna ne: ‘Bakakengeshibua bua buakane buabu badi ne disanka, bua bukalenge bua mu diulu budi buabu. Panupendabu ne panukengeshabu ne panushiminyinabu mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene.’​—Matayo 5:10-12.

6. Mmubelu kayi wakafila Yezu pakatumaye bapostolo bende 12?

⁶ Pashishe, pakatumaye bapostolo bende 12, wakabambila ne: ‘Nudimukile bantu, bualu bua buobu nebanufile kudi balumbuludi babu, nebanukume mu nsunagoga yabu; bulelela, nebaye nenu ku mêsu kua bangovena ne ku mêsu kua bamfumu bua bualu buanyi, nenuikale bu tshimanyishilu ku mêsu kuabu ne ku mêsu kua bisamba bia bende.’ Kadi bamfumu ba bitendelelu nkayabu ki mbavua ne bua kukengesha bayidi abu to. Yezu wakamba kabidi ne: ‘Muanabu ne muntu neafile muanabu ku lufu, tatu neafile muanende, bana nebatombokele batatuabu ne bamamuabu, nebabashipeshe. Bantu bonso nebikale nenu lukuna bua dîna dianyi; kadi wananukila  too ne ku nshikidilu neasungidibue.’ (Matayo 10:17, 18, 21, 22) Muyuki wa bena Kristo ba mu bidimu lukama bia kumpala udi ujadika ne: mêyi aa avua malelela.

Muyuki wa ditantamena ntatu ne lulamatu

7. Ntshinyi tshiakafikisha Stefano ku dilua martire?

⁷ Kakese kunyima kua lufu lua Yezu, Stefano wakalua muntu wa kumpala wakafua bua dijadika dia bulelela. Uvua ‘muule tente ne ngasa ne bukole, wakenzenza malu a kukema ne bimanyinu binene munkatshi mua bantu.’ Baluishi bende bena bitendelelu ‘kabakamanya mua kupita lungenyi luende ne nyuma wakadi umuakuisha.’ (Bienzedi 6:8, 10) Buule tente ne mukawu, bakaya ne Stefano kumpala kua Sanedren, kabadi kanene ka bena Yuda, kuakatuilanganaye ne bantu bavua bamushiminyine malu, yeye kujadika malu a mushinga. Kadi ku ndekelu, baluishi ba Stefano ntemu wa lulamatu bakamushipa.​—Bienzedi 7:59, 60.

8. Nntshinyi tshivua bayidi ba mu Yelushalema benze pavuabu babakengesha kunyima kua lufu lua Stefano?

⁸ Kunyima kua dishipibua dia Stefano, ‘dikenga dikole diakakuata bena [tshisumbu] ba mu Yelushalema, buonso buabu bakatangalaka mu nseke ya Yudaya ne ya Samalea.’ (Bienzedi 8:1) Dikengeshibua adi diakalekeshaku mudimu wa kuyisha wa bena Kristo anyi? Tòo, Bible udi ulonda wamba ne: ‘Bakadi batangalake bakendakana bamba dîyi dia lumu luimpe.’ (Bienzedi 8:4) Pamuapa bavua mua kuikala ne lungenyi lua buena lua mupostolo Petelo lua ne: ‘Butudi nabu mbua kutumikila mêyi a Nzambi kumpala kua mêyi a bantu.’ (Bienzedi 5:29) Nansha muvuabu babakengesha, bayidi abu bavua ne lulamatu ne dikima bakatungunuka ne kujadika bulelela, nansha bamanye ne: bivua mua kubafikisha ku makenga makole.​—Bienzedi 11:19-21.

9. Mmushindu kayi wakatungunukabu ne kukengesha bayidi ba Yezu?

⁹ Dikola dia makenga kadiakabatekesha mu mikolo to. Tshia kumpala, tudi bamanye ne: muntu wakanyisha bua kuasabu Stefano mabue ‘wakatshidi ufunyina bayidi ba Mukalenge bua kubashipaye, wakaya kudi muakuidi munene. Wakalomba mikanda ya kuya nayi mu nsunagoga ya mu Damaseke bua kusuika basanganaye mu Njila eu wa Nzambi, nansha balume nansha bakaji, ne bua kuluaye nabu ku Yelushalema.’ (Bienzedi 9:1, 2) Pashishe, mu tshidimu bu tshia 44 bikondo bietu ebi, ‘Helode wakakuata bena ekeleziya bakuabu bua kubakengesha. Wakashipa Yakobo, muanabu ne Yone, ne muele.’​—Bienzedi 12:1, 2.

