Tuikalayi ne lungenyi lua difila

MUNTU nansha umue ki mmuledibue ne lungenyi lua dipeshangana bintu to. Katshia ku tshilelelu muana utu anu ne meji a kusankisha majinga ende nkayende, upua muoyo too ne majinga a aba badi bamukuba. Kadi padiye wenda ukola, muana udi ufika ku dimanya ne: ki ng’anu yeye nkayende udi ne majinga to. Bidi bikengela kutangila kabidi majinga a bakuabu, ne udi ne tshia kulonga ki ng’anu bua kuangata bintu kudi bakuabu to, kadi ne bua kulonga kabidi mua kuabanyangana bintu nabu. Bidi bikengela kuikala ne lungenyi lua difila.

Bantu bonso batu bapeshangana bintu nansha ne muoyo wa kalolo kabatu anu ne lungenyi lua difila to. Bamue bantu batu bapeshangana bintu bua kumona mua kuvudija biapetabu. Bakuabu badi mua kufila bintu ne tshipatshila tshia se: babatumbishe kudi bantu. Kadi kufila kua bena Kristo balelela nkushilangane kuoku. Mmalu kayi adi atangila difila bintu didi Dîyi dia Nzambi dikankamija? Dikonkonona mu tshikoso mushindu uvua bena Kristo ba mu bidimu lukama bia kumpala bafila bintu nediandamune lukonko elu.

 Bilejilu bia mushindu uvua bena Kristo bafila bintu

Difila dia bena Kristo, anu mudidi dileja mu Bible, divua pa tshibidilu “diabanyangana dia bintu ne bakuabu” bavua mu dikenga dikole. (Ebelu 13:16, NW; Lomo 15:26) Kadivua dia benzejangana ku bukole to. Mupostolo Paulo wakafunda ne: ‘Nunku muntu ne muntu afile bintu bu muakadisunguileye mu mutshima wende, kafidi ne kanyinganyinga, anyi bu muenzeja ku bukole; bualu bua Nzambi udi musue muena kupa udi ufila ne disanka.’ (2 Kolinto 9:7) Kabidi muntu kavua ufila bintu ne tshipatshila tshia kudileja nansha. Anania ne Sapila bakafua anu bua lungenyi lua didileja lua nunku.​—Bienzedi 5:1-10.

Dijinga dia kufila bintu diakalua pavua bena Yuda ne bena kuitabuja benyi bavua bafume mitantshi mile badisangishe mu Yelushalema bua tshibilu tshia Pentekoste wa tshidimu tshia 33 bikondo bietu ebi. Mu tshibilu etshi ke muvua bayidi ba Yezu ‘buule ne nyuma muimpe, kubanga kuakula miakulu mikuabu.’ Bantu musumba munene bakadisangisha muaba uvuabu ne kutelejabu muyuki wa tshikuma wa Petelo pa bivua bitangila Yezu Kristo. Pashishe, bantu bakamona mushindu uvua Petelo ne Yone buondape mulema uvua ku tshiibi tshia ku ntempelo, bakumvua Petelo wakula kabidi bua Yezu ne bua mubidi bikengela kunyingalala bua bilema bitudi benze. Bantu binunu ne binunu bakanyingalala ne kubatijibuabu bua kulua bayidi ba Kristo.​—Bienzedi, nshapita 2 ne 3.

Bayidi bapiabapia aba bavua basue kushala mu Yelushalema bua kupeta malongesha makuabu kudi bapostolo ba Yezu. Kadi mmushindu kayi uvua bapostolo mua kukumbaja majinga a benyi bonso aba? Bible udi utulondela ne: ‘Bakadi ne madimi anyi nzubu bakabipana, bakadi balua ne mushinga wa biakapanabu, bakadi bauteka ku makasa a bapostolo; bakadi babanyangana muntu ne muntu bu muakadiye natshi bualu.’ (Bienzedi 4:33-35) Bushuwa, tshisumbu etshi tshipiatshipia tshia mu Yelushalema tshivuabu bafuma ku dienza tshivua ne lungenyi lua difila!

Kunyima, bisumbu bikuabu biakaleja pabi lungenyi lua difila. Tshilejilu, bena Kristo ba mu Makedonia, nansha muvuabu bapele, bakapitshisha ne pa dimona diabu mu difila mapa bua bana babu bakengi ba mu Yudaya. (Lomo 15:26; 2 Kolinto 8:1-7) Tshisumbu tshia mu Filipoi tshivua tshikuatshishe Paulo mu mudimu wende bilenga bia dikema. (Filipoi 4:15, 16) Tshisumbu tshia mu Yelushalema tshivua tshiotshi nkayatshi tshifila biakudia dituku dionso kudi bakaji ba mu lufuila, ne bapostolo bakateka bantu balume muanda-mutekete bakumbane bua kutangila bua se: kabavua bapue muoyo bakaji ba mu lufuila bavua bakanyine dikuatshisha edi.​—Bienzedi 6:1-6.

