Bamanyishi ba Bukalenge badi balonda

“Ebu mbualu bumvua tshiyi mumanye to!”

DOROTA, Ntemu wa Yehowa (muyishi wa ku dîba ne ku dîba) wa mu ditunga dia Pologne wakaya bu pa tshibidilu kutetesha muanende wa balume wa bidimu 14 kua munganga mu lupitadi lua tshilongelu tshiabu. Pavua munganga Janina * wenza mateta au wakakonka Dorota bua midimu ivua muanende wa balume wenza ku nzubu.

Dorota wakamuandamuna ne: “Pantu tshiyi ne bukole bua kuenza mudimu, muananyi utu ulamba biakudia bua bantu bonso basambombo ba mu dîku dietu. Utu kabidi ukolopa mu nzubu ne ungambuluisha bua kulongolola bintu bia mu nzubu. Utu musue kubala. Utu mulongi wa tshitembu.”

Janina wakamba ne: “Ebu mbualu bua dikema! Ndi ngenza mudimu muaba eu kukadi bidimu 12, kadi tshitu muanji kumvua bualu bua mushindu’eu” to.

Pakamona Dorota ne: kuvua mushindu wa kuyisha, wakamba ne: “Baledi ba bungi lelu kabatu balongesha bana babu bimpe to. Ke bua tshinyi bana babu batu badimona ne mushinga mukese.”

Janina wakamuebeja ne: “Mmunyi muudi mumanye bionso ebi? Bualu baledi ba bungi kabatu ne dimanya pa malu aa to.”

Dorota kumuandamuna ne: “Bible ke mpokolo mujalame wa dimanya. Tshilejilu, bilondeshile Dutelonome 6:6-9, kumpala kua kulongesha bana betu tudi ne bua kuanji kudilongesha tuetu bine. Katuenaku mua kuanji kubueja malu mimpe atudi tujinga kuambila bana betu mu mutshima wetu ne mu meji etu anyi?”

Janina wakamba ne: “Ebu mbualu bua dikema. Ebu mbualu bua dikema!” Pashishe wakebeja Dorota mushindu uvua Bible mumuambuluishe mu dikolesha bana ne dibalongesha.

Dorota wakamba ne: “Tutu tulonga Bible ne bana betu lumingu luonso ne tutu tukonkonona mukanda wa Les jeunes s’interrogent​—Réponses pratiques.” * Pashishe wakamuleja mushindu udi mukanda eu ne kumutelela bimue biena-bualu biawu.

Janina wakakema ne: “Ebu mbualu bumvua tshiyi mumanye to! Ndiku mua kupeta mukanda eu anyi?”

Kunyima kua dîba dijima, Dorota wakalua ne mukanda au.

Pakabala Janina mukanda au, wakamuebeja ne: “utu mu tshitendelelu kayi?”

Yeye kumuandamuna ne: “Ndi Ntemu wa Yehowa.”

“Mmunyi mutu Bantemu ba Yehowa bangata bantu badi kabayi bena kuitabuja nabu?”

Dorota wakamuandamuna ne: “Batu babangata anu bu mundi nkuangata ne kanemu emu,” ne kuambaye kabidi ne: “Bushuwa, tudi tujinga bua bantu aba bafike ku dimanya dia bulelela bua mu Bible.”

Janina wakamba ne: “Bidi bidianjila kunsankisha bikole menemene.”

Ku ndekelu kua muyuki wabu, Dorota wakakankamija Janina bua kubala Bible. Wakamuambila ne: “Neapeshe muoyo webe tshipatshila ne neakuambuluishe mu mudimu webe.”

Janina wakamba ne: “Bulelela udi munkankamije bua kubala Bible.”

Ne budimu buonso, Dorota wakenza bua diya kutangila munganga adi kuluadi mushindu muimpe wa yeye kuyisha.​—1 Petelo 3:15.

[Mêyi adi kuinshi]