Nkonko ya babadi

Mmunyi mudi bena Kristo ne bua kuangata divuala mpeta ya mabue a mushinga mukole a ngondo uvuabu baledibue?

Imue miaba, bantu batu bamba mudi mabue a mushinga mukole mikale umvuangana ne ngondo udi muntu muledibue. Biasua muena Kristo kuvuala mpeta wa dibue kampanda dia mushinga mukole abu mbualu budi bumutangila anu yeye nkayende. (Galatia 6:5) Kumpala kua kuangata dipangadika adi, kudi malu a mushinga a kukonkonona.

Tshibungu kampanda tshidi tshiamba ne: dibue dia mushinga mukole dia ngondo udibu balele muntu “ndibue dia mushinga mukole didi dipetangana ne dituku divua muntu muledibue, ne batu bela meji ne: divuala dibue edi didi ditutshisha muntu dikasa dimpe anyi dimupesha makanda a mubidi.” (Encyclopaedia Britannica) Tshibungu tshine etshi tshidi tshiamba kabidi ne: “Katshia ku kale bena lubuku lua mitoto bavua bamba muvua amue mabue a mushinga mikale ne bukole bua pa buabu.”

Nangananga mu bikondo bia kale ke muvua bantu ba bungi bamba ne: dibue dia mushinga mukole dia ngondo uvua muntu muledibue divua dipetesha eu uvua udivuala diakalengele. Muena Kristo mulelela udiku ne bua kuitaba bualu ebu anyi? Tòo, bualu mmumanye ne: Yehowa uvua mupishe bantu bavua bamuele nyima ne bavua beyemena ‘nzambi wa Dikasa Dimpe.’​—Yeshaya 65:11.

Mu tshikondo tshia Moyen Âge, batempi ba mbuku bakasunguila ngondo yonso wa mu tshidimu dibue kampanda dia mushinga mukole. Bavua bakankamija bantu bua kuvuala dibue dia mushinga mukole dia ngondo uvuabu babalele, divuabu bela meji ne: divua mua kukuba eu uvua udivuala ku bualu bubi buonso. Kadi bilondeshile tshidi Bible wamba, mbibi bua muena Kristo kulondaye mibelu ya muena lubuku bualu Bible mmubakandike.​—Dutelonome 18:9-12.

Kabiakuikala kabidi bimpe bua muena Kristo kuangataye mpeta kampanda ne mushinga wa pa buawu bualu udi ne dibue dia ngondo uvuabu bamulele to. Bantemu ba Yehowa kabatu basekelela mifikilu ya diledibua nansha. Kabena bayenza bualu misekelelu eyi idi itamba kuimanyina pa muntu ne misekelelu ya diledibua idibu baleje mu Bible nya bamfumu bavua kabayi basadila Nzambi.​—Genese 40:20; Matayo 14:6-10.

Bamue bantu batu bela meji ne: padi muntu uvuala mpeta muikale ne dibue dia mushinga mukole dia ngondo uvuabu bamulele bidi bilengeja bumuntu buende. Kadi bena Kristo balelela kabena bitaba lungenyi elu to, bualu mbamanye ne: badi bavuala “[bumuntu bupiabupia]” ku bukole bua nyuma muimpe wa Nzambi ne padibu batumikila mêyi a mu Bible.​—Efeso 4:22-24.

Bualu bunene menemene mmeji adi asaka muntu bua kuvuala mpeta wa nanku. Kumpala kua muena Kristo kuangata dipangadika dia kuvuala mpeta wa dibue dia ngondo uvuabu bamulele, udi ne bua kuanji kudiebeja ne: ‘Ndi musue kuvuala mpeta eu anu bualu dibue edi didi dinsankisha, nansha mudidi dibue didibu bangata bu dia ngondo uvuabu bandele anyi? Peshi ngenyi ya mashimi idi bantu bakuabu bamba bua dibue edi ke idi mmisake?’

Muena Kristo udi ne bua kukonkonona mutshima wende bua kumanya tshidi tshimusaka bua kuenza bualu ebu. Mukanda wa Nzambi udi wamba ne: ‘Ulame mutshima webe ne dilama dionso, bualu bua munda muawu mudi mupatuka mishimi yonso ya muoyo.’ (Nsumuinu 4:23) Padiye wangata dipangadika didi ditangila mabue a mushinga mukole a ngondo udiye muledibue, muena Kristo yonso udi ne bua kukonkonona tshidi tshimusaka bua kuenza bualu ebu ne bipeta bidibu mua kumukebela yeye ne bantu bakuabu.​—Lomo 14:13.