Bisumbu bia mu bidimu lukama bia kumpala bivua mene bisangisha bintu kumpala kua dîba bua bikondo bia ntatu bivua mua kulua. Tshilejilu, pavua muprofete Agabo mumanyishe dilua dia tshiyole tshikole tshia nzala, bayidi ba mu tshisumbu tshia Antiokia wa mu Sulia, ‘muntu ne tshiakadiye natshi muntu ne tshiakadiye natshi, bakapangadija bua kukuatshisha nabi bana babu ba mu Kristo ba mu Yudaya.’ (Bienzedi 11:28, 29) Elu ndungenyi luimpe be luvuabu baleje mu didianjila kukeba bintu bivua bakuabu mua kuikala nabi dijinga!

Ntshinyi tshiakasaka bena Kristo ba kumpala bua kuikala ne kalolo ne dinanga bivule nunku? Mmunyi mudi muntu mua kupeta lungenyi lua difila? Dikonkonona mu tshikoso tshilejilu tshia Mukalenge Davidi didi mua kutulongesha malu a bungi.

Mushindu uvua Davidi mukuatshishe ntendelelu mulelela ne kalolo

Munkatshi mua bidimu bitue ku 500, mushete wa tshipungidi (mushete wa tshijila uvua uleja dikala dia Yehowa) kauvua ne muaba mujalame uvuabu bauteka to. Bavua bawulamina mu ntenta, anyi mu tabernakle uvuabu bambula baya nende eku ne eku mu tshikondo tshivua bena Isalele banyunguluka mu tshipela too ne pakabuelabu mu Buloba Bulaya. Mukalenge Davidi uvua ne dijinga dikole dia kumusha mushete eu mu ntenta muvuabu bauteka ne kuibakila Yehowa nzubu uvuabu ne bua kulaminamu mushete wa tshijila eu. Ke Davidi kuambilaye muprofete Natana ne: ‘Mona, meme ndi mushikame mu nzubu wa mitshi ya cèdre, kadi mushete wa tshipungidi tshia mêyi a Yehowa udi mushale mu ntenta.’​—1 Kulondolola 17:1.

Kadi bu muvua Davidi muikale muluanganyi wa mvita, Yehowa wakamba ne: mu bukokeshi  bua ditalala, Solomo muanende ke uvua ne bua kuibaka ntempelo uvuabu ne bua kutekamu mushete wa tshipungidi. (1 Kulondolola 22:7-10) Kadi bualu ebu kabuakakanda Davidi bua kuleja lungenyi lua difila nansha. Wakasonsola bantu bonso bua bamulonde mu nyima, yeye kufila bintu bivuabu mua kuenza nabi mudimu wa kuibaka ntempelo. Pashishe kuambilaye Solomo ne: ‘Ngakamana kulongoluela nzubu wa Yehowa binunu lukama lua ntalanta ya or ne binunu tshinunu bia ntalanta ya argent ne biamu bia mitaku ne biamu bifike bidibu kabayi bamanye mua kubala, bualu bua bidi bia bungi; ngakalongolola mabaya ne mabue kabidi.’ (1 Kulondolola 22:14) Bu muvuaye mumone ne: kabivua bikumbane, wakangata biuma biende yeye ne kufilaye or ne argent bia mushinga mupite pa dolare 1 200 000 000. Bakokeshi bakafila pabu bintu ne kalolo konso. (1 Kulondolola 29:3-9) Bulelela, Davidi wakaleja kalolo anyi lungenyi lua difila!

