Muyuki wa Bantemu ba Yehowa ba mu Ukraine udi ukolesha ditabuja ne ufila dikima

ANU muvua bena Kristo ba mu bidimu lukama bia kumpala bapete makenga, ke mudi bantu ba Nzambi baapeta lelu. (Matayo 10:22; Yone 15:20) Miaba mikese patupu ke ivuabu bakengeshe Bantemu bidimu bia bungi kupita muvuabu babakengeshe mu ditunga dia Ukraine, muvuabu bakandike mudimu wa kuyisha Bukalenge bidimu 52.

Mukanda wa Annuaire des Témoins de Jéhovah 2002 uvua mulonde muyuki wa bantu ba Nzambi ba mu ditunga edi. Mmuyuki udi utangila ditabuja, dikima ne bukole kumpala kua buluishi bukole. Malu adi alonda aa ngamue a ku mêyi a dianyisha avua biro bia filiale bia Bantemu ba Yehowa ba mu Ukraine bapete:

“Ndi mujikije dibala dia Annuaire 2002. Mvua anu ndila pamvua mbala malu avua atangila mudimu wenu wa mu Ukraine. Ndi musue kunumanyisha bua makankamija a bungi amvua mupetele ku tshilejilu tshienu tshia lukunukunu ne ditabuja dikole. Ndi ne disanka dia kuikala nenu mu dîku dimue dia mu nyuma. Tuasakidilayi wa manza tente.”​—Andrée, France.

“Kakuena mêyi andi mua kumvuija nawu dianyisha dindi nadi kunudi ne kudi Yehowa bua Annuaire 2002. Binsonji bivua bimpueka pamvua mbala malu a bungi a bana betu bavua benze bidimu (bivuabu bapatule bipeta bimpe) mu kasho ne mu maloko manene. Ndi ne dianyisha dia bungi bua dikima diabu. Nansha munkadi Ntemu bidimu 27, ndi ntungunuka ne kulongela malu kudi bana betu ba balume ne ba bakaji aba. Bakakolesha ditabuja dianyi mu Yehowa, Tatuetu wa mu diulu.”​—Vera, Yougoslavie wa kale.

“Ndi mfunda mukanda eu ne disanka bua tshilejilu tshienu tshimpe tshia ditantamana ne lulamatu mu bidimu bionso bia buluishi ebi. Dieyemena dienu dia Yehowa ne muoyo mujima ne didisuika bua kushala ne lulamatu bidi bimupesha lumu. Kabidi, budipuekeshi buenu kumpala kua mateta budi bukolesha dituishibua dianyi dia se: Yehowa katu ulekela bantu bende. Bua tshilejilu tshienu tshimpe tshia dikima, muoyo mukole ne dinanukila, tudi mua kuitaba bua kuikala ne ntatu yetu mikese bipepele.”​—Tuteirihia, Polynésie Française.

“Kunyima kua dibala dianyi dia Annuaire, ndi musue kunufundila. Malu onso avua anutangila avua malenge mutshima wanyi bikole. Mvua ne disanka dia kuikala muena mu bulongolodi bua lulamatu ebu, budi mu buobumue, bulombola kudi Tatu wa dinanga, mukuatshishi, udi utupesha bukole mu tshikondo tshiakanyine. Bivua bintonde bikole bua muvua basadidi bungi tshianana ba Yehowa ba dikima ne lukunukunu nunku bakenge bikole mushindu eu ne bajimije ne mioyo yabu. Kadi mvua kabidi ne disanka bualu ku diambuluisha dia dikima ne lukunukunu biabu, bantu ba bungi menemene bakalonga bulelela ne kufika ku dimanya Tatu wetu wa mu diulu.”​—Colette, Pays-Bas.

“Meme ne mukajanyi tuvua anu basue kunufundila bua kunuambila ne: mitshima yetu ivua milengibue patuvua tubala muyuki wa Ukraine mu Annuaire. Nuenu bana betu bena lulamatu nudi bashiye tshilejilu tshitambe bunene tshia ditantamena makenga makole a mulunguluku. Bilondeshile Nsumuinu 27:11,  ndisanka kayipu divua nadi Yehowa bua kumona bana betu ba bungi ba lulamatu ba mu Ukraine bashale ne muoyo mutoke uvua kauyi mua kufua nansha muvuaku malu mabi onso a Diabolo.”​—Alan, Australie.

