Nkonko ya babadi

Bua tshinyi Elisha wakalomba ‘bitupa bibidi’ bia nyuma wa Eliya?

Kumpala kua Eliya kujikijaye mudimu wende wa buprofete mu Isalele, muprofete Elisha utshivua nsonga wakamulomba bualu ebu: ‘Ndi nkusengelela ne: Witabuje bua bitupa bibidi bia nyuma webe bikale kundi.’ (2 Bakelenge 2:9) Mu ngakuilu wa mu nyuma, bidi bimueneka ne: Elisha uvua ulomba bitupa bibidi bia buena bivuabu bapesha muana wa balume muanabute. (Dutelonome 21:17) Dikonkonona muyuki eu mu tshikoso neditutokeshile bualu ebu ne nedituambuluishe bua kupatula malongesha mu tshivua tshienzeke.

Mu diumvuangana ne bivua Yehowa muambe, muprofete Eliya ukavua musungule Elisha bua kumupinganaye. (1 Bakelenge 19:19-21) Mu bidimu bitue ku bisambombo, Elisha wakambuluisha Eliya ne lulamatu, ne uvua mudisuike bua kuenza mudimu eu too ne ku ndekelu. Nansha mu dituku dia ndekelu dia mudimu wa buprofete bua Eliya mu Isalele, Elisha uvua anu mulamate Eliya. Nansha muvua Eliya muambile Elisha bua alekele kumulonda, muprofete eu utshivua nsonga wakamba misangu isatu mijima ne: “Tshiena nkulekela.” (2 Bakelenge 2:2, 4, 6; 3:11) Bushuwa, Elisha uvua wangata muprofete eu ukavua muntu mukole bu tatuende wa mu nyuma.​—2 Bakelenge 2:12.

Kadi, Elisha kavua nkayende muana wa mu nyuma wa Eliya to. Eliya ne Elisha bavua ne tshisumbu tshia balume bavuabu babikila ne: “bana balume ba baprofete.” (2 Bakelenge 2:3) Muyuki udi mu Bakelenge Muibidi udi uleja ne: “bana balume” aba bavua pabu mu malanda mimpe ne Eliya uvua tatuabu wa mu nyuma. (2 Bakelenge 2:3, 5, 7, 15-17) Nunku bu muvuaye muntu musungula bua kumupingana, Elisha ke uvua wa kumpala munkatshi mua bana ba mu nyuma ba Eliya, uvua anu bu muanende muanabute. Mu Isalele wa kale, muanabute wetu muena dîna eu bavua bamupesha bitupa bibidi bia bumpianyi bua tatuende, kadi bana bakuabu buobu bavua babapesha tshitupa tshimue. Ke bualu kayi Elisha wakalomba bitupa bibidi bia bumpianyi bua Eliya bua mu nyuma.

Bua tshinyi Elisha wakalomba bualu ebu mu tshikondo atshi tshisunguluke? Bualu ukavua pa kuangata mudimu munene, wa kupingana pa muaba wa Eliya bu muprofete mu Isalele. Elisha wakajingulula ne: bua kumona mua kukumbaja majitu avua atangila mudimu eu munene, uvua dijinga ne bukole bua mu nyuma buvua bupite bivuaye yeye mua kukokesha, bukole buvua anu Yehowa nkayende mua kumupesha. Bivua bimukengela kuikala ne dikima anu bu muvua nadi Eliya. (2 Bakelenge 1:3, 4, 15, 16) Ke bua tshinyi wakalomba bitupa bibidi bia nyuma wa Eliya, nyuma wa dikima ne wa “lukunukunu lua bungi bua Yehowa”; ngikadilu ya mushinga mukole idi muntu upeta ku diambuluisha dia nyuma wa Nzambi. (1 Bakelenge 19:10, 14) Ntshinyi tshiakenza Eliya?

Eliya uvua mumanye ne: Elisha uvua mulombe tshintu tshivuaye kayi ne bukokeshi bua kufila to, kadi anu Nzambi ke uvua ne bukokeshi bua kumupeshatshi. Ke bualu kayi Eliya wakamuandamuna bimpe ne: ‘Wewe wakulomba bualu bukole, kadi biwantangila pangabandishibua kuudi, bualu nebuenjibue bu mu dîyi diebe.’ (2 Bakelenge 2:10) Bushuwa, Yehowa wakanyishila Elisha bua kumona Eliya ubanda mu mvunda. (2 Bakelenge 2:11, 12) Bushuwa, Elisha wakapeta tshivuaye ulomba. Yehowa wakamupesha nyuma uvuaye nende dijinga bua kutuadija mudimu wende mupiamupia ne bua kutantamena ntatu ivua kumpala.

Lelu, bena Kristo bela manyi (batubu babikila imue misangu ne: kasumbu ka Elisha) ne basadidi bakuabu bonso ba Nzambi badi mua kupeta malu a bungi adi akankamija mu muyuki eu wa mu Bible. Pamu’apa tudi mua kumona mudimu kampanda wa mu tshisumbu ne: mmutupite makanda ne kuela meji ne: katuena bakumbane bua kuwenza, peshi patudi tupeta bantu badi babenga anyi kabayi basue kuteleja malu atudi tubayisha mu teritware wetu tudi mua kubanga kujimija ndambu wa dikima dietu bua kutungunuka ne mudimu wa diyisha Bukalenge. Nansha nanku, tuetu balombe Yehowa dikuatshisha, neatupeshe nyuma muimpe utudi tukengela bua kutantamena ntatu ne nsombelu idi yenda ishintuluka. (Luka 11:13; 2 Kolinto 4:7; Filipoi 4:13) Bushuwa, anu muvua Yehowa mukoleshe Elisha bua majitu ende manene, neatuambuluishe tuetu buonso, bansonga ne bantu bakole, bua tuetu kukumbaja mudimu wetu.​—2 Timote 4:5.