Ntshinyi tshivua tshisake Davidi bua kufila ne kalolo nunku? Uvua mujingulule ne: bintu bionso bivuaye mupete ne muenze bivua bifumine ku dibenesha dia Yehowa. Wakamba mu disambila ne: ‘Yehowa Nzambi wetu, bintu ebi bionso bituakulongolola bua kukuibakila nabi nzubu  wa dîna diebe dia tshijila biakafuma mu tshianza tshiebe, bionso bidi biebe mene. Nzambi wanyi, ndi mumanye kabidi ne: wewe udi uteta mitshima ya bantu, udi usanka mu butoke bua mutshima. Meme ngakudifidila bintu ebi bionso mu butoke bua mutshima wanyi; ngakumona bantu bebe bonso badi kuneku badifidila bintu biabu ne disanka.’ (1 Kulondolola 29:16, 17) Davidi uvua wangata malanda ende ne Yehowa ne mushinga mukole. Uvua mumanye mushinga wa kukuatshila Nzambi mudimu ‘ne mutshima mutoke ne didikokela kudiye,’ ne uvua ne disanka pavuaye wenza nanku. (1 Kulondolola 28:9) Ngikadilu ya muomumue eyi kabidi ke ivua misake bena Kristo ba kumpala bua kuleja lungenyi lua difila.

Yehowa mmufidi munene

Yehowa ke tshilejilu tshitambe buimpe tshia difila. Udi ne dinanga dia bungi bualu ‘udi ubandishila bantu bimpe ne babi diba diende, ulokeshila bakane ne badi kabayi bakane mvula.’ (Matayo 5:45, MMM) Udi upesha bantu bonso ‘muoyo ne mupuya ne bintu bionso.’ (Bienzedi 17:25) Bulelela, anu mudi muyidi Yakobo wamba, ‘kupa kuonso kuimpe ne dipa dionso diakane tshishiki bidi bifuma mu diulu, bipueka panshi bilua kudi Tatu wa munya.’​—Yakobo 1:17.

 Dipa ditambe bunene didi Yehowa mutupeshe ndituma dia ‘Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Kakuena muntu nansha umue udi mua kuamba ne: uvua muakanyine dipa edi to, ‘bualu bua bonso bakenza malu mabi, ne badi bapanga kupeta butumbi kudi Nzambi.’ (Lomo 3:23, 24; 1 Yone 4:9, 10) Mulambu udi upikula wa Kristo udi nshindamenu ne njila utudi tupetela ‘kupa kudi kakuyi mua kuambibua’ kua Nzambi, mbuena kuamba ne: “bulengele bua dikema budi [Nzambi] mutumuangalajile.” (2 Kolinto 9:14, 15, MMM) Bu muvuaye ne dianyisha bua dipa dia kudi Nzambi, Paulo wakavuija ‘dimanyisha bantu lumu luimpe lua [bulenga bua Nzambi bukena butuakanyine]’ mudimu wende wa mushinga mukole mu nsombelu wende. (Bienzedi 20:24) Wakaleja ne: disua dia Nzambi divua bua se: “bantu [ba mishindu yonso] basungidibue, bafike ku dimanya dia malu malelela.”​—1 Timote 2:4.

Lelu, disua edi didi dienzeka ku diambuluisha dia mudimu munene wa diyisha ne dilongesha bantu udi mutangalake mpindieu mu matunga 234 a buloba bujima. Yezu ukavua mumanyishe bua didiunda dia mudimu eu pakambaye ne: ‘Nebambile bantu bonso ba pa buloba lumu luimpe elu lua bukalenge buanyi, neluikale tshimanyishilu ku bisamba bionso; pashishe, nshikidilu nealue.’ (Matayo 24:14) Eyowa, “nebambile bisamba bionso lumu luimpe diambedi.” (Mâko 13:10) Tshidimu tshishale etshi bamanyishi ba lumu luimpe ba tshisumi bapite pa miliyo isambombo bavua benze mêba 1 202 381 302 mu mudimu eu, ne bavua balombole malonga a Bible mapite pa 5 300 000. Bu mudi bantu bavule bafuane kujimija mioyo yabu, dibalongesha lumu luimpe didi ne mushinga wa bungi be!​—Lomo 10:13-15; 1 Kolinto 1:21.

Ku tshidimu tshionso badi bapatula miliyo ne miliyo ya bintu bu mudi: Bible, mikanda minene ne mikese, bua kuambuluisha aba badi ne nzala ya bulelela bua mu Bible. Kabidi, mbapatule bibejibeji bia Tshibumba tshia Nsentedi ne Réveillez-vous! bipite pa muliyare mujima. Bu mudi bantu ba bungi banyisha lumu luimpe, Bantemu ba Yehowa badi benda bibaka Nzubu ya Bukalenge ne Nzubu ya Mpuilu ya bungi bua kulongelamu malu a mu Nzambi. Tshidimu tshionso batu benza mpuilu wa tshijengu ne wa pa buende, kabidi ne mpungilu wa distrike. Tulasa tua ba-misionere, tua batangidi bena ngendu, tua bakulu ne basadidi ba midimu tudi kabidi tuenzeka pa tshibidilu. Tudi ne dianyisha dia bungi kudi Yehowa bua malu onso aa adiye mulongolole ku diambuluisha dia “mupika wa lulamatu ne wa budimu.” (Matayo 24:45-47, NW) Tudi basue kumuleja dianyisha dietu bulelela!

