“Dîyi dia Nzambi didi ne bukole menemene!”
“Dîyi dia Nzambi didi ne bukole menemene!”
“DÎYI dia Nzambi didi ne muoyo ne bukole.” (Ebelu 4:12) Bua kujadika bukole kabuyi kukandamena budi nabu Dîyi dia Nzambi, Kalandriye ka bantemu ba Yehowa ka tshidimu tshia 2003 kavua ne miyuki milelela isambombo ya malu a pa buloba bujima. Muinshi mua tshiena-bualu tshia “Kumpala ne panyima,” kalandriye kavua kaleja mudi mudimu wa dilongesha udi Bantemu ba Yehowa benza wambuluisha bantu bua kulengeja bikadilu biabu, bua kulekela bibidilu bibi, bua kulengeja nsombelu wa mu mêku abu ne bua kudia bulunda ne Nzambi.
Tudi bapete mikanda ya bungi ya dianyisha bua kalandriye ka 2003. Amue a ku malu adi mafundamu ng’wowu aa:
“Kalandriye aka kadi kajadikila bena Kristo balelela ne: kudi bantu bakuabu anu bu buobu bavua baluangane mvita mikole bua ditabuja. Mpindieu badi mua kubandila bimfuanyi bidimu bua kuvuluka malu adi bamue benze bua kushintuluka.”—Steven, États-Unis.
“Mvua musue kunufundila mêyi makese aa bua kunumanyisha mudi kalandriye ka 2003 kalenge mutshima wanyi bikole. Kalandriye kakatu kanji kundenga nunku to. Malu a mu nsombelu aa neikale munkatshi mua bintu bindi ngenda nabi mu tshibuta tshianyi tshia buambi bua kulejangana bilejilu bia bantu ne bijadiki bidi bilenga ku muoyo bia mushindu udi Bible mua kushintulula bantu.”—Marc, Belgique.
“Kalandriye aka kavua kandenge ku muoyo bikole be. Biakandenga bikole pamvua mubale ne mumone mushindu udi Yehowa mushintulule bantu aba. Nenku kalandriye aka nkankankamije bua kutungunuka ne kulengeja malu a mu nsombelu wanyi. Mpindieu kupita bikondo bikuabu bionso, ndi ndiumvua muikale munkatshi mua dîku dinene dia pa buloba bujima.”—Mary, États-Unis.
“Lutatu lua mu nyuma luvua nalu bisumbu bia bantu luakalenga Yezu ku muoyo bikole menemene. Tuasakidilayi bua munudi bidikije tshilejilu tshia Yezu pa kupatula malu a mu nsombelu adi mu kalandriye ka 2003. Kumpala Kalandriye kakavua kanji kumpuekeshisha binsonji nunku to.”—Cassandra, États-Unis.
“Pamvua ne bidimu 11, ngakabanga kunua makanya; pashishe meme kubuela mu diamba. Misangu ya bungi mvua ngumvua muoyo wa kudishipa. Pangakamanya Yehowa, bakangambuluisha bua kulekela bibidilu ebi bibi. Kalandriye aka kadi ne mushinga wa bungi be kundi. Bilejilu bia bana betu balume ne bakaji ba pa buloba bujima bidi binkolesha. Mpindieu ndi mumanye ne: tshiena nkayanyi mu mvita eyi ne se: bualu budi ne mushinga menemene nkunanga Yehowa ne kumuenzela mudimu ne muoyo mujima.”—Margaret, Pologne.
“Bushuwa, Dîyi dia Nzambi didi ne bukole menemene! Pangakapeta kalandriye ka 2003, ngakadikanda bua kubenga kudila muadi. Malu a mu nsombelu aa, pamue ne bindidimbi, bidi bikolesha ditabuja bikole.”—Darlene, États-Unis.
“Nsombelu uvua nende bamue ba ku bantu aba kumpala uvua mufuanangane bikole ne umvua nende panyi. Yehowa mmumpeshe bukole bua kulekela malu mabi atu amueneka kaayi kutshimuna. Tuasakidilayi wa bungi bua miyuki milelela eyi ya malu a mu nsombelu.”—William, États-Unis.