10. Mmuyuki kayi wa dikengeshibua udi mu mukanda wa Bienzedi ne wa Buakabuluibua?

¹⁰ Mu mukanda wa Bienzedi mudi malu makuabu adi atangila ntatu, diedibua mu buloko ne dikengeshibua bidi kabiyi kupua muoyo bivuabu batantamene kudi bena lulamatu bu mudi Paulo, eu uvua ukengesha bena Kristo kumpala ne wakalua mupostolo ne kufuila ditabuja mu bianza bia Amperere wa bena Lomo Néron bu mu tshidimu tshia 65 kumpala kua bikondo bietu ebi. (2 Kolinto 11:23-27; 2 Timote 4:6-8) Ndekelu wa bionso, mu mukanda wa Buakabuluibua, uvuabu bafunde pabuipi ne ku ndekelu kua bidimu lukama bia kumpala, tudi tusangana bele Yone mu buloko mu tshidila tshia Patemo ‘bualu bua dîyi dia Nzambi ne bua dimanyisha dia Yezu.’ Mukanda wa Buakabuluibua udi wakula kabidi bua ‘Antipa, mumanyishi wanyi, wanyi wa kueyemena’ mu Pêgamo.​—Buakabuluibua 1:9; 2:13.

11. Mmunyi muvua ngikadilu wa bena Kristo ba kumpala mujadike ne: mêyi a Yezu avua malelela pa bivua bitangila dikengeshibua?

¹¹ Bionso ebi biakajadika mêyi avua Yezu muambile bayidi bende ne: “Pikalabo bankengeshe meme, nebanukengeshe ne nuenu kabidi.” (Yone 15:20, MMM) Bena Kristo ba  lulamatu ba kumpala bavua badilongolole bua kupeta diteta ditambe bunene: dibamuenesha kasuba, dibela miaba ya nyama ya luonji, anyi dia mushindu mukuabu kayi wonso, bua kutungunukabu ne kukumbaja mudimu uvua Yezu Kristo mubapeshe eu: ‘Nenuikale bamanyi banyi mu Yelushalema ne mu Yudaya yonso ne Samalea ne ku mfundilu kua buloba.’​—Bienzedi 1:8.

12. Bua tshinyi dikengesha bena Kristo ki mbualu buakenzeka anu kale?

¹² Bikala muntu wela meji ne: anu bayidi ba Yezu ba kale ke bakakengeshabu ne tshikisu tshionso, udi udishima bikole menemene. Paulo, eu wakapeta makenga a bungi anu mutudi bamone wakafunda ne: ‘Bantu bonso badi basue kuikala bena kanemu mu Kristo Yezu nebakengeshibue.’ (2 Timote 3:12) Pa bidi bitangila dikengeshibua, Petelo wakamba ne: ‘Bua nuakabikidibua bua muanda eu, bualu bua Kristo wakakenga bua bualu buenu, wakanushila tshilejilu bua nuenu numulonde mu makasa ende.’ (1 Petelo 2:21) Kubangila tshikondo atshi too ne mu ‘matuku a ku nshikidilu’ wa tshikondo etshi, mbatungunuke ne kukina ne kukengesha bantu ba Yehowa. (2 Timote 3:1) Mu buloba bujima, mu matunga a ba tshikokesha nkaya ne mu matunga a makalenge a tshinsangansanga, batu bakadi bakengeshe Bantemu ba Yehowa ba mu tshikondo tshietu etshi musangu kampanda anyi kansanga, muntu pa nkayende anyi mu tshibungi.

Bua tshinyi badi babakina ne babakengesha?