“Binsonji bivua bimpueka ku mêsu pamvua mbala malu a bana betu ba mu Ukraine. Bakatantamena malu a bungi: buloko, dibanyanga mubidi, tshikisu ne ditapuluka ne bena mu dîku munkatshi mua bidimu bia bungi. Ndi musue kuambila bana betu bonso badi batungunuka ne kusadila mu bisumbu bienu ne: ndi mubanange ne ndi mbanemeka bikole. Ndi ne disanka dia bungi bua dikima diabu ne muoyo mukole wabu. Ndi mumanye mpokolo wa bukole buabu: nyuma wa Yehowa. Yehowa udi pabuipi netu, ne mmusue kutuambuluisha.”​—Sergei, Russie.

“Mvua mubale Annuaire 2002, meme kudila. Bana betu ba bakaji ne ba balume ba bungi ba mu tshisumbu tshietu mbakule bualu buenu. Nudi bantu ba mushinga mukole. Ndi ne disanka dia bungi bua kuikala munkatshi mua dîku dia mu nyuma dinene edi.”​—Yeunhee, Corée du Sud.

“Ndi ne disanka dia bungi bua muyuki wa ditabuja, ditantamana ne dinanga dikole binudi baleje bua Yehowa ne Bukalenge buende. Minga misangu tutu tupanga mua kuleja dianyisha bua budikadidi butudi nabu ne bua biakudia bivule bia mu nyuma bidi Yehowa utupesha. Kadi kabivua nanku buenu nuenu to. Tshilejilu tshienu tshia ditabuja tshidi tshituambuluisha bua kujingulula se: tudi mu malanda mashême ne Nzambi, ne neatupeshe bukole bua kumona mua kutantamena mateta onso.”​—Paul, Brésil.

“Mvua ne diakalenga dia kubala malu enu mu Annuaire 2002. Avua mansankishe bikole, nangananga muyuki udi ulenga ku muoyo wa muanetu Lydia Kurdas. Ndi munange muanetu wa bakaji eu be!”​—Nidia, Costa Rica.

“Lelu ndi mujikije dibala dia Annuaire 2002. Pamvua mmubala, ditabuja dianyi bua Yehowa divua dikoleshibua. Bualu bungikala tshiyi mua kupua muoyo nansha kakese mbua muyuki udi utangila mushindu uvuabu bajule mpata bua aba bavua balombola. Muyuki eu wakandongesha bua kubenga kuela bana betu badi balombola mpata. Tuasakidilayi wa bungi! Biakudia bia mu nyuma ebi bidi bimpe bua mutshima wetu ne bidi bitulongolola bua tshikondo tshikala ditabuja dietu mua kubuela mu diteta.”​—Leticia, États-Unis.

“Tudi ne dianyisha dia bungi bua Annuaire mulenga eu. Bamanyishi ba lumu luimpe ba bungi bavua babale bua musangu wa kumpala malu a mudimu wa bana betu ba mu Ukraine. Malu au mmakoleshe bana betu ba munemu mu Ukraine. Ba bungi, nangananga munkatshi mua bansonga mbavudije mudimu wabu. Bamue mbabange kusadila bu bampanda-njila ba pa tshibidilu anyi bambuluishi. Miyuki ya bana betu ba balume ne ba bakaji bavua basadile Yehowa pavuabu mu makandika ivua mikankamije bonso.”​—Kasumbu ka mudimu ka tshisumbu kampanda, Ukraine.

Bushuwa, lulamatu lua bana betu ba mu Ukraine ndukankamije Bantemu ba Yehowa ba buloba bujima. Nunku, dibala pa tshibidilu miyuki idi ilenga ku muoyo itu ipatuka mu Annuaire tshidimu tshionso mmushindu mulenga wa kukolesha ditabuja dietu ne ditantamana dietu mu bikondo ebi bikole.​—Ebelu 12:1.