“Ndi musangane bulunda, dinanga ne dikuatshishangana”

‘BANTU bonso nebamanye ne: nudi bayidi banyi, binuasuangana nunku.’ (Yone 13:35) Anu mukavua Yezu muambe, dinanga diakalua tshimanyinu tshia bena Kristo ba kumpala. Tertullien, pakafundaye bidimu bipite pa lukama kunyima kua lufu lua Kristo, wakatela mêyi a bantu bavuaye mumvue bamba ne: ‘Monayi mudibu banangangane ne mudibu mene badilongolole bua kufuila bana babu.’

Tudiku mua kupeta dinanga dia mushindu’eu pa buloba anyi? Eyowa. Angata tshilejilu tshia mukanda uvuabu batumine biro bia filiale wa Bantemu ba Yehowa mu ditunga dia Brésil. Mufundi wa mukanda, mmuntu mukaji mukuabu diende Marília, wakafunda ne:

“Pamvua musombele mu Villa Mercedes, mu ditunga dia Argentine, mamu mundedi (udi pende Ntemu wa Yehowa) wakapeta disama dia manungu a mifuba, kumushiyadi mutekete kubangila mu tshimono too ne ku bana ba nkasa. Munkatshi mua ngondo muanda-mukulu ya kumpala ya disama diende, Bantemu ba mu Villa Mercedes ke bavua bamulama bimpe ne dinanga dionso. Bavua bamuenzela malu onso, bamusukuila mu nzubu ne bamulambila biakudia. Nansha pavuaye mu lupitadi, Mamu uvua anu ne muntu mumulame, butuku ne munya.

“Bituadijile anu pinapu meme ne mamu tuakapingana mu Brésil mukadiye wenda umvua bimpe. Bantemu ba muaba utudi basombele mpindieu badi benza muabu muonso bua kuambuluisha Mamu bua umvue bimpe.”

Marília udi ujikija mukanda wende wamba ne: “Ndi nnujukuila bua se: meme tshiena Ntemu to, kadi ndi musangane bulunda, dinanga ne dikuatshishangana munkatshi mua Bantemu.”

Bushuwa, kutshidi bantu badi benza malu ne dinanga dilelela dia buena Kristo. Mu dienza malu aa, badi baleja bukole budi nabu malongesha a Yezu mu nsombelu wetu.