13. Ntshinyi tshidi basadidi ba Yehowa ba matuku etu aa ne bua kuikala bamanye pa bidi bitangila dikengeshibua?

¹³ Nansha ba bungi ba kutudi bikale ne budikadidi kampanda butudi nabu bua kuyisha ne kudisangisha pamue mu bisangilu, tudi ne bua kuvuluka mêyi a mu Bible aa: ‘Tshimuenekelu tshia malu a pa buloba ebu netshijimine.’ (1 Kolinto 7:31) Malu adi mua kushintuluka bikole menemene, kutufikisha ku dipona, tuetu katuyi badilongolole mu lungenyi ne mu meji ne mu nyuma kabidi. Nunku ntshinyi tshitudi mua kuenza bua kudikuba? Mushindu mutambe buimpe wa tuetu kudikuba nkuikala bavuluke tshidibu bakinyina ne bakengeshila bena Kristo banangi ba ditalala ne batumikidi ba mikenji.

14. Ntshinyi tshivua Petelo muleje ne: ke tshivuabu bakengeshila bena Kristo?

¹⁴ Mupostolo Petelo wakakula bua bualu ebu mu mukanda wende wa kumpala, wakafundaye bu pankatshi pa tshidimu tshia 62 ne tshia 64, pavua bena Kristo ba mu Ampire mujime wa Lomo bapeta mateta ne babakengesha. Wakamba ne: ‘Bananga, kanukemi bua dikenga didi bu kapia munkatshi muenu diakaluila kunudi bu diteta, bu bualu bupiabupia buakanukuata.’ Petelo wakatungunuka umvuija tshivuaye usua kuamba ne: ‘Umue wenu kakengeshibu bu mushipianganyi, anyi bu muibi, anyi bu muenji wa malu mabi, anyi bu mudibueji wa mu malu a bantu bakuabu; kadi biakenga muntu bu muena Kristo, kikadi biende ne bundu, kadi atumbishe biende Nzambi bua dîna edi.’ Petelo wakaleja ne: bavua bakenga, ki mbualu bavua benze bualu bubi kampanda to, kadi mbualu bavua bena Kristo. Bu buobu baditue mu ‘dipitshibua diodimue dia malu manyanguke’ bu bantu ba tshianana, bantu abu bavua mua kusomba nabu bimpe. Kadi mu bulelela, bavua bakenga bualu bavua badienzeja bua kukumbaja mudimu wabu wa bayidi ba Kristo. Ke tshidi tshienzekela kabidi bena Kristo balelela lelu eu.​—1 Petelo 4:4, 12, 15, 16.

15. Ndishilangana kayi didi dimueneka mu malu adibu benzela Bantemu ba Yehowa lelu?

¹⁵ Mu matunga a bungi, batu banyisha Bantemu ba Yehowa patoke bua buobumue ne dienza mudimu mu diumvuangana mu mpungilu yabu ne mu midimu yabu ya luibaku, bua bulelela ne lukunukunu biabu, bua tshilejilu tshiabu tshimpe mu bikadilu bilenga ne mu nsombelu wa mu dîku, ne nansha bua mmuenekelu wabu muimpe. * Kadi ku luseke lukuabu, mbakandike mudimu wabu mu matunga matue ku 28 pavuabu bafunda tshiena-bualu etshi, ne Bantemu ba bungi badi bapeta makenga a ku  mubidi ne bajimija bintu anu bua ditabuja diabu. Bua tshinyi badi bakengesha Bantemu eku bikale ne lumu luimpe nunku? Ne bua tshinyi Nzambi udi ulekela babakengesha?

16. Mbua bualu kayi bunene budi Nzambi ulekela bantu bende bakengeshibua?

¹⁶ Tshia kumpala, tudi ne bua kuikala bavuluke mêyi adi mu Nsumuinu 27:11, adi amba ne: ‘Muananyi, wikale ne meji, usankishe mutshima wanyi, bua mmanye mua kuitaba kudi muntu udi umpenda.’ Bulelela, etshi ntshilumbu tshia kalekale tshidi tshitangila bukokeshi bua buloba bujima. Nansha mudiku bijadiki bivule bia bantu badi bashale balamate Yehowa munkatshi mua bidimu bivule, Satana kêna mulekele kupenda Nzambi bu muakenzaye mu matuku a muntu muakane Yobo nansha. (Yobo 1:9-11; 2:4, 5) Kabiyi mpata, luonji lua Satana ndutambe kuvula padiye wenza muende muonso bua kujadika tshivuaye muambe, mpindieu udi Bukalenge bua Nzambi bujadika bikole, buikale ne benabu ne baleji-mpala babu pa buloba bujima. Bantu aba nebashale ne lulamatu kudi Yehowa nansha buobu mua kubaluisha peshi buobu mua kupeta makenga kayi onso anyi? Elu ndukonko ludi musadidi yonso wa Yehowa ne bua kuandamuna yeye nkayende.​—Buakabuluibua 12:12, 17.

