Mu matuku atshilualua kakuakuikala dibunda bilumbu

ELABI meji, buloba kabuyi ne malu mabi! Katuakuikala dijinga ne bampulushi, maloko anyi ne tubadi tudi tutudisha mfranga ya bungi. Nebuikale buloba budi muntu yonso unemeka muoyo ne bintu bia bakuabu. Bualu ebu budiku bumueneka kabuyi mua kuenzeka anyi? Ke muudi mua kuela meji. Kadi dishintuluka edi didi dikemesha ke didi Bible ulaya bushuwa. Bua tshinyi kubenga kukonkonona tshidi Bible umanyisha bua malu mabi adi pa buloba?

Tudi tubala mu mukanda wa Misambu ne: ‘Kunyingabadi bua benji ba malu mabi, kuikadi ne badi benza bienzedi bibi mukawu. Bualu bua nebafubidile tshitupa tshîpi bu mashinde matapa, nebafubidile bu midioko mitekete. Kadi badi ne mitshima mipuekele nebapiane buloba, mioyo yabo neyisanke mu ditalala dikumbane.’ (Musambu 37:1, 2, 11) Bushuwa, kakuena muntu udi mua kupangisha Nzambi bua kukumbajaye mulayi eu ne mikuabu yonso idi ikolesha ku muoyo to.

Nzambi neafile mabenesha onso aa ku diambuluisha dia Bukalenge buende. Mu disambila dia Tatu wetu, Yezu Kristo wakalongesha bayidi bende bua kusambila bua Bukalenge ebu bulue ne bua disua dia Nzambi dienzeke ‘pa buloba bu mudidi dienzeka mu diulu.’ (Matayo 6:9, 10, MMM) Mu katupa kîpi emu pabanga Bukalenge ebu kukokesha, muntu nansha umue pa buloba kakuenza malu mabi bua bupele, dikenga anyi bua kudisankisha to. Pamutu pa nanku, Dîyi dia Nzambi didi diamba ne: “Biakudia [nebivulangane] pa buloba ne pa nsongo ya mikuna.” (Musambu 72:16, MMM) Bulelela, Yehowa Nzambi neapeshe muntu yonso pa buloba bintu bilenga bia bungi. Bualu bua mushinga wa bungi mbua se: bantu nebikale banange Nzambi ne muntu nabu, ne malu mabi kaakunyanga kabidi buloba nansha.