Tulejayi Yehowa dianyisha

Anu muvuabi bua dibaka dia ntempelo ne dikumbaja dia majinga a mu bisumbu bia bena Kristo ba kumpala, mfranga ya kuenzeja nayi malu onso adi malongolola aa idi ifumina yonso anu ku mapa a budisuile. Kadi tudi ne bua kuvuluka ne: kakuena muntu udi mua kuvuija Yehowa mubanji to, bualu yeye ke Muena bintu bionso. (1 Kulondolola 29:14; Hagai 2:8) Nanku mapa atudi tufila adi tshijadiki tshia dinanga dietu bua Yehowa ne tshia dijinga dietu dia kutungunuja ntendelelu mulelela. Paulo udi wamba ne: bintu ebi bitudi tufila ne kalolo bidi bikale “disakidila kudi [Nzambi].” (2 Kolinto 9:8-13, Muanda Mulenga Lelu) Yehowa udi utukankamija bua tuikale tufila bintu bia mushindu’eu bualu bidi bileja ne: tudi ne lungenyi lua difila ne tudi ne mutshima mulongolola bimpe kudiye. Bena kalolo bonso ne badi beyemena Yehowa nebapete mabenesha a kudiye ne nebatante mu nyuma. (Dutelonome 11:13-15; Nsumuinu 3:9, 10; 11:25) Yezu udi utujadikila ne: netupete disanka, wamba ne: “Disanka dia kupa ndipite dia kupeta.”​—Bienzedi 20:35, MMM.

Bena Kristo badi ne lungenyi lua difila kabatu bindila anu padi tshikondo tshia dikenga tshilua to. Batu bakeba mishindu ya ‘kuenzela bantu bonso bimpe, kadi batamba kuenzela bena dîku dia bena kuitabuja [nabu] bimpe.’ (Galatia 6:10) Paulo wakafunda bua kukankamija bena Kristo bua kuikala ne muoyo muimpe wa kalolo wamba ne: ‘Kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku.’ (Ebelu 13:16) Difila bintu bitudi nabi bu mudi dîba, makanda etu a mubidi ne makuta bua kuambuluisha bakuabu ne bua kutungunuja ntendelelu mulelela didi disankisha Yehowa Nzambi bikole. Bulelela, mmunange lungenyi lua difila.

[Kazubu/​Tshimfuanyi mu mabeji 28, 29]

Mishindu idi bamue bafila mapa

MAPA BUA MUDIMU WA PA BULOBA BUJIMA

Bantu bavule batu bateka anyi badibutshila ndambu wa mfranga itubu bela mu tushete tua mapa tudi ne miaku eyi: “Mapa bua mudimu wa pa buloba bujima wa Bantemu ba Yehowa​—Matayo 24:14.”

Ku ngondo yonso bisumbu bitu bituma mfranga eyi ku biro bia Bantemu ba Yehowa bidi mu matunga adibu basombele. Mfranga yenu ya ku budisuile eyi nudi mua kuyituma diakamue ku Watch Tower Bible and Tract Society of Pennsylvania, c/o Office of the Secretary and Treasurer, 25 Columbia Heights, Brooklyn, New York 11201-2483, anyi ku biro bia Bantemu bidi mu ditunga dinudi. Dikonkonona didi dienjibua kudi “Watch Tower.” Nudi mua kufila nansha bilengejilu peshi bintu bikuabu bia mushinga. Tudi tunulomba bua kutuma mapa aa pamue ne mukanda mufunda mu tshikoso udi uleja ne: aa mmapa a kashidi.

MAPA MAFILA NE DÎYI DITENTEKAPU

Muntu udi mua kupesha Société Watch Tower dipa dia mfranga ne kumvuangana nende bua se: udi mua kumupingajilayi pikalaye nayi dijinga. Bua kupeta mumvuija makuabu, suaku ufundile biro bia Treasurer’s Office (Biro bia Mulami wa tshibutshilu) mu adrese udi kulu eku.

