Dieyemena didi difikisha ku nsombelu wa disanka

DISAMA dia tshifu dikebesha kudi biakudia bibi ditu dibi be! Muntu utu nadi utu ne bua kudia bintu ne budimu. Tshidibi, kubenga kudia biakudia bionso bua kuepuka disama dia tshifu ki nkuela meji bimpe to. Kujila biakudia bionso nkudivudijila makenga. Padi muntu kayi udia, kêna mua kuenza matuku a bungi to.

Bia muomumue kabidi, padi bantu baudi mueyemene bakuela mâyi ku makasa, bitu biosha ku muoyo. Padibu batuela mâyi ku mikolo misangu mivule, bidi bitulomba bua kuela meji bimpe patudi tukeba balunda. Tshidibi, kubenga kudia bulunda ne bantu bonso, tuela meji ne: nebatuele mâyi ku makasa ki nkumana kua bualu to. Bua tshinganyi? Bualu kubenga kutekela bakuabu muoyo kudi kukepesha disanka dietu. Bua kuikala ne nsombelu wa disanka, bidi bikengela tuetu kueyemenangana.

Mukanda kampanda udi wamba ne: “Dieyemena bakuabu ke tshimue tshia ku bintu binene bidi biambuluisha bua kuikala ne nsombelu kayi mukodi dituku dionso.” (Jugend 2002) Tshinga tshikandakanda tshidi tshiamba ne: “Muntu yonso eu utu ukeba kueyemenangana. Dieyemena didi diakaja nsombelu wa muntu,” dimufikisha too ne ku “dikala ne mushindu wa kutungunuka ne muoyo.” Tshikandakanda etshi tshidi tshiamba kabidi ne: padiku kakuyi dieyemena, “bidi bitondesha nsombelu.”​—Neue Zürcher Zeitung.

Kadi mpindieu bu mutudi baledibue ne dijinga dia kueyemena bantu bakuabu, utudi mua kueyemena nnganyi udi kayi mua kutuela mâyi ku mikolo?

Eyemena Yehowa ne muoyo webe wonso

Bible udi utuambila ne: “Eyemena Yehowa ne mutshima webe wonso.” (Nsumuinu 3:5) Eyowa, Dîyi dia Nzambi didi ditulomba misangu mivule bua kueyemena Yehowa Nzambi Mufuki wetu.

Tudi ne bua kueyemena Nzambi bua tshinyi? Tshia kumpala, mbualu Yehowa Nzambi udi wa tshijila anyi munsantu. Muprofete Yeshaya wakafunda ne: “Wa tshijila, Wa tshijila, Wa tshijila udi Yehowa.” (Yeshaya 6:3) Padibu bamba ne: Nzambi ng’wa tshijila, bidi bikukoka kudiye anyi? Kakuyi mpata, bidi ne bua kukukoka bualu bunsantu bua Yehowa budi bumvuija ne: udi mukezuke, kêna ne malu mabi, ne ng’wa kueyemena menemene. Kêna mua kudia  mishiku anyi kunyanguka to; patudi tumueyemena, kêna mua kutuela mâyi ku makasa nansha kakese.

Tudi kabidi mua kueyemena Nzambi bualu udi ne bukole ne dijinga dia kuambuluisha muntu udi umukuatshila mudimu. Tshilejilu, bukole buende budi bupite bionso budi bumupesha mushindu wa kuenza malu. Buakane buende bupuangane ne meji ende mapuangane bidi bilombola bienzedi biende. Ne dinanga diende didi kadiyi kufuanyikija ke didi dimufikisha ku dienza malu. Mupostolo Yone wakafunda ne: “Nzambi udi dinanga.” (1 Yone 4:8) Dinanga ke didi disaka Nzambi bua kuenza bualu buonso. Bunsantu bua Yehowa ne ngikadilu yende mikuabu milenga idi imuvuija Tatu muimpe, udi ukengela kumueyemena ne mutshima wonso. Kakuena tshintu anyi muntu udi ukumbanyina kueyemenyibua bu Yehowa to.

Eyemena Yehowa bua wikale ne disanka

Tshidi kabidi tshitusaka bua kueyemena Yehowa mbualu udi utumvuila bimpe bitambe kupita muntu mukuabu. Mmumanye mudi muntu yonso eu muikale ne dijinga dia kuikala udiumvua bimpe, utekemena ne weyemena Mufuki. Batu ne malanda a nunku ne Mufuki batu badiumvua bimpe. Mukalenge Davidi wakamba ne: ‘Disanka didi kudi muntu udi uvuija Yehowa tshieyemenu tshiende.’ (Musambu 40:4) Bantu ba bungi lelu’eu badi beyemena Nzambi ne muoyo mujima anu bu mudi Davidi wamba.

