Udiku “usuba mikolo ku mutshi musonga” anyi?

MU TSHIKONDO tshivuabu bafunda Bible, musongolo uvua mutshi mule muasa tshiamu ku lusongo luawu, ne bavua basaka nawu nyama ivua yambula majitu. Ntshinyi tshivua tshienzeka pavuabu batua nyama wa tshitshiu musongolo bua yeye kuya kumpala kadi ukandamana upingana tshianyima? Pamutu pa kupetaye disulakana, uvua udikengesha yeye nkayende.

Yezu Kristo (mumane kubika ku lufu) wakakula bua musongolo pakamuenekelaye muntu uvuabu babikila ne: Shaula, uvua uya bua kukuata bamue bayidi ba Yezu. Mu butoke bukole menemene, Shaula wakumvua Yezu wamba ne: ‘Shaula, Shaula, udi unkengeshila meme tshinyi? Wewe udi udikengesha pautshidi usuba mikolo ku mutshi musonga.’ Bu muvuaye ukengesha bena Kristo, Shaula uvua muikale uluisha Nzambi, udikengesha yeye nkayende.​—Bienzedi 26:14.

Tudiku petu mua kuikala ‘tusuba mikolo ku mutshi musonga’ katuyi bamanye anyi? Bible udi ufuanyikija ‘mêyi a bena meji’ ne misongolo idi itusaka bua kuya kumpala mu njila muakane. (Muambi 12:11) Tuetu mua kutumikila mibelu mifundisha ku nyuma wa Nzambi idi mu Dîyi diende, idi mua kutukankamija ne kutulombola bimpe. (2 Timote 3:16) Dibenga mibelu idi itukankamija eyi didi mua kutuenzela bibi.

Shaula wakatumikila mêyi akamuambila Yezu, kushintululaye nsombelu wende ne kulua Paulo mupostolo muena Kristo munangibue. Bia muomumue, ditumikila dietu dia mibelu ya Nzambi neditutuadile mabenesha a tshiendelele.​—Nsumuinu 3:1-6.

[Mêyi a dianyisha bua tshimfuanyi mu dibeji 32]

L. Chapons/​Illustrirte Familien-Bibel nach der deutschen Uebersetzung Dr. Martin Luthers