‘Semenayi pabuipi ne Nzambi ne yeye neasemene pabuipi nenu’

Kumpala ne panyima: Mêyi a mu Bible akamuambuluisha bua kushintuluka

PATSHIVUA Adrien nsonga, uvua muntu wa biji ne luonji lua bungi. Bumfika munda ebu buvua bumufikisha ku dienza malu a tshikisu tshikole. Uvua unua maluvu ukuatshika, unua makanya ne kabidi uvua muikale ne nsombelu wa buenzavi. Adrien uvua mumanyike bu ntomboji ne wakadisadisha nsalu ivua ileja buntomboji ebu. Adrien udi umvuija malu avuaye wenza mu tshikondo atshi, wamba ne: “Ngakakosesha nsuki mushindu uvua bantomboji benza pa tshibidilu, meme kufitamu budimbua bua kuyimanyika, ne misangu mikuabu mvua mfitamu mâyi a dikala dikunze anyi dia mubidi mukuabu.” Adrien uvua kabidi mutubuishe diulu diende.

Adrien wakaya kusombela mu tshizubuzubu tshikuabu nunku ne bansonga bakuabu bantomboji. Mu tshizubuzubu amu bavua banuinamu maluvu ne diamba. Adrien udi uvuluka wamba ne: “Mvua nditua diamba dia mu nshingi mu mijilu ne buanga bua valium ne tshintu tshionso tshimvua mpeta. Pamvua tshiyi mpeta diamba anyi budimbua bua kununkila, mvua nkoka kasolonyi mu mashinyi a bantu bua kankuate bu diamba anyi maluvu.” Bu muvua Adrien ubundangana bilumbu mu njila, wakabanga kutshingisha bantu ne kuluaye ne tshikisu tshia bungi. Bantu bonso kabavua basue kutuilangana nende to. Pinapu, bikadilu biende bibi ebi bivua bimukokela balunda babi.

Ku kakese ku kakese, Adrien wakamona ne: “balunda” bende bavua basomba nende anu bua kupeta bintu kudiye. Wakamona kabidi ne: “Biji bionso ne tshikisu kabivua bimupeteshe tshintu nansha tshimue to.” Pakadimonaye kayi ne tshia nsongo tshivuaye mupete ne malu onso mamutekeshe mu maboko, Adrien wakakosolokangana ne balunda bende abu. Pakapetaye tshibejibeji tshia Tshibumba tshia Nsentedi muaba mukuabu uvuabu bibaka nzubu, mukenji wa mu Bible uvuamu wakamusankisha ne wakabangisha kulonga Bible ne Bantemu ba Yehowa. Adrien wakitaba ne muoyo mujima dibikila edi dia se: ‘Semenayi pabuipi ne Nzambi ne yeye neasemene pabuipi nenu.’ (Yakobo 4:8) Ke bualu kayi kunyima kua matuku makese Adrien wakamona mushinga wa kutuadija kutumikila mêyi a mu Mifundu Minsantu.

Dimanya dia mu Bible divua dienda divula diakalengeja kuondo ka muoyo ka Adrien ne diakashintulula nsombelu wende. Bakamuambuluisha bua kutuyisha bumfika-munda buende ne bua kudima kudikanda. Ku diambuluisha dia bukole bua Dîyi dia Nzambi, bumuntu bua Adrien buakashintuluka bikole.​—Ebelu 4:12.

Kadi mmunyi mudi Bible mua kuikala ne bukole bua bungi nunku? Dimanya dia mu Bible didi dituambuluisha bua ‘kuvuala [bumuntu] bupiabupia.’ (Efeso 4:24) Bushuwa, bumuntu buetu budi bushintuluka patudi tutumikila dimanya dia mu Bible. Kadi mmushindu kayi udi dimanya edi dishintulula bantu?

Tshia kumpala, Bible udi usunguluja patoke ngikadilu mibi itudi ne bua kulekela. (Nsumuinu 6:16-19) Tshibidi, Mukanda wa Nzambi udi utukankamija bua kuleja ngikadilu milenga mipeta ku diambuluisha dia nyuma muimpe wa Nzambi. Munkatshi muayi mudi ‘dinanga, disanka, ditalala, lutulu, luse, buimpe, [ditabuja], kudipuekesha, kudikanda.’​—Galatia 5:22, 23.