Tuangatayi bimue bilejilu. Doris uvua mu ditunga dia République Dominicaine, dia Allemagne, dia Grèce ne dia États-Unis. Udi wamba ne: “Ndi ne disanka dia bungi bua mundi ngeyemena Yehowa. Mmumanye mua kuntabalela ku mubidi, mu nyuma ne ku mushindu undi ndiumvua munda muanyi. Udi mulunda mutambe bonso.” Wolfgang (mufidi wa mibelu mu malu a nsambu) udi wamba ne: “Bitu bimpe be bua kueyemena muntu udi ukujingila malu anu malenga, muntu udi mua kukuenzela ne wakuenzela malu matambe bulenga!” Ham (uvua muledibue mu Asia kadi udi mpindieu ku Mputu) udi wamba ne: “Ndi mukole ku muoyo bualu malu onso adi mu bianza bia Yehowa, ne katu wenza bilema to, ke bualu kayi ndi nsanka bua kumueyemena.”

Bushuwa, yonso wa kutudi udi ne bua kueyemena ki ng’anu Mufuki nkayende to, kadi ne bantu kabidi. Ke bualu kayi bu mudi Yehowa muikale mulunda wetu wa meji ne mumanye malu mapite bungi, udi utuleja bantu batudi ne bua kueyemena. Dibala Bible bimpe bimpe nedituambuluishe bua kulonda mubelu eu.

Bantu batudi mua kueyemena

Mufundi wa Misambu wakamba ne: “Kanueyemenyi baminyampala, anyi muana wa muntu, unudi kanuyi mua kusangana dikuatshisha kudiye.” (Musambu 146:3) Mêyi aa mafunda ku nyuma wa Nzambi adi atuleja ne: bantu ba bungi ki mbakanyine kubeyemena to. Kabiena bikengela kueyemena diakamue nansha aba badibu bangata ne mushinga mukole bu “baminyampala” ba pa buloba ebu, bu mudi aba badi bapiluke mu malu a bungi. Bantu aba badi mua kupambuishangana, kubeyemena kudi mua kulua kutuela mâyi ku mikolo.

 Kadi ebi kabiena ne bua kutusaka ku dibenga kueyemena muntu kayi yonso to. Tudi ne bua kusungula bimpe bimpe aba batudi mua kueyemena. Mmalu kayi adi mua kutuambuluisha? Tshilejilu tshimue tshia mu Isalele wa kale tshidi mua kutuambuluisha. Bakambila Mose pakavuabi bikengela kusungula bantu bavua mua kuambula majitu manene mu Isalele bua ‘kusungula balume badi ne lungenyi lule, badi batshina Nzambi, bena bulelela, badi bakina mbuejilu.’ (Ekesode 18:21) Ntshinyi tshitudi mua kulongela ku bualu ebu?

Bantu aba bavua ne ngikadilu ya buena ya Nzambi kumpala kua kubatekabu pa miaba eyi. Bakavua batshina Nzambi kuonso eku: banemeka Mufuki ne batshina bua kumufikisha munda. Bantu bonso bavua bamona muvua bantu abu banemeka ne batshina bua kuenza malu adi kaayi asankisha Nzambi to. Bu muvuabu babenga mishiku, bivua bileja ne: bavua ne bukole bua kubenga kulekela bumfumu bubanyanga. Kabavua ne bua kukeba amu abu masanka anyi a balela peshi balunda babu eku bela bantu bakuabu mâyi ku mikolo nansha.

Katuenaku petu mua kulonda malu aa kumpala kua kusungula muntu wa kueyemena anyi? Tudiku bamanye bantu badi bamueneka batshina Nzambi anyi? Mbadifile ne muoyo umue bua kulama mikenji yende anyi? Badi ne bukole bua kubenga kuenza malu adi kaayi mimpe anyi? Badi ne bululame, kabayi bafuane kushintulula malu anyi kuenza tshidi muoyo wabu musue kuenza anyi? Kakuyi mpata, bantu balume ne bakaji badi ne ngikadilu eyi mbakanyine kubeyemena.