17. Mêyi a Yezu a ne: “Malu aa nealue kunudi bu tshimanyishilu” adi umvuija tshinyi?

¹⁷ Pavua Yezu wambila bayidi bende malu avua ne bua kuenzeka ku ‘nshikidilu wa tshikondo etshi,’ wakaleja bualu bukuabu budi Yehowa ulekela bakengesha basadidi bende. Wakabambila ne: ‘Nebalue nenu ku mêsu kua bamfumu ne bangovena bua dîna dianyi. Malu au nealue kunudi bu tshimanyishilu.’ (Matayo 24:3, 9; Luka 21:12, 13) Yezu nkayende wakamanyisha malu kumpala kua Helode ne Pontio Pilato. Nansha mupostolo Paulo ‘bakaya [nende] ku mêsu kua bamfumu ne bangovena.’ Mulombola kudi Mukalenge Yezu Kristo, Paulo wakakeba mushindu wa kuyisha mukalenge mutambe bunene wa mu tshikondo atshi pakambaye ne: “Ndi ndayidila kudi Kaisa.” (Bienzedi 23:11; 25:8-12) Bia muomumue lelu, ntatu itu pa tshibidilu ilua kufila mushindu muimpe wa kuyisha banene ne bantu ba tshianana. *

18, 19. (a) Mmunyi mudi dikandamena ntatu mua kutupesha diakalenga? (b) Nkonko kayi ituakonkonona mu tshiena-bualu tshidi tshilonda?

¹⁸ Ndekelu wa bionso, ditantamena mateta ne makenga didi mua kutupetesha diakalenga. Mmu mushindu kayi? Muyidi Yakobo wakavuluija bena Kristo nende ne: ‘Nububale bu disanka dionso panuapona mu mateta a mishindu ya bungi; bualu bua nudi bamanye ne: diteta dia ditabuja dienu didi dienzeja ditantamana.’ Bulelela, dikengeshibua didi mua kulengeja ditabuja dietu ne kukolesha ditantamana dietu. Ke bualu kayi katuena tutshina dikengeshibua anyi tunyemena ku mishindu idi Bible ubenga bua kudiepuka anyi kudimanyika nansha. Kadi tudi tutumikila mubelu wa Yakobo eu: ‘Ditantamana dikale ne mudimu wadi muimpe tshishiki, bua nuenu nuikale bakane tshishiki, bakumbane mu malu onso, kanuyi kupanga mu bualu [nansha] bumue.’​—Yakobo 1:2-4.

¹⁹ Nansha mudi Dîyi dia Nzambi dituambuluisha bua kumvua tshidibu bakengeshila basadidi ba lulamatu ba Nzambi ne tshidi Nzambi mulekele bua bienzeke nanku, abi kabiena bivuija dikengeshibua bualu bupepele to. Mmunyi mutudi mua kupeta bukole kua kutantamena dikengeshibua? Ntshinyi tshitudi mua kuenza padibu batukengesha? Netumone malu a mushinga aa mu tshiena-bualu tshidi tshilonda.

[Mêyi adi kuinshi]

Udi mua kumvuija anyi?

• Mmu ngumvuilu kayi wa kumpala muvua Yezu muikale martire?

• Dikengeshibua dia bena Kristo ba mu bidimu lukama bia kumpala diakabatuadila tshinyi?

• Petelo wakumvuija ne: bua tshinyi bavua bakengesha bena Kristo balelela?

• Bua tshinyi Yehowa udi ulekela makenga akuata basadidi bende?

[Nkonko ya dilonga]

[Bimfuanyi mu mabeji 10, 11]

Bena Kristo ba mu bidimu lukama bia kumpala bakakenga, ki mbualu bavua benze bualu bubi kampanda to, kadi mbualu bavua bena Kristo

PAULO

YONE

ANTIPA

YAKOBO

STEFANO