Dijingulula bimpe menemene malu adi Nzambi ulomba diakambuluisha Adrien bua kudikonkonona  ne kumona ngikadilu ivuaye ne bua kudima ne eyi ivuaye ne bua kulekela. (Yakobo 1:22-25) Kadi atshi tshivua anu mbangilu. Pa kumusha dimanya, bivua bikengela kuikala ne muoyo wa kuenza bionso ebi uvua mua kusaka Adrien bua kujinga kushintuluka.

Adrien wakalonga bua se: bumuntu bupiabupia badi babufumba ‘bu mudi tshifuanyikiji tshia Mubufuki.’ (Kolosai 3:10) Wakalua kujingulula ne: bumuntu bua muena Kristo budi ne bua kufuana bumuntu bua Nzambi. (Efeso 5:1) Ku diambuluisha dia dilonga dia Bible, Adrien wakalonga mushindu udi Yehowa wenzela bantu malu ne kumanyaye ngikadilu milenga ya Nzambi bu mudi dinanga, bulenga, buimpe, luse ne buakane. Dimanya edi diakasaka Adrien bua kunanga Nzambi ne bua kudienzejaye bua kuikala muntu udi Yehowa wanyisha.​—Matayo 22:37.

Ndekelu wa bionso ku diambuluisha dia nyuma muimpe wa Nzambi, Adrien wakalekela bumfika-munda. Yeye ne mukajende badi mpindieu bambuluisha bantu bakuabu bua kushintululabu nsombelu yabu ku diambuluisha dia dimanya dia mu Bible. Adrien udi wamba ne: “Ndi mushilangane ne balunda banyi ba bungi ba kale bakadi lelu bamane kufua, bualu meme ndi ne muoyo ne ndi ne nsombelu wa disanka mu dîku.” Udi umona tshijadiki tshilelela tshidi tshileja bukole budi nabu Bible bua kulengeja nsombelu ya buntu.

[Lungenyi lunene lua mu dibeji 25]

“Biji bionso ne tshikisu kabivua bimpeteshe tshintu nansha tshimue to”

[Kazubu mu dibeji 25]

Mêyi a mu Bible adi ambuluisha bantu

Mêyi a mu Bible adi alonda aa mmambuluishe bantu ba bungi bavua bena bumfika-munda ne bena tshikisu bua kuluabu bena ditalala:

‘Nuikale ne bantu bonso ditalala. Kanudisombuedi bana betu banangibue, kadi nushile tshiji tshia Nzambi muaba.’ (Lomo 12:18, 19) Tulekele Nzambi ajadike muntu udiye musue kudisombuela kudiye ne tshikondo tshiadisombuelaye. Nzambi udi mua kudisombuela bualu yeye mmumanye malu onso, ne difutu dionso didi difumina kudiye didi dileja buakane buende bupuangane.

‘Nuikale ne tshiji kadi kanuenji bualu bubi; dîba kadibueledi tshiji tshienu; kanushidi Diabolo muaba.’ (Efeso 4:26, 27) Muntu udi mua kufika munda imue misangu ne kafikila. Biobi bienzeke bua yeye kufika munda nunku, kêna ne bua kushala ‘ne tshiji’ to. Bua tshinyi? Bualu tshiji tshidi mua kumusaka bua kuenza bualu bubi, nunku udi ushila “Diabolo muaba” ne bienzeja too ne bua ne: Yehowa Nzambi kamuanyishi.

‘Lekela kufua tshiji, upidie kuikala ne njiya. Kunyingabadi; bualu ebu budi mua kukuenzeja anu bualu bubi.’ (Musambu 37:8) Dibenga kukanda tshiji didi mua kufikisha ku dienza malu mabi kakuyi didikanda. Muntu yeye mushale mulame tshiji, udi mua kufika ku diamba anyi ku dienza bualu buikala mua kubungamija bantu bonso badi muanda au utangila.