Nkonko ya babadi

Nnganyi udi Yehowa wambila mu Genese 3:22 ne: “Umue wa ku tuetu”?

Bidi bimueneka ne: Yehowa Nzambi uvua wambila Muanende mulela umue pakambaye ne: “Muntu wenji bu umue wa ku tuetu, watufuanyi ku dijingulula dia malu mimpe ne mabi.” (Genese 3:22, MMV) Tumonayi bua tshinyi tudi tuamba nanku.

Yehowa wakapatula mêyi aa kunyima kua yeye mumane kufundila bena dibaka ba kumpala manyoka. Bamue badi bangata diamba ne: “umue wa ku tuetu” bu ngakuilu wa ku bungi bua kuleja buneme bua muntu tshianana, anu bu mutu mfumu mua kuamba tshilejilu ne: “katuena basue,” padiye wakula buende yeye nkayende. Kadi mushikuluji wa malu a Bible Donald Gowan udi wamba bua Genese 1:26 ne 3:22 ne: “Kakuena tshijadiki mu Dipungila Dikulukulu tshidi tshikale nshindamenu wa mumvuija a bungi adi aleja ne: ‘tuetu’ wa mu ngumvuilu wa bunême, ne ‘tuetu’ wa muntu nkayende udiambila, dikala ku bungi bua kuleja bukole anyi dileja mudi Nzambi muenza ne bantu bavule. . . . Kakuena dimue dia ku mumvuija aa didi diumvuangana ne lungenyi ludi mu 3:22, mudibu bakula bua ‘umue wa ku tuetu to.’”

Yehowa uvua mua kuikala wambila Satana Diabolo, eu ukavua mubange kudipangadijila yeye nkayende “malu mimpe ne malu mabi” ne uvua mufikishe bantu ba kumpala ku dienza bia muomumue anyi? Kabiena biumvuika bua kuamba nanku to. Mu mvese eu, Yehowa udi wamba ne: “umue wa ku tuetu.” Satana kavua kabidi mu tshisumbu tshia banjelu ba lulamatu nansha, nenku kavua mua kuikala munkatshi mua aba bavua ku luseke lua Yehowa to.

Nzambi uvua wakula bua banjelu ba lulamatu mu mvese eu anyi? Katuena mua kuamba kushindika bualu ebu to. Kadi difuanangana didi pankatshi pa Genese 1:26 ne Genese 3:22 didi mua kutuambuluisha. Tudi tubala mu Genese 1:26 ne: ‘Tuenze muntu ne tshifuanyikiji tshietu mufuanangane netu.’ Nzambi uvua wambila nganyi mêyi aa? Mupostolo Paulo uvua wakula bua tshifukibua tshia mu nyuma tshiakalua muntu wa mubidi mupuangane muinyika Yezu ne: ‘Yeye udi tshifuanyikiji tshia Nzambi udi kayi mua kumuenebua, muan’a bute wa bifukibua bionso; bualu bua munda muende muakafukibua bintu bionso bia mu diulu ne bia pa buloba.’ (Kolosai 1:15, 16) Bidi bimueneka patoke ne: Yehowa udi wakula ne Muanende mulela umue mu Genese 1:26, “muena mudimu wende [munene]” uvua nende pavuaye ufuka diulu ne buloba. (Nsumuinu 8:22-31) Difuanangana dia miaku idi mu Genese 3:22 didi ditufikisha ku diamba ne: Yehowa uvua wakula ne eu uvua pabuipi nende menemene, mumue ne: Muanende mulela umue.

Bidi bimueneka ne: Muana mulela umue wa Nzambi uvua ne dimanya dia “malu mimpe ne mabi.” Bu muvuaye muenze mutantshi mule pamue ne Yehowa, uvua mua kuikala mulonge bimpe menemene meji ne mikenji ya Tatuende. Bu muvua Yehowa mua kuikala mutuishibue ne: Muanende uvua mumanye malu aa ne muikale ne lulamatu kabidi, Yehowa uvua mua kuikala mumupeshe budikadidi kampanda bua kudienzela amue malu kayi umukonka to. Nunku ke muvua Muana mua kuikala ne mushindu ne dianyisha dia kumanya tshidi tshimpe ne tshidi tshibi. Kadi [Muana wa Nzambi] yeye uvua mushilangane ne Satana ne Adama ne Eva, bualu malu avuaye wenza kaavua abengangana ne a Yehowa to.