Kudi nkonko ya bungi, kadi mandamuna mimpe makese

MU DINDA dia dituku dia Bansantu, mu dituku 1 Kasuabanga 1755, tshikumina tshinene tshiakenzeka mu tshimenga tshia Lisbonne (mu ditunga dia Portugal) pavua bantu ba bungi bikale mu misa. Nzubu ya bungi yakupuka ne bantu bavule bakafua.

Matuku makese kunyima kua tshipupu atshi, Voltaire mufundi wa mu ditunga dia France wakapatula kasala (Poème sur le désastre de Lisbonne) kavua kaleja muvuaye mubenge tshivua bantu bamba ne: Nzambi ke uvua mutume tshipupu atshi bua mpekatu yabu. Bua kuleja muvua bantu kabayi mua kumvua anyi kumvuija malu a bipupu bia buena ebi, Voltaire wakafunda ne:

Bifukibua kabitu biakula, tudi tubikonka malu mu tshianana;

Tudi dijinga ne Nzambi udi wambila bantu malu.

Voltaire kavua muntu wa kumpala uvua mujule nkonko pa bidi bitangila Nzambi to. Mu kupita kua bidimu, bipupu ne makenga mbijudije nkonko mu mitu ya bantu. Kukadi bidimu bungi tshianana mpindieu, Yobo utshifuma ku dijimija bana bende bonso ne muikale ne disama dibi wakakonka ne: ‘Bualu kayi [Nzambi] udi upa muntu udi mu dikenga munya, ne udi upa muntu udi ne kanyinganyinga mu mutshima wende muoyo?’ (Yobo 3:20) Lelu, bantu ba bungi badi badiebeja mudi Nzambi muimpe ne wa dinanga umueneka bu udi utangila makenga ne malu mabi ne mêsu, kayi ne tshidiye wenza.

Padi bantu bamona nzala, mvita, masama ne lufu, ba bungi badi babenga ne muoyo mujima bamba ne: kakuena Mufuki udi uditatshisha bua bantu to. Muena nkindi mukuabu udi ubenga dikalaku dia Nzambi wakamba ne: “Kakuena tshintu tshidi mua kubingisha Nzambi padiye ulekela muana ukenga, . . . anu bikalaye kayiku to.” Makenga a bungi bu mudi dishipa dia bena Yuda bavule mu Mvita Mibidi ya Buloba bujima, akafikisha bantu ku diamba pabu nanku. Tangila tshivua mufundi mukuabu muena Yuda mufunde: “Diumvuija dipepele dia makenga avua menzeke mu buloko bua Auschwitz didi dia se: Nzambi katu ubuela mu malu a bantu to.” Bilondeshile dilonga kampanda divuabu benze mu tshidimu tshia 1997 mu France (ditunga didi bantu ba bungi bikale bena Katolike), bantu bu 40 pa lukama badi bamba ne: Nzambi kênaku pa kumona dishipa dia bantu ba bisa bikuabu bu muvuabi bienzeke mu ditunga dia Rwanda mu tshidimu tshia 1994.

 Mbualu budi bupumbisha bantu bua kuitabuja Nzambi anyi?

Bua tshinyi Nzambi katu wepula bantu ku makenga? Mufundi mukuabu wa malu a kale muena Katolike wakamba ne: lukonko elu ludi “lupumbisha bantu ba bungi bua kuitabuja Nzambi.” Wakakonka ne: “Kudiku mushindu wa kuitabuja Nzambi udi utangila bantu bavule bafua kabayi ne bualu ne babutula bisamba bijima bia bantu kayi ne tshidiye wenza anyi?”

Tshikandakanda kampanda tshia bena Katolike tshiakamba bia muomumue ne: “Padi makenga adi afumina ku malu a kale, njiwu ya ku biamu bidi bantu bapatule, bipupu, dishipangana ku bukole, anyi lufu lua muntu utudi bananga bifikila bantu, aba badi mu lutatu batu batangila muulu, bakonka ne: ‘Nzambi udi kuepi?’ Badi bakeba diandamuna. Ki nyeye utu ulengulula malu bikole, wenza bu udi kayiku anyi?”​—La Croix.

Papa Jean-Paul II wakakula bua imue ya ku nkonko eyi mu mukanda wende wa malu a bapostolo (Salvifici Doloris) mu tshidimu tshia 1984. Wakafunda ne: “Nansha mudi diulu ne buloba biambuluishe bantu bua kumona ne: Nzambi udiku, udi ne meji ne bukole, ne udi munene, malu mabi ne makenga adi bu adi ajibakaja ngikadilu eyi ya Nzambi, misangu mikuabu mu mushindu mualabale, nangananga padi bantu bamona makenga a buatshia buila adi kaayi ne mutu kaayi nshingu ne malu adi bantu benza kabayi babenza tshintu.”

Dikalaku dia Nzambi wa dinanga ne wa-bukole-buonso udi Bible wamba didiku diumvuangana ne dikalaku dia makenga a bantu anyi? Nzambi utuku wenza bualu kampanda bua kuepula muntu anyi bantu ku makenga anyi? Utuku uditatshisha buetu tuetu lelu anyi? Kudiku “Nzambi udi wakula ne bantu” bu muakamba Voltaire, bua kuandamuna nkonko eyi anyi? Anyisha ubale tshiena-bualu tshidi tshilonda, neupete diandamuna.

[Bimfuanyi mu dibeji 3]

Dibutuka dia tshimenga tshia Lisbonne mu tshidimu tshia 1755 diakasaka Voltaire ku diamba ne: bantu kabavua mua kupeta diumvuija dia mianda ya nanku to

[Mêyi a dianyisha]

Voltaire: Mu mukanda wa Great Men and Famous Women; Lisbonne: J.P. Le Bas, Praça da Patriarcal depois do terramoto de 1755. Foto: Museu da Cidade/​Lisboa

[Tshimfuanyi mu dibeji 4]

Bantu ba bungi batu babenga ne: Nzambi kênaku pa kumona dishipa dia bantu ba bisa bikuabu bu mudi mu Rwanda

[Mêyi a dianyisha]

FOTO WA AFP

 [Mêyi a dianyisha bua tshimfuanyi mu dibeji 2]

TSHIZUBU, bana: USHMM, courtesy of Main Commission for the Prosecution of the Crimes against the Polish Nation