Kuteketshi mu mikolo bua diedibua mâyi ku makasa dia mu mpukapuka to

Patudi tukeba muntu wa kueyemena, mbimpe tuikale ne lutulu bualu dieyemena ditu dilomba lupolo lua tshikondo bule kampanda. Tshidi tshimpe nkubanga kueyemena muntu kakese ku kakese. Mushindu kayi? Tudi mua kumona ngikadilu wa muntu munkatshi mua lupolo kampanda, kumona mudiye wenza malu mu imue nsombelu. Mmuntu wa kueyemena mu tualu tukese anyi? Tshilejilu, utu upingaja bintu bidiye usomba anu bu mudiye mulaye anyi? Utu unemeka bipungidi anyi? Pikalabi nanku, tudi mua kumueyemena mu malu manene. Bidi biumvuangana ne dîyi edi: ‘Muntu udi mua kueyemenyibua padiye ne bintu bikese neikale mua kueyemenyibua kabidi pikaleye ne bintu bia bungi.’ (Luka 16:10) Kumanya mua kusungula muntu utudi mua kueyemena ne kuikala ne lutulu kudi mua kutuambuluisha bua kuepuka diedibua mâyi ku makasa dinene.

Kadi mpindieu biatuela muntu mâyi ku makasa, tuenze tshinyi? Bantu batu babala Bible batu bamanye mutubu bele Yezu Kristo mâyi ku mikolo kudi bapostolo bende butuku pakaluabu kumukuata. Yudasa Isakaliote wakamutungila, bapostolo bakuabu kumvua buôwa e kudiasa lubilu. Petelo wakavila Yezu misangu isatu. Kadi Yezu wakamona se: anu Yudasa ke uvua muenze malu ku bukole. Nansha muvuabu bele Yezu mâyi ku makasa mu tshikondo tshikole etshi, kakapanga kueyemena bapostolo bende bavua bashale 11 mbingu mikese panyima to. (Matayo 26:45-47, 56, 69-75; 28:16-20) Bia muomumue tuetu kabidi, patudi tumona ne: mbatuele mâyi ku makasa, tutete kumanya bikala bualu abu budi buleja mudi muntu kayi wa kueyemena anyi buikale anu butekete bua mubidi wa muntu tshianana.

Badi mua kungeyemena anyi?

Eu yonso udi usungula bantu badiye mua kueyemena, udi ne bua kudiebeja mu bululame buonso ne: ‘Ndi muntu udibu mua kueyemena anyi? Ne nkatshinkatshi yonso, mmalu kayi andi mua kutekemena kudi mukuabu ne andi panyi ne bua kuenza?’

Kakuyi mpata, muntu wa kueyemena utu wamba anu bulelela. (Efeso 4:25) Kêna ukeba mêyi adi asankisha bantu amu bua disanka diende yeye nkayende to. Padi muntu wa kueyemena upunga ne mukuabu, udi wenza muende muonso bua kukumbaja mêyi ende. (Matayo 5:37) Padibu bambila muntu wa kueyemena bualu busokome, kêna ubanga kubuambila banga bantu nansha. Muntu wa kueyemena udi ne lulamatu kudi muena dibaka nende. Katu utangila bindidimbi bia bantu kabayi bilamba, kêna uteka meji ku malu adi ajula majinga mabi, ne kêna ulamatangana ne bantu badi kabayi balume ta bakaji nende nansha. (Matayo 5:27, 28) Muntu  wa kueyemena udi wenza mudimu bikole bua kupeta mushindu wa kudiambuluisha ne kuambuluisha dîku diende, kêna ukeba kupetela makuta pambidi pa bakuabu to. (1 Timote 5:8) Tuetu bamanye malu aa makane adi Bible uleja mu mutu, tudi mua kumanya bimpe bantu ba kueyemena. Tuetu bikale petu tulonda malu makane aa netulue bantu ba kueyemena.

Bivua bimpe kuikala muaba udi bantu bonso bikale ba kueyemena, kakuyi dielangana mâyi ku mikolo kabidi to! Mbualu budi kabuyi mua kuenzeka anyi? Ki mbua badi bitaba malu adi Bible mulaye ne muoyo umue to. Bualu Dîyi dia Nzambi didi diakula bua ‘buloba bupiabupia’ muikala kamuyi kabidi dishima, didiata bakuabu mu makasa, dibungama, masama ne lufu. (2 Petelo 3:13; Musambu 37:11, 29; Buakabuluibua 21:3-5) Ki mbimpe kumanya makuabu malu pa bualu ebu anyi? Bantemu ba Yehowa nebikale ne disanka dia kukumanyisha manga malu pa tshilumbu etshi ne pa malu makuabu kabidi a mushinga munene.

[Tshimfuanyi mu dibeji 4]

Patudi katuyi tutekela bakuabu muoyo, disanka dietu didi dikepela

[Tshimfuanyi mu dibeji 5]

Yehowa ke muntu wa kueyemena bikole menemene

[Bimfuanyi mu dibeji 7]

Tuetu bonso tudi dijinga ne kueyemenangana