MAPA MALONGOLOLA

Pa kumusha mapa a mfranga mifila bua kashidi ne mapa mafila ne dîyi ditentekapu, kudi mishindu mikuabu ya kufila bintu bua kuendesha mudimu wa Bukalenge udi wenzeka pa buloba bujima. Mona imue mishindu:

Mfranga ya tshieya: Muntu udi mua kuenzela Société Watch Tower mikanda bua kuikalaye ne bukenji bua kuangata mfranga yende ya tshieya anyi ya pansio.

Konte ya ku banke: Muntu udi mua kufundisha konte yende ya ku banke, mikanda ya mfranga mitekesha ku banke anyi konte yende ya mfranga ya pansio mu dîna dia Société Watch Tower anyi kufunda bua kuyifutabu Société eu dîba dia lufu luende, bilondeshile mikenji ya banke ya muaba udiye.

Bukenji bua kupeta bintu ne mfranga misombesha: Badi mua kupesha Société bukenji bua kupeta bintu ne mfranga misombesha bu dipa dia kashidi.

Mpangu ne Nzubu: Muntu udi mua kufila lupangu anyi nzubu wende bu dipa dia kashidi, padibi biende yeye, kadi utungunuka ne kudilamu patshidiye ne muoyo. Bidi bikengela kumanyisha biro bia Société bia mu ditunga dienu kumpala kua kumupesha lupangu anyi nzubu.

Dipa dia kufuta ku tshidimu: Dipa dia kufuta ku tshidimu ndipa dia muntu wangata makuta anyi mikanda (idi ileja bukenji budiye nabu bua kupeta mfranga anyi bintu) ubifila kudi Société Watch Tower. Pashishe muntu eu (anyi mukuabu udiye musungule) udi utuadija kupeta difutu kampanda ku tshidimu ku tshidimu patshidiye ne muoyo. Tshidimu tshidi muntu ufila dipa dia mushindu’eu badi bamupuekeshila mushinga wa bitadi bivuaye ufuta bua lupetu luende.

Bintu bia bumpianyi ne bintu bitekesha: Muntu udi mua kufundisha dîna dia Société Watch Tower ku mikanda ya bumpianyi bua kuangataye bintu anyi mfranga yende, peshi kufundisha Société ku mikanda ya tshipungidi bua kumupa bukenji bua kuangata bintu bitekesha. Badi mua kukepesha mushinga wa bitadi padi bintu bitekesha mu dîna dia tshitendelelu.

Anu mudi miaku eyi: “mapa malongolola” ileja, mapa a mushindu’eu atu alomba bua muafidi adianjile kudilongolola. Bua kuambuluisha bantu badi bajinga kuendesha mudimu udi Bantemu ba Yehowa benza pa buloba bujima ne mushindu kampanda wa mapa malongolola, Société mmupatule kakanda ka mu Anglais ne mu tshiena-Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Bavua bafunde kakanda aka bua kuandamuna nkonko ya bungi idibu bele Société bua mapa, bintu bia bumpianyi ne bintu bitekesha. Kakanda aka kadi kabidi ne mumvuija makuabu mimpe bua mpangu anyi nzubu, mfranga ne bitadi. Ne nkenza bua kuambuluisha bantu ba mu États-Unis badi badilongolola bua kupesha Société dipa dia pa buadi mpindieu anyi bua kumushila bintu dîba dia lufu, bua kusungulabu mushindu udi mutambe buimpe ne muakanyine bua kufila mapa aa bilondeshile mêku abu ne nsombelu yabu. Wewe dijinga ne kakanda aka, udi mua kukalomba buludiludi ku Biro bia Mapa Malongolola (Charitable Planning Office), kunyima kua bantu ba bungi bamane kubala kakanda aka ne bayukile ne aba badi benza mudimu ku Biro bia Mapa Malongolola, ba bungi mbafike ku diambuluisha Bantemu ba Yehowa mu mudimu wabu wa buloba bujima, ne mbakepeshe kabidi bungi bua makuta a bitadi padibu bafile bintu ebi. Bidi bikengela kumanyisha Biro bia Mapa Malongolola ne kubitumina mukanda wonso udi utangila tshilumbu etshi.

Biwikala mulongolole bua kufila mapa, udi ne bua kufundila Biro bia Mapa Malongolola anyi kuela nshinga mu adrese udi kuinshi eku, peshi ku biro bia Bantemu ba Yehowa bia mu ditunga dienu.

Charitable Planning Office

Watch Tower Bible and Tract Society of Pennsylvania

100 Watchtower Drive

Patterson, New York 12563-9204

Telefone: (845) 306-0707

[Tshimfuanyi mu dibeji 26]

Ntshinyi tshiakasaka bena Kristo ba kumpala bua kuikala bena muoyo wa kalolo?